Himayaa ang Dios “Paagi sa Isa ka Baba”

‘Himayaa ninyo paagi sa isa ka baba ang Dios kag Amay sang aton Ginuong Jesucristo.’​—⁠ROMA 15:6.

1. Ano nga leksion tuhoy sa pag-atubang sa nagkalainlain nga pagtamod ang ginhatag ni apostol Pablo sa mga masigkatumuluo?

INDI palareho ang gusto ukon luyag sang tanan nga Cristiano. Apang, ang tanan nga Cristiano dapat maglakat nga nahiusa sa dalanon padulong sa kabuhi. Posible bala ini? Huo, kon wala naton ginapadaku ang magagmay nga mga indi pag-ugyunay. Amo ini ang leksion nga ginhatag ni apostol Pablo sa mga masigkatumuluo sang unang siglo. Paano niya ginpaathag ining importante nga punto? Kag paano naton maaplikar ang iya inspirado nga laygay karon?

Ang Pagkaimportante sang Cristianong Paghiusa

2. Paano ginpadaku ni Pablo ang pagkinahanglan sing paghiusa?

² Nahibaluan ni Pablo nga ang Cristianong paghiusa importante, kag naghatag sia sing maayo nga laygay agod buligan ang mga Cristiano nga magpinaumuray sa isa kag isa sa gugma. (Efeso 4:​1-3; Colosas 3:​12-​14) Apang, sa tapos matukod ang madamo nga kongregasyon kag maduaw ang iban sa sulod sang kapin sa 20 ka tuig, nahibal-an niya nga mabudlay huptan ang paghiusa. (1 Corinto 1:​11-​13; Galacia 2:​11-​14) Sa amo, ginpalig-on niya ang mga masigkatumuluo sa Roma: “Kabay nga itugot sang Dios nga nagahatag sing pagbatas kag paglipay . . . nga sing may paghiusa mahimaya ninyo paagi sa isa ka baba ang Dios kag Amay sang aton Ginuong Jesucristo.” (Roma 15:​5, 6) Dapat man naton karon himayaon si Jehova nga Dios “paagi sa isa ka baba” subong nahiusa nga grupo sang iya katawhan. Tubtob sa ano nga kasangkaron naton ini himuon?

3, 4. (a) Ano ang nanuhaytuhay nga kahimtangan sang mga Cristiano sa Roma? (b) Paano ang mga Cristiano sa Roma makaalagad kay Jehova “paagi sa isa ka baba”?

³ Madamo nga mga Cristiano sa Roma ang mga abyan mismo ni Pablo. (Roma 16:​3-​16) Bisan pa indi pareho ang ila kahimtangan, ginbaton ni Pablo ang tanan niya nga mga kauturan subong “mga hinigugma sang Dios.” Sia nagsulat: “Nagapasalamat ako sa akon Dios paagi kay Jesucristo nahanungod sa inyo tanan, bangod ang inyo pagtuo ginahambalan sa bug-os nga kalibutan.” Maathag nga ang mga taga-Roma huwaran sa madamo nga paagi. (Roma 1:​7, 8; 15:14) Subong man, ang pila ka miembro sang kongregasyon may nagkalainlain nga pagtamod sa pila ka butang. Sanglit ang mga Cristiano karon naghalin sa nanuhaytuhay nga kahimtangan kag kultura, ang pagtuon sa inspirado nga laygay ni Pablo kon paano atubangon ang mga indi pag-ugyunay makabulig sa ila sa paghambal sa “isa ka baba.”

