Sin-o ang Nagahimaya sa Dios Karon?

“Takus ka, Jehova, nga amon Dios, sa pagbaton sang himaya kag dungog kag gahom.”​​—⁠⁠BUGNA 4:11.

1, 2. (a) Ano nga mga halimbawa ang nagapakita nga ginasunod sang mga imbentor ang mga desinyo nga masapwan sa kinaugali? (b) Ano nga pamangkot ang nagautwas, kag ano ang sabat?

ISA ka adlaw sang katuigan 1940, gindayandayan sang Swiso nga enhinyero nga si George de Mestral ang iya ido. Pagpauli nila, natalupangdan niya nga ang iya panapton kag ang mga bulbol sang ido puno sing dalupang. Natingala kon ano ini, gin-usisa niya ang mga dalupang sa miskroskopyo kag napukaw ang iya interes sa magagmay nga mga kaw-it nga nagatapik sa bisan ano nga may balu. Sang ulihi, bangod sini naimbento niya ang Velcro ukon magic tape. Indi lamang si de Mestral ang nagkopya sang mga desinyo nga masapwan sa kinaugali. Sa Estados Unidos, ang mag-utod nga Wright nakadesinyo sing isa ka eroplano sa tapos nila matun-an ang dalagku nga mga pispis nga nagalupad. Gindesinyo sang Pranses nga enhinyero nga si Alexandre-Gustave Eiffel ang torre sa Paris nga gintawag sa iya ngalan, nga ginagamit ang sadsaran nga mga prinsipio sang pagsuporta sang tul-an sang paa sang tawo sa kabug-aton sang iya lawas.

² Ginapakita sining mga halimbawa kon paano pirme ginailog sang tawo ang mga desinyo nga masapwan sa kinaugali. Apang, makatarunganon ipamangkot: Daw ano kasunson ginapadunggan sang mga imbentor ang Isa nga nagdesinyo sang magagmay nga mga dalupang, dalagku nga mga pispis, tul-an sang paa sang tawo, kag sang tanan nga iban pa nga mga desinyo sang kinaugali nga ginailog sang mga imbentor? Makapasubo apang matuod nga sa kalibutan karon, talagsa lamang ginapatuhoy sa Dios ang dungog ukon himaya nga nagakadapat sa iya.

3, 4. Ano ang kahulugan sang Hebreong tinaga nga ginbadbad “himaya,” kag sa ano ini nagapatuhoy kon ginagamit kay Jehova?

³ ‘Ngaa,’ mahimo mamangkot ang iban, ‘kinahanglanon gid nga himayaon ang Dios? Indi bala mahimayaon na ang Dios?’ Matuod, si Jehova amo ang labing mahimayaon nga Persona sa uniberso, apang wala ina nagakahulugan nga ginahimaya sia sang tanan nga tawo. Sa Biblia, ang Hebreong tinaga nga ginbadbad “himaya” nagakahulugan gid sing “kabug-aton.” Nagapatuhoy ini sa bisan ano nga butang nga nagahimo sa isa ka tawo nga mabug-at ukon importante sa panulok sang iban. Kon ginagamit ini sa Dios, nagapatuhoy ini sa isa ka butang nga nagahimo sa Dios nga makadalayaw sa panulok sang tawo.

⁴ Pila lamang karon ang nagahatag sing igtalupangod kon ngaa makadalayaw ang Dios. (Salmo 10:⁠4; 14:1) Sa katunayan, ang prominente nga mga tawo sa katilingban, kon nagapati gid man sila sa  Dios, masami nga nag-impluwensia sa mga tawo nga indi pagtahaon ang mahimayaon nga Manunuga sang uniberso. Sa anong mga paagi ginhimo nila ini?

