Ginapahayag ni Jehova ang Iya Himaya sa mga Mapainubuson

“Ang resulta sang pagkamapainubuson kag sang kahadlok kay Jehova amo ang manggad kag himaya kag kabuhi.”​—⁠HULUBATON 22:4.

1, 2. (a) Paano ginpakita sang tulun-an nga Binuhatan nga si Esteban “isa ka tawo nga puno sang pagtuo kag balaan nga espiritu”? (b) Ano ang pamatuod nga mapainubuson si Esteban?

SI Esteban “isa ka tawo nga puno sang pagtuo kag balaan nga espiritu.” “Puno [man sia] sang pagkamainayuhon kag gahom.” Bangod isa sia sa una nga mga disipulo ni Jesus, naghimo sia sing daku nga mga tanda kag kalatingalahan sa mga tawo. Isa ka bes, pila ka tawo ang nakigsuay sa iya, “apang indi sila makapanindugan batok sa kaalam kag espiritu nga paagi sini sia nagahambal.” (Binuhatan 6:​5, 8-10) Maathag nga si Esteban isa ka maukod nga estudyante sang Pulong sang Dios, kag malantipon niya ini nga ginpangapinan sa Judiyong relihioso nga mga lider sang panahon niya. Ang iya detalyado nga testimonya, nga narekord sa Binuhatan kapitulo 7, nagapamatuod nga interesado gid sia sa pagpahayag sang katuyuan sang Dios.

² Indi kaangay sang relihioso nga mga lider, nga nagbatyag nga mas mataas sila sangsa kinaandan nga mga tawo bangod sang ila posisyon kag ihibalo, mapainubuson si Esteban. (Mateo 23:2-7; Juan 7:49) Bisan pa batid sa Kasulatan, nalipay sia nga tangduan sa ‘pagpanagtag sing pagkaon sa mga lamesa’ agod makakonsentrar ang mga apostoles “sa pangamuyo kag sa ministeryo sang pulong.” Maayo ang reputasyon ni Esteban sa mga kauturan amo nga ginpili sia nga isa sa pito ka lalaki nga may pamatuod nga magaatipan sining matag-adlaw nga pagpanagtag sing pagkaon. Mapainubuson niya nga ginbaton ini nga buluhaton.​—⁠Binuhatan 6:1-6.

3. Anong talalupangdon nga pagpahayag sang di-bagay nga kaayo sang Dios ang naeksperiensiahan ni Esteban?

³ Natalupangdan ni Jehova ang pagkamapainubuson ni Esteban, pati na ang iya espirituwalidad kag katutom. Sang nagapanaksi si Esteban sa nagapamatok nga Judiyong mga lider sa Sanhedrin, “nakita nila nga ang iya nawong subong sang nawong sang anghel.” (Binuhatan 6:15) Ang iya nawong kaangay sang isa ka mensahero sang Dios, nga may kalinong nga naghalin sa Dios sang himaya nga si Jehova. Sa tapos makapanaksi sing maisugon sa mga miembro sang Sanhedrin, naeksperiensiahan ni Esteban ang isa ka talalupangdon nga pagpahayag sang di-bagay nga kaayo sang Dios. “Sia, nga puno sang balaan nga espiritu, nagtangla sa langit kag nakakita sang himaya sang Dios kag kay Jesus nga nagatindog sa tuo sang Dios.” (Binuhatan 7:55) Para kay Esteban, ginpamatud-an liwat sining talalupangdon nga palanan-awon ang posisyon ni Jesus subong Anak sang Dios kag Mesias. Ginpabakod sini ang mapainubuson nga si Esteban kag nagpasalig sa iya nga nahamut-an sia ni Jehova.

4. Kay sin-o ginapahayag ni Jehova ang iya himaya?

⁴ Subong sang ginpakita sa palanan-awon ni Esteban, ginapahayag ni Jehova ang iya himaya kag katuyuan sa nagakahadlok sa Dios nga mga indibiduwal nga mapainubuson kag nagapakabahandi sang ila kaangtanan sa iya. “Ang resulta sang pagkamapainubuson kag sang kahadlok kay Jehova amo ang manggad kag himaya kag kabuhi,” siling sang Biblia. (Hulubaton 22:4) Gani, importante nga mahangpan naton kon ano ang matuod nga pagkamapainubuson, kon paano naton mapalambo ining importante nga kinaiya, kag kon paano kita makabenepisyo sa pagpakita sini sa tanan nga bahin sang aton kabuhi.