⁴ Sa Roma may yara Judiyo kag Gentil nga mga tumuluo. (Roma 4:⁠1; 11:13) Maathag nga indi mabiyaan sang pila ka Judiyong Cristiano ang pila ka kinabatasan nga naandan na nila sa idalom sang Mosaikong Kasuguan, bisan pa nahisayran nila nga ining mga buhat indi kinahanglanon sa kaluwasan. Sa pihak nga bahin, ginbaton sang pila ka Judiyong Cristiano nga ang halad ni Cristo naghilway sa ila gikan sa mga pagdumili nga ginasunod nila antes mangin mga Cristiano. Bangod sini, ginbag-o nila ang iban nila nga mga kinabatasan kag mga kustombre. (Galacia 4:​8-​11) Walay sapayan sini, subong sang ginpatalupangod ni Pablo, ang tanan “mga hinigugma sang Dios.” Ang tanan makadayaw sa Dios “paagi sa isa ka baba” kon mahuptan nila ang nagakaigo nga panghunahuna sa isa kag isa. Mahimo man nga magkatuhay ang aton mga pagtamod karon sa pila ka butang, gani dapat naton binagbinagon sing maayo kon paano  ginpaathag ni Pablo ining importante nga prinsipio.​—⁠Roma 15:4.

‘Abiabiha ang Isa kag Isa’

5, 6. Ngaa nagkalainlain ang mga pagtamod sang mga Cristiano sa kongregasyon sa Roma?

⁵ Sa iya sulat sa mga taga-Roma, ginsambit ni Pablo ang isa ka kahimtangan tuhoy sa pagkananuhaytuhay sang mga opinyon. Sia nagsulat: “Ang isa ka tawo may pagtuo nga makakaon sang tanan nga butang, apang ang tawo nga maluya nagakaon sing mga utan.” Ngaa amo sini? Bueno, sa idalom sang Mosaikong Kasuguan, ang karne sang baboy isa ka ginadilian nga pagkaon. (Roma 14:⁠2; Levitico 11:7) Apang, ini nga Kasuguan wala na ginpatuman sang napatay si Jesus. (Efeso 2:15) Nian, pagligad sang tatlo ka tuig kag tunga nga napatay si Jesus, ginsilingan sang isa ka anghel si apostol Pedro nga sa pagtamod sang Dios wala na sing kalan-on ang dapat tamdon nga mahigko. (Binuhatan 11:​7-​12) Bangod sini, mahimo nga naghunahuna ang pila ka Judiyong Cristiano nga makakaon na sila sang karne sang baboy​—⁠ukon makakaon na sang iban pa nga kalan-on nga gindumili sa idalom sang Kasuguan.

⁶ Apang, ang paghunahuna pa lang nga magkaon sining di-matinlo anay nga mga kalan-on mahimo nga makangilil-ad na para sa iban nga Judiyong mga Cristiano. Ining mga sensitibo mahimo nga masaklaw gid kon makita nila nga ang ila Judiyong mga kauturan kay Cristo nagakaon sining mga kalan-on. Dugang pa, ang pila ka Gentil nga Cristiano, nga ang ila anay relihion ayhan wala gid sing ginadumili nga kalan-on, mahimo nga maligban nga ginabaisan ang tuhoy sa kalan-on. Sa pagkamatuod, indi sayop nga ang isa indi magkaon sang pila ka kalan-on, basta wala lang niya ginapilit nga ining indi pagkaon kinahanglanon agod maluwas. Apang, ang nagkalainlain nga pagtamod mahimo bangdan sang kagumon sa kongregasyon. Dapat maghalong ang mga Cristiano sa Roma nga ining mga indi pag-ugyunay wala nagaupang sa ila nga himayaon ang Dios “paagi sa isa ka baba.”