“Indi Sila Mapasaylo”

5. Paano ginapaathag sang madamo nga sientipiko ang mga kalatingalahan sang mga tinuga?

⁵ Madamo nga sientipiko ang nagainsister nga wala sing Dios. Kon amo, paano nila ginapaathag ang mga kalatingalahan sang mga gintuga, lakip ang katawhan? Ginatudlo nila ang ebolusyon, ang aksidente lamang nga pagtuhaw sang kabuhi. Halimbawa, ang ebolusyonista nga si Stephen Jay Gould nagsulat: “Nagaluntad kita karon bangod ang isa ka klase sang mga isda may pinasahi nga mga kapay nga mahimo nangin mga tiil kag nagkabuhi sila sa takas . . . Mahimo mangita kita sing iban pa nga sabat​​—⁠⁠apang wala kita sing makita.” Sing kaanggid man, si Richard E. Leakey kag si Roger Lewin nagsulat: “Mahimo nga ang espesyi sang tawo isa lamang ka daku nga sala nga natabo sa kinaugali.” Bisan gani ang pila ka sientipiko nga nagadayaw sa katahom kag desinyo sang kinaugali napaslawan sa paghatag sing kadungganan sa Dios.

6. Ngaa nagauklo ang madamo sa paghatag sa Dios sang kadungganan nga nagakadapat sa iya subong Manunuga?

⁶ Kon ginainsister sang edukado nga mga indibiduwal nga ang ebolusyon isa ka katunayan, ginapahangop nila nga mga ignorante lamang ang indi magpati sa sini. Ano ang reaksion sa sini sang madamo? Sang nagligad nga pila ka tuig, gin-interbyu sang isa ka tawo nga nakahibalo gid sang teoriya sang ebolusyon ang mga tawo nga nagbaton sa teoriya. Nagsiling sia: “Natukiban ko nga ang kalabanan sang nagapati sa ebolusyon nagapati sa sini bangod ginhambalan sila nga ang tanan nga intelihente nga tawo nagapati sa ebolusyon.” Huo, kon edukado gani nga mga indibiduwal ang nagapabutyag sang ila ateistiko nga mga pagtamod, nagauklo ang iban sa paghatag sa Dios sang kadungganan nga nagakadapat sa iya subong Manunuga.​​—⁠⁠Hulubaton 14:​15, 18.

7. Suno sa Roma 1:​20, ano ang maathag nga makita paagi sa kitaon nga mga tinuga, kag ngaa?

⁷ May ebidensia bala ang mga sientipiko sa ila mga konklusion? Wala gid! Ginapalibutan kita sang ebidensia nga may isa ka Manunuga. Tuhoy sa iya, nagsulat si apostol Pablo: “Ang iya di-makita nga mga kinaiya maathag nga makita kutob sang gintuga ang kalibutan, bangod mahantop ini paagi sa mga butang nga ginhimo, bisan ang iya dayon nga gahom kag pagka-Dios, amo kon ngaa indi sila mapasaylo.” (Roma 1:20) Maathag nga makita naton ang ebidensia sang Manunuga sa iya mga gintuga. Busa nagasiling si Pablo nga halin sa panugod sang pagluntad sang tawo, ‘mahantop’ na sang tawo ang ebidensia sang pagluntad sang Dios paagi sa kitaon nga mga tinuga. Diin ini nga ebidensia?

8. (a) Paano ang pisikal nga kalangitan nagapamatuod sa gahom kag kaalam sang Dios? (b) Ano ang nagapakita nga ang uniberso may Una nga Kabangdanan?