 Pagkamapainubuson—⁠Isa ka Kinaiya sang Dios

5, 6. (a) Ano ang pagkamapainubuson? (b) Paano ginpakita ni Jehova ang pagkamapainubuson? (c) Ano dapat ang epekto sa aton sang pagpaubos ni Jehova?

⁵ Mahimo makibot ang iban nga si Jehova nga Dios, ang pinakamataas kag labing mahimayaon sa bug-os nga uniberso, amo ang pinakadaku nga halimbawa sang pagkamapainubuson. Ginsiling ni Hari David kay Jehova: “Hatagan mo ako sang imo taming sang kaluwasan, kag ang imo tuo nga kamot magaalay-ay sa akon, kag ang imo pagkamapainubuson magapadaku sa akon.” (Salmo 18:35) Sa paglaragway kay Jehova subong mapainubuson, gingamit ni David ang Hebreong tinaga nga may panguna nga kahulugan nga “pagduko.” Magluwas sa tinaga nga “pagkamapainubuson,” ang iban pa nga Hebreong mga tinaga nga may labot sa sini nagkahulugan sing “pagpaubos” “pagkahagop,” kag “pagpanubo.” Gani ginpakita ni Jehova ang pagkamapainubuson sang nagpaubos sia agod pakig-angutan ang di-himpit nga tawo nga si David kag ginhimo sia nga hari nga magarepresentar sa Iya. Subong sang mabasa sa superskripsion sang Salmo 18, gin-amligan kag ginbuligan ni Jehova si David, kag ginluwas sia “gikan sa palad sang tanan niya nga kaaway kag gikan sa kamot ni Saul.” Nahibaluan man ni David nga ang natigayon niya nga kabantugan ukon himaya subong hari nagdepende sa mapainubuson nga pagpanghikot ni Jehova para sa iya. Ini nga ihibalo nagbulig kay David nga magpabilin nga mapainubuson.

⁶ Kamusta kita? Gintudluan kita ni Jehova sing kamatuoran, kag mahimo nga ginhatagan niya kita sing pinasahi nga mga pribilehiyo sa pag-alagad paagi sa iya organisasyon, ukon gingamit kita sa pila ka paagi agod matuman ang iya kabubut-on. Ano ang batyagon naton sa sini? Indi bala kita dapat magpaubos? Indi bala kita dapat magpasalamat nga nagpaubos si Jehova kag likawan ang pagbayaw sa aton kaugalingon, nga magadul-ong gid sa kapahamakan?​—⁠Hulubaton 16:18; 29:23.

7, 8. (a) Paano ginpakita ni Jehova ang pagkamapainubuson sa iya pagpakig-angot kay Manases? (b) Paano si Jehova kag si Manases nangin halimbawa para sa aton sa pagkamapainubuson?

⁷ Wala lamang nagpakita sing daku nga pagkamapainubuson si Jehova paagi sa pagpakig-angot sa di-himpit nga mga tawo kundi handa man sia sa pagkaluoy sa mga kubos, ginabayaw pa gani ang mga nagapaubos sang ila kaugalingon. (Salmo 113:4-7) Binagbinaga ang natabo kay Hari Manases sang Juda. Gingamit niya sing sayop ang iya dungganon nga posisyon subong hari sa pagpalapnag sang butig nga pagsimba kag ‘naghimo sang tuman kadamo nga malaut sa itululok ni Jehova, sa pagpaakig sa iya.’ (2 Cronica 33:6) Sang ulihi, ginsilutan ni Jehova si Manases paagi sa pagtugot sa hari sang Asiria nga kuhaon sia sa trono bilang hari. Sa bilangguan,  ‘nagpakiluoy si Manases kay Jehova nga iya Dios kag nagpaubos gid sang iya kaugalingon,’ amo nga ginpasag-uli sia ni Jehova sa trono sa Jerusalem, kag “nakilala ni Manases nga si Jehova ang matuod nga Dios.” (2 Cronica 33:11-13) Huo, ang pagpaubos sang ulihi ni Manases nagpahamuot kay Jehova, nga nagpakita man sing pagkamapainubuson paagi sa pagpatawad sa iya kag pagpasag-uli sa iya bilang hari.