7. Ano anay ang nagkalainlain nga pagtamod may kaangtanan sa pagkabig sa isa ka adlaw nga pinasahi kada semana?

⁷ Naghatag si Pablo sing ikaduha nga halimbawa: “Ginahusgahan sang isa ka tawo ang isa ka adlaw nga labaw sa iban; ginahusgahan sang isa pa ka tawo ang isa ka adlaw subong sang tanan nga iban pa.” (Roma 14:5a) Sa idalom sang Mosaikong Kasuguan, wala sing hilikuton nga dapat himuon sa Inugpahuway. Bisan ang paglakbay ginadumilian gid sa amo nga adlaw. (Exodo 20:​ 8-​10; Mateo 24:20; Binuhatan 1:12) Apang, sang gindula na ang Kasuguan, ining mga pagdumili wala na ginpatuman. Ang iban nga Judiyong mga Cristiano mahimo nga indi gihapon mahim-os tuhoy sa paghimo sing bisan ano nga hilikuton ukon sa paglakbay sing malayo sa adlaw nga gintamod nila anay nga sagrado. Bisan sang nangin Cristiano na sila, mahimo nga gintigana nila ang ikapito nga adlaw para lamang sa espirituwal nga mga katuyuan, bisan pa nga sa pagtamod sang Dios ang Inugpahuway wala na ginapatuman. Nagsayop bala sila sa paghimo sini? Wala, kon wala sila mag-insister nga ang Inugpahuway ginapatuman gihapon sang Dios. Gani, bilang pagpasunaid sa konsiensia sang iya Cristianong mga kauturan, si Pablo nagsulat: “Ang tagsa ka tawo mangin kumbinsido sing bug-os sa iya kaugalingon nga hunahuna.”​—⁠Roma 14:5b.

8. Bisan pa dapat sila magpakita sing pasunaid sa konsiensia sang iban, ano ang indi dapat himuon sang mga Cristiano sa Roma?

⁸ Walay sapayan sini, bisan pa ginpalig-on ni Pablo ang iya mga kauturan nga magpasunaid sa mga may maluya nga konsiensia, matigdas nga ginpakamalaut ni Pablo ang mga nagtinguha nga piliton ang mga masigkatumuluo nga sundon ang Mosaikong Kasuguan agod maluwas. Halimbawa, sang mga 61 C.⁠E., ginsulat ni Pablo ang tulun-an nga Hebreo, isa ka epektibo nga sulat sa Judiyong mga Cristiano nga nagapaathag sing maayo nga ang pagsunod sa Mosaikong Kasuguan wala sing kabilinggan bangod ang mga Cristiano may labaw pa nga paglaum pasad sa halad nga gawad ni Jesus.​—⁠Galacia 5:​1-​12; Tito 1:​10, 11; Hebreo 10:​1-​17.

9, 10. Ano ang dapat likawan nga himuon sang mga Cristiano? Ipaathag.

⁹ Subong sang nakita na naton, nangatarungan si Pablo nga ang nagkalainlain nga pagpili indi kinahanglan nga mangin makatalagam sa paghiusa kon wala sing klaro nga paglapas sa Cristianong mga prinsipio. Gani, ginpamangkot ni Pablo ang mga Cristiano nga may maluya nga konsiensia: “Ngaa ginahusgahan mo ang imo utod?” Kag ginpamangkot niya ang mga mabakod (ayhan ang mga ginatugutan sang ila konsiensia nga magkaon sing mga kalan-on nga gindumili sa idalom sang Kasuguan ukon maghimo sing sekular nga hilikuton sa Inugpahuway): “Ngaa ginatamay mo man ang imo utod?” (Roma 14:10) Suno kay Pablo, indi dapat pakamalauton sang mga Cristiano nga may maluya nga konsiensia ang ila mga kauturan nga may mas masangkad nga pagtamod. Subong man, indi dapat tamayon sang mabakod nga mga Cristiano ang mga may maluya nga konsiensia sa pila ka bahin. Dapat tahuron sang tanan ang nagakaigo nga mga motibo sang iban kag “indi maghunahuna sing labaw sa dapat [nila] hunahunaon sa [ila] kaugalingon.”​—⁠Roma 12:​3, 18.