⁸ Makita naton ang ebidensia sang Dios sa mabituon nga kalangitan. “Ang mga langit nagapahayag sang himaya sang Dios,” siling sang Salmo 19:1. “Ang mga langit”​​—⁠⁠ang adlaw, bulan, kag mga bituon​​—⁠⁠nagapamatuod sa gahom kag kaalam sang Dios. Nagadayaw kita sa nagabalas nga kabituunan. Kag ini tanan nga mga tinuga sa langit wala nagasinumbali sa kahawaan kundi nagasunod sa eksakto gid nga pisikal nga mga kasuguan.⁠ * (Isaias 40:26) Rasonable bala hunahunaon nga natabuan lamang ini nga kahim-ong? Talalupangdon  nga madamo nga sientipiko ang nagasiling nga ang uniberso may hinali nga panugod. Nagpaathag tuhoy sini, nagsulat ang isa ka propesor: “Ang uniberso nga wala sing ginsuguran mas madali batunon sang isa ka tawo nga may ateistiko ukon agnostiko [nga pagtamod]. Sing kaanggid man, ang isa ka uniberso nga may ginsuguran daw nagakinahanglan sing una nga kabangdanan; kay sin-o ang mapati nga ina nga epekto natabo nga wala sing bastante nga kabangdanan?”

9. Paano kitaon gid ang kaalam ni Jehova sa gintuga nga mga sapat?

⁹ Makita man naton sa duta ang ebidensia sang Dios. Nagtuaw ang salmista: “Kadamo sang imo mga binuhatan, O Jehova! Sa kaalam ginhimo mo ini tanan. Ang duta puno sang imo mga binuhatan.” (Salmo 104:24) Ang “mga binuhatan” ni Jehova, lakip ang mga sapat, nagapamatuod sa iya kaalam. Subong sang ginsambit naton sa panugod, maayo gid ang kalidad sang desinyo sang buhi nga mga butang amo nga masami ini ginatinguhaan nga ilugon sang mga sientipiko. Binagbinaga ang pila pa ka halimbawa. Ginatun-an sang mga manugpanalawsaw ang sungay sang usa, agod makahimo sila sing mas mabakod nga helmet; ginatun-an nila ang isa ka espesyi sang langaw nga may maanting nga palamatin-an, agod mapauswag ang mga hearing aid; kag ginausisa nila ang mga balahibo sa pakpak sang bukaw, agod mapauswag ang mga eroplano nga indi mamutikan sang radar. Apang bisan ano pa ang himuon sang tawo, indi gid niya makopya ang himpit nga mga desinyo nga masapwan sa kinaugali. Ang libro nga Biomimicry​​—⁠⁠Innovation Inspired by Nature nagsiling: “Nahimo sang buhi nga mga butang ang tanan nga luyag naton himuon, nga indi mahakog sa petrolyo, wala ginadagtaan ang planeta, ukon ginabutang sa katalagman ang ila palaabuton.” Dalayawon gid ini nga kaalam!

10. Ngaa indi makatarunganon nga ipanghiwala ang pagluntad sang isa ka Daku nga Desinyador? Iilustrar.

¹⁰ Bisan magtangla ka man sa langit ukon magtulok sa mga tinuga diri mismo sa duta, maathag gid ang ebidensia nga may yara isa ka Manunuga. (Jeremias 10:12) Dapat kita mag-ugyon sing tinagipusuon sa langitnon nga mga tinuga nga nagsinggit: “Takus ka, Jehova, nga amon Dios, sa pagbaton sang himaya kag dungog kag gahom, kay ikaw ang nagtuga sang tanan nga butang.” (Bugna 4:11) Apang, madamo nga sientipiko ang wala makakita paagi sa ‘mga mata sang ila tagipusuon’ sa ebidensia nga may isa ka Manunuga bisan pa nagadayaw sila sa desinyo sang mga butang nga makita sang ila literal nga mga mata. (Efeso 1:18) Mailustrar naton ang kahimtangan sing subong sini: Ang pagdayaw sa katahom kag desinyo nga masapwan sa kinaugali kag pagkatapos ipanghiwala ang pagluntad sang isa ka Daku nga Desinyador nga naghimo sini subong ka indi makatarunganon sa pagdayaw sa isa ka matahom nga painting kag pagkatapos ipanghiwala ang pintor nga naghimo sang blangko nga kanbas nga mangin isa ka matahom nga obra-maestra. Indi katingalahan nga ‘indi mapasaylo’ ang mga indi magpati sa Dios!

