Paano Ka Nagahulat kay Jehova?

ANG kalabanan nga tawo karon matinalak-on gid kon may ginahulat sila nga isa ka tawo ukon isa ka butang. Apang, ginapalig-on sang Kasulatan ang katawhan sang Dios nga palambuon ang “nagahulat nga panimuot.” Tuhay sa mga tawo sa palibot niya, si manalagna Miqueas nagpahayag: “Magapakita ako sing nagahulat nga panimuot sa Dios sang akon kaluwasan.”​​—⁠⁠Miqueas 7:⁠7; Panalabiton 3:26.

Apang, ano ang buot silingon sang paghulat kay Jehova? Paano dapat maghulat sa Dios ang isa ka Cristiano? May yara bala nagakaigo kag di-nagakaigo nga mga paagi sa paghimo sini? Ang eksperiensia ni manalagna Jonas sang ikasiam nga siglo B.⁠C.⁠E. nagahatag sing leksion tuhoy sa sini.

Isa ka Di-nagakaigo nga Paghulat

Ginsugo ni Jehova nga Dios si Jonas nga magkadto kag magbantala sa mga pumuluyo sang Ninive, ang kabisera sang Emperyo sang Asiria. Ang Ninive kilala subong “siudad nga nagapatulo sing dugo” bangod sang kabangis kag kapintas sini, kag ginapamatud-an ini sang mga istoryador kag mga arkeologo. (Nahum 3:1) Sang primero ginlikawan ni Jonas ini nga hilikuton, apang ginpat-od ni Jehova nga sa ulihi makakadto ang manalagna sa Ninive.​​—⁠⁠Jonas 1:3⁠⁠–​​3:2.

“Si Jonas nagsugod sa pagsulod sa siudad sa kalayuon nga lalakton sing isa ka adlaw, kag padayon sia nga nagbantala kag nagsiling: ‘Kap-atan pa ka adlaw, kag ang Ninive laglagon.’” (Jonas 3:4) Talalupangdon ang reaksion sa pagbantala ni Jonas: “Ang katawhan sang Ninive nagtuo sa Dios, kag nagpahibalo sila sing puasa kag nagpanapot sing sako, kutob sa labing daku sa ila tubtob gid sa labing kubos sa ila.” (Jonas 3:5) Bangod sini, si Jehova, nga isa ka Dios nga ‘indi luyag nga ang bisan sin-o malaglag kundi luyag niya nga ang tanan makadangat sa paghinulsol,’ wala maglaglag sa siudad.​​—⁠⁠2 Pedro 3:9.

Ano ang reaksion ni Jonas? Ang rekord nagasiling: “Apang, indi gid yadto makapahamuot kay Jonas, kag nanginit sia sa kaakig.” (Jonas 4:1) Ngaa? Ayhan ginbatyag ni Jonas nga ang wala matuman nga kalaglagan sa pat-od nga petsa nga ginpahibalo niya naghimo sa iya nga isa ka indi mapatihan nga manalagna. Maathag nga mas ginkabalak-an niya ang iya reputasyon sangsa kaluoy kag kaluwasan sang iban.

Sa pagkamatuod, wala man gid mag-untat si Jonas subong manalagna. Apang, naghulat sia agod “makita niya kon ano ang matabo sa siudad.” Huo, nagsunggod sia kag naghulat na lang kon ano ang matabo. Sang nakita niya nga wala matabo ang ginapaabot niya, naghimo sia sing layanglayang, naglingkod sa handong sini, kag nagakusmod nga naghulat kon ano ang matabo. Apang, wala nahamuot si Jehova sa panimuot  ni Jonas, gani mahigugmaon nga gintadlong Niya ang sayop nga panghunahuna sang Iya manalagna.​​—⁠⁠Jonas 4:​5, 9-11.

Kon Ngaa Mapailubon si Jehova

Bisan pa ang Ninive naghinulsol kag wala ginlaglag, liwat ini nga nangin malaut. Paagi kanday manalagna Nahum kag Sofonias, gintagna ni Jehova ang kalaglagan sini. Tuhoy sa “siudad nga nagapatulo sing dugo,” nagsiling si Jehova nga laglagon niya ang Asiria kag himuon ang Ninive nga isa ka kahapayan. (Nahum 3:⁠1; Sofonias 2:13) Sang 632 B.⁠C.⁠E., nalaglag ang Ninive, kag wala na magluntad pa liwat.

Sing kaanggid, ang kalibutan karon pataka nga nagapatulo sing dugo nga sobra pa sa ginhimo anay sang dumaan nga Ninive. Bangod sini kag sang iban pa nga rason, ginpahayag ni Jehova nga ang malaut nga sistema sang mga butang karon malaglag sa “dakung kapipit-an” nga wala pa gid matabo anay.​​—⁠⁠Mateo 24:​21, 22.