⁸ Ang kahanda ni Jehova sa pagpatawad kag ang mahinulsulon nga panimuot ni Manases nagatudlo sa aton sing importante nga mga leksion sa pagkamapainubuson. Dapat naton pirme dumdumon nga nagapakig-angot si Jehova sa aton suno sa pagpakig-angot naton sa mga nakasayop sa aton kag sa panimuot naton kon makasala kita. Kon handa kita magpatawad sa mga sayop sang iban kag mapainubuson kita nga nagabaton sang aton mga sayop, mahimo kita kaluuyan ni Jehova.​—⁠Mateo 5:​23, 24; 6:12.

Ginapahayag ang Himaya sang Dios sa mga Mapainubuson

9. Ang pagkamapainubuson isa bala ka tanda sang kaluyahon? Ipaathag.

⁹ Apang, indi dapat hangpon sing sayop nga ang pagkamapainubuson kag ang may labot sini nga mga kinaiya isa ka tanda sang kaluyahon ukon isa ka huyog sa pagkunsinti sa sayop. Subong ginapamatud-an sa Balaan nga Kasulatan, si Jehova mapainubuson, apang nagapakita sia sing matarong nga kaakig kag daku nga gahom kon nagakadapat ini. Bangod mapainubuson si Jehova, ginahatagan niya sing atension, ukon pinasahi nga konsiderasyon, ang mga mapainubuson, apang nagapahilayo sia sa mga matinaastaason. (Salmo 138:6) Paano si Jehova nagapakita sing pinasahi nga konsiderasyon sa iya mapainubuson nga mga alagad?

10. Ano ang ginapahayag ni Jehova sa mga mapainubuson, subong sang ginapakita sa 1 Corinto 2:6-10?

¹⁰ Sa iya gintalana nga tion kag paagi sa iya ginpili nga alagyan sang komunikasyon, ginapahayag ni Jehova sa mga mapainubuson ang mga detalye kon paano niya tumanon ang iya katuyuan. Ining mahimayaon nga mga butang wala nahibaluan sang mga nagasalig sing matinaastaason sa tawhanon nga kaalam ukon panghunahuna. (1 Corinto 2:6-10) Apang ang mga mapainubuson, bangod ginhatagan sila sing sibu nga paghangop sa katuyuan ni Jehova, nagadayaw kay Jehova bangod ginaapresyar nila sing kapin ang iya daku nga himaya.

11. Sang unang siglo, paano nangin indi mapainubuson ang iban, kag paano ini naghalit sa ila?

¹¹ Sang unang siglo, madamo, pati na ang pila nga nagpangangkon nga mga Cristiano, ang indi mapainubuson kag nasandad sa ginpahayag ni apostol Pablo sa ila tuhoy sa katuyuan sang Dios. Si Pablo nangin “isa ka apostol sa mga pungsod,” apang indi ini bangod sang iya ginhalinan nga pungsod, edukasyon, edad, ukon malawig nga rekord sang maayong binuhatan. (Roma 11:13) Masami ini ginatamod sang indi mahunahunaon sa espirituwal nga mga indibiduwal nga amo ang ginabasihan ni Jehova sa pagpili sang iya gamiton. (1 Corinto 1:26-29; 3:⁠1; Colosas 2:18) Apang, ginpili ni Jehova si Pablo suno sa Iya mahigugmaon nga kaayo kag matarong nga katuyuan. (1 Corinto 15:8-10) Ang gintawag ni Pablo nga “tuman kaayo nga mga apostoles,” kag ang iban pa nga mga manugpamatok, wala nagbaton kay Pablo kag sa iya pagpangatarungan gikan sa Kasulatan. Ang indi nila pagpaubos nag-upang sa ila sa pagtigayon sing ihibalo kag paghangop sa mahimayaon nga paagi ni Jehova sa pagtuman sang iya katuyuan. Indi gid naton pagpakadiutayon ukon hukman ang mga ginapili ni Jehova sa pagtuman sang iya kabubut-on.​—⁠2 Corinto 11:4-6.

