Ang Gobierno sang Ginharian sang Dios—Matuod Karon

“Paano maghilisugot ang madamo nga pungsod, nga may nanuhaytuhay nga kultura kag pag-uswag? Ginasiling nga isa lamang ka pagsalakay gikan sa iban nga planeta ang makapahiusa sa tawhanon nga rasa.”—⁠The Age, pamantalaan sa Australia.

PAGSALAKAY gikan sa iban nga planeta? Mapahiusa man sini ang tanan nga pungsod sa duta ukon indi, sa pagkamatuod ang Biblia nagatagna nga may isa ka manug-abot nga krisis nga magapahiusa sang tanan nga pungsod sa kalibutan. Sa pagkamatuod, ini nga krisis pahanabuon sang puersa gikan sa gua sining planeta.

Matagnaon nga ginpatuhuyan ni Hari David sang dumaan nga Israel ini nga hitabo sa kalibutan. Sa idalom sang pag-inspirar sang Dios nagsulat sia: “Ang mga hari sang duta nagatindog kag ang mataas nga mga opisyales nagahilisapol sing tingob batok kay Jehova kag sa iya hinaplas, nga nagasiling: ‘Bugrason ta ang ila mga gapos kag ipilak gikan sa aton ang ila mga pisi!’” (Salmo 2:​2, 3; Binuhatan 4:​25, 26) Talupangda nga ang mga manuggahom sang kalibutan magahilisapol sing tingob batok kay Jehova, ang Manunuga sang uniberso, kag sa iya hinaplas, ukon sa iya gintangdo nga Hari nga si Jesucristo. Paano ina mahanabo?

Suno sa kronolohiya sang Biblia kag sa natuman nga mga tagna, ang Ginharian sang Dios natukod  sa langit sang 1914 kag si Jesucristo ang Hari.⁠ * Sadto nga tion ang mga pungsod sa kalibutan isa lamang ang ginahunahuna. Sa baylo nga magpasakop sa pagkasoberano sang bag-ong bun-ag nga Ginharian sang Dios, nag-ilinaway sila sa paghingamo sing gahom​—⁠ang Dakung Inaway, ukon Bug-os Kalibutan nga Inaway I.

Paano ginatamod ni Jehova nga Dios ining reaksion sang tawhanon nga mga manuggahom? “Ang Isa nga nagalingkod sa kalangitan magakadlaw; si Jehova magauligyat sa ila. Sa sina nga tion magapamulong sia sa ila sa iya kasingkal kag gamuhon niya sila sa iya tama nga kaakig.” Nian si Jehova magasiling sa iya Anak, ang hinaplas nga Hari sang Ginharian: “Mangayo ka sa akon, agod nga ihatag ko sa imo ang mga pungsod subong palanublion mo kag ang kaukbungan sang duta subong imo kaugalingon nga pagkabutang. Balion mo sila paagi sa setro nga salsalon, dugmukon mo sila kaangay sang suludlan sang maninihon.”​​—⁠Salmo 2:​4, 5, 8, 9.

Ining katapusan nga pagdugmok sa nagasumpunganay nga mga pungsod paagi sa setro nga salsalon mahanabo sa Armagedon, ukon Har⁠–​​Magedon. Ang pinakaulihi nga tulun-an sang Biblia, ang Bugna, nagalaragway sining talipuspusan nga hitabo subong ang “inaway sang daku nga adlaw sang Dios nga Labing Gamhanan,” diin ang “mga hari sang bug-os napuy-an nga duta” ginatipon sing tingob. (Bugna 16:​14, 16) Sa idalom sang impluwensia sang mga demonyo, ang mga pungsod sang duta magahiusa gid man sa ulihi sa isa ka tulumuron—ang makig-away batok sa Dios nga Labing Gamhanan.

Ang tion nga magahilisapol ang mga tawo agod makig-away batok sa pagkasoberano sang Dios madasig nga nagahilapit. Apang, ang ila “paghiusa” indi makahatag sing personal nga benepisyo sa ila. Sa baylo, ang ila buhat mangin pamuno sang madugay na ginahulat nga paghidait para sa tanan nga katawhan. Paano? Sa sining katapusan nga inaway, “dugmukon [sang Ginharian sang Dios] kag papason ini tanan nga ginharian [sang kalibutan], kag magapadayon ini tubtob sa walay katubtuban.” (Daniel 2:44) Ang Ginharian sang Dios, indi ang bisan ano nga organisasyon sang tawo, ang mangin gobierno nga magatuman sang handum sang katawhan para sa bug-os kalibutan nga paghidait.

Ang Pangulo nga Administrador sang Gobierno sang Ginharian

Amo ini ang Ginharian nga ginapangamuyo sang sinsero nga mga tawo, nga nagasiling: “Pakariha ang imo ginharian. Kabay nga himuon ang imo kabubut-on, kon paano sa langit, subong man sa duta.” (Mateo 6:10) Sa baylo nga isa ka di-mahangpan nga kahimtangan sang tagipusuon, ang Ginharian sang Dios isa ka matuod nga gobierno nga nakahimo na sing dalayawon nga mga binuhatan sugod sang inagurasyon sini sa langit sang 1914. Binagbinagon naton ang pila ka talalupangdon nga mga rason nga nagapakita nga ang Ginharian sang Dios isa ka katunayan nga nagapanghikot sing bug-os karon.

