Si Jehova, ang Aton ‘Kuta sa Tion sang Kalisdanan’

“Ang kaluwasan sang mga matarong nagagikan kay Jehova; sia kuta nila sa tion sang kalisdanan.”​—⁠SALMO 37:39.

1, 2. (a) Ano ang ginpangamuyo ni Jesus para sa iya mga disipulo? (b) Ano ang kabubut-on sang Dios para sa iya katawhan?

SI Jehova labing gamhanan. May gahom sia nga amligan ang iya matutom nga mga sumilimba sa bisan anong paagi nga luyag niya. Sarang pa gani niya mapain ang iya katawhan sa pisikal gikan sa kalibutan kag ibutang sila sa isa ka duog nga walay peligro kag malinong. Apang, tuhoy sa iya mga disipulo, nangamuyo si Jesus sa iya langitnon nga Amay: “Nagapangabay ako sa imo, indi agod kuhaon sila gikan sa kalibutan, kundi agod bantayan sila bangod sa isa nga malauton.”​—⁠Juan 17:15.

² Ginpili ni Jehova nga indi kita pagkuhaon “gikan sa kalibutan.” Sa baylo, kabubut-on niya nga magkabuhi kita sa tunga sang mga pumuluyo sining kalibutan agod ibantala ang iya mensahe sang paglaum kag lugpay sa iban. (Roma 10:13-15) Apang, subong sang ginpahangop ni Jesus sa iya pangamuyo, paagi sa pagkabuhi sa sining kalibutan, ginapadayag kita sa “isa nga malauton.” Ang malalison nga katawhan kag malaut nga puersa sang mga espiritu nagatuga sing daku nga kasakit kag kalisang, kag indi puera sa kalisdanan ang mga Cristiano.​—⁠1 Pedro 5:9.

3. Ano nga realidad ang dapat atubangon bisan sang matutom nga mga sumilimba ni Jehova, apang ano nga lugpay ang masapwan naton sa Pulong sang Dios?

³ Sa idalom sina nga mga pagtilaw, natural lamang nga kon kaisa nagaluya ang aton buot. (Hulubaton 24:10) Ang rekord sang Biblia may madamo nga kasaysayan sang mga matutom nga nakaeksperiensia sing kalisdanan. “Madamo ang mga kapahamakan sang matarong,” siling sang salmista, “apang gikan sa sini tanan ginaluwas sia ni Jehova.” (Salmo 34:19) Huo, ang malain nga mga butang nagakatabo bisan sa “matarong.” Kaangay ni salmista David, kon kaisa mahimo nga ‘magpalaminhod kita kag mahanog sing tuman.’ (Salmo 38:8) Apang, makalugpay ang mahibaluan nga “si Jehova malapit sa mga buong sing tagipusuon; kag ginaluwas niya ang mga nadugmok sa espiritu.”​—⁠Salmo 34:18; 94:19.

4, 5. (a) Nahisanto sa Hulubaton 18:​10, ano ang dapat naton himuon agod maamligan kita sang Dios? (b) Ano ang pila ka espesipiko nga mga tikang nga mahimo naton agod mabaton ang bulig sang Dios?

⁴ Nahisanto sa pangamuyo ni Jesus, nagabantay gid si Jehova sa aton. Sia ang aton ‘kuta sa tion sang kalisdanan.’ (Salmo 37:39) Kaanggid man sa sini ang ginasiling sang tulun-an sang Hulubaton: “Ang ngalan ni Jehova torre  nga mabakod. Ang matarong nagadalagan sa sini kag ginahatagan sing pangamlig.” (Hulubaton 18:10) Ginapahayag sini nga teksto ang isa ka sadsaran nga kamatuoran nahanungod sa mapinalanggaon nga pag-ulikid ni Jehova sa iya mga tinuga. Nagahatag ang Dios sing proteksion ilabi na sa mga matarong nga aktibo nga nagapangita sa iya, nga subong bala daw nagadalagan kita sa isa ka mabakod nga torre agod maamligan.

⁵ Kon may yara kita makatulublag nga mga problema, paano kita makadalagan kay Jehova agod maamligan? Binagbinagon naton ang tatlo ka importante nga tikang nga mahimo naton agod mabaton ang bulig ni Jehova. Una, dapat kita mangamuyo sa aton langitnon nga Amay. Ikaduha, dapat naton sundon ang panuytoy sang iya balaan nga espiritu. Kag ikatlo, dapat kita magpasakop sa kahimusan ni Jehova paagi sa pagpakig-upod sa mga Cristiano nga makapahaganhagan sang aton kalisdanan.