¹⁰ Ginpaathag ni Pablo ang timbang nga pagtamod sa sining paagi: “Ang nagakaon indi magtamay sa wala nagakaon, kag ang wala nagakaon indi maghusgar sa nagakaon, kay nabaton na sia sang Dios.” Nagsiling pa sia: ‘Ginbaton man kita ni Cristo, tungod sa himaya sang Dios.’ Sanglit ang mabakod kag maluya ginabaton sang Dios  kag ni Cristo, dapat man kita mangin mahinangpanon kag ‘batunon ang isa kag isa.’ (Roma 14:⁠3; 15:7) Sin-o ang indi magaugyon sa sini?

Ang Utudnon nga Gugma Nagaresulta sa Paghiusa Karon

11. Anong pinasahi nga kahimtangan ang nagluntad sang panahon ni Pablo?

¹¹ Sa iya sulat sa mga taga-Roma, ginsambit ni Pablo ang isa ka pinasahi nga kahimtangan. Bag-o lang gindula ni Jehova ang isa ka katipan kag nagtukod sing bag-o. Ang iban nabudlayan sa pagpasibu. Ini gid nga kahimtangan wala na nagaluntad karon, apang ang kaangay nga mga hulusayon mahimo mag-utwas kon kaisa.

12, 13. Ano ang pila ka kahimtangan nga mapakita sang mga Cristiano karon ang pagpasunaid sa konsiensia sang ila mga kauturan?

¹² Halimbawa, ang isa ka Cristianong babayi mahimo nga katapo anay sang isa ka relihion nga nagapadaku sang simple lang nga pamayo kag pamustura. Sang ginbaton niya ang kamatuoran, mahimo nabudlayan sia sa pagpasibu sa ideya nga wala ginadumili ang pagsuksok sing disente kag maduagon nga panapton sa nagakaigo nga mga okasyon ukon ang haganhagan nga pagkoloreti. Sanglit wala sing nadalahig nga prinsipio sa Biblia, indi nagakaigo nga hayluhon sang bisan sin-o ining Cristianong babayi nga supakon ang iya konsiensia. Sa amo man nga tion, narealisar niya nga indi niya dapat mulayon ang Cristianong mga babayi nga ginatugutan sang ila konsiensia sa paggamit sining mga butang.

¹³ Binagbinaga ang isa pa ka halimbawa. Ang isa ka Cristianong lalaki mahimo nagdaku sa kahimtangan nga ang paggamit sing alkohol wala ginatugot. Sang matun-an niya ang kamatuoran, nahibaluan niya ang pagtamod sang Biblia nga ang alak isa ka dulot gikan sa Dios kag mahimo gamiton sing haganhagan. (Salmo 104:15) Ginbaton niya ini nga pagtamod. Walay sapayan sini, bangod sang iya gindak-an, ginpakamaayo niya nga likawan sing bug-os ang alkoholiko nga mga ilimnon, apang wala niya ginamulay ang mga nagagamit sini sing haganhagan. Sa amo ginaaplikar niya ang mga pinamulong ni Pablo: “Tinguhaon naton ang mga butang nga nagadala sing paghidait kag ang mga butang nga makapalig-on sa isa kag isa.”​—⁠Roma 14:19.

14. Sa ano nga mga kahimtangan maaplikar sang mga Cristiano ang laygay ni Pablo sa mga taga-Roma?

¹⁴ Ang iban nga mga kahimtangan nagautwas nga nagakinahanglan sing pag-aplikar sang laygay ni Pablo sa mga taga-Roma. Ang Cristianong kongregasyon ginatapuan sang madamo nga indibiduwal, kag nagkalainlain ang ila naluyagan. Gani, mahimo nga nagkalainlain ang ila gusto​—⁠halimbawa, may kaangtanan sa pamayo kag pamustura. Sa pagkamatuod, ang Biblia nagahatag sing maathag nga mga prinsipio nga ginasunod sang tanan nga sinsero nga Cristiano. Wala sing isa sa aton ang dapat magsuksok sing panapton ukon magpili sing mga estilo sang buhok nga di-kinaandan ukon di-maugdang ukon nagapakilala sa aton upod sa indi maayo nga mga elemento sang kalibutan. (1 Juan 2:​15-​17) Ginadumdom sang mga Cristiano nga sa tanan nga tion, bisan pa kon nagalingawlingaw sila, mga ministro sila nga nagatiglawas sa Soberano sang Uniberso. (Isaias 43:10; Juan 17:16; 1 Timoteo 2:​9, 10) Apang, sa madamo nga bahin may madamong maayo nga mapilian ang mga Cristiano.⁠ *

