Ang Labing Bilidhon nga Palanublion

SA KASISIDMON sang iya kabuhi, ang tigulang nga si apostol Juan nagsulat: “Wala na ako sing daku pa nga rason sa pagpasalamat sangsa sining mga butang, sa pagpamati nga ang akon mga anak padayon nga nagalakat sa kamatuoran.”​—3 Juan 4, NW.

Ginapatuhuyan sang matutom nga apostol ang iya espirituwal nga mga anak. Apang, madamo nga mga ginikanan ang nagabatyag kaangay sa ginbatyag sang apostol. Nagpanikasog sila nga padakuon ang ila mga anak “sa disiplina kag sa pagtudlo sang Ginuo,” kag nalipay sila karon nga makita ang ila nagdalagku na nga mga anak nga “nagalakat sa kamatuoran.” (Efeso 6:4) Sa katunayan, kon ginatudluan mo ang imo mga anak sang dalanon padulong sa kabuhi nga dayon, ginahatagan mo sila sang labing bilidhon nga palanublion. Amo sini bangod ang diosnon nga debosyon, nga nagalakip sang pagkabuhi suno sa luyag ni Jehova nga himuon sang mga Cristiano, “may saad sang kabuhi karon kag sa palaabuton.”​—1 Timoteo 4:8.

Si Jehova, ang himpit nga Amay, nagapabalor gid sang diosnon nga mga ginikanan nga nagapanikasog sing lakas nga tudluan ang ila mga anak sang espirituwal nga mga butang. Kon mamati ang mga anak, malipay gid sila sa pagbuylog sa ila mga ginikanan sa matuod nga pagsimba. Kon maghamtong na ini nga mga anak, makatipon sila sing makalilipay nga mga handumanan tuhoy sini nga mga eksperiensia. Ang iban malipayon nga naghinumdom sang una nga pagpakigbahin nila sa Teokratikong Eskwelahan Para sa Ministeryo. * Ukon ayhan nadumduman nila ang tion sang una nga nagbasa sila sing isa ka teksto sa Biblia sa pamalaybalay nga ministeryo upod sa isa sa ila mga ginikanan. Paano nila malipatan ang pagpamati nila sa pagbasa sang ila mga ginikanan sa Ang Akon Libro Sang mga Sugilanon sa Biblia ukon sa Pagpamati sa Dakung Manunudlu? * Ginhinumdom ni Gabriel ang butang nga naluyagan gid niya: “Sang apat ka tuig pa lang ako, ginakantahan ako sang akon iloy kada adlaw samtang nagadigamo sia. Saulado ko pa ang isa ka ambahanon sa Ginharian. Sang ulihi, nagbulig ini sa akon nga mahangpan ang importansia sang pag-alagad kay Jehova.” Ayhan saulado mo man ang matahom nga ambahanon nga ginapatuhuyan ni Gabriel. Ini amo ang numero 157 sa songbook nga Mag-amba Sing mga Pagdayaw kay Jehova, kag natig-uluhan ini sing “Simbahon si Jehova sa Pagkalamharon.”

Ang ambahanon nagaumpisa: “Ang mga bata sa Dios nagdayaw;/Kay Jesus sila naghilinugyaw.” Matuod, may mga kabataan nga may pribilehiyo  anay nga makaupod si Jesus, kag mahimo nga ginpahalipay nila sia bangod sang ila makaparepresko kag bunayag nga paagi. Gingamit pa gani ni Jesus ang kahanda sang magagmay nga mga bata nga tudluan subong halimbawa nga dapat ilugon sang iya mga sumulunod. (Mateo 18:3, 4) Gani ang mga bata may yara nagakaigo nga duog sa pagsimba kay Jehova. Sa katunayan, ang liriko sang ambahanon nagapadayon: “Bisan bata pa Dios mahimaya.”

