Isa ka Palanublion nga Imo Masaligan

“KON pahibaluon ka paagi sa sulat nga may palanublion ka nga kuluhaon, mag-andam. Mahimo nga biktimahon ka sang isa ka batid nga manugtonto.”

Amo sini ang paandam sang Postal Inspection Service sa Estados Unidos sa Web site sini. Ngaa? Bangod linibo ka tawo ang nakabaton sing sulat nga nagasiling, ‘Napatay ang imo paryente kag ginbilinan ikaw sing palanublion.’ Subong resulta, madamo ang nagpadala sang bayad nga $30 ukon kapin pa para sa ‘report sang duta’ nga magapaathag kuno kon diin nahamtang ang palanublion kag kon paano ini makuha. Nalugaw-an gid sila. Ang tanan nga nagsabat nakabaton sing pareho gid nga report​​—⁠⁠kag wala gid sing tsansa nga may palanublion.

Ini nga mga pahito nagapukaw sang kinaugali nga handum sang tawo nga makapanubli. Apang, ang Biblia nagaugyon sa mga nagahatag sing palanublion sang nagsiling ini: “Ang isa nga maayo nagabilin sing palanublion sa mga anak sang mga anak.” (Hulubaton 13:22) Ang matuod, si Jesucristo mismo ang nagsiling sining bantog kag ginapakabahandi gid nga pinamulong sa iya Sermon sa Bukid: “Bulahan ang mga mapainubuson, kay sila magapanubli sang duta.”​​—⁠⁠Mateo 5:​5, Ang Biblia, Philippine Bible Society.

Ang mga pinamulong ni Jesus nagapahanumdom sa aton sang ginsulat sang inspirado nga si Hari David sang dumaan nga Israel siniglo antes sini: “Ang mapainubuson magapanubli sang duta, kag magakalipay sila sa kabuganaan sang paghidait.”​​—⁠⁠Salmo 37:​11, PBS.

“Magapanubli sang duta”​​—⁠⁠daw ano ka makakulunyag nga palaabuton! Apang mapat-od bala naton nga indi lamang ini isa pa ka malalangon nga padugi nga gindesinyo sa pagtonto sa mga tawo? Huo, mapat-od naton. Bangod ang duta bahin sang makatilingala nga tinuga ni Jehova, sia subong ang Manughimo kag Tag-iya may legal nga kinamatarong sa paghatag sini subong palanublion kay bisan sin-o nga pilion niya. Paagi kay Hari David, nagsaad sing matagnaon si Jehova sa Iya pinalangga nga Anak, si Jesucristo: “Mangayo ka sa akon, agod nga ihatag ko sa imo ang mga pungsod subong palanublion mo kag ang kaukbungan sang duta subong imo kaugalingon nga pagkabutang.” (Salmo 2:8) Bangod sini, si apostol Pablo naglaragway kay Jesus subong ang isa nga ‘gintangdo sang Dios nga manunubli sang tanan nga butang.’ (Hebreo 1:2) Busa, makasalig gid kita nga sang nagsiling si Jesus nga ang mapainubuson “magapanubli sang duta,” bunayag gid sia, kag may nagakaigo sia nga awtoridad sa pagtuman sang iya saad.​​—⁠⁠Mateo 28:18.

Busa ang importante nga pamangkot amo, Paano magmatuod ini nga saad? Bisan diin kita magtulok karon, daw subong bala nga ang mga agresibo kag matinaastaason amo ang nagamadinalag-on kag nagakuha sang luyag nila. Ano ang mabilin sa mga mapainubuson?  Dugang pa, ang duta puno sang daku nga mga problema sa polusyon, kag ang manggad sini ginahimuslan sang mga mahamkunon kag makitid sing panghunahuna. May duta pa bala nga takus panublion? Ginaagda ka namon nga basahon ang masunod nga artikulo agod mahibaluan ang sabat sa sini kag sa iban pa nga importante nga mga pamangkot.

[Retrato sa pahina 3]

Mabaton mo bala ang matuod nga palanublion?