12. Paano ginapakita sang halimbawa ni Moises nga ginapakamaayo ni Jehova ang mga mapainubuson?

 ¹² Sa pihak nga bahin, madamo sing mga halimbawa sa Biblia ang nagapadaku kon paano ginpakamaayo ang mapainubuson nga mga tawo nga makita ang himaya sang Dios. Nakita ni Moises, nga “amo ang labing mahagop” sa tanan nga tawo, ang himaya sang Dios kag natigayon niya ang suod nga kaangtanan sa iya. (Numeros 12:3) Ginpakamaayo gid sang Manunuga sa madamong paagi ining mapainubuson nga tawo, nga isa ka kubos nga manugbantay sing mga karnero sa sulod sang 40 ka tuig, diin daku nga bahin sini ang ginhinguyang sa Arabian Peninsula. (Exodo 6:​12, 30) Sa bulig ni Jehova, si Moises nangin humalambal kag panguna nga manug-organisar sang pungsod sang Israel. Nagsugilanunay sila sang Dios. Paagi sa palanan-awon, nakita niya ang “dagway ni Jehova.” (Numeros 12:​7, 8; Exodo 24:​10, 11) Ginpakamaayo man ang mga nagkilala sa sining mapainubuson nga alagad kag tiglawas sang Dios. Sing kaanggid, pakamaayuhon man kita kon kilalahon naton kag tumanon ang manalagna nga daku pa kay Moises, si Jesus, kag “ang matutom kag mainandamon nga ulipon” nga iya gintangdo.​—⁠Mateo 24:​45, 46; Binuhatan 3:22.

13. Paano ginpahayag ang himaya ni Jehova sa mapainubuson nga mga manugbantay sing karnero sang unang siglo?

¹³ Kay sin-o ‘nagsilak ang himaya ni Jehova’ sang ginpahibalo sang anghel ang maayong balita tuhoy sa pagkatawo sang “isa ka Manluluwas, nga amo si Cristo nga Ginuo”? Indi sa matinaastaason nga mga lider sang relihion ukon sa mga tawo nga may mataas nga posisyon kundi sa mapainubuson nga mga manugbantay sing karnero “nga nagapuyo sa gua kag nagabantay sa gab-i sa ila mga panong.” (Lucas 2:8-11) Wala ginahangad ini nga mga tawo bangod sang ila kalantip kag trabaho. Apang, sila ang nakita kag ginpili ni Jehova nga una nga pahibaluon tuhoy sa pagkatawo sang Mesias. Huo, ginapahayag ni Jehova ang iya himaya sa mga mapainubuson kag nagakahadlok sa Dios.

14. Paano ginapakamaayo sang Dios ang mga mapainubuson?

¹⁴ Ano ang ginatudlo sini nga mga halimbawa sa aton? Ginapakita sini nga si Jehova nahamuot kag nagapahayag sang ihibalo kag paghangop sa iya katuyuan sa mga mapainubuson. Ginapili niya ang mga indibiduwal nga mahimo wala sing mga kinaiya nga ginahangad sang pila ka tawo kag ginagamit sila agod ipahibalo ang iya mahimayaon nga katuyuan sa iban. Dapat ini magpahulag sa aton nga padayon nga magpatuytoy kay Jehova, sa iya matagnaon nga Pulong, kag sa iya organisasyon. Makasalig kita nga padayon nga pahibaluon ni Jehova ang iya mapainubuson nga mga alagad tuhoy sa pagpahayag sang iya mahimayaon nga katuyuan. Si manalagna Amos nagsiling: “Ang Soberanong Ginuo nga si Jehova indi maghimo sing isa ka butang kon indi niya anay mapahayag ang iya kompidensial nga butang sa iya mga alagad nga mga manalagna.”​—⁠Amos 3:7.

Palambua ang Pagkamapainubuson kag Batuna ang Kahamuot sang Dios

15. Ngaa dapat kita magpanikasog nga magpabilin nga mapainubuson, kag paano ini ginpakita sa natabo kay Hari Saul sa Israel?