Una sa tanan, may gamhanan kag epektibo ini nga ehekutibo nga sanga nga ginapangunahan sang ginpalingkod sa trono nga Hari, nga si Jesucristo. Sang 33 C.⁠E., ginhimo ni Jehova nga Dios si Jesucristo nga Ulo sang Cristianong kongregasyon. (Efeso 1:22) Sugod sadto, si Jesus nagpanghikot subong ulo, sa amo nagapasundayag sang iya ikasarang sa pagdumala. Halimbawa, sang natabo ang daku nga tiggulutom sa Judea sang unang siglo, gilayon nga naghulag ang Cristianong kongregasyon agod buligan ang mga katapo sini. Gin-organisar ang hilikuton sa pagbulig, kag ginpadala sanday Bernabe kag Saulo gikan sa Antioquia para sa pagbulig.​​—⁠Binuhatan 11:27-​30.

 Madamo pa ang mapaabot naton kay Jesucristo karon nga ang gobierno sang Ginharian natukod na kag nagapanghikot. Kon may mga kalamidad​—⁠mga linog, mga tiggulutom, mga baha, mga bagyo, mga unos, ukon mga paglupok sang bulkan⁠—ang Cristianong kongregasyon sang mga Saksi ni Jehova maabtik nga nagabulig sa mga masigkatumuluo kag sa iban pa nga yara sa apektado nga mga duog. Halimbawa, sang natabo ang makahalapay nga mga linog sa El Salvador sang Enero kag Pebrero 2001, gin-organisar ang mga hilikuton sa pagbulig sa tanan nga bahin sang pungsod, kag ang mga grupo sang mga Saksi ni Jehova gikan sa Canada, Guatemala, kag Estados Unidos nag-aman sing bulig. Tatlo ka duog sang pagsimba nila subong man kapin sa 500 ka puluy-an ang napatindog liwat sa gilayon.

Mga Sakop sang Gobierno sang Ginharian sang Dios

Sugod sang gintukod ini sang 1914, ang langitnon nga Ginharian sang Dios padayon nga nagatipon kag nagaorganisar sang mga sakop sini gikan sa mga katawhan sa bug-os nga kalibutan. Katumanan ini sang isa ka talalupangdon nga tagna nga ginrekord ni Isaias: “Mahanabo gid sa ulihi nga bahin sang mga adlaw nga ang bukid sang balay ni Jehova [ang iya nabayaw nga matuod nga pagsimba] tukuron sing malig-on nga mataas pa sa putukputukan sang kabukiran, . . . kag magadugok sa sini ang tanan nga pungsod.” Ginapakita sang tagna nga “madamo nga tawo” ang magataklad sa sina nga bukid kag magabaton sang mga instruksion kag mga kasuguan ni Jehova.​—⁠Isaias 2:​2, 3.

Ini nga hilikuton nagresulta sa labing talalupangdon nga hublag sa modernong tion​—⁠isa ka internasyonal nga paghiliutod sang kapin sa 6,000,000 ka Cristiano sa kapin sa 230 ka kadutaan. Sa mga internasyonal nga kombension sang mga Saksi ni Jehova, masami nga nagakatingala ang mga tagpanilag kon makita nila ang gugma, paghidait, kag paghiusa sa tunga sang daku nga kadam-an sang mga tawo, nga nagalandas sang mga pader sang nasyonalismo, kultura, kag hambal. (Binuhatan 10:​34, 35) Indi ka bala magaugyon nga agod matingob sang isa ka gobierno ang ginatos ka etniko nga grupo nga may paghidait kag paghiusa, dapat nga epektibo ini kag mabakod​—⁠kag matuod?

Ang Ginharian sang Dios kag Edukasyon

Ang tagsa ka gobierno may mga talaksan nga ginapatuman sa mga banwahanon sini, kag ang tanan nga luyag magkabuhi sa idalom sini nga gobierno dapat magtuman sa sining mga talaksan. Sing kaanggid, ang Ginharian sang Dios may mga talaksan man nga dapat tumanon sang tanan nga makalipikar subong sakop sini. Apang, isa ka daku katama nga hilikuton ang paghimo sa madamo nga tawo gikan sa nanuhaytuhay nga ginhalinan nga magbaton kag magtuman sang isa lang ka talaksan. Yari, nian, ang isa pa ka rason nga nagapamatuod nga ang Ginharian sang Dios matuod​—⁠ang epektibo nga programa sini sa edukasyon nga nagalab-ot kag nagapabag-o indi lamang sang hunahuna kundi pati man sang tagipusuon.

