“Magpinalanggaanay Kamo”

“Sa utudnon nga gugma magpinalanggaanay kamo.”​​—⁠⁠ROMA 12:10.

1, 2. Paano nagtamdanay ang isa ka modernong-adlaw nga misyonero kag si apostol Pablo kag ang ila mga kauturan?

SA iya 43 ka tuig nga pagmisyonero sa Malayo nga Sidlangan, nakilala si Don sa iya mainabyanon nga pagpakig-angot sa iya mga gin-alagaran. Sang nagmasakit sia nga ginkamatay niya sang ulihi, ang pila sang iya mga nabuligan sa kamatuoran naglakbay sing linibo ka kilometro agod magsiling lamang sa iya, “Kamsahamnida, kamsahamnida!”​​—⁠⁠“Salamat sa imo, salamat sa imo!” sa Koreanhon. Natandog ang ila tagipusuon sang pagkamapinalanggaon ni Don.

² Indi lamang si Don ang nagpakita sini nga halimbawa. Sang nahauna nga siglo, nagpakita si apostol Pablo sing tudok nga pagpalangga sa iya mga gin-alagaran. Nagsakripisyo si Pablo. Bisan pa may malig-on sia nga panindugan, malulo man sia kag matinatapon, “subong sang nagabatiti nga iloy nga nagaatipan sang iya kaugalingon nga mga anak.” Nagsulat sia sa kongregasyon sa Tesalonica: “Bangod ginapalangga kamo, nahamuot kami sa pagpaambit sa inyo, indi lamang sang maayong balita sang Dios, kundi man sang amon kaugalingon nga mga kalag, bangod nga nangin mahal gid kamo sa amon.” (1 Tesalonica 2:​7, 8) Sang ulihi, sang ginsugiran ni Pablo ang iya mga kauturan sa Efeso nga indi na sila magkitaay liwat, “sila tanan naghibi sing tama, kag ginhakos nila si Pablo kag mapinalanggaon nga ginhalukan sia.” (Binuhatan 20:​25, 37) Maathag nga ang relasyon ni Pablo kag sang iya mga kauturan indi lamang bangod isa sila ka pagtuluuhan. Nagapalanggaanay gid sila.

Pagkamapinalanggaon kag Gugma

3. Paano naangot ang mga termino sang Biblia para sa pagpalangga kag gugma?

³ Sa Kasulatan, ang pagkamapinalanggaon, kahanuklog, kag kaluoy suod nga naangot tanan sa pinakadungganon nga Cristianong kinaiya​​—⁠⁠ang gugma. (1 Tesalonica 2:⁠8; 2 Pedro 1:7) Kaangay sang mga sikyap sang isa ka matahom nga brilyante, ini tanan nga diosnon nga mga  kinaiya nagatimbanganay kag nagabuligay. Labi pa ini nga nagapasuod sa mga Cristiano indi lamang sa isa kag isa kundi sa ila man langitnon nga Amay. Busa, ginlaygayan ni apostol Pablo ang iya mga masigkatumuluo: “Himua ninyo nga indi mangin salimpapaw ang inyo gugma. . . . Sa utudnon nga gugma magpinalanggaanay kamo.”​​—⁠⁠Roma 12:​9, 10.

4. Ano ang kahulugan sang tinaga nga ‘pagpalangga’?

⁴ Ang Griegong tinaga nga gingamit ni Pablo para sa ‘pagpalanggaanay’ may duha ka bahin, ang isa ka bahin nagakahulugan sing pag-abyanay kag ang isa naman, sing kinaugali nga pagpalangga. Subong sang ginpaathag sang isa ka iskolar sa Biblia, nagakahulugan ini nga ang mga Cristiano “dapat makilala sa debosyon nga amo ang kinaiya sang isa ka nagahigugmaanay, suod, kag nagabuligay nga pamilya.” Amo bala sina ang ginabatyag mo sa imo Cristianong mga kauturan? Ang mapinalanggaon nga espiritu​​—⁠⁠subong sang magparyentehanay​​—⁠⁠dapat magluntad sa sulod sang Cristianong kongregasyon. (Galacia 6:10) Sa amo, ang The New Testament in Modern English, ni J. B. Phillips, nagbadbad sang Roma 12:10: “Magpakita kita sing mainit gid nga pagpalangga sa isa kag isa subong mag-ulutod.” Kag ang Maayong Balita nga Biblia mabasa sing subong sini: “Maghigugmaanay kamo sing mahirop subong sang mag-ulutod.” Huo, dapat maghigugmaanay ang mga Cristiano indi lamang bangod rasonable ini nga himuon ukon bangod obligado sila nga himuon ini. “Paagi sa . . . indi salimpapaw nga utudnon nga gugma,” dapat kita ‘maghigugmaanay sing hanuot gikan sa tagipusuon.’​​—⁠⁠1 Pedro 1:22.

