Ang Pagpangita sing Kalipay

PILA ka tuig ang nagligad, ang mga tawo sa Alemanya, Estados Unidos, Gran Britanya, kag Pransia ginpamangkot, “Ano ang kinahanglan agod mangin malipayon?” Sa mga gin-interbyu, 89 porsiento ang nagsiling nga kinahanglan ang isa ka maayong panglawas; 79 porsiento ang nagsambit sang makaalayaw nga pag-asawahay ukon pag-updanay; 62 porsiento ang nagpatuhoy sa mga padya sang pagkaginikanan; kag 51 porsiento ang nagapati nga ang madinalag-on nga karera amo ang kinahanglanon para sa kalipay. Kag bisan pa masami ginatudlo sa kalabanan nga tawo nga ang kuarta wala nagapasalig sing kalipay, 47 porsiento sang mga ginpamangkot ang kumbinsido nga amo ini ang makapat-od sing kalipay. Ano ang ginapakita sang mga katunayan?

Una, tan-awa ang ginasiling nga kaangtanan sang kuarta kag kalipay. Ang surbe sa isa ka gatos ka pinakamanggaranon nga mga tawo sa Estados Unidos nagapakita nga sila indi mas malipayon sangsa ordinaryo nga mga tawo. Dugang pa, bisan madamo sa Estados Unidos ang nagdoble ang materyal nga mga pagkabutang sang nagligad nga tatlo ka dekada, sa pagkamatuod indi sila mas malipayon sangsa nagligad, suno sa mga eksperto sa kapagros sa hunahuna. Sa katunayan, ang isa ka report nagsiling: “Sa amo man nga hut-ong sang tion, nagtimbuok ang kadamuon sang mga ginapung-awan. Ang paghikog sang mga tin-edyer nagtatlo ka pilo. Nagdoble ang kadamuon sang mga nagdiborsio.” Sa mga 50 ka pungsod, ang mga manugpanalawsaw nga nagtuon sang kaangtanan sang kuarta sa kalipay naghinakop nga ang kuarta indi makabakal sing kalipay.

Masunod, daw ano ka importante ang maayong panglawas, makaalayaw nga pag-asawahay, kag madinalag-on nga karera agod mangin malipayon? Bueno, kon ini nga mga butang kinahanglanon gid agod magmalipayon, kamusta naman ang minilyon ka tawo nga indi maayo ang panglawas, kag wala sing makaalayaw ang pag-asawahay? Kamusta naman ang mga mag-asawa nga wala sing anak kag ang mga lalaki kag mga babayi nga wala sing madinalag-on nga karera? Indi na bala magmalipayon ini nga mga tawo? Kag maalimunaw ayhan ang ginapangangkon nga kalipay sang mga tawo nga mapagros karon kag may makaalayaw nga pag-asawahay kon magbag-o na ang ila kahimtangan?

Nagapangita Bala Kita sa Husto nga mga Duog?

Luyag sang tanan mangin malipayon. Indi ini makatilingala kay ang Manunuga sang tawo ginlaragway subong “malipayon nga Dios,” kag ang tawo ginhimo sa dagway sang Dios. (1 Timoteo 1:​11; Genesis 1:​26, 27) Gani, natural lamang nga ang mga tawo mangita sing kalipay. Apang, nasapwan sang iban nga ang pagpanguyapot sa kalipay daw  subong sang pag-uyat sing isa ka hakop nga balas​—⁠madali lang ini madula.

Apang, indi ayhan nga sobra ang ginahimo sang iban sa pagpangita sing kalipay? Amo sini ang pagpati sang isa ka sosyal nga pilosopo nga si Eric Hoffer. Siling niya: “Ang pagpangita sing kalipay amo ang panguna nga rason sang indi pagtigayon sing kalipay.” Matuod gid ini kon nagapangita kita sing kalipay sa sayop nga mga duog. Kon amo sini, pat-od gid nga mapaslawan lamang kita kag malugaw-an. Ang pagtinguha nga mangin manggaranon; ang pagpanikasog nga mangin bantog kag mangin kilala; ang paglab-ot sa politikal, sosyal, kag materyal nga mga tulumuron; ukon ang pagkabuhi para lamang sa kaugalingon kag ang insigida nga pagpaayaw sa kaugalingon indi tanan makahatag sa aton sing kalipay. Indi katingalahan nga ginbaton sang iban ang daw wala nagasantuanay nga pagtamod sang isa ka awtor nga nagsiling: “Kon mag-untat lamang kuntani kita sa pagtinguha nga mangin malipayon mas maayo pa ang aton kahimtangan”!

Sing talalupangdon, ang surbe nga ginsambit sa umpisa sining artikulo nagapakita man nga 4 sa 10 ka tawo ang nagbatyag nga ang kalipay matigayon paagi sa paghimo sing maayo kag pagbulig sa iban. Kag 1 sa 4 ang nagpadaku nga ang pagtuo kag ang relihiosong mga pagpati amo ang may daku nga papel sa kalipay. Maathag nga kinahanglan usisaon naton sing tul-id pa kon ano gid bala ang kinahanglan agod mangin malipayon. Ang masunod nga artikulo magabulig sa aton.

[Mga retrato sa pahina 3]

Madamo ang nagapati nga ang kuarta, isa ka makaalayaw nga pamilya, ukon isa ka madinalag-on nga karera amo ang yabi sa kalipay. Nagaugyon ka bala?