Paagi sa ila huwaran nga paggawi​—sa puluy-an, sa eskwelahan, kag sa iban pa nga mga duog​—madamo nga kabataan ang naghatag sing kadungganan sa Dios kag sa ila pamilya. Daw ano gid nga pagpakamaayo para sa ila nga may yara sila “mga ginikanan nga Cristiano.” (Deuteronomio 6:7) Ginahimo sang diosnon nga mga ginikanan ang ginasiling sang Dios, kay subong isa ka mahigugmaon nga Amay, ginatudluan niya ang iya mga tinuga sa paglakat sa banas nga dapat nila laktan. Kag daw ano gid nga pagpakamaayo ang nabaton nila! Samtang ginatudluan sang mga ginikanan ang mga kabataan sa ila pamilya, nalipay gid sila nga ang ila mga kabataan nagasunod sa ila! (Isaias 48:17, 18) Si Angélica, nga nagaalagad karon sa sanga talatapan sang mga Saksi ni Jehova sa Mexico, nagsiling: “Pirme nagpanikasog ang akon mga ginikanan nga sundon ang mga prinsipio sang Biblia. Amo sini kon ngaa masadya gid ang akon pagkabata. Malipayon ako.”

Ining mga Cristiano nagaugyon nga mapuslanon gid nga amligan ang imo espirituwal nga palanublion. Ayhan isa ikaw ka pamatan-on nga ginpadaku sa isa ka pamilya nga may matuod nga Cristianong mga prinsipio. Kon amo, ini man nga ambahanon nagalaygay sa imo: “Mga lamharon, mangin matinlo.” Magaabot ang tion nga magahimo ka sang imo kaugalingon nga mga desisyon, gani karon “Dios saligan bisan pa lanubo./Likawan ninyo nga mangin bantog.”

Kon nagsayop ka nga gin-una mo sa imo kabuhi ang mangin popular sa iban, ang tanan nga paghanas nga nabaton mo mahimo mangin walay pulos kag mahimo mo madula ang imo mga paglaum sa palaabuton. Mahimo mo madula ang imo pagkamabinantayon kon nagahandum ka nga mangin popular. Nagresulta ini sa pagpakig-upod sang iban sa mga tawo nga, bisan pa daw mabuot, wala sing interes sa Cristianong mga talaksan. Ginpakita ini sa halimbawa ni Tara, ang bida nga ginlaragway sa video nga Young People Ask​—How Can I Make Real Friends? Kaangay ni Tara, marealisar sang bisan sin-o nga Cristianong pamatan-on nga nagapakig-upod sa mga wala sing apresasyon sa matuod nga pagsimba nga sa ulihi ang “malain nga kaupod” nagadunot sang mapuslanon nga mga batasan. Tinuig ang kinahanglan agod mapalambo ang maayo nga mga batasan, apang madali lang ini maglain.

Matuod, ang pagkabuhi nga may diosnon nga kahadlok indi mahapos. Apang, subong ginasiling pa sang ambahanon, “dumduma ang inyo  Manunuga,/Bisan lamharon pa alagdon sia,” kag sa sining paagi matukod mo ang isa ka mabakod nga pundasyon para sa matuod nga kadalag-an. Kag “pagdaku n’yo ang kalipay bug-os.” Labi mo pa nga maapresyar nga sa idalom sang mahigugmaon nga pag-atipan ni Jehova, wala sing makapugong sa imo sa paghimo kon ano ang husto sa iya itululok. Amo ina ang paagi agod mangin isa ikaw ka hamtong kag diosnon nga adulto. Dugang pa, ang maalamon nga paghimulos sa Cristianong paghanas nagahatag sa imo sing kahigayunan nga “mapahamut-an ang Dios.” May daku pa bala nga pribilehiyo nga matigayon ang tawo?​—Hulubaton 27:11.

Busa, mga pamatan-on, dumduma pirme kon daw ano ka bilidhon ang paghanas gikan kay Jehova kag gikan sa inyo Cristianong mga ginikanan. Kabay nga ang ila daku nga gugma sa inyo magapahulag sa inyo nga himuon ang kalahamut-an sa itululok ni Jehova. Kaangay ni Jesucristo kag sang matutom nga pamatan-on nga si Timoteo, mapahalipay ninyo ang inyo langitnon nga Amay kag ang inyo dutan-on nga mga ginikanan. Kag kon kamo mangin ginikanan man, magaugyon kamo kay Angélica, nga ginsambit kaina, nga nagsiling: “Kon magbata man ako sa ulihi, panikasugan ko gid nga ipatudok sa iya tagipusuon ang gugma kay Jehova kutob sa pagkalapsag, kag tugutan ini sa pag-ubay sa iya.” Sa pagkamatuod, ang matadlong nga banas nga nagapadulong sa kabuhi nga dayon amo ang labing bilidhon nga palanublion!

[Mga nota]