Ang Gahom sang Pangamuyo

6. Paano ginatamod sang matuod nga mga Cristiano ang pangamuyo?

⁶ Ginarekomendar sang pila ka eksperto sa mapagros nga lawas ang pangamuyo subong bulong sa depresyon kag kahuol. Bisan pa mahimo matuod nga ang malinong nga tinion sang pagpamalandong makadula sang kahuol, amo man ang mahimo sang pila ka tunog sang kinaugali ukon bisan gani sang masahe sa likod. Wala ginapakadiutay sang matuod nga mga Cristiano ang pangamuyo paagi sa pagtamod sa sini nga daw isa lamang ka terapiya agod mag-ayo ang pamatyag. Ginatamod naton ang pangamuyo subong isa ka mainampuon nga komunikasyon sa Manunuga. Ang pangamuyo nagadalahig sang aton debosyon kag pagsalig sa Dios. Sa pagkamatuod, ang pangamuyo bahin sang aton pagsimba.

7. Ano ang buot silingon sang pagpangamuyo nga may pagsalig, kag paano ang subong sini nga mga pangamuyo nagabulig sa aton sa paglandas sa kalisdanan?

⁷ Ang aton mga pangamuyo dapat may kompiansa, ukon pagsalig, kay Jehova. Si apostol Juan nagsulat: “Ini amo ang pagsalig naton sa iya, nga, bisan ano man nga butang ang pangayuon naton suno sa iya kabubut-on, nagapamati sia sa aton.” (1 Juan 5:14) Si Jehova, ang Supremo nga Persona, ang lamang matuod kag labing gamhanan nga Dios, nagahatag gid sing pinasahi nga atension sa hanuot nga mga pangamuyo sang iya mga sumilimba. Ang paghibalo lamang nga nagapamati ang aton mahigugmaon nga Dios kon ginasugid naton sa iya ang aton mga kabalaka kag mga problema makalugpay.​—⁠Filipos 4:6.

8. Ngaa indi gid dapat magkahuya ang matutom nga mga Cristiano ukon magbatyag nga indi takus kon nagapalapit sila kay Jehova sa pangamuyo?

⁸ Indi gid dapat magkahuya ang matutom nga mga Cristiano, ukon magbatyag nga indi takus, ukon kulang sing kompiansa kon nagapalapit sila kay Jehova sa pangamuyo. Matuod nga kon malugaw-an kita ukon madamo sing problema, mahimo nga kon kaisa daw wala kita sing huyog nga magpalapit kay Jehova sa pangamuyo. Sa sina nga mga tinion dapat naton dumdumon nga si Jehova “nagapakita . . . sing kaluoy sa iya mga napiutan” kag “nagalugpay sa mga ginpaubos.” (Isaias 49:13; 2 Corinto 7:6) Dapat gid kita magdangop  nga may pagsalig sa aton langitnon nga Amay subong aton kuta ilabi na sa tion sang kalisang kag kalisdanan.

9. Ano ang papel sang pagtuo kon nagapalapit kita sa Dios paagi sa pangamuyo?

⁹ Agod makabenepisyo sing bug-os gikan sa pribilehiyo sa pagpangamuyo, dapat kita magpakita sing matuod nga pagtuo. Ang Biblia nagasiling nga “sia nga nagapalapit sa Dios dapat magpati nga amo sia kag nga sia . . . manugpadya sadtong hanuot nga nagapangita sa iya.” (Hebreo 11:6) Ang pagtuo indi lamang pagpati nga nagaluntad ang Dios. Ang matuod nga pagtuo nagadalahig sing malig-on nga pagpati sa ikasarang kag handum sang Dios sa pagpadya sa aton pagkamatinumanon sa iya. “Ang mga mata ni Jehova nagatamod sa mga matarong, kag ang iya mga dulunggan bukas sa ila pangamuyo.” (1 Pedro 3:12) Ang pirme nga pagdumdom sa mahigugmaon nga pag-ulikid ni Jehova sa aton nagahatag sing pinasahi nga kahulugan sa aton mga pangamuyo.

