Report sang mga Manugbantala sang Ginharian

Isa ka Sulat Halin kay Alejandra

ANG pagsulat madugay na nga epektibo nga paagi sa pagpanaksi. Bisan pa nga kon kaisa daw indi pat-od ang resulta, yadtong padayon nga nagagamit sining paagi ginpadyaan sing bugana. Ginadumdom nila ang maalam nga laygay sang Biblia: “Sa kaagahon isab-ug ang imo binhi kag tubtob sa gab-i dili pagpapahuwaya ang imo kamot; kay wala ka makahibalo kon diin ini magauswag, kon diri ukon dira, ukon kon ang duha mangin alangay nga maayo.”​​—⁠⁠Manugwali 11:6.

Si Alejandra, isa ka lamharon nga Saksi nga nagaalagad sa sanga talatapan sang mga Saksi ni Jehova sa Mexico sa sulod sang mga napulo ka tuig, gina-chemotherapy bangod sang kanser. Naglubha ang iya kahimtangan, kag nagluya sia amo nga indi na niya mahimo ang iya matag-adlaw nga hilikuton. Apang, bangod indi niya luyag nga mapatumbayaan ang iya ministeryo, namat-od si Alejandra nga magsulat. Nagsulat sia tuhoy sa wala bayad nga kahimusan sa pagtuon sa Biblia kag ginlakip niya ang numero sang telepono sang iya iloy. Ginhatag niya dayon ang mga sulat sa iya iloy agod ibilin sang iya iloy sa mga puluy-an nga wala sing tawo samtang nagapamalaybalay sia.

Samtang, si Diojany, nga isa ka dalagita gikan sa Guatemala, nagtrabaho sa Cancún, Mexico subong kabulig sa balay. Samtang didto sia, nakapakig-angot sia sa mga Saksi ni Jehova kag naluyagan niya ang mga paghinun-anon sa Biblia upod sa ila. Sang ulihi, namat-od ang iya mga amo nga magsaylo sa Mexico City kag luyag nila nga updon sia. Nangalag-ag si Diojany nga mag-upod bangod indi na niya mapakig-angutan ang mga Saksi ni Jehova.

“Indi ka magkabalaka,” pasalig sang iya mga amo, “may mga Saksi bisan diin. Pangitaon naton dayon sila kon didto na kita.” Bangod sining makalilipay nga posibilidad, nagpasugot si Diojany nga mag-upod sa ila. Sang sa Mexico City na sila, ginpangita sang mga amo ni Diojany ang mga Saksi. Bangod sang pila ka rason, wala nila masalapuan ang mga Saksi, bisan pa nga may kapin sa 41,000 ka Saksi kag 730 ka kongregasyon sa sina nga siudad.

Wala magdugay, nagluya ang buot ni Diojany bangod wala na niya mapakig-angutan ang mga Saksi agod padayunon ang ila paghambalanay sa Biblia. Isa ka adlaw, ang iya amo nga babayi nagpalapit sa iya, kag nagsiling: “Isa gid ka sorpresa! Nabatian sang imo Dios ang imo mga pangamuyo.” Ginadaho kay Diojany ang isa ka sulat, sia nagsiling: “Ginbilin ini nga sulat sang mga Saksi para sa imo.” Sulat ini halin kay Alejandra.

Nakig-angot si Diojany sa iloy ni Alejandra kag sa iya utod nga babayi nga si Blanca, kag nagtuon sia sa Biblia. Pagligad sang pila ka semana, nagkitaay si Diojany kag si Alejandra kag makalilipay gid yadto. Ginpalig-on sia ni Alejandra nga magpadayon sa iya pagtuon sa Biblia agod mag-uswag sia sa espirituwal.

Pila ka bulan sang ulihi, sang Hulyo 2003, napatay si Alejandra, nagabilin sing maayo nga halimbawa sang pagtuo kag kaisog sa iya mga masigkatumuluo. Sa lubong, madamo gid ang natandog sang nasugilanon nila si Diojany kag nabatian nga nagsiling: “Isa gid ka maayo nga halimbawa para sa akon si Alejandra kag ang iya pamilya. Determinado ako nga alagaron si Jehova kag magpabawtismo sa dili madugay. Ginahandum ko gid nga makita liwat si Alejandra sa nagapakari nga Paraiso!”

Huo, ang isa ka sulat daw diutay nga butang. Apang may daku kag mapinadayunon ini nga epekto!