Kon Ano Gid ang Kinahanglan Agod Mangin Malipayon

SI Jehova, ang “malipayon nga Dios,” kag si Jesucristo, ang “malipayon kag lamang nga Manuggahom,” ang nakahibalo gid kon ano ang kinahanglanon agod mangin malipayon. (1 Timoteo 1:​11; 6:15) Busa, indi makatilingala nga ang yabi sa kalipay masapwan sa Pulong sang Dios, ang Biblia.​​—⁠Bugna 1:⁠3; 22:⁠7.

Sa iya bantog nga Sermon sa Bukid, ginlaragway ni Jesus kon ano ang kinahanglan agod mangin malipayon. Sia nagsiling: “Malipayon ang mga” (1) mahunahunaon sang ila espirituwal nga kinahanglanon, (2) nagalalaw, (3) malulo, (4) ginagutom kag ginauhaw sa pagkamatarong, (5) maluluy-on, (6) putli sing tagipusuon, (7) mahidaiton, (8) ginahingabot tungod sa pagkamatarong, kag (9) ginapakahuy-an kag ginahingabot tungod sa iya.​—⁠Mateo 5:3-11.⁠ *

Sibu Bala ang Ginsiling ni Jesus?

Ang pagkamaminatud-on sang pila sang ginsiling ni Jesus nagakinahanglan sing diutay nga paathag. Sin-o ang indi mag-ugyon nga ang isa ka malulo, maluluy-on, kag mahidaiton nga tawo mas malipayon sangsa maakigon, palaaway kag walay kaluoy nga tawo?

Apang, mahimo matingala kita kon paano matawag nga malipayon ang mga tawo nga ginagutom kag ginauhaw sa pagkamatarong ukon nagalalaw.  Ining mga tawo may realistiko nga pagtamod sa mga kahimtangan sa kalibutan. “Nagapanghayhay [sila] kag nagabakho sa tanan nga kalangil-aran nga ginahimo” sa aton panahon. (Ezequiel 9:4) Ini nga butang wala nagapahalipay sa ila. Apang, sang matun-an nila ang katuyuan sang Dios nga paluntaron niya ang matarong nga mga kahimtangan sa duta kag hatagan sing hustisya ang mga ginapigos, nangin malipayon gid sila katama.​​—⁠Isaias 11:4.

Ang ila gugma sa pagkamatarong nagapahulag man sa mga tawo nga maglalaw bangod sang ila sulitsulit nga mga kasaypanan. Busa mahunahunaon sila sang ila espirituwal nga kinahanglanon. Ining mga tawo handa magpatuytoy sa Dios bangod nakahibalo sila nga sia lamang ang makabulig sa mga tawo sa paglandas sang ila mga kaluyahon.​​—⁠Hulubaton 16:​3, 9; 20:24.

Ang mga tawo nga nagalalaw, ang mga ginagutom kag ginauhaw sa pagkamatarong, kag ang mga mahunahunaon sang ila espirituwal nga kinahanglanon nakahibalo sang importansia sang pagtigayon sing maayo nga kaangtanan sa Manunuga. Ang maayo nga kaangtanan sa mga tawo nagahatag sing kalipay, apang mas daku nga kalipay ang mahatag sang isa ka maayo nga kaangtanan sa Dios. Huo, ang serioso nga mga nagahigugma sa kon ano ang matarong, nga handa magbaton sa panuytoy sang Dios, matawag gid nga malipayon.

Apang, mahimo mabudlayan ka magpati nga puede mangin malipayon ang isa nga ginahingabot kag ginapakahuy-an. Apang, matuod gid ini, bangod si Jesus mismo ang nagsiling sini. Bueno, paano dapat hangpon ang iya ginsiling?

Ginahingabot Apang Malipayon—⁠Paano Ina Mangin Posible?

Talupangda nga wala nagsiling si Jesus nga ang pagpakahuya kag paghingabot amo ang magadul-ong sa kalipay. Sia nagsiling: “Malipayon ang mga ginahingabot tungod sa pagkamatarong, . . . kon ginapakahuy-an kamo sang mga tawo kag ginahingabot kamo . . . tungod sa akon.” (Mateo 5:​10, 11) Gani ang kalipay matigayon lamang kon ang isa ka tawo ginapakahuy-an bangod nangin sumulunod sia ni Cristo kag bangod ginpahisuno niya ang iya kabuhi sa matarong nga mga prinsipio nga gintudlo ni Jesus.

