Dapat Bala Maghimo sing Maayo sa Iban Ukon Likawan Lamang ang Paghimo sing Malain sa Iban?

“ANG indi mo luyag himuon sa imo, indi paghimua sa iban.” Ining sulundan sang husto nga pamatasan ginsiling nga naghalin sa bantog nga Tsino nga manunudlo kag pilosopo nga si Confucius. Sa karon, mga 2,500 ka tuig na ang nakaligad, madamo sa gihapon ang nagapati nga ang isa ka tawo makabig na nga matarong basta wala lang sia nagahalit sa iban.

Sa pagkamatuod, ining prinsipio ni Confucius mapuslanon man. Sa pihak nga bahin, ang Biblia nagapahayag sing tuhay nga aspekto sang pamatasan kag pagpakig-angot. Luwas sa ginakabig sang iban nga sala bangod sa paghimo sang isa ka butang, subong sang paghimo sing malain batok sa isigkatawo, ang Biblia nagapatuhoy sa sala bangod sa indi paghimo sang isa ka butang. Ang Cristianong disipulo nga si Santiago nagsulat: “Ang bisan sin-o nga makahibalo sang maayo buhaton kag wala nagabuhat sini, sa iya ini sala.” (Santiago 4:17) Sa baylo nga basta tudluan lamang ang mga Cristiano nga indi maghimo sang malain sa iban, si Jesucristo naghatag sining laygay: “Ang tanan nga butang nga buot ninyo nga himuon sang mga tawo sa inyo, himua man ninyo sa ila.”​—Mateo 7:​12.

Orihinal nga gintuyo sang Dios nga pakig-angutan sang mga tawo ang isa kag isa sa pagpakig-angot nga luyag nila himuon man sa ila. Naghatag sia sing pinakamaayo nga halimbawa kon paano ipabutyag ang kabalaka sa iban sa paagi sang pagtuga niya sa mga tawo: “Ang Dios nagtuga sang tawo sa iya kaugalingon nga dagway, sa dagway sang Dios gintuga niya sia; lalaki kag babayi gintuga niya sila.” (Genesis 1:​27) Nagakahulugan ini nga mahigugmaon nga ginbutangan sang Dios ang mga tawo sing konsiensia, nga kon nahanas sing maayo, makagiya ini sa ila sa pagtratar sa iban sa paagi nga luyag man nila himuon sang iban sa ila.

Madamo sa karon ang walay paglaum kag walay untat nga nagaantos bangod sa mga buhat sang walay pasunaid kag maiyaiyahon nga mga tawo. Maathag nga ang kinahanglanon amo ang indi lamang paghimo sing malain kag makahalalit sa iban kundi, sa baylo, paghimo sing maayo kag pagbulig sa ila. Amo sini ang rason kon ngaa nagboluntaryo ang mga Saksi ni Jehova nga buligan ang iban nga makatuon sing dalayawon nga paglaum nga masapwan sa Pulong sang Dios. Kon nagaduaw sila sa ila mga isigkatawo dala ang maayong balita gikan sa Biblia, ginahimo nila ini sa espiritu sang gugma, nagahimo sa iban sang butang nga luyag man nila himuon sa ila.