“Amo Ini ang Pinakamaayo nga Mahimo Mo”

SI Alexis isa ka singko anyos nga bata nga lalaki sa siudad sang Morelia, Mexico, nga ang mga ginikanan nagatuon sang Biblia kag nagatambong sa mga miting sang mga Saksi ni Jehova. Samtang nagatambong sa isa ka sirkito nga asambleya upod sa iya pamilya, nakita niya ang isa ka pasundayag tuhoy sa pagbantala sa pamalaybalay. Nagliso dayon sia sa iya amay kag namangkot: “Tay, Tay, ngaa wala ka nagagua kag nagabantala?” Ang iya amay nagsabat, “Nagatuon pa lang ako agod mahimo ko ini.” Si Alexis nagsabat sing mapagsik, “Tay, amo ini ang pinakamaayo nga mahimo mo.”

Nahangpan sining bata nga dapat manghikot ang isa suno sa iya ihibalo kay Jehova. Bangod isa lang sila ka balay nga ginaistaran sang iya duha ka lamharon nga pakaisa, nangamuyo anay sia kay Jehova kag nian naghambal sa ila tuhoy sa iya natun-an sa Ang Akon Libro Sang mga Sugilanon sa Biblia paagi sa bulig sang iya mga ginikanan. Bisan indi pa makahibalo magbasa si Alexis, nahibaluan niya sing maayo ang mga kaundan sang libro paagi sa mga laragway nga nagailustrar sang mga sugilanon. Nagsiling pa gani sia nga luyag niya duawon ang mga tawo sa ila mga puluy-an agod ipaambit sa ila ang iya natun-an tuhoy sa mga katuyuan sang Dios.

Sa pagkamatuod, ang mga lamharon kag mga tigulang sarang makapahisuno sang ila kabuhi sa ginapaabot sa ila ni Jehova, “ang Balaan,” kag sa amo may labing daku nga pribilehiyo nga magpanaksi tuhoy sa iya sa tunga sang mga pungsod. (Isaias 43:⁠3; Mateo 21:16) Wala sing duhaduha, amo ini ang isa sang pinakamaayo nga mahimo sang isa ka tawo.