Ginailustrar ini sang natabo sa una nga mga Cristiano. Ang mga katapo sang Sanhedrin, ang mataas nga hukmanan sang mga Judiyo, ‘nagpatawag sa mga apostoles, ginbunal sila, kag ginmanduan sila nga mag-untat na sa paghambal pasad sa ngalan ni Jesus, kag ginbuhian sila.’ Ano ang nangin reaksion sang mga apostoles? “Busa, naghalin sila sa atubangan sang Sanhedrin, nga nagakalipay bangod naisipan sila nga takus nga pakahuy-an tungod sa iya ngalan. Kag sa adlaw-adlaw sa templo kag sa balaybalay nagpadayon sila nga walay untat sa pagpanudlo kag sa pagpahayag sing maayong balita nahanungod kay Cristo, si Jesus.”​—⁠Binuhatan 5:40-42; 13:​50-​52.

Si apostol Pedro naghatag sing dugang nga kasanagan sa kaangtanan sang pagpakahuya kag kalipay. Nagsulat sia: “Kon ginapakahuy-an kamo tungod sa ngalan ni Cristo, malipayon kamo, bangod ang espiritu sang himaya, bisan ang espiritu sang Dios, yara sa inyo.” (1 Pedro 4:14) Huo, ang pag-antos subong Cristiano bangod sa paghimo sing matarong, bisan pa inang pag-antos makaulugot, nagapatubas sing kalipay sa paghibalo nga ang isa nakabaton sing balaan nga espiritu sang Dios. Ano ang kaangtanan sang espiritu sang Dios sa kalipay?

Mga Buhat sang Unod Ukon mga Bunga sang Espiritu?

Ang balaan nga espiritu sang Dios nagapabilin lamang sa mga nagatuman sa Dios subong manuggahom. (Binuhatan 5:32) Wala ginahatag ni Jehova ang iya espiritu sa mga nagahimo sing “mga buhat sang unod.” Ini nga mga buhat amo ang “pagkamakihilawason, pagkadimatinlo, malaw-ay nga paggawi, idolatriya, pagbuhat sing espiritismo, mga pag-ilinaway, pagpinuyas, kaimon, mga pagsilabo sang kaakig, mga pagbaisay, mga pagbinahinbahin, mga sekta, mga pagkahisa, mga paghuboghubog, magansal nga kinalipay, kag mga butang nga kaangay sini.” (Galacia 5:19-21) Matuod, kinaandan na lamang sa kalibutan karon “ang mga buhat sang unod.” Apang, ang mga nagahimo sini wala nagaagom sing matuod kag permanente nga kalipay. Sa baylo, ang paghimo sini nga mga butang nagaguba sang maayo nga kaangtanan sang isa sa iya mga paryente, mga abyan, kag mga kakilala.  Dugang pa, ang Pulong sang Dios nagasiling nga ang mga “nagabuhat sining mga butang indi makapanubli sing ginharian sang Dios.”

Sa kabaliskaran, ginahatag sang Dios ang iya espiritu sa mga nagapalambo sang “mga bunga sang espiritu.” Ang mga kinaiya nga nalakip sa sining mga bunga amo ang “gugma, kalipay, paghidait, pagkamapinasensiahon, pagkamainayuhon, pagkaayo, pagtuo, kalulo, pagpugong sa kaugalingon.” (Galacia 5:​22, 23) Kon ginapakita naton ining mga kinaiya, makatigayon kita sing maayo nga kaangtanan sa iban kag sa Dios nga magaresulta sa matuod nga kalipay. (Tan-awa ang kahon.) Labing importante, paagi sa pagpakita sing gugma, pagkamainayuhon, pagkaayo, kag iban pa nga diosnon nga mga kinaiya, mapahamut-an naton si Jehova kag makatigayon kita sing malipayon nga paglaum nga maagom ang kabuhi nga walay katapusan sa bag-ong kalibutan sang pagkamatarong sang Dios.

