Mga Benepisyo sang Pag-aplikar sang Espirituwal nga mga Talaksan

“Ang nagahigugma sang pilak indi mabusog sing pilak, bisan ang nagahigugma sang manggad sing kinitaan.”​​—⁠⁠Manugwali 5:10.

ANG sobra nga pagtrabaho makapahuol, kag ang kahuol mahimo tunaan sang balatian kag kon kaisa sang kamatayon. Sa madamo nga kadutaan, ginaguba sang diborsio ang mga pamilya. Ang masami nga ginabangdan sini nga mga trahedya amo ang sobra nga kabalaka sa materyal nga mga butang. Sa baylo nga mangin kontento, ang isa ka tawo nga wala sing kabulusgan sa materyal nga mga butang pirme nagahingamo sing madamo pa, bisan ano pa ang matabo sa iya. Ang isa ka libro tuhoy sa pagbulig sa kaugalingon nagasiling: “Ang pagpakig-indis-indis sa kaingod lapnag sa isa ka pungsod, bisan pa kon ang kaingod, bangod sang pagbakabaka, mahimo atakehon sa tagipusuon sa edad nga kuarentay tres.”

Ang paghingamo sing madamo pa nga materyal nga mga butang mahimo nga walay kabulusgan, amo kon ngaa indi na malipayon ang isa ka tawo. Ang aton kaluyahon sa sini masami nga ginahingalitan sang mabaskog nga puersa sang pasayod! Ang mga programa sa telebisyon puno sing mga pasayod nga nagahaylo sa imo nga baklon ang mga butang nga mahimo indi mo kinahanglanon kag indi mo pa gani masarangan. Ini tanan makahalit gid.

Ang pagpatuyang sa kaugalingon mahimo nga  indi mamutikan apang makahalit ini sa aton lawas kag moralidad. Halimbawa, ang maalam nga si Hari Solomon nagsiling: “Ang malinong nga tagipusuon amo ang kabuhi sang undanon nga organismo.” (Hulubaton 14:30) Sa kabaliskaran, mahimo kita magbalatian kag madula ang aton kalipay bangod sang sobra nga paghimakas, pagkabalaka, kag sang mga pag-ipit nga magtipon sing materyal nga manggad. Mahimo man maguba ang mga relasyon kon unahon naton ang materyal nga mga tulumuron. Kag kon maguba na gani ang relasyon sang isa ka tawo sa iya pamilya kag sa iban, maapektuhan man ang iya kabuhi.

Ang Kinalabaw sang Espirituwal nga mga Talaksan

“Indi na kamo magpadihon suno sa sining sistema sang mga butang,” laygay ni apostol Pablo sang nagligad nga halos duha ka libo ka tuig. (Roma 12:2) Ginahigugma sang kalibutan ang mga tawo nga nagailog sa mga talaksan sini. (Juan 15:19) Nagatinguha ini nga ganyaton ang imo tanan nga igbalatyag agod kumbinsihon ka nga mangin materyalistiko. Ginahatagan sing importansia “ang kailigbon sang mga mata” agod tinguhaan mo kag sang iban man ang materyal nga mga butang.​​—⁠⁠1 Juan 2:15-17.

Apang may mga talaksan nga labaw pa sa kuarta, kabantugan, kag manggad. Sang nagligad nga mga siglo, natipon ni Hari Solomon ang tanan nga materyal nga butang nga mahimo matigayon sa kalibutan. Nagpahimo sia sing mga balay kag mga hardin, may mga latagon sia nga mabungahon, mga suluguon, mga kahayupan, lalaki kag babayi nga mga manug-amba, kag madamo nga bulawan kag pilak. Mas madamo nga pagkabutang ang natipon ni Solomon sangsa bisan sin-o nga nauna sa iya. Nagmanggaranon gid sia kaayo. Natigayon ni Solomon ang halos tanan nga butang nga ginhandum niya. Apang, walay sapayan sang tanan nga nahimuan niya, sia nagsiling: “Ang tanan walay pulos kag pagpanikasog sa hangin.”​​—⁠⁠Manugwali 2:1-11.