Apang, wala pa ginpahanabo ni Jehova ang ginsaad nga kalaglagan agod ang sinsero nga mga tawo karon, kaangay sang mga mahinulsulon sa Ninive, makahinulsol kag maluwas. Ginapatuhuyan ni apostol Pedro ang pagpailob sang Dios sa sining mga pulong: “Si Jehova indi mahinay may kaangtanan sa iya saad, subong sang ginakabig sang iban nga kahinayon, kundi mapailubon sia sa inyo bangod indi niya luyag nga ang bisan sin-o malaglag kundi luyag niya nga ang tanan makadangat sa paghinulsol.”​​—⁠⁠2 Pedro 3:​9, 10, 13.

Paghulat sing Nagakaigo

Si Pedro nagpadayon sa pagsiling: “Sanglit ini tanan nga butang tunawon sing amo sina, ano bala nga sahi sang mga tawo dapat mangin amo kamo sa balaan nga paggawi kag sa mga buhat sang diosnon nga debosyon, nga nagahulat kag ginadumdom gid pirme ang presensia sang adlaw ni Jehova!” (2 Pedro 3:​11, 12) Talupangda nga samtang nagahulat sang adlaw ni Jehova, dapat kita magpakita sing ‘balaan nga paggawi kag mga buhat sang diosnon nga debosyon’​​—⁠⁠dapat may ginahimo kita, indi nga wala sing ginahimo.

Huo, ang nagakaigo nga paghulat nagapakita sing bug-os nga pagsalig nga ang adlaw ni Jehova magaabot sing eksakto gid sa gintalana nga tion ni Jehova. Ini nga pagtuo nagabunga sing balaan nga paggawi kag diosnon nga mga buhat, kag ang panguna sa sini amo ang pagbantala sing maayong balita sang Ginharian sang Dios. Nagpahamtang si Jesus sing maayo nga halimbawa sa pagbantala, kag ginsugo niya ang iya hinaplas nga mga sumulunod: “Wagkusi ninyo ang inyo mga balikawang kag pasigaha ang inyo mga lampara, kag kamo mismo mangin kaangay sa mga tawo nga nagahulat sa ila agalon kon magbalik sia gikan sa kasal, agod sa iya pag-abot kag pagpanuktok gilayon nga mabuksan nila sia. Malipayon yadtong mga ulipon nga sa pag-abot sang agalon masapwan nga nagabantay!”​​—⁠⁠Lucas 12:35-37.

Ang unang siglo nga mga ulipon ‘nagawagkos sang ila balikawang’ paagi sa pagputyong sang punta sang ila kunop nga panapton agod mapahapos ang mabug-at nga pagpangabudlay. Sa amo, ang isa ka Cristiano dapat mangin mapagsik kag makugi sa maayong mga buhat. Dapat niya pakigbatuan ang bisan ano nga huyog nga “magligoy” sa espirituwal nga hilikuton, ayhan ginagamit ang iya kusog sa paglipaylipay  kag sa paghingamo sa materyal nga mga butang. Sa baylo, dapat “madamo [sia] pirme sing ginahimo sa hilikuton sang Ginuo” samtang nagahulat sa daku kag makakulugmat nga adlaw ni Jehova.​​—⁠⁠Roma 12:11; 1 Corinto 15:58.

Masako Samtang Nagahulat

Ang mga Saksi ni Jehova padayon nga masako samtang nagahulat sang adlaw ni Jehova. Halimbawa, sa 2003 nga tuig sang pag-alagad nakahinguyang sila sing promedyo nga 3,383,000 ka oras kada adlaw sa pagbantala sang pulong ni Jehova. Hunahunaa lamang, ang isa ka Saksi dapat kuntani magbantala sing walay untat sa sulod sang 386 ka tuig agod mahimo ang hinimuan sa isa lamang ka adlaw!

Apang, dapat naton pamangkuton ang aton kaugalingon, ‘Paano ako nagahulat kay Jehova?’ Naghatag si Jesus sing isa ka parabola nga nagalaragway sang kapisan nga ginapaabot sa matutom nga hinaplas nga mga Cristiano. Naghambal sia tuhoy sa tatlo ka ulipon: “Sa isa naghatag [ang agalon] sing lima ka talanton, sa isa duha, sa isa pa isa, sa tagsatagsa suno sa iya ikasarang, kag naglakat sia sa iban nga kadutaan. Sa gilayon ang isa nga nakabaton sing lima ka talanton naglakat kag nagpatikang sini kag nagganar sing lima pa. Sa amo man nga paagi ang isa nga nakabaton sing duha nagganar sing duha pa. Apang ang isa nga nakabaton sing isa lamang naglakat, kag nagkutkot sa duta kag gintago ang pilak nga kuarta sang iya agalon. Pagkatapos sang malawig nga tion nag-abot ang agalon sadtong mga ulipon kag nagpakighusay sa ila.”​​—⁠⁠Mateo 25:15-19.