Ang Kalipay Isa ka Pagpili

Sang si Wolfgang kag si Brigitte, isa ka mag-asawa nga taga-Alemanya, nagsugod sa pagtuon sa Biblia sing serioso, madamo sila anay sing materyal nga mga butang nga ginahunahuna sang mga tawo nga kinahanglanon agod mangin malipayon. Hoben pa sila kag mapagros. Nagabiste sila sing malahalon, nagaistar sila sa matahom nga puluy-an, kag may madinalag-on nga negosyo. Ginhinguyang nila ang kalabanan nila nga tion sa pagpangita sing materyal nga mga butang, apang wala ini nakahatag sa ila sing matuod nga kalipay. Apang, sang ulihi, naghimo si Wolfgang kag si Brigitte sing isa ka importante nga pagpili. Nagsugod sila sa paghinguyang sing kapin nga tion kag panikasog sa paglab-ot sa espirituwal nga mga butang kag nangita sing mga paagi nga magsuod pa kay Jehova. Wala magdugay ang ila pagpili nagbag-o sang ila panimuot, kag nagpahulag sa ila nga pasimplehon ang ila kabuhi kag mag-alagad subong mga payunir, ukon bug-os tion nga mga manugbantala sang Ginharian. Sa karon, nagaalagad sila subong mga boluntaryo sa sanga talatapan sang mga Saksi ni Jehova sa Alemanya. Dugang pa, nagatuon sila sing isa ka lenguahe sa Asia agod mabuligan ang mga dumuluong nga makatuon sing kamatuoran nga masapwan sa Pulong sang Dios, ang Biblia.

Nakasapo bala ining mag-asawa sing matuod nga kalipay? Si Wolfgang nagsiling: “Sugod sang nangin masako kami sa espirituwal nga mga butang, nangin mas malipayon kami kag mas naayawan. Ang pag-alagad kay Jehova sing bug-os tagipusuon nagpabakod man sang amon pag-asawahay. Malipayon ang amon pag-asawahay sang una, apang may mga obligasyon kami kag mga  intereses nga nagabutong sa amon sa magkatuhay nga mga tulumuron. Karon pareho na ang amon tulumuron.”

Ano Bala ang Kinahanglan Agod Mangin Malipayon?

Sa malip-ot nga hambal: Likawi “ang mga buhat sang unod,” kag palambua “ang mga bunga sang espiritu” sang Dios. Agod mangin malipayon, dapat handumon sang isa ang suod nga kaangtanan sa Dios. Ang tawo nga nagatinguha sini nagasigo sa ginlaragway ni Jesus nga isa ka malipayon nga tawo.

Busa, indi paghunahunaa nga indi mo gid matigayon ang kalipay. Mahimo, nga indi maayo ang imo panglawas karon ukon may problema ka sa imo pag-asawahay. Ayhan wala ka na sing tsansa nga mangin isa ka ginikanan ukon mahimo nagapanikasog ka sa pagpangita sing isa ka madinalag-on nga karera. Mahimo nga indi na puno ang imo kahita kaangay sang una. Walay sapayan, magpakaisog ka; wala sing rason nga madulaan ka sing paglaum! Lubaron sang paggahom sang Ginharian sang Dios ining mga problema kag ang ginatos pa ka problema. Sa pagkamatuod, sa dili na lang madugay tumanon ni Jehova nga Dios ang iya saad nga ginpabutyag sang salmista: “Ang imo ginharian dayon nga ginharian . . . Ginahumlad mo ang imo kamot kag ginabusog ang handum sang tagsa ka butang nga buhi.” (Salmo 145:​13, 16) Subong sang sarang mapamatud-an sang minilyon ka alagad ni Jehova sa bug-os nga kalibutan, ang pagdumdom sa sining makapalig-on nga mga saad ni Jehova makahatag gid sing daku nga kalipay sa imo karon.​—⁠Bugna 21:3.

[Nota]

[Kahon/Retrato sa pahina 6]

Mga Butang nga Makapahalipay

Ang gugma nagapahulag sa iban nga higugmaon ka man.

Ang paghidait nagabulig sa imo nga mangin maayo ang imo relasyon sa iban.

Ang pagkamapinasensiahon nagabulig sa imo nga mangin malipayon gihapon bisan may pagtilaw.

Ang pagkamainayuhon nagaganyat sa iban nga makigsuod sa imo.

Ang imo pagkaayo magapahulag sa iban sa pagbulig sa imo kon nagakinahanglan ka sing bulig.

Ang pagtuo magapasalig sa imo nga mahigugmaon nga tuytuyan ikaw sang Dios.

Ang kalulo magahatag sa imo sing kalmado nga tagipusuon, hunahuna, kag lawas.

Ang pagpugong sa kaugalingon nagakahulugan nga magadiutay ang imo mga sayop.

[Mga retrato sa pahina 7]

Agod mangin malipayon, dapat mo busgon ang imo espirituwal nga mga kinahanglanon