‘Gintudluan sang Dios nga Maghigugmaanay’

5, 6. (a) Paano ginagamit ni Jehova ang internasyonal nga mga kombension sa pagtudlo sa iya katawhan tuhoy sa Cristiano nga pagpalangga? (b) Paano nagabakod ang kaangtanan sa ulot sang mga kauturan sa pagligad sang isa ka hut-ong sang tion?

⁵ Bisan pa “ang gugma sang kalabanan” sa kalibutan karon nagabugnaw, ginatudluan ni Jehova ang iya katawhan karon nga “maghigugmaanay” sila. (Mateo 24:12; 1 Tesalonica 4:9) Ang internasyonal nga mga kombension sang mga Saksi ni Jehova nagahatag sing talalupangdon nga mga kahigayunan sa paghanas sa sini. Sa sini nga mga kombension, nagakilalahay ang lokal nga mga Saksi kag ang mga kauturan gikan sa malayo nga mga kadutaan, kag madamo sa ila ang nagaaman sing dalayunan para sa mga delegado gikan sa iban nga mga pungsod. Sa isa ka kombension kasan-o lang, ang iban naggikan sa mga pungsod diin ang mga tawo sa ila lugar hipuson. “Sang mag-abot ining mga delegado, ginanerbios gid sila kag mahuluy-on,” saysay sang isa ka Cristiano nga nagbulig sa pagpangita sing mga dalayunan. “Apang pagligad lamang sang anom ka adlaw sang magpaalam na sila, sila kag ang mga tagbalay nga nag-amuma sa ila naghaksanay kag naghibi. Naeksperiensiahan nila ang isa ka sahi sang Cristianong gugma nga indi gid nila malipatan.” Paagi sa pag-abiabi sa aton mga kauturan, walay sapayan sang ila ginhalinan, mapakita sang bisita kag sang tagbalay ang ila labing maayo nga kinaiya.​​—⁠⁠Roma 12:13.

⁶ Bisan pa makakulunyag ini nga mga eksperiensia sa kombension, mas suod pa nga relasyon ang nagalambo kon ang mga Cristiano magkaupod nga nagaalagad kay Jehova sa sulod sang isa  ka hut-ong sang tion. Kon makilala naton sing maayo ang aton mga kauturan, labi pa nga maapresyar naton ang ila matahom nga mga kinaiya​​—⁠⁠ang ila pagkamaminatud-on, pagkamasaligan, katutom, kaayo, kaalwan, konsiderasyon, kaluoy, kag pagkadimakagod. (Salmo 15:3-5; Hulubaton 19:22) Si Mark, nga nagmisyonero sa Sidlangan nga Aprika, nagsiling, “Ang pagpanghikot upod sa aton mga kauturan nagaporma sing isa ka kaangtanan nga indi mabugto.”

7. Ano ang kinahanglanon agod maeksperiensiahan naton ang Cristiano nga pagpalanggaanay sa sulod sang kongregasyon?

⁷ Agod matigayon kag matipigan ini nga kaangtanan sa sulod sang kongregasyon, dapat mangin suod ang mga katapo sini sa isa kag isa. Paagi sa regular nga pagtambong sa Cristianong mga miting, ginapabakod naton ang aton relasyon sa aton mga kauturan. Paagi sa pagpakig-upod sa mga kauturan antes kag pagkatapos sang mga miting, kag pagpakigbahin sa mga miting, ginapalig-on naton kag ginapukaw ang isa kag isa “sa gugma kag sa maayong mga buhat.” (Hebreo 10:​24, 25) “Nalipay ako maghinumdom,” saysay sang isa ka gulang sa Estados Unidos, “nga sang bata pa ako, ang akon pamilya isa pirme sa pinakaulihi maghalin sa Kingdom Hall, kay nagapakigsugilanon pa kami sa mga kauturan kag makapalig-on gid yadto.”