Ang ‘Bulag nga mga Manugtuytoy’ Nagapatalang sa Madamo

11, 12. Sa ano ginbase ang pagpati sa doktrina nga predestinasyon, kag ano ang nagapakita nga ini nga doktrina wala nagahimaya sa Dios?

¹¹ Madamo nga relihiosong mga tawo ang sinsero nga nagapati nga ang ila pagsimba nagahimaya sa Dios. (Roma 10:​2, 3) Apang, ang relihion sa kabilugan isa pa ka bahin sang katilingban sang tawo nga aktual nga nagpugong sa minilyon sa paghimaya sa Dios. Sa anong paagi? Binagbinagon naton ang duha ka paagi.

¹² Una, paagi sa butig nga mga panudlo ginakuha sang mga relihion ang himaya nga nagakadapat sa Dios. Binagbinaga subong isa ka halimbawa ang panudlo nga predestinasyon. Ini nga doktrina ginbase sa pagpati nga sanglit may gahom ang Dios sa paghibalo kon ano ang palaabuton, pat-od nga nahibaluan niya sing abanse ang madangatan sang tanan nga butang. Sa amo, ginapahangop sang predestinasyon nga madugay na gintalana sang Dios ang palaabuton​​—⁠⁠maayo man ukon malain​​—⁠⁠sang tagsa ka indibiduwal. Suno sa sini nga ideya, ang Dios amo ang dapat basulon sa tanan nga pag-antos kag kalautan sa kalibutan karon. Wala gid ginahimaya ang Dios kon sia ang basulon sa baylo nga ang iya panguna nga Kaaway, si Satanas, ang isa nga ginatawag sang Biblia nga “manuggahom sang kalibutan”!​​—⁠⁠Juan 14:30; 1 Juan 5:19.

13. Ngaa binuang hunahunaon nga indi makontrol sang Dios ang iya ikasarang sa paghibalo sing abanse sang palaabuton? Iilustrar.

¹³ Ang predestinasyon indi Makasulatanhon nga panudlo nga nagapasipala sa Dios. Ginagumon sini ang panghunahuna tuhoy sa kon ano ang  sarang mahimo sang Dios kag kon ano ang aktual nga ginahimo niya. Ang Biblia maathag nga nagasiling nga ang Dios may ikasarang sa paghibalo sing abanse sang mga butang nga mahanabo. (Isaias 46:​9, 10) Apang, indi makatarunganon hunahunaon nga indi niya makontrol ang iya ikasarang sa paghibalo sang palaabuton ukon nga sia ang balasulon sa tagsa ka butang nga mahanabo. Sa pag-ilustrar: Ibutang ta nga makusog gid ikaw. Hakwaton mo bala ang tanan nga mabug-at nga butang nga makita mo bangod makusog ka? Siempre indi! Sing kaanggid man, ang ikasarang sang Dios sa paghibalo sang palaabuton wala nagapilit sa iya nga hibaluon sing abanse ukon italana ang tagsa ka butang. Ginapili lang sang Dios kon ano ang luyag niya hibaluon sing abanse.⁠ * Maathag nga ang butig nga mga panudlo, lakip ang predestinasyon, wala nagahimaya sa Dios.

14. Sa anong paagi ginapakahuy-an sang organisado nga relihion ang Dios?

¹⁴ Ang ikaduha nga paagi nga ginapakahuy-an sang organisado nga relihion ang Dios amo ang paggawi sang mga sumulunod sini. Ginapaabot ang mga Cristiano nga sundon nila ang mga panudlo ni Jesus. Lakip sa iban pa nga mga butang, gintudluan ni Jesus ang iya mga sumulunod nga “maghigugmaanay” sila kag magpabilin nga “indi bahin sang kalibutan.” (Juan 15:12; 17:14-16) Kamusta naman ang mga katapo sang klero sang Cristiandad? Ginasunod gid bala nila ini nga mga panudlo?