Bangod sang labaw nga kaalam nga ginhatag kay Solomon, nahibaluan niya nga mas makaalayaw ang espirituwal nga mga talaksan. Nagsulat sia: “Ang katapusan sang butang, sang nabatian na ang tanan, amo: Magkahadlok sa matuod nga Dios kag magtuman sang iya mga sugo. Kay amo ini ang bug-os nga katungdanan sang tawo.”​​—⁠⁠Manugwali 12:13.

Bilidhon pa sangsa bulawan ukon pilak ang bahandi nga masapwan sa mga pahina sang Pulong sang Dios, ang Biblia. (Hulubaton 16:16) Kaangay sang mga hiyas, masapwan mo sa sini ang madalom nga mga kamatuoran. Pangitaon mo bala kag kutkuton ini? (Hulubaton 2:1-6) Ginapalig-on ka sang aton Manunuga, ang Taghatag sang matuod nga mga talaksan, nga himuon ini, kag buligan ka niya. Paano?

Ginahatag ni Jehova ang hamili nga mga kamatuoran paagi sa iya Pulong, sa iya espiritu, kag sa iya organisasyon. (Salmo 1:1-3; Isaias 48:​17, 18; Mateo 24:45-47; 1 Corinto 2:10) May kahigayunan ka nga pilion sing maalamon ang labing maayo kag labing makapaladya nga dalanon sang pagkabuhi kon usisaon mo ining tumalagsahon kag bilidhon  gid nga mga hiyas. Kag indi ini mabudlay himuon bangod nahibaluan ni Jehova, nga aton Manunuga, kon ano gid ang ginakinahanglan naton agod magmalipayon kita.

Ginarekomendar sang Biblia ang Labing Mataas nga mga Talaksan

Praktikal kag walay tupong ang maayo nga mga laygay sang Biblia. Indi malabawan ang mga talaksan sa moral nga ginasakdag sini. Mapuslanon pirme ang mga laygay sini. Natilawan na ini sang panahon. Subong halimbawa, nagalaygay ang Biblia nga magpangabudlay ka sing lakas, mangin bunayag, gamiton sing maalamon ang kuarta, kag likawan ang pagtinamad.​​—⁠⁠Hulubaton 6:6-8; 20:23; 31:16.

Nahisanto sa sini, nagsiling si Jesus: “Mag-untat kamo sa pagtipon para sa inyo kaugalingon sing mga bahandi sa duta, diin ang mga sapatsapat kag tuktok nagaut-ot, kag diin ang mga kawatan nagasulod kag nagapangawat. Sa baylo, magtipon kamo para sa inyo kaugalingon sing mga bahandi sa langit, diin walay mga sapatsapat kag tuktok nga mang-ut-ot, kag diin wala sing mga kawatan nga magsulod kag magpangawat.”​​—⁠⁠Mateo 6:​19, 20.

Ini nga laygay sang nagligad nga 2,000 ka tuig, sibu sa tion kag maaplikar man gihapon karon. Sa baylo nga magdurop sa pagpangita sing materyal nga manggad, makabenepisyo kita karon kon tinguhaan naton ang labaw gid nga dalanon sang pagkabuhi. Ang sekreto amo ang pagtipon sing espirituwal nga mga bahandi, nga magaresulta sa malipayon kag kontento nga pagkabuhi. Paano naton mahimo ini? Basahon naton kag iaplikar ang ginatudlo sang Pulong sang Dios, ang Biblia.