Dapat Ka Bala “Magpasangkad”?

8. (a) Ano ang buot silingon ni Pablo sang ginlaygayan niya ang mga taga-Corinto nga “magpasangkad” sila? (b) Ano ang mahimo naton agod mapalambo ang pagpalanggaanay sa sulod sang kongregasyon?

⁸ Agod makapakigbahin sa sini nga pagpalanggaanay, mahimo nga dapat kita “magpasangkad” sa aton tagipusuon. Sa kongregasyon sa Corinto, si apostol Pablo nagsulat: “Ang amon tagipusuon nagsangkad. Wala kamo ginapiuti sa amon.” Ginlaygayan sila ni Pablo nga “magpasangkad” sa ila pagpakig-angot. (2 Corinto 6:11-13) ‘Mapasangkad’ mo man bala ang imo pagpakita sing pagpalangga? Indi na kinahanglan nga hulaton mo pa ang iban nga magpalapit sa imo. Sa iya sulat sa mga taga-Roma, gin-angot ni Pablo ang kinahanglanon nga magpalanggaanay sila paagi sa sini nga laygay: “Sa pagpadungog sa isa kag isa manguna kamo.” (Roma 12:10) Agod mapadunggan mo ang iban, mahimo nga ikaw ang una nga magtamyaw sa ila sa mga miting. Mahimo mo man sila hagaron nga mag-upod sa imo sa pagministeryo sa latagon ukon sa paghanda para sa miting. Nagabukas ini sang dalan agod mapalambo ang pagpalanggaanay.

9. Ano nga mga tikang ang ginhimo sang iban agod suod pa nga mangin abyan nila ang ila mga masigka-Cristiano? (Ilakip ang lokal nga mga halimbawa.)

⁹ Ang mga pamilya kag mga indibiduwal sa kongregasyon ‘makapasangkad’ paagi sa pagduaw sa isa kag isa, ayhan sa pagsaluhay sa simple lamang nga pagkaon, kag paagi sa pag-updanay sa mapuslanon nga mga hilikuton. (Lucas 10:42; 14:12-14) Si Hakop nagaorganisar kon kaisa sing mga piknik para sa gamay nga mga grupo. “Yara ang tanan, pati ang nagasolo nga mga ginikanan,” saysay niya. “Ang tagsatagsa nagapauli nga malipayon, kag labi pa sila nga nagasuuray.” Subong mga Cristiano, dapat kita magtinguha indi lamang nga mangin masigkatumuluo kundi mangin matuod man nga mga mag-abyanay.​​—⁠⁠3 Juan 14.

10. Ano ang mahimo naton kon may problema kita sa mga kauturan?

¹⁰ Apang, kon kaisa, ang pagkadihimpit makaupang sa pagpalambo sang pag-abyanay kag pagpalanggaanay. Ano ang aton mahimo? Una, mahimo naton ipangamuyo ang maayo nga relasyon sa aton mga kauturan. Kabubut-on sang Dios nga maghinangpanay ang iya mga alagad, gani sabton niya inang sinsero nga mga pangamuyo. (1 Juan 4:​20, 21; 5:​14, 15) Dapat man naton himuon ang aton ginapangamuyo. Si Ric, isa ka nagalakbay nga ministro sa Sidlangan nga Aprika, naghinumdom tuhoy sa isa ka utod nga lalaki nga bangod sang iya agresibo nga personalidad,  daw wala sing makasaho sa iya. “Sa baylo nga likawan ang utod, namat-od ako nga pangilalahon sia sing dugang pa,” paathag ni Ric. “Estrikto gali nga disiplinaryo ang amay sini nga utod. Sang mahangpan ko ang panikasog nga ginhimo sang utod agod malandas ini nga inagihan kag kon ano na ang iya gin-uswag, gindayaw ko sia. Nag-amigohay gid kami.”​​—⁠⁠1 Pedro 4:8.

Ipautwas ang Imo Ginabatyag!

