“Agod Ipakilala ang Ngalan ni Jehova”

SA BUG-OS nga kalibutan, ang mga magasin nga Ang Lalantawan kag Magmata! ginaapresyar tungod sa espirituwal nga kaundan kag makatudlo nga impormasyon sini. Ginapakita ini sa sulat sang isa ka bumalasa sa Pransia nga nagsiling:

“Isa ako ka lin-ay nga tumandok sang Aprika, kag manubo sing naeskwelahan. Kasan-o lang, nasugdan ko nga basahon ang inyo mga magasin. Naganyat ako sa mga topiko sini kag nasapwan ko ang kabilihanan sang pagbasa. Paagi sa inyo mga magasin, napauswag ko ang akon bokabolaryo kag makahimo na ako sing isa ka sulat nga diutay lang ang sayop.

“Nagdayaw gid ako nga makabalhag kamo sing mga artikulo may kaangtanan sa mga tawo, sa duta, kag sa Manunuga. Ini nga mga artikulo mahapos hangpon kag nagahimo sa isa ka tawo nga mangin maukod nga bumalasa. Wala na sing iban pa ang may ikasarang sa pagtudlo sing dungan sa tanan nga sahi sang tawo.

“Nagdayaw man ako sang mahibaluan ko nga ini tanan ginahimo indi bangod sa kuarta kundi agod ipakilala ang ngalan ni Jehova. Nahibaluan ko nga nahamuot sia sa inyo, kag nagapasalamat ako sa inyo. Palihug padayuna ninyo ang pagkuha sing kusog gikan sa Manunuga agod makatudlo.”

Ang mga Saksi ni Jehova nagapanghikot karon sa pagtudlo sang Biblia sa 235 ka kadutaan. Ang Lalantawan ginabalhag sa 148 ka lenguahe kag ang Magmata! naman sa 87. Ini nga mga balasahon wala ginaimprinta agod dayawon ang bisan sin-o nga tawo. Ang napasad sa Biblia nga laygay kag sibu sa tion nga impormasyon nga masapwan sa sini gindesinyo agod padunggan ang Manunuga, nga nagasiling: “Ako, si Jehova, . . . ang Isa nga nagatudlo sa imo agod makabenepisyo ka.” (Isaias 48:17) Kabay nga makabenepisyo ka paagi sa regular nga pagbasa sang Balaan nga Kasulatan upod sining mga bulig sa pagtuon sa Biblia.