Indi Lamang Hampang

LUYAG gid sang mga bata maghampang. Apang “indi ini walay pulos ukon indi importante nga buhat,” paathag sang libro nga The Developing Child. “Napasad sa sini ang daku nga pag-uswag sang bata sa iya paghangop sa iya palibot.” Paagi sa paghampang, matun-an sang mga bata nga gamiton ang ila mga igbalatyag, mahangpan ang ila palibot, kag makapakig-angot sa iban.

Sugod sa edad nga apat ukon lima ka tuig, ginasunodsunod na sang mga bata ang mga adulto sa ila mga hampang. Ginsambit anay ni Jesus ang mga bata nga nagahampang. Ang iban gusto maghampang sang “kasal,” ang iban gusto sang “lubong” kag, subong sang pirme ginahimo sang mga bata, nagabaisay sila kay ang iban indi gusto mag-entra. (Mateo 11:​16, 17) Ini nga sahi sang mga hampang makapatudok sing importante nga mga katungdanan sa hunahuna sang nagadaku nga bata.

Ang mga bata sa mga retrato nagahampang sang ginahimo sang isa ka manunudlo sang Biblia kag isa ka nagatuon. Indi ini matuodtuod nga pagtuon sa Biblia, apang ang ideya sang pagpaambit sang mensahe sang Biblia maathag sa ila hunahuna. Kag importante ini nga leksion, kay ginsugo ni Jesus ang tanan niya nga sumulunod nga maghimo sing mga disipulo kag tudluan ang mga tawo nga tumanon ang tanan nga gintudlo niya sa ila.​​—⁠⁠Mateo 28:​19, 20.

Ang mga ginikanan nga ang ila kabataan luyag maghampang nga nagahiwat kuno sila sing mga pagtuon sa Biblia, nagapamulongpulong, ukon nagabantala sa pamalay dapat gid malipay. Natural lang nga ginailog sang mga bata ang makita nila nga ginahimo sang mga adulto sa palibot nila. Ginapakita sang pasad sa Biblia nga mga hampang sang mga bata nga ginapadaku sila “sa sahi sang edukasyon kag paglaygay nga luyag sang Ginuo.”​​—⁠⁠Efeso 6:​4, Charles B. Williams.

Luyag ni Jehova nga makigbahin ang mga bata sa matuod nga pagsimba. Ginsilingan niya si Moises nga pabation “ang magagmay nga mga bata” kon ginabasa ang Kasuguan. (Deuteronomio 31:12) Kon nabatyagan sang mga bata nga nadalahig sila, makita ini sa ila mga hampang. Kag ang bata nga nagahampang nga isa sia ka ministro sang Dios nagaumpisa na nga mangin isa ka ministro sang Dios.