11. (a) Ano ang kinahanglanon agod maglambo ang pagpinalanggaanay sa sulod sang kongregasyon? (b) Ngaa mahimo nga makahalit sa espirituwal ang paglikaw sa pagpautwas sang aton ginabatyag?

¹¹ Madamo nga tawo karon ang wala sing suod nga abyan. Makapasubo gid ini! Indi ini dapat matabo sa sulod sang Cristianong kongregasyon. Ang matuod nga gugma sa mga utod indi lamang ang matinahuron nga pagpakighambal kag pagpakita sing maayo nga mga pamatasan; ukon ang masadya nga pagkinadlaw. Sa baylo, dapat handa kita nga ipautwas ang aton ginabatyag, subong sang ginhimo ni Pablo sa mga taga-Corinto, kag ipakita sa aton mga masigkatumuluo nga nabalaka gid kita sa ila kaayuhan. Bisan pa indi tanan kinaugali nga mahuyugon makig-upod ukon palahambal, ang sobra nga pagpain sang kaugalingon makahalit. “Ang isa nga nagapain sang iya kaugalingon magapangita sang iya makagod nga handum,” paandam sang Biblia. “Magapamatok sia sa tanan nga praktikal nga kaalam.”​​—⁠⁠Hulubaton 18:1.

12. Ngaa kinahanglanon ang maayong komunikasyon sa suod nga mga relasyon sa sulod sang kongregasyon?

¹² Ang bunayag nga komunikasyon kinahanglanon sa matuod nga pag-abyanay. (Juan 15:15) Nagakinahanglan kita tanan sing mga abyan nga aton matu-aran sang aton tudok nga mga panghunahuna kag mga balatyagon. Dugang pa, mas mahapos kita magbuligay kon mas kilala naton ang isa kag isa. Kon magpakita kita sing kabalaka sa kaayuhan sang isa kag isa sa sining paagi, ginapalambo naton ang pagpalanggaanay, kag maeksperiensiahan naton ang kamatuoran sang ginsiling ni Jesus: “May kapin nga kalipay sa paghatag sangsa pagbaton.”​​—⁠⁠Binuhatan 20:35; Filipos 2:1-4.

13. Ano ang mahimo naton agod mapakita naton nga tunay gid ang aton pagpalangga sa aton mga kauturan?

¹³ Agod mapuslanon gid ang pagpalangga nga aton ginapakita, dapat naton ipabutyag ini. (Hulubaton 27:5) Kon tunay gid ang aton pagpalangga, mabanaag ini sa aton nawong, kag mahimo nga matandog man ang iban. “Ang kasanag sang mga mata nagapahalipay sa tagipusuon,” sulat sang isa ka maalam nga tawo. (Hulubaton 15:30) Ang madinumdumon nga mga buhat nagapalambo man sang pagpalangga. Bisan pa indi mabakal ang tunay nga pagpalangga, mahimo nga daku gid ang mahimo sang isa ka tinagipusuon  nga regalo. Isa ka kard, isa ka sulat kag “pulong nga napamulong sa husto nga tion”​​—⁠⁠ini tanan makapabutyag sing tudok nga pagpalangga. (Hulubaton 25:11; 27:9) Sa tion nga mangin abyan na naton ang iban, dapat naton ini tipigan paagi sa padayon nga pagpakita sing di-makagod nga pagpalangga. Luyag naton makabulig sa aton mga abyan ilabi na sa tion nga kinahanglan nila ini. Ang Biblia nagasiling: “Ang matuod nga kaupod nagahigugma sa tanan nga tion, kag isa ka utod nga natawo kon may kapiutan.”​​—⁠⁠Hulubaton 17:17.

14. Ano ang mahimo naton kon ang isa ka utod daw wala nagasapak sa aton pagpalangga sa iya?

¹⁴ Ang matuod, indi naton mapaabot nga mangin suod kita sa tanan sa kongregasyon. Natural lamang nga mangin mas suod kita sa iban. Gani kon ang isa ka utod daw malayo ang buot sa imo, indi dayon maghinakop nga may diperensia ka ukon ina nga utod. Kag indi sia pagpilita nga makig-abyan sa imo. Kon magtinguha ka lamang nga makig-abyan sa iya suno sa itugot niya, mahimo nga sa ulihi magaabyanay kamo.

