Sulat Para kay Noe

“MAHAL nga Noe, pila ka beses ko na ikaw nga nabasa sa Biblia kag kon paano mo gintukod ang isa ka arka nga paagi sini naluwas kamo sang imo pamilya sang Anaw.”

Amo ini ang umpisa sang sulat sang 15-anyos nga si Minnamaria nga iya ginpasakop sa isa ka paindis-indis sa pagsulat para sa mga estudyante nga nagapangidaron sing 14 tubtob 21 anyos. Ini nga paindis-indis gin-isponsoran sang serbisyo sa koreo sang Finland, sang Federation for Finnish Mother Tongue Teachers, kag sang Finnish Literature Society. Ang mga pumalasakop dapat magsulat sing isa ka sulat base sa isa ka libro. Mahimo nila sulatan ang awtor sang libro ukon ang isa ka karakter sini. Napilian sang mga manunudlo ang kapin sa 1,400 ka sulat sang ila mga estudyante kag ginpadala ini sa mga hurado sang paindis-indis. Nian nagpili ang mga hurado sing isa ka sulat para sa una nga premyo, napulo para sa ikaduha nga premyo, kag napulo para sa ikatlo nga premyo. Nalipay si Minnamaria nga nalakip ang iya sulat sa ikatlo nga premyo.

Ngaa si Noe, nga nagkabuhi sing mga 5,000 ka tuig sang una, ang ginsulatan sang tin-edyer nga estudyante nga si Minnamaria? Sia nagsiling: “Ang Biblia ang una ko nga nahunahuna. Pamilyar gid ako sa mga karakter sa Biblia. Madamo na ako sing nabasa tuhoy sa ila amo nga daw buhi gid sila para sa akon. Si Noe ang akon ginpili bangod ang iya kabuhi makawiwili kag tuhay sa akon.”

Ang sulat ni Minnamaria kay Noe naghingapos sa sini nga mga pulong: “Isa gihapon ikaw ka halimbawa sang pagtuo kag pagkamatinumanon. Ang imo kabuhi nagapalig-on sa tanan nga nagabasa sing Biblia nga magpanghikot suno sa ila pagtuo.”

Ini nga sulat sang isa ka lamharon nga nagabasa sing Biblia isa ka maayo nga halimbawa kon paano ang Biblia nangin “buhi [gid] kag gamhanan” sa mga tawo, bata man ukon tigulang.—Hebreo 4:12.