15. (a) Ano ang rekord sang klero sa mga inaway sang mga pungsod? (b) Ano ang epekto sa minilyon sang paggawi sang klero?

¹⁵ Binagbinaga ang rekord sang klero tuhoy sa inaway. Ginsuportahan nila, ginkunsinti, kag ginpangunahan pa gani ang madamo nga inaway sang mga pungsod. Ginbendisyunan nila ang mga tropa kag ginpakamatarong ang pagpatay. Indi naton malikawan ang mamangkot, ‘Wala gid bala mapensaran sini nga mga klerigo nga ang mga klerigo sa pihak nga bahin nagahimo sing amo man nga butang?’ (Tan-awa ang kahon nga “Sin-o ang Ginadampigan Sang Dios?”) Wala ginahimaya sang klero ang Dios kon magsiling sila nga ginasakdag sila sang Dios sa madugo nga mga inaway; wala man nila ginahimaya ang Dios kon magsiling sila nga ang mga talaksan sang Biblia karaan na kag ginakunsinti nila ang bisan ano nga sahi sang seksuwal nga imoralidad. Ginapahanumdom gid nila kita sang relihioso nga mga lider nga gintawag ni Jesus nga “mga magbubuhat sang pagkamalinapason” kag ‘bulag nga mga tuytoy’! (Mateo 7:15-23; 15:14) Bangod sang paggawi sang klero, minilyon ang nagbugnaw sa ila gugma sa Dios.​​—⁠⁠Mateo 24:12.

Sin-o Gid ang Nagahimaya sa Dios?

16. Agod masabat ang pamangkot kon sin-o gid ang nagahimaya sa Dios, ngaa dapat naton usisaon ang Biblia?

¹⁶ Kon ang prominente kag impluwensiado nga mga tawo sa kalibutan sa kabilugan wala maghimaya sa Dios, sin-o gid kon amo ang nagahimo sini? Agod masabat ina nga pamangkot, dapat naton usisaon ang Biblia. Kay man, ang Dios ang may kinamatarong sa pagsiling kon paano sia dapat himayaon, kag ginbutang niya sa Biblia nga iya Pulong ang iya mga talaksan. (Isaias 42:8) Binagbinagon naton ang tatlo ka paagi sa paghimaya sa Dios, kag  sa tagsa ka paagi sabton naton ang pamangkot kon sin-o gid sa karon ang nagahimo sini.

17. Paano ginpakita ni Jehova mismo nga ang paghimaya sa iya ngalan isa ka importante nga aspekto sang iya kabubut-on, kag sin-o sa karon ang nagadayaw sa ngalan sang Dios sa bug-os nga duta?

¹⁷ Una, mahimaya naton ang Dios paagi sa pagdayaw sa iya ngalan. Pasad sa ginsiling ni Jehova kay Jesus, maathag gid nga ang pagdayaw sa ngalan sang Dios isa ka importante nga aspekto sang kabubut-on sang Dios. Pila na lang ka adlaw antes sia mapatay, nangamuyo si Jesus: “Amay, himayaa ang imo ngalan.” Nian isa ka tingog ang nagsabat: “Ginhimaya ko na ini kag himayaon ko ini liwat.” (Juan 12:28) Walay duhaduha nga si Jehova mismo ang naghambal. Pasad sa iya ginsabat, maathag nga importante sa iya ang paghimaya sa iya ngalan. Sin-o karon, kon amo, ang nagahimaya kay Jehova paagi sa pagpakilala sang iya ngalan kag pagdayaw sa iya sa bug-os nga duta? Amo ang mga Saksi ni Jehova, kag ginahimo nila ini sa 235 ka kadutaan!​​—⁠⁠Salmo 86:​11, 12.

18. Paano naton makilala kon sin-o ang mga nagasimba sa Dios sa “kamatuoran,” kag ano nga grupo ang nagapanudlo sang kamatuoran sang Biblia sa kapin sa isa ka siglo?