“Nahamuot Ako sa Imo”

15. Ano ang epekto sang komendasyon, ukon sang kakulang sini, sa iban?

¹⁵ Pat-od nga nalipay gid si Jesus sang nabatian niya ang pulong gikan sa langit sang ginbawtismuhan sia: “Nahamuot ako sa imo”! (Marcos 1:11) Ini nga mga pulong sang pagbaton pat-od nga nagpalig-on sang pagsalig ni Jesus nga palangga sia sang iya Amay. (Juan 5:20) Makapasubo nga ang iban wala gid makabati sini nga komendasyon gikan sa ila ginatahod kag ginahigugma. “Madamo nga pamatan-on kaangay ko ang wala sing mga paryente nga nagaugyon sa ila Cristianong mga pagtuluuhan,” siling ni Ann. “Pulos mga pagmulay lamang ang mabatian namon sa balay. Ginakasubo gid namon ini.” Apang, sang mangin bahin na sila sang kongregasyon, nabatyagan nila ang kainit sang mabinuligon, mainulikdon nga espirituwal nga pamilya​​—⁠⁠ang mga amay kag mga iloy kag mga utod nga lalaki kag babayi sa pagtuo.​​—⁠⁠Marcos 10:​29, 30; Galacia 6:10.

16. Ngaa indi makabulig ang pagpakita sing mamulayon nga panimuot sa iban?

¹⁶ Sa iban nga mga kultura, ang mga ginikanan, mga may edad na, kag mga manunudlo talagsa lang nagapabutyag sing bug-os tagipusuon nga kahamuot sa mga pamatan-on, bangod ginahunahuna nila nga ini nga komendasyon mahimo nga magahimo sa ila nga pabaya ukon arogante. Ini nga panghunahuna makaapektar man bisan gani sa Cristianong mga pamilya kag sa kongregasyon. Tuhoy sa isa ka pamulongpulong ukon iban pa nga panikasog, ang mga may edad na mahimo magsiling: “Maayo ang nahimuan mo, apang mapauswag mo pa ina!” Ukon sa iban nga paagi, mahimo pa gani nga ipasat-om nila ang ila indi pagkahamuot sa pamatan-on. Sa paghimo sini, madamo ang nagapati nga ginapalig-on nila ang mga pamatan-on nga lab-uton ang ila bug-os nga ikasarang. Apang masami nga baliskad ang epekto sini, kay mahimo nga mag-atras ang mga pamatan-on ukon magbatyag nga indi sila makasarang.

17. Ngaa dapat kita mangita sing mga kahigayunan sa paghatag sing komendasyon sa iban?

¹⁷ Apang, ang komendasyon indi dapat gamiton subong pasakayle lamang sa laygay. Ang sinsero nga komendasyon nagapalambo sang pagpalanggaanay  sa sulod sang pamilya kag sang kongregasyon, kag busa nagapalig-on sa mga pamatan-on nga mangayo sing laygay sa eksperiensiado nga mga utod nga lalaki kag babayi. Gani sa baylo nga sundon ang kultura kon paano naton dapat tratahon ang iban, “magsuklob [kita] sing bag-o nga personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.” Iluga si Jehova sa paghatag sing komendasyon.​​—⁠⁠Efeso 4:24.

18. (a) Mga pamatan-on, paano ninyo dapat tamdon ang laygay gikan sa mga may edad na? (b) Ngaa nagahalong gid ang mga may edad na kon paano sila nagalaygay?

¹⁸ Sa pihak nga bahin, kamo nga mga pamatan-on, indi kamo dapat maghinakop nga kon ginatadlong ukon ginalaygayan kamo sang mga may edad na, nagakahulugan ina nga wala sila mahamuot sa inyo. (Manugwali 7:9) Baliskad ina! Mahimo gid nga ginapahulag sila sang ila kabalaka kag tudok nga pagpalangga sa inyo. Kay kon indi, ngaa magtinguha pa sila nga makighambal sa inyo? Bangod nahibaluan nila ang epekto sang mga tinaga, ang mga may edad na​​—⁠⁠ilabi na ang mga gulang sa kongregasyon⁠​—⁠masami nga nagapamensar gid sing maayo kag nagapangamuyo antes sila maglaygay, bangod luyag lamang nila nga maghimo sing maayo.​​—⁠⁠1 Pedro 5:5.

