Kon Paano Malandas ang Pagluya sing Buot

NALUYAHAN ka bala? Sa sining di-pat-od kag magamo nga tion, madamo ang naluyahan sing buot. Naluyahan ang iban bangod wala sila sing trabaho. Ginalandas sang iban ang kahimtangan nga resulta sang isa ka aksidente. Ginabatas naman sang iban ang mga problema sa pamilya, malubha nga balatian, ukon kasubo.

Kon naluyahan ka, diin ka mangayo sing bulig? Madamo sa bug-os nga kalibutan ang nalugpayan paagi sa pagbasa sang Pulong sang Dios, ang Biblia. Ginpasalig sila sang ginsiling ni apostol Pablo: “Pakamaayuhon ang Dios kag Amay sang aton Ginuong Jesucristo, ang Amay nga may mapinalanggaon nga kaluoy kag ang Dios nga may bug-os nga paglugpay, nga nagalugpay sa amon sa tanan namon nga kapipit-an.” (2 Corinto 1:​3, 4) Tilawi bala nga basahon ini kag ang iban pa nga mga teksto sa imo mismo Biblia. ‘Magalipay ini sang imo tagipusuon kag magapalig-on sa imo.’​—⁠2 Tesalonica 2:17.

Makabaton man kita sing bulig agod malandas ang pagluya sing buot paagi sa pagpakig-upod sa mga nagaalagad kay Jehova. Ang Hulubaton 12:25 nagasiling: “Ang kabalaka sa tagipusuon sang isa ka tawo magapakuko sini, apang ang maayong pulong nagapasadya sini.” Kon nagatambong kita sa Cristianong mga miting, mabatian naton ining “maayong pulong,” nga “matam-is sa kalag kag ikaayo sa mga tul-an.” (Hulubaton 16:24) Tilawi bala nga magtambong sa isa ka miting sa Kingdom Hall sang mga Saksi ni Jehova agod maeksperiensiahan mo mismo nga mapabakod sini nga pagtililipon.

Mabuligan man ikaw sang pangamuyo. Kon daw indi mo na masarangan ang mga kabalaka sa kabuhi, isugid ang imo ginabatyag sa “Nagapamati sa pangamuyo.” (Salmo 65:2) Mas nahangpan kita sang aton Manunuga, si Jehova nga Dios, sangsa aton kaugalingon. Makasalig kita sa iya bulig. Ang iya Pulong nagasaad: “Ihaboy ang imo lulan kay Jehova, kag sia gid magaalay-ay sa imo. Indi gid sia magtugot nga malingkang ang matarong.” (Salmo 55:22) Huo, “ang mga nagalaum kay Jehova maulian sing kusog.”​—⁠Isaias 40:31.

Ginhatag sa aton ni Jehova nga Dios ang tanan nga kinahanglanon nga bulig agod malandas sing madinalag-on ang pagluya sing buot. Gamiton mo bala ini?