¹⁸ Ikaduha, mahimaya naton ang Dios paagi sa pagtudlo sang kamatuoran tuhoy sa iya. Nagsiling si Jesus nga ang matuod nga mga sumilimba ‘magasimba [sa Dios] sa . . . kamatuoran.’ (Juan 4:24) Paano naton makilala kon sin-o ang mga nagasimba sa Dios sa “kamatuoran”? Dapat ginasikway nila ang mga doktrina nga wala napasad sa Biblia kag sayop nga nagalaragway sa Dios kag sa iya kabubut-on. Sa baylo, dapat ginatudlo nila ang putli nga mga kamatuoran sang Pulong sang Dios, lakip ang masunod: si Jehova amo ang Labing Mataas nga Dios, kag sia lamang ang himayaon subong ang labing mataas (Salmo 83:18); si Jesus amo ang Anak sang Dios kag ang gintangdo nga Manuggahom sa Mesianikong Ginharian sang Dios (1 Corinto 15:​27, 28); pakabalaanon sang Ginharian sang Dios ang ngalan ni Jehova kag tumanon ang iya katuyuan para sa duta kag sa mga tawo diri (Mateo 6:​9, 10); ang maayong balita tuhoy sini nga Ginharian dapat ibantala sa bug-os nga duta. (Mateo 24:14) Sa kapin sa isa ka siglo, isa lamang ka grupo ang matutom nga nagapanudlo sining hamili nga mga kamatuoran​​—⁠⁠ang mga Saksi ni Jehova!

19, 20. (a) Ngaa ang maayong paggawi sang isa ka Cristiano mahimo nga magahimaya sa Dios? (b) Ano nga mga pamangkot ang makabulig sa aton sa paghibalo kon sin-o sa karon ang nagahimaya sa Dios paagi sa pagpakita sing maayong paggawi?

¹⁹ Ikatlo, mahimaya naton ang Dios paagi sa pagsunod sa iya mga talaksan. Si apostol Pedro nagsulat: “Hupti nga maayo ang inyo paggawi sa tunga sang mga pungsod, agod nga sa butang nga ginahambal nila batok sa inyo subong mga malauton, himayaon nila ang Dios sa adlaw sang iya pag-usisa bangod sang inyo maayong mga buhat nga ila mismo nakita.” (1 Pedro 2:12) Ang pagtuo sang isa ka Cristiano makita sa iya paggawi. Kon makita sang mga tawo ini nga koneksion​​—⁠⁠buot silingon, kon makita nila nga ang maayong paggawi sang isa ka Cristiano direkta nga resulta sang iya pagtuo​​—⁠⁠nagahimaya ini sa Dios.

²⁰ Sin-o sa karon ang nagahimaya sa Dios paagi sa pagpakita sing maayong paggawi? Bueno, ano nga relihioso nga grupo ang gindayaw sang madamo nga gobierno bangod mahidaiton sila kag masinulundon sa kasuguan nga mga banwahanon nga nagabayad sing buhis? (Roma 13:​1, 3, 6, 7) Sin-o nga mga tawo ang kilala sa bug-os nga kalibutan sa ila paghiusa sa ila mga masigkatumuluo​​—⁠⁠isa ka matuod nga paghiusa walay sapayan sang ila nanuhaytuhay nga mga rasa, mga pungsod, kag mga kultura? (Salmo 133:⁠1; Binuhatan 10:​34, 35) Ano nga grupo ang kilala sa bug-os nga kalibutan sa ila hilikuton sa pagtudlo sing Biblia nga nagapalig-on sang pagtahod sa kasuguan, sa maayo nga mga prinsipio tuhoy sa pamilya, kag sa moralidad nga nahisanto sa Biblia? May isa lamang ka grupo nga ang ila maayong paggawi sa sini kag sa iban pa nga mga bahin nagahatag sing ebidensia​​—⁠⁠ang mga Saksi ni Jehova!

Ginahimaya Mo Bala ang Dios?