Likawi nga Masandad ang Iban

15. Para sa kaayuhan sang iya mga kauturan, sa ano nga mga kahimtangan nga ang isa ka Cristiano dapat maglikaw sa paghimo sang iya mga kinamatarong?

¹⁵ May isa pa ka importante nga prinsipio nga ginpatalupangod si Pablo sa aton sa iya laygay sa mga Cristiano sa Roma. Kon kaisa, ang isa ka Cristiano nga may nahanas sing maayo nga konsiensia mahimo maglikaw sa paghimo sing isa ka butang nga indi man gid sayop. Ngaa? Bangod nakahisayod sia nga kon himuon niya ang isa ka butang mahimo ini makahalit sa iban. Sa sini nga kahimtangan, ano ang dapat naton himuon? Si Pablo nagsiling: “Maayo nga indi magkaon sing unod ukon mag-inom sing alak ukon maghimo sing bisan ano nga butang nga nagapasandad sa imo utod.” (Roma 14:​14, 20, 21) Sa amo, “kita nga mabakod dapat magpas-an sang mga kaluyahon sang mga indi mabakod, kag indi magpahamuot sa aton kaugalingon. Pahamut-an sang kada isa sa aton ang iya isigkatawo sa kon ano ang maayo sa pagpalig-on  sa iya.” (Roma 15:​1, 2) Kon ang aton ginahimo nagatublag sang konsiensia sang aton masigka-Cristiano, ang utudnon nga gugma magapahulag sa aton nga mangin mapatugsilingon kag likawan ang paghimo sini nga butang. Ang isa ka halimbawa sini amo ang paggamit sing alkoholiko nga mga ilimnon. Ang isa ka Cristiano ginatugutan sa pag-inom sing alak sing haganhagan. Apang kon ang paghimo sini mahimo magpasandad sa iya kaupod, indi niya pag-ipilit ang iya kinamatarong.

16. Paano kita makapakita sing pasunaid sa mga tawo sa aton teritoryo?

¹⁶ Ini nga prinsipio maaplikar man sa aton pagpakig-angot sa mga tawo sa gua sang Cristianong kongregasyon. Halimbawa, mahimo nagapuyo kita sa isa ka lugar diin ang dominante nga relihion nagatudlo sa mga sumulunod sini nga tamdon ang isa ka adlaw sang semana subong adlaw nga inugpahuway. Bangod sini, agod indi masandad ang aton mga kaingod kag mangin kabangdanan agod balabagan ang hilikuton nga pagbantala, likawan naton kon posible ang paghimo sing bisan anong butang sa amo nga adlaw nga magapaakig sa aton mga kaingod. Sa isa pa ka kahimtangan, ang isa ka manggaranon nga Cristiano mahimo magsaylo agod mag-alagad diin may daku nga kinahanglanon sa isa ka lugar nga imol ang mga tawo. Ayhan luyag niya magpakita sing pasunaid sa iya bag-o nga mga kaingod paagi sa pagpamayo kag pagpangabuhi sing simple.