Makapaladya ang Espirituwal nga mga Talaksan

Makabenepisyo kita sa pisikal, sa emosyon, kag sa espirituwal kon iaplikar naton sing nagakaigo ang espirituwal nga mga talaksan. Kon paano ang ozone layer sa kahawaan sang duta nagataming sa aton gikan sa makahalalit nga silak sang adlaw, ang maayo nga mga prinsipio sa moral nagaamlig man sa aton paagi sa pagpahibalo sa aton sang makatalagam nga mga epekto sang materyalismo. Ang Cristiano nga si apostol Pablo nagsulat: “Ang mga determinado nga magmanggaranon nagakahulog sa pagsulay kag sa siod kag sa madamong binuang kag makahalalit nga kailigbon, nga nagatugdang sang mga tawo sa kalaglagan kag kahapayan. Kay ang gugma sa kuarta amo ang gamot sang tanan makahalalit nga mga butang, kag paagi sa paghingamo sini nga gugma ang iban nagtalang gikan sa pagtuo kag nagbuno sang ila kaugalingon sing madamong kasakitan.”​​—⁠⁠1 Timoteo 6:​9, 10.

Ang gugma sa manggad nagahaylo sa tawo nga mangita sing daku pa nga manggad, posisyon, kag gahom. Masami gid nga ginagamit ang maduhaduhaan kag indi bunayag nga mga paagi agod matigayon ini. Ginauyangan sang isa ka tawo ang iya tion, kusog, kag mga abilidad sa paghingamo sing materyal nga mga butang. Mahimo pa gani nga indi sia makatulog sing mahamuok bangod sini. (Manugwali 5:12) Maupangan sini ang iya pag-uswag sa espirituwal. Maathag nga ginpakita sang pinakabantog nga tawo nga nabuhi sa duta, si Jesucristo, kon ano ang mas maayo gid nga dalanon: “Malipayon ang mga mahunahunaon sang ila espirituwal nga kinahanglanon.” (Mateo 5:3) Nahibaluan niya nga ang espirituwal nga mga manggad nagadul-ong sa permanente nga mga padya kag importante gid sangsa materyal nga mga butang nga wala nagadugay.​​—⁠⁠Lucas 12:13-31.

Mapuslanon Gid Bala Ini?

“Ginkumbinsi gid ako sang akon mga ginikanan nga indi praktikal ang espirituwal nga mga talaksan,” siling ni Greg. “Apang, naglinong ang akon  kabuhi sang gintinguhaan ko ang espirituwal nga mga tulumuron bangod wala na ako mahul-an sa pagpakig-indis-indis para sa manggad.”

Ang espirituwal nga mga talaksan makabulig man sa imo kaangtanan sa iban. Naluyagan ka sang imo matuod nga mga abyan bangod sang imo personalidad, indi bangod sang imo pagkabutang. Ang Biblia nagarekomendar: “Makig-upod ka sa mga maalam kag mangin maalam ka.” (Hulubaton 13:​20, Today’s English Version) Dugang pa, ang kadalag-an sang isa ka pamilya nasandig sa kaalam kag gugma, indi sa materyal nga mga pagkabutang.​​—⁠⁠Efeso 5:22⁠⁠–​​6:4.

Ang maayo nga mga prinsipio indi duna sa aton. Makatuon kita sini gikan sa aton mga isigkatawo ukon gikan sa Pulong sang Dios. Amo kon ngaa makabulig ang pagtuon sa Biblia agod mabag-o naton ang aton bug-os nga pagtamod tuhoy sa materyal nga mga butang. “Nabuligan ako nga binagbinagon liwat ang akon mga talaksan, kag natun-an ko nga mangin kontento sa kinahanglanon lamang nga mga butang,” siling ni Don, nga manedyer anay sa bangko.