¹⁵ Agod kahamut-an sang Dios sing dayon, dapat kita magpabilin nga mapainubuson. Kon ang isa ka tawo mapainubuson, wala ini nagakahulugan nga pirme sia mapainubuson. Sarang madula sang isa ka tawo ang pagkamapainubuson kag magpadala sa bugal kag pagbayaw sa kaugalingon, nga nagadul-ong sa pagkamatinaastaason kag kapahamakan. Amo gid sini ang natabo kay Saul, ang unang ginhaplas nga hari sa Israel. Sang ginpili sia, nagbatyag sia nga ‘magamay sa iya panan-aw.’ (1 Samuel 15:17) Apang, pagligad lamang sang duha ka tuig nga paggahom, nangin matinaastaason sia. Ginsupak niya ang kahimusan ni Jehova sa paghalad paagi kay manalagna Samuel, kag naghimuhimo sia sing mga rason agod pakamatarungon ang iya paghalad. (1 Samuel 13:​1, 8-14) Amo ini ang umpisa sang sunodsunod nga mga hitabo nga nagpakita sang indi niya pagpaubos. Subong resulta, nadula niya ang espiritu kag kahamuot sang Dios, nga nagdul-ong sa iya makahuluya nga kamatayon. (1 Samuel 15:3-19, 26; 28:⁠6; 31:4) Maathag ang leksion: Dapat naton panikasugan nga magpabilin nga mapainubuson kag mapinasakupon kag indi magbatyag nga importante kita, sa amo malikawan naton ang matinaastaason nga mga buhat nga nagaresulta sa indi pagkahamuot ni Jehova.

16. Paano makabulig sa aton ang pagpamalandong sa aton kaangtanan kay Jehova kag sa aton isigkatawo agod mapalambo ang pagkamapainubuson?

 ¹⁶ Bisan pa indi isa ka bunga sang espiritu sang Dios ang pagkamapainubuson, isa ini ka diosnon nga kinaiya nga dapat palambuon. (Galacia 5:​22, 23; Colosas 3:​10, 12) Bangod nadalahig ang aton hunahuna​—⁠kon paano naton ginatamod ang aton kaugalingon kag ang iban​—⁠kinahanglan gid panikasugan ang pagpalambo sing pagkamapainubuson. Ang paghunahuna kag pagpamalandong sa aton kaangtanan kay Jehova kag sa aton isigkatawo makabulig sa aton nga magpabilin nga mapainubuson. Sa itululok sang Dios, ang tanan nga di-himpit nga mga tawo kaangay sang berde nga hilamon nga nagatubo sing makadali kag nagakalaya. Ang mga tawo kaangay lamang sang mga tibakla sa latagon. (Isaias 40:​6, 7, 22) May rason bala nga magpabugal ang isa ka hilamon kay mas mataas ini sangsa iban nga mga hilamon? May rason bala nga magpabugal ang isa ka tibakla sang ikasarang sini kay matayog ini diutay maglukso sangsa iban nga mga tibakla? Makahalam-ot bisan ang paghunahuna lang sini. Gani, ginpahanumdom ni apostol Pablo ang iya mga masigka-Cristiano: “Sin-o bala ang nagahimo sa imo nga mangin tuhay sa iban? Sa pagkamatuod, ano ang imo nga wala mo mabaton? Karon, kon nabaton mo ini matuod, ngaa bala nagapahambog ka subong nga daw wala mo ini mabaton?” (1 Corinto 4:7) Ang pagpamalandong sa sini nga mga teksto sa Biblia makabulig sa aton nga mapalambo kag mapakita ang pagkamapainubuson.

17. Ano ang nagbulig kay manalagna Daniel agod mapalambo ang pagkamapainubuson, kag ano ang makabulig sa aton nga mahimo man ini?

