Dapat Gid Bala nga Miembro Ka sang Isa ka Relihion?

‘INDI na kinahanglan nga may relihion pa ako ukon pirme ako magsimba agod magtuo sa Dios!’ Amo sini ang ginabatyag sang madamo nga tawo tuhoy sa pagbuylog sa isa ka relihion. Ang matuod, ang iban nagasiling nga mas nagasuod sila sa Dios kon nagaobserbar sila sa kinaugali sa gua sangsa kon nagatambong sila sa simbahan. Madamo karon ang nagapati nga ang pagpakig-upod sa isa ka relihion indi na kinahanglanon sa pagtuo sa Dios.

Apang, tuhay naman ang ginabatyag sang iban. Para sa ila, kinahanglanon, kag importante pa gani, ang pagbuylog sa isa ka relihion kag ang pagkadto sa simbahan agod kahamut-an sang Dios ang isa. Gani importante gid sa tanan ang mangin miembro sang isa ka relihion, indi lamang para sa mga nagatuon sa mga relihion agod makakuha sing estadistika kag iban pa nga impormasyon. Ano man ang kahimtangan, bangod nadalahig ang aton kaangtanan sa Dios, indi bala makatarunganon nga mahibaluan ang pagtamod sang Dios sa sini? Kon amo, ano ang matun-an naton gikan sa iya Pulong, ang Biblia, tuhoy sa sini nga topiko?

Kon Paano Nakig-angot ang Dios sa Katawhan sang Una

Sang mga 4,400 ka tuig na ang nakaligad, nag-anaw sing malaglagon sa bug-os nga duta. Indi madali malipatan ini nga hitabo, kag nalakip sa maragtas sang mga tawo sa bug-os nga kalibutan ang mga sugilanon tuhoy sini. Bisan pa may kinatuhayan sa mga detalye, madamo ang magkaanggid sa sini nga mga sugilanon, lakip sa kamatuoran nga pila lamang ka tawo kag sapat ang nakalampuwas.

Ang mga nakalampuwas bala sa Anaw nangin mapalaron lamang kag natabuan nga naluwas? Ginapakita sang kasaysayan sang Biblia nga indi amo sini ang natabo. Talalupangdon nga wala ginpahibalo sang Dios ang tagsa ka indibiduwal tuhoy sa pag-abot sang Anaw. Sa baylo, ginsugiran niya si Noe, nga amo ang nagpaandam sa mga tawo nga nagakabuhi sadto tuhoy sa nagapakari nga Anaw.—Genesis 6:13-16; 2 Pedro 2:5.

 Ang kaluwasan nagdepende sa pagbuylog sa sining nahiusa nga grupo kag sa kahanda nga tumanon ang sugo sang Dios kay Noe. Bisan ang mga sapat sa arka naluwas bangod upod sila sa sini nga grupo. Ginhatagan sing espesipiko nga mga instruksion si Noe agod mahuptan nga buhi ang mga sapat.—Genesis 6:17–7:8.

Pagligad sang ginatos ka tuig, ang mga kaliwat ni Noe sa iya anak nga si Sem nangin mga ulipon sa Egipto. Apang, tuyo sang Dios nga hilwayon sila kag dalhon sa duta nga ginsaad niya sa ila katigulangan nga si Abraham. Sa liwat, wala ini ginpahibalo sa tagsa ka indibiduwal kundi una nga ginpahibalo sa ginpili nga mangin ila mga lider—si Moises kag ang iya utod nga si Aaron. (Exodo 3:7-10; 4:27-31) Sa tapos mahilway subong isa ka grupo gikan sa Egipto ang mga ulipon anay, ginhatag sa ila ang Kasuguan sang Dios sa Bukid Sinai kag ginhimo sila nga pungsod sang Israel.—Exodo 19:1-6.

Naluwas lamang ang indibiduwal nga mga Israelinhon bangod nagpakig-upod sila sa isa ka grupo nga gintukod sang Dios kag ginsunod nila ang panuytoy sang gintangdo nga mga lider sa sini nga grupo. Gintugutan pa gani ang indibiduwal nga mga Egiptohanon nga makig-upod sa sini nga grupo nga maathag nga ginkahamut-an sang Dios. Sang magbiya ang mga Israelinhon sa Egipto, nag-upod sa ila ini nga mga indibiduwal, gani mahimo sila makatigayon sang pagpakamaayo sang Dios.—Exodo 12:37, 38.

Nian, sang unang siglo, ginsugdan ni Jesus ang iya pagbantala kag gintipon ang katawhan subong iya mga disipulo. Ginpakig-angutan niya sila subong isa ka grupo, bisan pa gintatap man niya ang mga indibiduwal suno sa ila mga kinahanglanon. Sa 11 ka matutom nga mga apostoles, si Jesus nagsiling: “Kamo amo ang mga nakapadayon kaupod nakon sa mga pagsulay sa akon; nagatangdo ako sa inyo sing ginharian, subong nga ang akon Amay nagtangdo sing ginharian sa akon.” (Lucas 22:28, 29) Sang ulihi, ginpasagahay ang balaan nga espiritu sang Dios sa mga disipulo sang nagtipon sila subong isa ka grupo.—Binuhatan 2:1-4.

Maathag nga ginapakita sini nga mga halimbawa nga sang una pirme nagapakig-angot ang Dios sa iya katawhan subong isa ka organisado nga grupo. Ang matuod, gingamit sang Dios ang pila ka indibiduwal nga ginpakig-angutan niya sing personal—sanday Noe, Moises, Jesus, kag iban pa—sa pagkomunikar sa isa ka nahiusa nga grupo. Wala sing rason nga magpati nga tuhay na ang pagpakig-angot sang Dios sa iya mga alagad karon. Siempre pa, bangod sini nag-utwas ang isa pa ka pamangkot: Bastante na bala ang pagpakig-upod sa bisan ano lang nga relihion? Binagbinagon naton ining importante nga pamangkot sa masunod nga artikulo.

[Retrato sa pahina 4]

Madugay na nga nagapakig-angot ang Dios sa iya katawhan subong isa ka organisado nga grupo