21. Ngaa dapat naton binagbinagon kon bala personal nga nagahimaya kita kay Jehova?

²¹ Dapat pamangkuton sang tagsatagsa sa aton ang iya kaugalingon, ‘Ako bala personal nga nagahimaya kay Jehova?’ Suno sa Salmo 148, ang kalabanan nga tinuga nagahimaya sa Dios. Ang mga anghel, ang pisikal nga mga langit, ang duta kag ang mga sapat nga gintuga diri​​—⁠⁠sila tanan nagahimaya kay Jehova. (Bersikulo 1-10) Makapasubo gid nga ang kalabanan nga mga tawo karon wala nagahimaya sa Dios! Paagi sa pagkabuhi sa isa ka paagi nga nagahimaya sa Dios, nagabuylog ka sa iban pa nga mga tinuga nga nagadayaw kay Jehova. (Bersikulo 11-13) Wala na sing mas maayo pa nga paagi nga magamit mo ang imo kabuhi.

22. Paagi sa paghimaya kay Jehova, sa anong mga paagi makabenepisyo ka, kag ano dapat ang mangin desisyon mo?

²² Paagi sa paghimaya kay Jehova, nagabenepisyo ka sa madamo nga paagi. Sa imo pagpakita sing pagtuo sa halad nga gawad ni Cristo, ginapasag-uli ka sa Dios kag maagom mo ang isa ka mahidaiton kag mapadyaon nga relasyon sa imo langitnon nga Amay. (Roma 5:10) Samtang nagapangita ka sing mga rason sa paghimaya sa Dios, labi ikaw nga mangin malaumon kag mainapresyahon. (Jeremias 31:12) Nian, mabuligan mo ang iban sa pagtigayon sing isa ka malipayon kag makaalayaw nga kabuhi, gani mangin mas malipayon ka. (Binuhatan 20:35) Kabay nga isa ka sa mga nagdesisyon sing malig-on nga himayaon ang Dios​​—⁠⁠sa karon kag sa walay katubtuban!

[Mga nota]

Madumduman Mo Bala?

• Ngaa makasiling kita nga ang mga sientipiko sa kabilugan wala makabulig sa mga tawo sa paghimaya sa Dios?

• Sa anong duha ka paagi ginpunggan sang organisado nga relihion ang mga tawo sa paghimaya sa Dios?

• Sa anong mga paagi mahimaya naton ang Dios?

• Ngaa dapat mo binagbinagon kon bala personal ka nga nagahimaya kay Jehova?

 [Mga Pamangkot sa Pagtinuon]

[Kahon sa pahina 12]

“Sin-o ang Ginadampigan sang Dios?”

Ang isa ka tawo nga katapo anay sang Air Force sang Alemanya sa tion sang Bug-os Kalibutan nga Inaway II apang sang ulihi nangin isa sa mga Saksi ni Jehova naghinumdom:

“Ang nagtublag sa akon sa tion sadtong mga tinuig nga may inaway . . . amo ang mga klerigo sang halos tanan nga relihion​​—⁠⁠Katoliko, Luterano, Episcopal, kag iban pa​​—⁠⁠nga nagabendisyon sa eroplano kag sa mga tripulante sini antes sila maglupad para sa ila misyon nga ihulog ang ila makamamatay nga kargamento. Pirme ako nagpalibog, ‘Sin-o ang ginadampigan sang Dios?’

“Ang Aleman nga mga soldado nagasuksok sing paha nga sa bilya sini nasulat ang mga tinaga nga Gott mit uns (Ang Dios upod sa amon). Apang nagpalibog ako, ‘Ngaa abi indi mag-upod ang Dios sa mga soldado sa pihak nga bahin nga pareho man sa amon sing relihion kag nagapangamuyo sa pareho man nga Dios?’”

[Retrato sa pahina 10]

Sa bug-os nga duta, ginahimaya gid sang mga Saksi ni Jehova ang Dios