Mga Pamangkot Gikan sa mga Bumalasa

Sang ginsilingan ni Jesus ang iya mga sumulunod nga “magpahulam nga wala sing saka, nga wala nagalaum sing bisan ano nga balos,” buot bala niya silingon nga indi nila dapat sukton bisan ang lawas sini?

Mahangpan sing maayo ang pinamulong ni Jesus sa Lucas 6:35 kon ginabinagbinag ang Mosaikong Kasuguan. Sa sini, ang Dios nagsugo sa mga Israelinhon nga magpahulam nga wala sing saka sa mga masigka-Israelinhon nga namigado kag nagakinahanglan gid sing bulig. (Exodo 22:25; Levitico 25:35-​37; Mateo 5:42) Wala ini ginhulam agod inegosyo. Sa baylo, ining wala-saka nga pagpahulam magapiyanpiyan sa kaimulon ukon kapurauton. Kay man, indi gid mahigugmaon nga magganansia sa kapigaduhon sang iban. Apang, ang nagapahulam may kinamatarong nga manukot sang lawas sini, kag ginakuha niya kon kaisa ang isa ka putika (kasiguruhan sa pagpahulam).​​—⁠⁠Deuteronomio 15:​7, 8.

Samtang ginasakdag ang Kasuguan, ginpasangkad pa ni Jesus ang aplikasyon sini, nga nagasiling nga ang isa nga nagabulig indi dapat maglaum “sing bisan ano nga balos.” Kaangay sa mga Israelinhon, ang mga Cristiano kon kaisa nagapamigado ukon nagaatubang sing mga kahimtangan nga mahimo magresulta sa kaimulon kag kapurauton. Kon ang isa ka Cristianong utod sa sini nga kahimtangan nagapangayo sing pinansial nga bulig, indi bala mahigugmaon nga buligan sia? Sa pagkamatuod, ang matuod nga gugma magapahulag sa masigka-Cristiano nga buligan ang isa ka utod nga namigado bangod sang mga sirkunstansia nga indi niya makontrol. (Hulubaton 3:27) Ayhan posible nga magregalo na lang sa utod nga nagakinahanglan, bisan pa ang kantidad mahimo nga mas diutay sangsa mapahulam sang isa.​​—⁠⁠Salmo 37:21.

Sang unang siglo C.⁠E., gintangduan sanday apostol Pablo kag Bernabe nga magdala sing mga amot halin sa mga Cristiano sa Asia Minor sa ila mga kauturan sa Judea bangod sang tiggulutom. (Binuhatan 11:28-30) Sa karon man, kon may mga kalamidad, masami nga nagapadala sing mga regalo ang mga Cristiano sa ila mga kauturan nga nagakinahanglan. Sa paghimo sini, nagahatag man sila sing maayo nga panaksi sa iban. (Mateo 5:16) Sa pagkamatuod, dapat man binagbinagon ang panimuot kag kahimtangan sang isa nga nagapangayo sing bulig. Ngaa nagakinahanglan sia sing bulig? Ang pinamulong ni Pablo talalupangdon: “Kon ang bisan sin-o indi magtrabaho, indi man sia pagpakan-on.”​​—⁠⁠2 Tesalonica 3:10.

Kon ang utod nga nagahulam indi man gid puraot kundi nagapangayo lamang sing bulig agod makatibawas sa pagpamigado tungod sa mga sirkunstansia nga indi niya makontrol, daw nagakaigo ang pagpahulam sa iya nga wala sing saka. Sa sini nga mga kahimtangan, ang pagpahulam nga nagalaum nga bayaran indi supak sa pinamulong ni Jesus sa Lucas 6:35. Dapat isulat ang mga kasugtanan, kag ang ginpahulam dapat manikasog nga bayaran ang ginhulam suno sa kasugtanan. Sa pagkamatuod, ang Cristianong gugma dapat magpahulag sa naghulam nga bayaran ini subong nga nagpahulag man ini sa isa nga pahulamon sia.

Dapat man tan-awon sang isa nga nagapahulam (ukon nagaregalo) ang kahimtangan sang iya pamilya. Halimbawa, makompromiso bala niya ang iya ikasarang sa pag-atipan sa kinahanglanon sang iya pamilya, nga suno sa Kasulatan isa ka panguna nga salabton? (2 Corinto 8:​12; 1 Timoteo 5:8) Sa gihapon, ang mga Cristiano nagapangita sing mga kahigayunan nga mapakita ang gugma sa isa kag isa, kag ginapakita ini nga gugma sa praktikal nga mga paagi nga nahisanto sa mga prinsipio sa Biblia.​​—⁠⁠Santiago 1:​27; 1 Juan 3:​18; 4:​7-​11.