10. Paano kita dapat mangamuyo agod makabaton kita sing espirituwal nga kabaskog gikan kay Jehova?

¹⁰ Nagapamati si Jehova sa aton mga pangamuyo kon nagapalapit kita sa iya nga may bug-os nga tagipusuon. Ang salmista nagsulat: “Nagpanawag ako sa akon bug-os nga tagipusuon. Sabta ako, O Jehova.” (Salmo 119:145) Indi kaangay sang ritwal nga mga pangamuyo sang madamo nga relihion, ang aton mga pangamuyo indi rutina lamang ukon pakulahaw. Kon nagapangamuyo kita kay Jehova sa aton “bug-os nga tagipusuon,” ang aton mga pulong puno sing kahulugan kag katuyuan. Pagkatapos sining hanuot nga mga pangamuyo, mabatyagan naton ang paumpaw nga resulta sang paghaboy naton sang aton “lulan kay Jehova.” Subong sang ginapangako sang Biblia, “sia gid magaalay-ay” sa aton.​—⁠Salmo 55:22; 1 Pedro 5:​6, 7.

Ang Espiritu sang Dios Kabulig Naton

11. Ano ang isa ka paagi sang pagsabat ni Jehova kon kita ‘padayon nga nagapangayo’ sang iya bulig?

¹¹ Si Jehova indi lamang Manugpamati sa pangamuyo kundi Manugsabat man sini. (Salmo 65:2) Si David nagsulat: “Sa adlaw sang akon kalisdanan magatawag ako sa imo, kay sabton mo ako.” (Salmo 86:7) Gani, ginpalig-on ni Jesus ang iya mga disipulo nga ‘magpadayon sa pagpangayo’ sang bulig ni Jehova kay “ang Amay sa langit magahatag sing balaan nga espiritu sa mga nagapangayo sa iya.” (Lucas 11:9-13) Huo, ang aktibo nga puersa sang Dios nagapanghikot subong kabulig, ukon manuglugpay, sa iya katawhan.​—⁠Juan 14:16.

12. Paano makabulig sa aton ang espiritu sang Dios kon daw indi na masarangan ang mga problema?

¹² Bisan sa tion sang pagtilaw, ang espiritu sang Dios makahatag sa aton sing “gahom nga labaw sa kinaandan.” (2 Corinto 4:7) Si apostol Pablo, nga nagbatas sing madamo nga makapahuol nga mga kahimtangan, may pagsalig nga nagsiling: “Sa tanan nga butang may kusog ako bangod sa iya nga nagahatag sing gahom sa akon.” (Filipos 4:13) Sa karon man, madamo nga Cristiano ang nakatigayon liwat sing espirituwal kag emosyonal nga kusog bilang sabat sa ila mga pangamuyo. Masami nga ang makatulublag nga mga problema indi gid man gali tuman kadaku sa tapos naton mabaton ang bulig sang espiritu sang Dios. Bangod sining kusog halin sa Dios, masiling man naton ang ginsiling sang apostol: “Ginaipit kami sa tagsa ka paagi, apang wala mapiuti nga indi na makagiho; ginaligban kami, apang indi sing bug-os nga wala na sing maguaan; ginahingabot kami, apang wala ginapatumbayaan; ginapukan kami, apang wala malaglag.”​—⁠2 Corinto 4:​8, 9.

13, 14. (a) Paano si Jehova nangin kuta naton paagi sa iya nasulat nga Pulong? (b) Paano ang pag-aplikar sa mga prinsipio sang Biblia personal nga nakabulig sa imo?

¹³ Gin-inspirar man kag gintipigan sang balaan nga espiritu ang nasulat nga Pulong sang Dios para sa aton kaayuhan. Paano si Jehova nangin kuta naton sa tion sang kalisdanan paagi sa mga pahina sang iya Pulong? Ang isa ka paagi amo ang paghatag sa aton sing praktikal nga kaalam kag ikasarang sa paghunahuna. (Hulubaton 3:21-24) Ginahanas sang Biblia ang aton ikasarang sa paghunahuna kag ginapauswag ang aton ikasarang sa pagpangatarungan. (Roma 12:1) Paagi sa regular nga pagbasa kag pagtuon sa Pulong sang Dios, kag pag-aplikar sini, ‘mahanas naton ang aton mga ikasarang sa paghantop nga makilala ang husto kag sayop.’ (Hebreo 5:14) Ayhan personal nga naeksperiensiahan ninyo kon paano kamo nabuligan sang mga prinsipio sa Biblia sa paghimo sing maalamon nga mga desisyon sang may problema kamo. Nagahatag sa aton ang  Biblia sing kaalam nga makabulig sa aton sa pagpangita sing praktikal nga mga solusyon sa makatulublag nga mga problema.​—⁠Hulubaton 1:4.

