May Epekto Gid Bala ang Imo mga Pangamuyo?

SIN-O sa aton ang wala makaatubang sing isa ka serioso nga kahimtangan nga indi naton kontrolado? Ginapakita sang Biblia nga nahibaluan ni apostol Pablo nga ang pangamuyo makaapektar sa mangin resulta sini nga mga kahimtangan.

Sang di-makatarunganon nga ginbilanggo si Pablo sa Roma, nagpangabay sia sa iya mga masigkatumuluo nga mangamuyo para sa iya, nga nagadugang: “Nagalaygay ako sa inyo sing labi pa gid sa paghimo sini agod nga mapabalik ako sa inyo sa labing madali.” (Hebreo 13:18, 19) Sa isa pa ka okasyon, ginpabutyag ni Pablo ang iya pagsalig nga ang Dios magasabat sa mga pangamuyo para sa iya maaga nga pagkahilway. (Filemon 22) Wala madugay ginhilway si Pablo sa bilangguan kag ginpadayon niya liwat ang iya pagmisyonero.

Apang mabag-o gid bala sang pangamuyo ang mangin resulta sang imo mga problema? Ayhan. Apang, dumduma, ang pangamuyo indi lamang isa ka pormal nga relihioso nga buhat. Isa ini ka aktual nga komunikasyon sa aton mahigugmaon kag gamhanan nga Amay sa mga langit. Indi kita dapat mangalag-ag nga mangin espesipiko sa aton mga pangamuyo, apang hulata sing mapailubon kag tan-awa kon paano si Jehova magasabat.

Ang Dios indi direkta nga magasabat sa tagsa ka pangamuyo, ukon pirme sia magasabat sa paagi ukon sa tion nga ginapaabot naton. Halimbawa, si Pablo, sulitsulit nga nangamuyo nahanungod sa iya “ungon sa unod.” Wala pagkuhaa sang Dios ang problema ni Pablo, kon ano man ini, apang ginlugpayan niya si Pablo sa makapalig-on nga mga pulong: “Ang akon bugay tuman sa imo, kay ang akon gahom ginahimpit sa kaluyahon.”—2 Corinto 12:​7-9.

Makasalig man kita nga bisan pa wala ginakuha sang Dios ang isa ka partikular nga problema, sia “magahatag man sing lulutsan, agod nga makasarang [kita] sa pagbatas.” (1 Corinto 10:13) Sa dili madugay, dulaon sang Dios ang tanan nga pag-antos sang mga tawo. Samtang wala pa ini, ang pagliso sa ‘Manugpamati sang pangamuyo’ may daku nga epekto.—Salmo 65:2.