Tinguhai ang Espirituwal nga mga Manggad nga Nagadugay

Ang espirituwal nga mga talaksan nagahatag, indi sing umalagi lamang nga kaayawan, kundi sing nagadugay nga mga padya. Nagsulat si Pablo: “Ang mga butang nga makita umalagi, apang ang mga butang nga di-makita walay katapusan.” (2 Corinto 4:18) Matuod, mahimo nga mabusog sang materyal nga mga butang ang umalagi nga mga handum, apang wala nagadugay ang benepisyo nga matigayon sang isa ka makagod nga tawo. Ang mga benepisyo sang espirituwal nga mga talaksan walay katubtuban.​​—⁠⁠Hulubaton 11:⁠4; 1 Corinto 6:​9, 10.

Ginapakamalaut sang Biblia ang materyalistiko nga pagtamod nga lapnag karon. Ginatudluan kita sini kon paano punggan ang makagod nga handum paagi sa pagpasimple sa aton mata, ginapatuhoy  ini sa mas importante nga mga butang, ang espirituwal nga mga manggad. (Filipos 1:10) Ginabuyagyag sini nga ang kakagod isa gid ka pagsimba sa kaugalingon. Samtang ginaaplikar naton ang matun-an naton gikan sa Pulong sang Dios, labi kita nga mangin malipayon. Sa baylo nga magbaton, interesado kita nga maghatag. Isa gid ini ka mabaskog nga pagpalig-on nga, sa baylo nga magpatuyang sa kaugalingon, sundon naton ang espirituwal nga mga talaksan!

Matuod, ang kuarta mahimo nga mangin proteksion sa pila ka kasangkaron. (Manugwali 7:12) Apang ang Biblia realistiko nga nagasiling: “Ang imo kuwarta madula sa isa lamang ka pamisok, nga daw tinuboan sang mga pakpak kag naglupad kaangay sang agila.” (Hulubaton 23:​5, Maayong Balita nga Biblia) Daku ang ginasakripisyo sang mga tawo bangod sang pagkamateryalistiko​​—⁠⁠ikaayong lawas, mga pamilya, matinlo nga konsiensia pa gani⁠—nga may malaglagon nga mga resulta. Sa pihak nga bahin, ginabusog sang espirituwal nga mga talaksan ang aton labing importante nga mga kinahanglanon⁠—ang gugma, katuyuan, kag pagsimba sa mahigugmaon nga Dios, si Jehova. Ginatudlo man sini kon paano matigayon ang himpit kag walay katapusan nga kabuhi sa isa ka paraiso nga duta​​—⁠⁠ang paglaum nga ginatanyag sang Dios sa aton.

Sa indi madugay ang kabuganaan nga ginahandum sang katawhan matuman na sing bug-os sa bag-ong kalibutan sang Dios. (Salmo 145:16) Sa sina nga tion ang bug-os nga duta “matugob sang ihibalo ni Jehova.” (Isaias 11:9) Magalambo ang espirituwal nga mga talaksan. Madula na sing bug-os ang materyalismo kag ang makahalalit nga epekto sini. (2 Pedro 3:13) Nian ang mga butang nga nagahimo sang aton kabuhi nga mas makaalayaw​​—⁠⁠ang himpit nga ikaayong lawas, makaalayaw nga trabaho, mapuslanon nga kalingawan, maayo nga relasyon sa pamilya, kag ang dayon nga pagpakig-abyan sa Dios​​—⁠⁠magahatag sa katawhan sing matuod nga kalipay tubtob sa walay katubtuban.

[Kahon/Retrato sa pahina 6]

Gamita Sing Mas Maalamon ang Imo Kuarta!

Hibalua ang imo mga kinahanglanon. Gintudluan kita ni Jesus nga mangamuyo: “Hatagi kami karon nga adlaw sang amon kalan-on sa inadlaw.” (Lucas 11:3) Indi pagtamda nga kinahanglanon ang mga butang nga naluyagan mo lamang. Dumduma nga wala nasandig sa sini ang imo kabuhi.​​—⁠⁠Lucas 12:16-21.