¹⁴ Ang Pulong sang Dios nagahatag sa aton sing isa pa ka tuburan sang kusog​—⁠ang ginalauman nga kaluwasan. (Roma 15:4) Ginasugiran kita sang Biblia nga ang malain nga mga butang nga nagakatabo indi magapadayon tubtob sa walay katubtuban. Temporaryo lamang ang bisan ano nga mga kapipit-an nga ginaantos naton. (2 Corinto 4:16-18) May yara kita “paglaum sa kabuhi nga walay katapusan nga ginsaad sang Dios, nga indi makabutig, sa wala pa ang malawig nga panahon nga nagligad.” (Tito 1:2) Kon ginakalipay naton ini nga paglaum, nga pirme ginadumdom ang masanag nga palaabuton nga ginsaad ni Jehova, mabatas naton ang mga kapipit-an.​—⁠Roma 12:12; 1 Tesalonica 1:3.

Ang Kongregasyon​—⁠Isa ka Paagi sa Pagpabutyag sang Gugma sang Dios

15. Paano makabuligay ang mga Cristiano?

¹⁵ Ang isa pa ka kahimusan ni Jehova nga makabulig sa aton sa tion sang kalisdanan amo ang aton pag-updanay sa sulod sang Cristianong kongregasyon. Ang Biblia nagasiling: “Ang matuod nga kaupod nagahigugma sa tanan nga tion, kag isa ka utod nga natawo kon may kapiutan.” (Hulubaton 17:17) Ginapalig-on sang Pulong sang Dios ang tanan sa kongregasyon nga padunggan kag higugmaon ang isa kag isa. (Roma 12:10) “Padayon nga pangitaon sang kada isa, indi ang kaugalingon nga kaayuhan, kundi ang iya sang iban nga tawo,” sulat ni apostol Pablo. (1 Corinto 10:24) Ini nga panimuot makabulig sa aton nga ipatuhoy ang aton igtalupangod sa mga kinahanglanon sang iban kag indi sa mga pagtilaw nga ginaantos naton. Kon nagabulig kita sa iban, indi lamang nga ginabuligan naton sila kundi nagabatyag man kita sing kalipay kag kaayawan nga nagapamag-an sang aton mga lulan.​—⁠Binuhatan 20:35.

16. Paano makapalig-on ang tagsa ka Cristiano?

¹⁶ Importante ang mahimo sang hamtong sa espirituwal nga mga lalaki kag mga babayi sa pagpalig-on sa iban. Agod mahimo ini, boluntaryo sila nga nagabulig. (2 Corinto 6:11-13) Makabenepisyo gid ang kongregasyon kon ang tanan nagahinguyang sing tion sa paghatag sing komendasyon sa mga pamatan-on, sa pagpalig-on sa mga bag-uhan, kag sa pagpalig-on sa mga ginapung-awan. (Roma 15:7) Ang utudnon nga gugma magabulig man sa aton agod indi kita mangin suspetsuso sa iban. Indi gid kita magpadasudaso sa paghinakop nga ang personal nga mga problema tanda sang espirituwal nga kaluyahon. Nagakaigo nga ginpalig-on ni Pablo ang mga Cristiano nga “maghambal sing malugpayon sa mga kalag nga ginapung-awan.” (1 Tesalonica 5:14) Ginapakita sang Biblia nga bisan ang matutom nga mga Cristiano ginalisdan.​—⁠Binuhatan 14:15.

17. Ano ang mga kahigayunan agod mapabakod naton ang higot sang Cristianong paghiliutod?

¹⁷ Ang Cristianong mga miting isa gid ka maayo nga kahigayunan nga malugpayan kag mapalig-on  naton ang isa kag isa. (Hebreo 10:​24, 25) Indi lamang sa tion sang mga miting sa kongregasyon nga ginapakita naton ining mahigugmaon nga pagpakig-angot sa isa kag isa. Sa baylo, ang katawhan sang Dios nagapangita man sing mga kahigayunan nga makaupdanay sila sa di-pormal nga mga paagi. Kon mag-utwas ang makatulublag nga mga kahimtangan, maabtik kita nga nagabuligay bangod sang mabakod nga higot sang pag-abyanay. Si apostol Pablo nagsulat: “Walay pagbinahinbahin sa lawas, kundi ang mga bahin sini may yara kaanggid nga pag-ulikid sa isa kag isa. Kag kon ang isa ka bahin nagaantos, ang tanan sang iban pa nga bahin nagaantos upod sini; ukon kon ang isa ka bahin ginahimaya, ang tanan sang iban pa nga mga bahin nagakalipay upod sini.”​—⁠1 Corinto 12:​25, 26.