17. Ngaa rasonable nga hunahunaon ang iban kon nagahimo kita sing mga desisyon?

¹⁷ Rasonable bala nga magpaabot nga ang “mga mabakod” maghimo sini nga mga pagpasibu? Bueno, hunahunaa ining ilustrasyon: Samtang nagamaneho sa haywey, nakita naton sa unhan ang pila ka kabataan nga makatalagam nga nagalakat sa higad sang karsada. Padayon bala kita nga magpaburhot sa pagpadalagan bangod may legal nga kinamatarong kita sa paghimo sini? Indi, magamenor kita agod malikawan ang katalagman sa mga kabataan. Kon kaisa, ang kaanggid nga kahanda sa paghinay, ukon pagpasunaid, kinahanglan sa aton kaangtanan sa mga masigkatumuluo ukon sa iban. Ayhan nagahimo kita sing isa ka butang nga may kinamatarong gid kita nga himuon. Wala sing nalapas nga mga prinsipio sa Biblia. Apang, kon masaklaw naton ang iban ukon mahalitan ang mga may maluya nga konsiensia, ang Cristianong gugma magapahulag sa aton nga maghalong sa aton mga ginahimo. (Roma 14:​13, 15) Ang paghupot sing paghiusa kag pagpauswag sing mga intereses sang Ginharian mas importante sangsa paghimo sang aton mga kinamatarong.

18, 19. (a) Sa pagpakita sing pasunaid sa iban, paano naton mailog ang halimbawa ni Jesus? (b) Sa ano kita tanan nagapanghikot nga nahiusa sing bug-os, kag ano ang binagbinagon sa masunod nga artikulo?

 ¹⁸ Kon nagapanghikot kita sa sining paagi, ginasunod naton ang labing maayo nga halimbawa. Si Pablo nagsiling: “Bisan si Cristo wala magpahamuot sa iya kaugalingon; kundi subong sang nasulat: ‘Ang mga pasipala sang mga nagpasipala sa imo nagtupa sa akon.’” Handa si Jesus sa paghalad ukon sa pagsakripisyo sang iya kabuhi para sa aton. Pat-od nga handa man kita nga isakripisyo ang pila sang aton mga kinamatarong kon magabulig ini sa “mga indi mabakod” nga himayaon ang Dios upod sa aton. Sa pagkamatuod, ang pagpakita sing maabiabihon kag maalwan nga panimuot sa mga Cristiano nga may maluya nga konsiensia​—⁠ukon kinabubut-on nga ginalikawan ang paghimo sing mga butang kag wala nagainsister sang aton mga kinamatarong​—⁠nagapakita sang “amo man nga panimuot sang hunahuna nga yara kay Cristo Jesus.”​—⁠Roma 15:1-5.

¹⁹ Bisan pa ang aton pagtamod sa mga butang diin wala sing nadalahig nga mga prinsipio sa Kasulatan mahimo nga indi magkapareho, kon tuhoy sa pagsimba, nagapanghikot kita nga nahiusa sing bug-os. (1 Corinto 1:10) Halimbawa, ini nga paghiusa makita sa aton reaksion sa mga nagapamatok sa matuod nga pagsimba. Ginatawag sang Pulong sang Dios ining mga nagapamatok nga mga estranghero kag ginapaandaman kita nga mag-andam sa “tingog sang mga estranghero.” (Juan 10:5) Paano naton makilala ini nga mga estranghero? Ano dapat ang aton reaksion sa ila? Ini nga mga pamangkot binagbinagon sa masunod nga artikulo.

[Nota]

Paano Mo Sabton?

• Ngaa ang nagkalainlain nga pagtamod sa personal nga mga butang indi makatalagam sa paghiusa?

• Subong mga Cristiano, ngaa dapat kita magpakita sing mahigugmaon nga pasunaid sa isa kag isa?

• Ano ang pila ka paagi nga maaplikar naton ang laygay ni Pablo tuhoy sa paghiusa karon, kag ano ang magapahulag sa aton sa paghimo sini?

[Mga Pamangkot sa Pagtinuon]

[Retrato sa pahina 9]

Ang laygay ni Pablo tuhoy sa paghiusa importante para sa kongregasyon

[Retrato sa pahina 10]

Ang mga Cristiano nahiusa walay sapayan sang ila nagkalainlain nga kahimtangan

[Retrato sa pahina 12]

Ano na ang dapat himuon sini nga drayber?