Magbadyet ka. Indi magpadasudaso sa pagbakal. Ang Biblia nagasiling: “Ang mga plano sang maukod nagapadulong gid sa kaayuhan, apang ang tagsatagsa nga padasudaso nagapadulong gid sa kinawad-on.” (Hulubaton 21:5) Ginlaygayan ni Jesus ang iya mga manugpalamati nga isipon anay ang bili antes sugdan ang bisan ano nga proyekto.​​—⁠⁠Lucas 14:28-30.

Likawi ang indi kinahanglanon nga pagpangutang. Kon mahimo, magsupot anay sing kuarta sa baylo nga mangutang. Amo sini ang ginasiling sang hulubaton: “Ang nagahulam alagad sang nagapahulam.” (Hulubaton 22:7) Paagi sa pagpugong sa kaugalingon kag pagsunod sa imo badyet, makaplano ka pa gani para sa dalagku nga mga balaklon.

Likawi ang pag-usik. Halungi ang mga butang nga nabakal mo na agod maglawig ini, sa amo mabuhinan ang usik. Nagpakita si Jesus sing nagakaigo nga pagtamod sa pagkinot may kaangtanan sa butang nga gingamit niya.​​—⁠⁠Juan 6:10-13.

Unaha ang importante nga mga butang. Ang isa ka maalam nga tawo ‘magabakal sing tion’ agod malab-ot ang mas importante nga mga tulumuron.​​—⁠⁠Efeso 5:​15, 16.

[Kahon/Retrato sa pahina 7]

Pagtuon Gikan sa Eksperiensia​​—⁠⁠May Mas Maayo nga Paagi

Ang personal nga mga eksperiensia​​—⁠⁠maayo kag malain​​—⁠⁠makatudlo sa aton sing mapuslanon nga mga leksion. Apang matuod gid bala nga ang labing maayo nga makatudlo sa aton amo ang aton naeksperiensiahan? Indi, may yara labaw pa nga makuhaan sing panuytoy. Ginkilala ini sang salmista sang nagsiling sia sa pangamuyo: “Ang imo pulong suga sa akon tiil, kag kapawa sa akon banas.”​​—⁠⁠Salmo 119:105.

Ngaa mas makatuon kita gikan sa instruksion sang Dios sangsa aton personal nga eksperiensia? Una, ang pagtuon lamang gikan sa eksperiensia​​—⁠⁠nga indi sigurado​​—⁠⁠mahimo nga masakit kag may kabayaran. Indi man ini kinahanglan nga matabo. “O kon talupangdon mo lamang ang akon mga sugo!” siling sang Dios sa dumaan nga mga Israelinhon. “Nian ang imo paghidait mangin subong sang suba, kag ang imo pagkamatarong subong sang mga balod sang dagat.”​​—⁠⁠Isaias 48:18.

Ang isa ka rason kon ngaa ang Pulong sang Dios indi matupungan sa paghatag sing instruksion amo nga ini nagaunod sang pinakadumaan kag labing sibu nga rekord sang naeksperiensiahan sang tawo. Ayhan narealisar mo nga ang pagtuon gikan sa mga kadalag-an kag mga kapaslawan sang iban mas maayo sangsa suliton mo ang ila mga sayop. (1 Corinto 10:6-11) Mas importante pa, paagi sa Biblia, nagahatag ang Dios sa aton sing mapuslanon kag masaligan nga mga sugo kag mga prinsipio. “Ang kasuguan ni Jehova himpit . . . Ang pahanumdom ni Jehova masaligan, nga nagapaalam sa isa nga indi eksperiensiado.” (Salmo 19:7) Sa pagkamatuod, ang pagtuon gikan sa kaalam sang aton mahigugmaon nga Manunuga amo ang labing maayo nga paagi.

[Retrato sa pahina 4]

Luyag sang kalibutan nga ilugon mo ang materyalistiko nga pagkabuhi sini

[Retrato sa pahina 5]

Mas bilidhon pa sa bulawan ukon pilak ang bahandi nga masapwan sa Biblia