Paghingamo sing Madamo Pa

“Kon wala kita sing kaayawan, wala man kita sing kabulusgan.”​​—⁠⁠Report sang Worldwatch Institute.

“ANO ang luyag naton? Tanantanan. San-o naton ini luyag matigayon? Subong gid.” Ini nga eslogan popular anay sa pila ka estudyante sa kolehiyo sang katuigan 1960. Sa karon, mahimo nga indi na mabatian ini nga eslogan, apang ang ideya sini yara gihapon. Sa pagkamatuod, ang paghingamo sing madamo pa daw amo ang kinaiya sang mga tawo sa aton dag-on.

Para sa madamo, ang pagtigayon sing manggad kag pagkabutang amo ang prioridad. Ang presidente anay sang Estados Unidos nga si Jimmy Carter nagsiling isa ka bes: “Wala na karon ginakilala ang tawo suno sa iya ginahimo kundi suno sa iya ginapanag-iyahan.” May importante pa bala sangsa aton mga pagkabutang? Kon may yara, ano ini, kag ano ang mga benepisyo sini?