Paano ginahimo sang gobierno sang Ginharian ining mabudlay nga hilikuton? Paagi sa apostoliko nga pamaagi sang pagbantala “sa pamalaybalay” kag pagtudlo sang Pulong sang Dios sa kada indibiduwal. (Binuhatan 5:42; 20:20) Daw ano ka epektibo ini nga sahi sang pagtudlo? Si Jacques  Johnson, nga isa ka Katoliko nga pari, nagsulat sa isa ka semanal nga pamantalaan sa Canada tuhoy sa iya mga panikasog nga palas-ayon ang isa ka babayi sa pagtuon upod sa mga Saksi ni Jehova. “Daw naligban ako kag narealisar ko nga yara ako sa isa ka inaway nga wala ako sing padaug,” siling niya. “Narealisar ko nga sa sulod sang pila ka bulan ining JW [Saksi ni Jehova] nga mga babayi nakapalambo sing suod nga kaangtanan sa sining lamharon nga iloy nga nagapakuribong sa balay. Nangin suod sila sa iya paagi sa pagbulig sa iya, pagpakig-abyan sa iya, pagtukod sing madalom nga kaangtanan. Wala magdugay nangin aktibo sia nga katapo sang ila relihion kag wala ako sing mahimo agod punggan ini.” Subong nga ang tagipusuon sining anay Katoliko napahulag sang mensahe sang Biblia nga gintudlo sang mga Saksi ni Jehova kag sang ila Cristianong paggawi, natandog man ang tagipusuon sang minilyon ka tawo sa bug-os nga kalibutan.

Ini nga porma sang edukasyon​—⁠ang edukasyon sang Ginharian​—⁠nasentro sa Biblia, ginabayaw ang mga prinsipio sini kag ang mga talaksan sini sa moral. Ginatudluan sini ang mga tawo nga higugmaon kag padunggan ang kada isa walay sapayan sang ila ginhalinan. (Juan 13:​34, 35) Ginabuligan man sini ang mga tawo nga magsunod sa laygay: “Indi na kamo magpadihon suno sa sining sistema sang mga butang, kundi magbalhin kamo paagi sa pagbag-o sang inyo painuino, agod nga mapamatud-an ninyo sa inyo kaugalingon ang maayo kag kalahamut-an kag himpit nga kabubut-on sang Dios.” (Roma 12:2) Paagi sa pagtalikod sa ila anay paagi sang pagkabuhi kag malipayon nga pagsunod sa mga kasuguan kag mga prinsipio sang gobierno sang Ginharian, nasapwan sang minilyon ang paghidait kag kalipay karon kag masanag nga paglaum sa palaabuton.​​—⁠Colosas 3:​9-​11.

Ang isa ka talalupangdon nga bulig agod matigayon ining bug-os kalibutan nga paghiusa amo ining magasin, Ang Lalantawan. Paagi sa organisado nga pamaagi sa pagbadbad kag mga kasangkapan sa pagbalhag sa madamo nga lenguahe, ang panguna nga mga artikulo sa Ang Lalantawan ginabalhag sing dulungan sa 135 ka lenguahe, kag dungan ini nga matun-an sang kapin sa 95 porsiento sang mga bumalasa sini sa bug-os kalibutan sa ila kaugalingon nga lenguahe.

Ang isa ka manunulat nga Mormon naghimo sing listahan sang labing tumalagsahon nga mga kadalag-an sa pagmisyonero magluwas sa iya relihion. Ginlista niya Ang Lalantawan kag Magmata!, nga ginbalhag sang mga Saksi ni Jehova, subong ang pinakamaayo nga magasin para sa pag-ebanghelyo kag nagsiling: “Wala gid sing makasumbong sa Lalantawan ukon Magmata! nga ginapalig-on sini ang di-pagsapak​—⁠sa kabaliskaran, ginapalambo sini ang pagkaalisto nga malaka ko lang makita sa iban nga relihioso nga mga publikasyon. Ang Lalantawan kag Magmata! makarepresko bangod sang napasad-sa-katunayan, napanalawsaw sing maayo, mapuslanon kag realistiko nga kaundan.”

Madamo katama sing mga ebidensia nga ang Ginharian sang Dios matuod gid kag nagapanghikot na sing bug-os. Ang mga Saksi ni Jehova malipayon kag mapagsik nga nagapaambit sining “maayong balita sang ginharian” sa ila mga isigkatawo, ginaagda sila nga mangin sakop sini. (Mateo 24:14) Naganyat ka bala sa sining palaabuton? Sarang mo maagom ang mga pagpakamaayo nga matigayon paagi sa pagpakig-upod sa mga ginatudluan kag nagapanikasog nga magkabuhi suno sa mga talaksan sang Ginharian. Subong man, sarang mo maagom ang paglaum nga magkabuhi sa idalom sang paggahom sang Ginharian sa ginsaad nga bag-ong kalibutan nga “sa sini magapuyo ang pagkamatarong.”​—⁠2 Pedro 3:13.

[Nota]

[Retrato sa pahina 4, 5]

Sang 1914 ang mga pungsod nakigbahin sa bug-os kalibutan nga inaway

[Mga retrato sa pahina 6]

Ang boluntaryo nga hilikuton sa pagbulig ebidensia sang nagapanghikot nga Cristianong gugma

[Retrato sa pahina 7]

Ang mga Saksi ni Jehova sa bug-os nga kalibutan nagabenepisyo gikan sa isa lang ka programa sang edukasyon