“Si Jehova Mapinalanggaon Gid”

19. Ngaa makasalig ang mga nakaeksperiensia sing kapaslawan nga buligan sila ni Jehova?

¹⁹ Bangod sang indi maayo nga mga naeksperiensiahan, mahimo batyagon sang iban nga madugangan lamang ang ila kapaslawan kon magpakita pa sila sing pagkamapinalanggaon. Kinahanglan nila ang kaisog kag malig-on nga pagtuo agod buksan nila liwat ang ila tagipusuon sa iban. Apang indi nila dapat kalipatan nga si Jehova “indi . . . malayo sa tagsatagsa sa aton.” Ginaagda niya kita nga magpalapit sa iya. (Binuhatan 17:27; Santiago 4:8) Nahangpan man niya nga nahadlok kita nga mapilasan ang aton balatyagon, kag nagasaad sia nga buligan niya kita. Ginapasalig kita ni salmista David: “Si Jehova malapit sa mga buong sing tagipusuon; kag ginaluwas niya ang mga nadugmok sa espiritu.”​​—⁠⁠Salmo 34:18.

20, 21. (a) Paano naton mahibaluan nga mahimo kita mangin suod kay Jehova? (b) Ano ang kinahanglanon agod mangin suod kita kay Jehova?

²⁰ Ang suod nga pagpakig-abyan kay Jehova amo ang labing importante nga relasyon nga mapalambo naton. Apang posible gid bala ini nga relasyon? Huo. Ginasugid sang Biblia nga may matarong nga mga lalaki kag mga babayi nga nangin suod gid sa aton langitnon nga Amay. Ang ila tinagipusuon nga ginpamulong gintipigan agod magpasalig sa aton nga mahimo man kita mangin suod kay Jehova.​​—⁠⁠Salmo 23, 34, 139; Juan 16:27; Roma 15:4.

²¹ Sarang malab-ot sang bisan sin-o ang mga ginapatuman ni Jehova agod mangin suod sa iya. “O Jehova, sin-o ang mangin bisita sa imo tolda?” pamangkot ni David. “Sia nga nagalakat nga walay kasawayan kag nagahimo sing pagkamatarong kag nagapamulong sing kamatuoran sa iya tagipusuon.” (Salmo 15:​1, 2; 25:14) Mapamatud-an naton nga “si Jehova mapinalanggaon gid” kon makita naton nga ang pag-alagad sa Dios may maayo nga resulta kag bangod sini ginatuytuyan kag ginaamligan niya kita.​​—⁠⁠Santiago 5:11.

22. Ano nga sahi sang relasyon ang luyag ni Jehova nga matigayon sang iya katawhan?

²² Isa gid ka daku nga pagpakamaayo nga si Jehova nagahandum nga mangin suod sa di-himpit nga mga tawo! Indi bala nga dapat kita, kon amo, magpinalanggaanay? Sa bulig ni Jehova, may mahimo ang tagsatagsa sa aton agod magpinalanggaanay kita nga amo ang tanda sang aton Cristianong paghiliutod. Sa idalom sang Ginharian sang Dios, mabatyagan sang tanan sa duta ini nga pagpalangga tubtob sa walay katubtuban.

Mapaathag Mo Bala?

• Ano nga sahi sang espiritu ang dapat magluntad sa sulod sang Cristianong kongregasyon?

• Paano ang tagsatagsa sa aton makapakita sing pagkamapinalanggaon sa sulod sang kongregasyon?

• Paano ang sinsero nga komendasyon nagapalambo sang Cristianong pagpalangga?

• Paano ang pagkamapinalanggaon ni Jehova nagabulig sa aton?

[Mga Pamangkot sa Pagtinuon]

[Retrato sa pahina 15]

Indi lamang obligasyon sang mga Cristiano nga maghigugmaanay sila

[Mga retrato sa pahina 16, 17]

‘Mapasangkad’ mo bala ang imo pagpalangga?

[Retrato sa pahina 18]

Mamulayon ka bala ukon makapalig-on?