Kinahanglanon Bala ang Maayo nga Laygay?

MADAMO karon ang nagapati nga may ikasarang sila sa paghibalo sang maayo kag malain kag may kinamatarong sila nga himuon ang bisan ano nga luyag nila. Ang iban nagasiling nga puede na ang bisan ano basta nagapahalipay ini sa isa ka tawo. Ang pag-asawahay kag pamilya, nga madugay na nga ginkabig nga sadsaran sang katilingban sang tawo, naapektuhan sing daku.​—⁠Genesis 3:5.

Binagbinaga si Verónica,⁠ * nga nagaistar sa Mexico. Nagsiling sia: “Halos 15 ka tuig na kami nga mag-asawahay sang ginsugiran ako sang akon bana nga may kerida sia. Nagsiling sia nga bangod mas bataon kag nagapahalipay sa iya ini nga babayi, indi niya sia pagbiyaan. Natublag ako sa pagpamensar nga ang akon pinakasuod nga abyan indi na mag-upod sa akon. Abi ko anay pinakamasakit na kon mapatay ang aton hinigugma. Apang para sa akon, mas masakit ang panghilahi bangod indi lamang nga wala na ang isa nga akon ginahigugma kundi padayon pa niya nga ginasakit ang akon balatyagon.”

Binagbinaga man ang kahimtangan sang isa ka 22-anyos nga lalaki nga diborsiado na kag may isa ka anak nga lalaki apang indi luyag mag-abaga sang iya responsabilidad subong amay. Nagapasagod sila sang iya anak sa iya iloy. Kon indi magsugot ang iya iloy sa tanan niya nga luyag, nagasingki sia kag nagabuyayaw sa iya, daw kaangay sang walay batasan nga bata. Makaluluoy gid ang iya iloy bangod sang iya masingki nga paggawi.

Indi ini tumalagsahon nga mga hitabo. Nangin kinaandan na bisan diin ang legal nga pagbulagay kag diborsio. Naeksperiensiahan sang madamong kabataan ang pagbiya sang isa nila ka ginikanan agod magminyo liwat. Nadula na sang iban nga mga pamatan-on ang pagtahod sa  iban, lakip sa ila mga ginikanan, kag naghimo sila sing mga buhat nga daw indi mahanduraw sang una. Ang pagtilawtilaw sa sekso, pag-abuso sa droga, pagpanakit sang mga pamatan-on, kag pagpatay sang kabataan sa ila mga manunudlo ukon mga ginikanan nangin kinaandan na sa madamong pungsod. Kag mahimo natalupangdan mo nga indi lamang ang pagpadaku sa kabataan kag pag-asawahay ang mabudlay atubangon karon.

Kon makita naton ini nga mga kahimtangan, mahimo magpalibog kita kon ano na ang nagakatabo sa katilingban. Kon nahibaluan gid sang mga tawo ang maayo kag malain, ngaa kadamo gid sang mga problema nga indi malubad? Kinahanglanon bala ang maayo nga laygay? May yara bala sing amo sinang maayo nga laygay, nga napamatud-an nga masaligan? Bisan pa madamo ang nagasiling nga nagapati sila sa Dios kag sa iya nasulat nga Pulong, daw wala ini sing epekto sa ila mga desisyon. Apang ano ang mabenepisyo naton kon mangayo kita sing laygay sa Dios? Binagbinagon naton ini sa masunod nga artikulo.

[Nota]