Makabatyag Pa Bala Kita sing Matuod nga Seguridad?

MASADYA nga nagahinampang ang mga bata upod sa ila mahigugmaon nga mga ginikanan​​—⁠⁠sin-o ang indi mawili sa sini nga talan-awon? Nagabatyag gid sing seguridad ini nga mga bata kon kaupod nila ang ila mapinalanggaon nga mga ginikanan. Apang, madamong kabataan ang wala gid nagabatyag sini nga kalipay. Sa baylo, kada adlaw ginapaligban sang pila ka kabataan kon diin naman sila matulog sa gab-i. May paglaum pa bala ining walay puluy-an nga mga bata kag iban pa nga wala sing seguridad?

Bisan pa daw madulaan ka sing paglaum sa palaabuton, nagahatag sing paglaum ang Pulong sang Dios. Gintagna ni manalagna Isaias ang adlaw nga magakabuhi na ang tanan nga may seguridad. Nagsulat sia: “Pat-od nga magapatindog sila sing mga balay kag magapuyo sa sini; kag pat-od nga magatanom sila sing mga ulubasan kag magakaon sang bunga sini. Indi sila magpatindog kag iban ang magapuyo; indi sila magtanom kag iban ang magakaon.”​​—⁠⁠Isaias 65:​21, 22.

Apang masaligan bala ini nga paglaum? Bisan ang tinaga nga “paglaum” indi sa tanan nga tion nagapahangop sing kapat-uran. Halimbawa, sa Brazil, may pinamulong nga “A esperança é a última que morre,” nga nagapahangop nga madamo nga tawo ang nagalaum gihapon bisan pa wala sila sing malauman. Apang, tuhay ang paglaum nga ginatanyag sa aton sang buhi nga Dios. Si apostol Pablo nagsulat: “Wala sing bisan sin-o nga nagabutang sang iya pagtuo sa [Dios] ang mapaslawan.” (Roma 10:11) Ang natuman na nga mga tagna sang Biblia nagapasalig sa aton nga ang tanan iban pa nga mga saad ni Jehova nga Dios matuman man. Kon matuman na ini nga mga saad, madula na ang mga kahimtangan nga nagpilit sa mga bata nga mag-istar sa mga kalye.

Ang praktikal nga mga laygay sang Biblia makabulig bisan karon sa mga walay paglaum agod mag-ayo ang ila kabuhi kag makita nila ang matuod nga seguridad. Paano? Malipay ang mga Saksi ni Jehova sa inyo komunidad sa pagbulig sa imo nga makita ang sabat sa sini nga pamangkot.