Ang tatlo ka ulipon naghulat sang pagbalik sang agalon. Ang duha nga nangin masako samtang nagahulat sa ila agalon ginsilingan sang pag-abot niya: “Maayo gid, ulipon nga maayo kag matutom!” Apang, tuhay ang ginhimo sa isa nga uyaya nga naghulat. Ang agalon nagsiling: “Ipilak ninyo ang ulipon nga wala sing pulos sa kadudulman nga sa gua.”​​—⁠⁠Mateo 25:20-30.

Bisan pa ini nga parabola naaplikar sa hinaplas nga mga Cristiano, nagahatag ini sing leksion sa aton tanan walay sapayan sang aton paglaum. Ginapaabot sang Agalon, nga si Jesucristo, nga ang tagsatagsa sa aton mangabudlay sing maukod sa pag-alagad sa iya samtang ginahulat naton ang iya pag-abot sa dakung adlaw ni Jehova. Ginapabaloran niya ang pagpangabudlay sang tagsatagsa “suno sa iya ikasarang” kag kahimtangan. Makalilipay gid nga mabatian ang pulong nga “maayo gid” gikan sa Agalon kon matapos na ang paghulat!

 Ang Pagpailob sang Aton Ginuo Nagakahulugan sing Kaluwasan

Kamusta kon ang karon nga sistema sang mga butang maglawig pa sangsa ginahunahuna ukon ginalauman naton? May rason gid ini. Si apostol Pedro nagsulat: “Kabiga ninyo ang pagpailob sang aton Ginuo subong kaluwasan.” (2 Pedro 3:15) Ang sibu nga ihibalo tuhoy sa katuyuan sang Dios kag ang mapainubuson nga pagbaton sang aton pagkakubos magabulig sa aton nga mangin mapailubon tubtob sa pagtamod ni Jehova nagakaigo nga pakitaan sing pagpailob ang daan nga sistema karon.

Agod palig-unon ang mga Cristiano nga mangin mapailubon, ang manunulat sang Biblia nga si Santiago nagsaysay sing isa ka ilustrasyon. Sia nagsiling: “Yari karon! Ang mangunguma padayon nga nagahulat sang hamili nga bunga sang duta, nga nagapakita sing pailob sa sini tubtob mabaton niya ang una kag ulihi nga ulan. Magpailob man kamo; palig-una ang inyo tagipusuon, kay ang presensia sang Ginuo malapit na.”​​—⁠⁠Santiago 5:​7, 8.

Indi luyag ni Jehova nga Dios nga kapuyon kita ukon mangampo samtang nagahulat. May ginapahimo sia sa aton kag malipay sia kon samtang nagahulat kita mapisan naton nga ginahimo ining hilikuton. Luyag niya nga mangin subong man kita sang mga ginalaragway ni apostol Pablo sa iya sulat sa mga taga-Hebreo: “Ginahandum namon nga ang kada isa sa inyo magpakita sang amo man nga kapisan agod may bug-os nga kapat-uran sang paglaum tubtob sa katapusan, agod nga indi kamo magmahinay, kundi mangin mga manug-ilog nila nga paagi sa pagtuo kag pagpailob nagapanubli sang mga saad.”​​—⁠⁠Hebreo 6:​11, 12.

Gani indi kita dapat malapyo. Sa baylo, kabay nga ang aton personal nga kaangtanan kay Jehova nga Dios, ang aton pagtuo sa halad nga gawad ni Jesus, kag ang aton masanag nga paglaum sa bag-ong sistema sang mga butang magapapagsik sa aton. Kaangay sang “maayo kag matutom” nga mga ulipon sa parabola ni Jesus, kabay nga mangin takus kita sa komendasyon kag padya paagi sa masako pirme nga pagdayaw sa aton Dios, kaangay sang salmista nga nagsiling: “Para sa akon, magahulat ako pirme, kag dugangan ko ang tanan mo nga kadayawan.”​​—⁠⁠Salmo 71:14.

[Retrato sa pahina 21]

Naluyahan sing buot, naghulat si Jonas agod makita kon ano ang matabo sa Ninive

[Mga retrato sa pahina 22, 23]

Magpakita kita sing diosnon nga debosyon samtang ginahulat naton ang adlaw ni Jehova