18. Ano nga huyog ang dapat naton likawan kon maluya ang aton buot?

¹⁸ Kon kaisa, mahimo nga maluya gid ang aton buot amo nga wala kita sing huyog nga makig-upod sa mga masigka-Cristiano. Dapat naton pakigbatuan ini nga balatyagon agod indi naton madingutan ang aton kaugalingon sang lugpay kag bulig nga mahatag sang mga masigkatumuluo. Ang Biblia nagapaandam: “Ang isa nga nagapain sang iya kaugalingon magapangita sang iya makagod nga handum; magapamatok sia sa tanan nga praktikal nga kaalam.” (Hulubaton 18:1) Ang aton mga kauturan isa ka paagi nga ginagamit sang Dios sa pagpabutyag sang iya pag-ulikid sa aton. Kon ginakilala naton ining mahigugmaon nga kahimusan, makasapo kita sing paumpaw sa tion sang kalisdanan.

Hupti ang Positibo nga Panimuot

19, 20. Paano ang Kasulatan nagabulig sa aton sa pagsikway sa negatibo nga mga panghunahuna?

¹⁹ Madali mangin negatibo ang aton panghunahuna, kon magluya ang aton buot kag masubuan kita. Halimbawa, kon mag-utwas ang problema, mahimo duhaduhaan na sang iban ang ila espirituwalidad, kag maghinakop nga ang ila problema tanda nga ang Dios wala mahamuot sa ila. Apang, dumduma nga wala ginatilawan ni Jehova ang bisan sin-o paagi sa “malaut nga mga butang.” (Santiago 1:13) “Sa iya tagipusuon wala . . . ginapapiutan [sang Dios] ukon ginapakalisod ang mga anak sang mga tawo,” siling sang Biblia. (Panalabiton 3:33) Sa baylo, nagakasubo gid si Jehova kon nagaantos ang iya mga alagad.​—⁠Isaias 63:​8, 9; Zacarias 2:8.

²⁰ Si Jehova “ang Amay nga may mapinalanggaon nga kaluoy kag ang Dios nga may bug-os nga paglugpay.” (2 Corinto 1:3) Ginaulikdan niya kita, kag bayawon niya kita sa nagakaigo nga tion. (1 Pedro 5:​6, 7) Ang pirme nga pagdumdom nga ginahigugma kita sang Dios magabulig sa aton agod mahuptan ang positibo nga panimuot, kag magkalipay pa gani. Si Santiago nagsulat: “Kabiga ninyo nga bug-os nga kalipay, mga kauturan ko, kon makasugata kamo sing nanuhaytuhay nga mga pagtilaw.” (Santiago 1:2) Ngaa? Nagsabat sia: “Bangod nga nahamut-an magabaton sia sing purongpurong sang kabuhi, nga ginsaad ni Jehova sa mga padayon nga nagahigugma sa iya.”​—⁠Santiago 1:12.

21. Walay sapayan sang aton mga kabudlayan, ano nga garantiya ang ginahatag sang Dios sa mga nagapabilin nga matutom sa iya?

²¹ Subong sang ginpaandam sa aton ni Jesus, magaantos kita sing kapipit-an sa kalibutan. (Juan 16:33) Apang nagapangako ang Biblia nga wala sing “kapipit-an . . . ukon kasakit ukon paghingabot ukon tiggulutom ukon kahubo ukon katalagman” ang magapahamulag sa aton gikan sa gugma ni Jehova kag sa gugma sang iya Anak. (Roma 8:​35, 39) Makalugpay ang mahibaluan nga temporaryo lamang ang aton kalisdanan! Samtang ginahulat naton ang katapusan sang pag-antos sang tawo, ginabantayan kita sang aton mahigugmaon nga Amay nga si Jehova. Kon magdangop kita sa iya agod maamligan, sia mangin isa ka “malig-on nga kataason para sa bisan sin-o nga ginapigos, isa ka malig-on nga kataason sa mga tion sang kalisdanan.”​—⁠Salmo 9:9.

Ano ang Natun-an Naton?

• Ano ang dapat paabuton sang mga Cristiano samtang nagakabuhi sa sining malaut nga kalibutan?

• Paano ang aton hugot nga mga pangamuyo makapalig-on sa aton kon ginatilawan kita?

• Paano ang espiritu sang Dios isa ka kabulig?

• Ano ang mahimo naton agod makabuligay kita sa isa kag isa?

[Mga Pamangkot sa Pagtinuon]

[Retrato sa pahina 18]

Dapat naton pangitaon si Jehova nga subong bala daw nagadalagan kita sa isa ka mabakod nga torre

[Mga retrato sa pahina 20]

Ginagamit sang mga hamtong sa espirituwal ang tanan nga kahigayunan agod hatagan sing komendasyon kag palig-unon ang iban