Mga Pamangkot Gikan sa mga Bumalasa

Ngaa gintugutan ang Israelinhon nga mga lalaki nga mapangasawa ang bihag nga dumuluong nga mga babayi bisan pa gindumili sang Mosaikong Kasuguan ang pagminyo sa pila ka dumuluong?​—⁠Deuteronomio 7:1-3; 21:​10, 11.

Gintugutan ini bangod sang pinasahi nga mga kahimtangan. Ginsugo ni Jehova ang mga Israelinhon nga laglagon ang mga siudad sang pito ka pungsod sa Canaan kag patyon ang tanan nga pumuluyo sini. (Deuteronomio 20:15-18) Sa iban nga mga pungsod, ang bihag nga mga ulay amo lamang ang mahimo nga hamtong nga nakalampuwas. (Numeros 31:​17, 18; Deuteronomio 20:14) Kinahanglan anay himuon sini nga babayi ang pila ka butang antes sia mapangasawa sang isa ka Israelinhon.

Tuhoy sa mga dapat himuon sang babayi, ang Biblia nagasiling: “Kiskisan niya karon ang iya ulo kag utdan ang iya mga kuko, kag ubahon niya ang panapton sang iya pagkabihag kag magpuyo sa imo balay kag maglalaw sa iya amay kag sa iya iloy sa bug-os nga isa ka bulan; kag sa tapos sina huliran mo sia, kag panag-iyahan mo sia subong imo nobya, kag mangin asawa mo sia.”​—⁠Deuteronomio 21:​12, 13.

Ang bihag nga dalaga nga luyag pangasaw-on sang isa ka Israelinhon dapat magkiskis sang iya ulo. Ang pagkiskis sang ulo isa ka tanda sang paglalaw ukon kasubo. (Isaias 3:24) Halimbawa, sang napatay ang tanan nga anak ni patriarka Job kag nadula ang tanan niya nga pagkabutang, ginkiskisan niya ang iya ulo subong tanda sang paglalaw. (Job 1:20) Dapat man utdon sang dumuluong nga babayi ang iya mga kuko agod nga bisan pa butangan ini sing kolor, indi gihapon matahom ang iya mga kamot. Ano ang “panapton sang iya pagkabihag” nga dapat ubahon sang bihag nga babayi? Kinabatasan sang mga babayi sang mga siudad sa Canaan nga isuksok ang ila pinakamatahom nga panapton kon malapit na sila malutos. Ginahimo nila ini sa paglaum nga basi maganyat nila ang ila mananakop. Ini nga panapton ginauba kag wala na ginasuksok sang isa ka bihag nga babayi nga nagalalaw.

Ang bihag nga babayi nga buot pangasaw-on sang isa ka Israelinhon dapat maglalaw tungod sa napatay niya nga mga hinigugma sa sulod sang isa ka bulan. Ang mga siudad sa Canaan bug-os gid nga nalaglag amo nga ang iya pamilya kag mga abyan napatay na tanan. Bangod ginlaglag na sang Israelinhon nga mga soldado ang mga larawan sang iya mga dios, wala na sia sing simbahon. Ang isa ka bulan nga paglalaw mangin panahon man sang pagputli kay sa sini nga tion untatan na sang bihag nga babayi ang nagligad niya nga pagsimba.

Apang, tuhay ang kahimtangan kon tuhoy sa kalabanan sang dumuluong nga mga babayi. Tuhoy sa ila, nagsugo si Jehova: “Dili ka makig-alyansa sa pagminyo sa ila. Dili mo ihatag ang imo anak nga babayi sa iya anak nga lalaki, kag dili mo kuhaon ang iya anak nga babayi para sa imo anak nga lalaki.” (Deuteronomio 7:3) Ngaa gindumilian ini? Ang Deuteronomio 7:4 nagasiling: “Kay patalikdon niya ang imo anak sa pagsunod sa akon, kag magaalagad sila sa iban nga mga dios.” Gani, gindumilian ini agod amligan ang mga Israelinhon gikan sa butig nga relihion. Apang, ang dumuluong nga babayi sa kahimtangan nga ginlaragway sa Deuteronomio 21:10-13 indi isa ka katalagman. Patay na ang tanan niya nga paryente, kag ginlaglag na ang mga larawan nga nagarepresentar sa iya mga dios. Wala na sia sing kontak sa butig nga mga sumilimba. Tugot sa isa ka Israelinhon nga mangasawa sang isa ka dumuluong sa sini nga kahimtangan.