Mga Pamangkot Gikan sa mga Bumalasa

Paano ginatamod sang Cristianong kongregasyon ang pagkahakugan?

Ginapakamalaut sang Pulong sang Dios ang pagpahubog kag ang pagkahakugan subong mga buhat nga indi nagakaigo sa mga alagad sang Dios. Gani, ang pagtamod sang Cristianong kongregasyon sa kompirmado nga hakugan pareho sa palahubog. Indi mahimo mangin bahin sang Cristianong kongregasyon ang palahubog kag ang hakugan.

Ang Hulubaton 23:​20, 21 nagasiling: “Indi ka makig-upod sa mga lakas mag-inom sing alak, sa mga mahakog magkaon sing karne. Kay ang palahubog kag ang hakugan magaimol, kag ang katuyo magapapanapot sa isa ka tawo sing mga lapat lamang.” Sa Deuteronomio 21:​20, mabasa naton ang tuhoy sa “batinggilan kag mabinatuon” nga indibiduwal, nga takus sa kamatayon sa idalom sang Mosaikong Kasuguan. Suno sa sini nga bersikulo, ang duha ka kinaiya sining rebelyuso kag di-mahinulsulon nga indibiduwal amo nga “hakugan sia kag palahubog.” Maathag nga sa Israel sang una, ginatamod ang pagkahakugan nga isa ka buhat nga indi nagakaigo sa mga luyag mag-alagad sa Dios.

Apang, ano ang pagkahakugan, kag ano ang ginasiling sang Cristianong Griegong Kasulatan tuhoy sini? Ang isa ka hakugan “dalokdalok kag walay kaayawan sa pagkaon kag pag-inom.” Sa amo, ang pagkahakugan isa ka sahi sang kakagod ukon pagkasakon, kag ang Pulong sang Dios nagasiling sa aton nga ang “mga tawo nga  sakon” indi makapanubli sang Ginharian sang Dios. (1 Corinto 6:​9, 10; Filipos 3:​18, 19; 1 Pedro 4:3) Dugang pa, sang ginpaandaman ni apostol Pablo ang mga Cristiano sa “mga buhat sang unod,” ginsambit niya ang “mga paghuboghubog, magansal nga kinalipay, kag mga butang nga kaangay sini.” (Galacia 5:19-21) Masami nga kaupod sang paghuboghubog kag magansal nga kinalipay ang sobra nga pagkaon. Dugang pa, pat-od nga nalakip ang pagkahakugan sa ginsiling ni Pablo nga “kag mga butang nga kaangay sini.” Kaanggid sa iban pa nga “mga buhat sang unod,” ang isa ka Cristiano nga kilala nga hakugan kag nagapakatig-a sa pagbag-o sang iya makagod ukon mahamkunon nga batasan dapat isikway sa kongregasyon.​​—⁠⁠1 Corinto 5:​11, 13.⁠ *

Bisan pa pareho ang pagtamod sang Pulong sang Dios sa palahubog kag sa hakugan, mas mahapos makilala ang palahubog sangsa hakugan. Mas maathag ang mga palatandaan sang pagpahubog. Apang mas mabudlay mapat-od kon tubtob diin mangin kompirmado nga hakugan ang isa ka indibiduwal bangod indi ini mapat-od sa nagua lamang nga panagway. Gani, kinahanglan gid ang labi nga paghalong kag maayo nga paghantop sang mga gulang sa kongregasyon nga nagauyat sini nga mga kaso.

Halimbawa, ang sobra nga katambukon mahimo isa ka palatandaan sang pagkahakugan, apang indi ini matuod sa tanan nga kaso. Mahimo nga nangin tuman katambok ang isa bangod sang balatian. Mahimo man nga napanubli niya ini. Dapat man naton dumdumon nga ang sobra nga katambukon isa ka pisikal nga kahimtangan, samtang ang pagkahakugan isa ka panimuot, ang dalok ukon sobra nga pagpatuyang. Gani, ang pagkahakugan indi mapat-od sa kadakuon sang lawas kundi sa panimuot sang isa sa pagkaon. Mahimo nga normal lang ang kadakuon sang isa ka indibiduwal ukon basi maniwang pa gani sia apang hakugan sia. Isa pa, lainlain ang talaksan sang husto nga kabug-aton ukon panglawason sa kada lugar.

Ano ang mga palatandaan sang pagkahakugan? Ang isa ka hakugan wala nagapugong sang iya kaugalingon sa dinalok kag sobra nga pagkaon tubtob nga indi na maayo ang iya pamatyag ukon magbalatian na sia. Ang indi niya pagpugong sa iya kaugalingon nagapakita nga wala sia mabalaka sa magaresulta nga kahuy-anan sa ngalan ni Jehova kag sa Iya katawhan. (1 Corinto 10:31) Sa pihak nga bahin, ang isa ka tawo nga masobrahan sa pagkaon kon kaisa indi dayon makabig nga “makagod nga tawo.” (Efeso 5:5) Apang, suno sa Galacia 6:​1, basi nagakinahanglan sing bulig ini nga Cristiano. Si Pablo nagsiling: “Mga kauturan, bisan pa ang isa ka tawo makahimo sing sayop nga tikang antes niya matalupangdan ini, kamo nga may espirituwal nga mga kalipikasyon magtinguha nga pasibuon ina nga tawo sa espiritu sang pagkalulo.”

Ngaa importante gid karon ang laygay sang Biblia nga likawan ang sobra nga pagkaon? Bangod nagpaandam si Jesus, ilabi na sa aton tion: “Hatagi sing igtalupangod ang inyo kaugalingon nga ang inyo mga tagipusuon indi gid mabug-atan sang sobra nga pagkaon kag lakas nga pag-inom kag mga kabalaka sa kabuhi, kag yadto nga adlaw magaabot sa inyo sing hinali subong sang siod.” (Lucas 21:​34, 35) Ang indi pagpatuyang sa pagkaon isa ka importante nga paagi agod malikawan ang makahalalit sa espirituwal nga estilo sang pagkabuhi.

Isa ka Cristianong kinaiya ang mangin haganhagan. (1 Timoteo 3:​2, 11) Gani, buligan gid ni Jehova ang tanan nga nagapanikasog sa pagsunod sa laygay sang Biblia nga mangin haganhagan sa pagkaon kag sa pag-inom.​​—⁠⁠Hebreo 4:16.

[Nota]