Mga Pamangkot Gikan sa mga Bumalasa

Sang nagsulat si apostol Juan nga “ginatabog sang himpit nga gugma ang kahadlok,” ano ang buot niya silingon sang “himpit nga gugma,” kag ano nga “kahadlok” ang ginatabog?

“Wala sing kahadlok sa gugma,” sulat ni apostol Juan, “kundi ginatabog sang himpit nga gugma ang kahadlok, bangod ang kahadlok nagapugong. Sa pagkamatuod, sia nga nagakahadlok wala mahimpit sa gugma.”​​—⁠⁠1 Juan 4:18.

Ginapakita sang konteksto nga ginabinagbinag ni Juan ang kahilwayan sa paghambal​​—⁠⁠ilabi na ang kaangtanan sang gugma sa Dios kag sang kahilwayan sa pagpakighambal sa Iya. Mabasa naton ini sa bersikulo 17: “Amo ini kon paano ginhimpit sa aton ang gugma, agod nga may kahilwayan kita sa paghambal sa adlaw sang paghukom.” Ang kadakuon sang gugma sang isa ka Cristiano sa Dios kag ang pagbatyag niya sang gugma sang Dios sa iya may direkta nga epekto sa iya kahilwayan sa paghambal​​—⁠⁠ukon wala sini⁠—kon nagapangamuyo sia sa Dios.

Ang ekspresyon nga “himpit nga gugma” makahulugan. Sa Biblia, ang tinaga nga “himpit” wala pirme nagakahulugan sing bug-os gid nga pagkahimpit, buot silingon, sa pinakamataas nga kasangkaron, kundi sa masami sa relatibo nga kahulugan. Halimbawa, sa iya Sermon sa Bukid, si Jesus nagsiling: “Busa dapat kamo magpakahimpit, subong nga ang inyo langitnon nga Amay himpit.” Ginsilingan ni Jesus ang iya mga sumulunod nga kon ginahigugma lamang nila ang nagahigugma sa ila, ang ila gugma indi bug-os, kulang, kag depektuso. Dapat nila himpiton, ukon bug-uson, ang ila gugma paagi sa paglakip bisan sa ila mga kaaway. Sing kaanggid, sang nagsulat si Juan tuhoy sa “himpit nga gugma,” nagahambal sia tuhoy sa gugma sa Dios nga bug-os tagipusuon, napalambo sing bug-os, kag nagadalahig sang tanan nga aspekto sang kabuhi sang isa.​​—⁠⁠Mateo 5:​46-​48; 19:​20, 21.

Kon nagapangamuyo sa Dios, nahibaluan gid sang isa ka Cristiano nga makasasala sia kag di-himpit. Apang, kon ang iya gugma sa Dios kag ang pagbatyag niya sang gugma sang Dios sa iya napalambo sing bug-os, wala sia ginapunggan sang kahadlok nga pakamalauton ukon sikwayon sia. Sa baylo, may kahilwayan sia sa paghambal sa pagpabutyag sang kon ano ang yara sa iya tagipusuon kag sa pagpangayo sing kapatawaran pasad sa halad nga gawad, nga mahigugmaon nga gin-aman sang Dios paagi kay Jesucristo. Nagasalig sia nga ang iya mga pangabay ginapamatian gid sang Dios.

Paano ang isa “mahimpit sa gugma” kag sa amo ‘matabog’ ang kahadlok nga pakamalauton ukon sikwayon? “Ang bisan sin-o nga nagatuman sang iya [sang Dios] pulong, tunay nga sa sining tawo ang gugma sang Dios ginhimo nga himpit,” siling ni apostol Juan. (1 Juan 2:5) Hunahunaa ini: Kon ginhigugma kita sang Dios sang makasasala pa kita, indi bala nga labi pa nga higugmaon niya kita kon nagahinulsol gid kita kag maukod nga “nagatuman sang iya pulong”? (Roma 5:⁠8; 1 Juan 4:10) Sa pagkamatuod, basta nagapabilin kita nga matutom, makasalig man kita subong sang pagsalig ni apostol Pablo sang nagsiling sia tuhoy sa Dios: “Sia nga wala magdingot bisan sang iya kaugalingon nga Anak kundi ginhatag sia para sa aton tanan, ngaa indi man niya mainayuhon nga ihatag sa aton ang tanan nga iban pa nga butang upod sa iya?”​​—⁠⁠Roma 8:32.