¹⁷ Gintawag ang Hebreong manalagna nga si Daniel nga “nahamut-an sing daku nga lalaki” sa mga mata sang Dios bangod sang iya “pagpaubos.” (Daniel 10:​11, 12) Ano ang nagbulig kay Daniel nga mapalambo ang pagkamapainubuson? Una sa tanan, nagsalig sia sing bug-os kay Jehova, pirme nagapalapit sa iya sa pagpangamuyo. (Daniel 6:​10, 11) Dugang pa, si Daniel isa ka mapisan kag napahulag sing nagakaigo nga estudyante sang Pulong sang Dios, nga nagbulig sa iya nga mahuptan sa hunahuna ang mahimayaon nga katuyuan sang Dios. Handa man sia sa pagbaton sang iya mga sayop magluwas sa mga sayop sang iya katawhan. Kag interesado  gid sia sa pagsakdag sa pagkamatarong sang Dios, indi sa iya pagkamatarong. (Daniel 9:​2, 5, 7) Makatuon bala kita sa talalupangdon nga halimbawa ni Daniel kag magpanikasog sa pagpalambo kag pagpakita sing pagkamapainubuson sa tanan nga bahin sang aton kabuhi?

18. Ano ang palaabuton nga himaya para sa mga mapainubuson karon?

¹⁸ “Ang resulta sang pagkamapainubuson kag sang kahadlok kay Jehova amo ang manggad kag himaya kag kabuhi,” siling sang Hulubaton 22:4. Huo, ginakahamut-an ni Jehova ang mga mapainubuson, kag ang resulta amo ang himaya kag kabuhi. Sang gintugutan niya si Jehova nga tadlungon ang iya panghunahuna sa tapos nga halos magbiya na sia sa pag-alagad sa Dios, mapainubuson nga ginbaton ni salmista Asaf: “Paagi sa imo laygay tuytuyan mo ako, kag pagkatapos dalhon mo ako sa himaya.” (Salmo 73:24) Kamusta kita karon? Ano ang palaabuton nga himaya para sa mga mapainubuson? Dugang pa sa ginkahamut-an kag ginpakamaayo nga kaangtanan kay Jehova, mapaabot nila nga makita ang katumanan sang inspirado nga pinamulong ni Hari David: “Ang mga mahagop magapanag-iya sang duta, kag makasapo gid sila sing daku nga kalipay sa kabuganaan sang paghidait.” Mahimayaon gid nga palaabuton!​—⁠Salmo 37:11.

Madumduman Mo Bala?

• Paano si Esteban isa ka halimbawa sang mapainubuson nga tawo nga ginpakitaan ni Jehova sang Iya himaya?

• Sa ano nga mga paagi nagpakita sing pagkamapainubuson si Jehova nga Dios?

• Ano nga mga halimbawa ang nagapakita nga ginapahayag ni Jehova ang iya himaya sa mga mapainubuson?

• Paano makabulig sa aton ang halimbawa ni Daniel agod mapalambo ang pagkamapainubuson?

[Mga Pamangkot sa Pagtinuon]

[Kahon sa pahina 12]

Maisog Apang Mapainubuson

Sa kombension sang mga Estudyante sang Biblia (kilala karon nga mga Saksi ni Jehova) sang 1919 sa Cedar Point, Ohio, E.⁠U.⁠A., ang 50-anyos nga si J. F. Rutherford, nga amo anay ang nagatatap sa hilikuton, malipayon nga nagbulig sa pagbitbit sang mga maleta kag pagdul-ong sa mga kombensionista sa ila mga kuarto. Sa katapusan nga adlaw sang kombension, ginpapagsik niya ang 7,000 ka tagpalamati paagi sa pagsiling: “Kamo ang embahador sang Hari sang mga hari kag Ginuo sang mga ginuo, nga nagapahibalo sa mga tawo . . . sang mahimayaon nga ginharian sang aton Ginuo.” Bisan pa si Utod Rutherford isa ka tawo nga maisog, kilala sa paghambal nga may awtoridad kag wala nagakompromiso sa ginapatihan niya nga kamatuoran, tunay man sia nga mapainubuson sa atubangan sang Dios, masami ini matalupangdan sa iya mga pangamuyo sa agahan nga pagsimba sa Bethel.

[Retrato sa pahina 9]

Si Esteban, batid sa Kasulatan apang mapainubuson nga nagpanagtag sing pagkaon

[Retrato sa pahina 10]

Ang pagpaubos ni Manases nagpahamuot kay Jehova

[Retrato sa pahina 12]

Ngaa si Daniel isa ka “nahamut-an sing daku nga lalaki”?