Nahibaluan Mo Bala ang Kalipay Bangod sang Paghatag?

ANG isa ka matutom nga utod nga babayi aktibo sa Cristianong pag-alagad sa sulod sang halos 50 na ka tuig. Bisan pa maluya na sia bangod sang katigulangon, determinado sia nga magkadto sa bag-o gintukod nga Kingdom Hall. Ginadapit sang isa ka utod nga lalaki, nagsulod sia sa Kingdom Hall kag diretso nga naglakat sing mahinay pakadto sa kahon-alamutan. Naghulog sia sing kuarta nga ginsupot niya agod iamot. Bisan pa indi sia makatrabaho sa pagpatindog sini, luyag niya makabulig.

Ining Cristianong babayi mahimo magpahanumdom sa imo sa isa pa ka matutom nga babayi​​—⁠⁠ang “imol nga babaying balo” nga nakita ni Jesus nga naghulog sing duha ka gamay nga sensilyo sa bahandian sang templo. Wala kita ginsugiran tuhoy sa iya kahimtangan, apang kon ang isa balo sadto, mahimo gid nga pigado sia. Pat-od nga nahanuklog si Jesus sa iya bangod nahangpan gid ni Jesus ang iya kahimtangan. Agod ipakita ang halimbawa sang babaying balo sa iya mga disipulo, si Jesus nagsiling nga ang gamay nga dulot sang babaying balo nagarepresentar sang “tanan niya, ang iya bug-os nga pangabuhian.”​​—⁠⁠Marcos 12:41-44.

Ngaa ang isa ka kubos nga babayi kaangay sining imol nga balo nagsakripisyo sing subong sini? Maathag nga bangod ini sang iya tudok nga debosyon kay Jehova nga Dios, nga ang sentro sang pagsimba sa Iya yara sa templo sa Jerusalem. Bisan pa limitado lamang ang iya mahimo, luyag niya sakdagon ang sagrado nga pag-alagad. Kag nalipay gid sia sa paghatag sing masarangan niya.

Paghatag Agod Sakdagon ang Hilikuton ni Jehova

Ang pag-amot sing materyal kag kuarta importante gid pirme nga bahin sang putli nga pagsimba, kag pirme ini ginatunaan sang daku nga kalipay. (1 Cronica 29:9) Sa dumaan nga Israel ang mga amot gingamit indi lamang agod patahumon ang templo kundi agod magpadayon man ang adlaw-adlaw nga pagpanghikot sa tanan nga aspekto sang pagsimba kay Jehova. Ginsiling sang Kasuguan nga ang mga anak sang Israel mag-amot sing ikanapulo nga bahin sang ila patubas agod sakdagon ang mga Levinhon, nga nagaserbisyo sa templo. Apang ang mga Levinhon mag-amot man para kay Jehova sing ikanapulo nga bahin sang mga produkto nga ila nabaton.​​—⁠⁠Numeros 18:21-​29.

Bisan pa ang mga Cristiano wala na sa idalom sang Kasuguan nga katipan, ang prinsipio nga ang mga alagad sang Dios mag-amot sing materyal bilang pagsakdag sa matuod nga pagsimba wala magbag-o. (Galacia 5:1) Dugang pa, ang mga Cristiano sang unang siglo nalipay sa pag-amot agod makapiyanpiyan sa kinawad-on sang  ila mga kauturan. (Binuhatan 2:​45, 46) Ginpahanumdom ni apostol Pablo ang mga Cristiano nga subong nga ang Dios maalwan nga naghatag sa ila sing maayong mga butang, dapat man sila mangin maalwan sa iban. Sia nagsulat: “Tulini ang mga manggaranon sa karon nga sistema sang mga butang nga indi sila magmatinaastaason, kag ipahamtang nila ang ila paglaum, indi sa walay kapat-uran nga mga manggad, kundi sa Dios, nga nagahatag sa aton sing tanan nga butang sing bugana para sa aton ikalipay; nga maghimo sing maayo, nga mangin manggaranon sa maayong mga buhat, nga mangin maalwan, handa sa pagpaambit, mahalungon nga nagatipon para sa ila kaugalingon sing maayo nga sadsaran para sa palaabuton, agod makapanguyapot sila sing hugot sa matuod nga kabuhi.” (1 Timoteo 6:17-19; 2 Corinto 9:11) Sa pagkamatuod, pasad sa iya naeksperiensiahan, napamatud-an ni Pablo ang pinamulong ni Jesus: “May kapin nga kalipay sa paghatag sangsa pagbaton.”​​—⁠⁠Binuhatan 20:35.

Ang Cristianong Paghatag Karon

Sa karon, ang mga alagad ni Jehova padayon nga nagagamit sang ila pagkabutang agod buligan ang isa kag isa kag agod sakdagon ang hilikuton sang Dios. Bisan ang mga kubos nagaamot sing masarangan nila. “Ang matutom kag mainandamon nga ulipon” may salabton kay Jehova nga gamiton sa labing maayo nga paagi ining tanan nga gin-amot nga mga pundo. (Mateo 24:45) Ang mga pundo ginagamit sa pagpalakat sa mga sanga talatapan, sa pagbadbad kag pagbalhag sing mga Biblia kag mga literatura sa Biblia, sa paghiwat sing dalagku nga pagtinipon sang mga Cristiano, sa paghanas kag pagpadala sing mga nagalakbay nga manugtatap kag mga misyonero, sa paghatag sing bulig sa mga biktima sang kalamidad, kag sa madamo iban pa nga importante nga katuyuan. Binagbinagon naton ang isa sini nga katuyuan​​—⁠⁠paghatag sing pundo para sa pagpatindog sing mga duog sang pagsimba.

Ang mga Saksi ni Jehova nagatipon sing pila ka beses kada semana sa ila mga Kingdom Hall agod magbenepisyo gikan sa espirituwal nga edukasyon kag makapalig-on nga pagpakig-upod. Apang, sa madamo nga pungsod, bangod sang kapigaduhon indi makapatindog sing mga Kingdom Hall ang mga Saksi didto kon wala sing pinansial nga bulig. Gani, sang 1999, ginsugdan sang mga Saksi ni Jehova ang isa ka programa nga ginagamit ang mga pundo gikan sa manggaranon nga mga pungsod sa pagpatindog sing mga Kingdom Hall sa imol nga mga pungsod. Dugang pa, linibo ka mga boluntaryo ang nag-amot sang ila tion kag ikasarang, nga sa masami  nagatrabaho sa baw-ing nga mga duog sa sini nga mga pungsod. Sa tion sang konstruksion, ang lokal nga mga Saksi nagatuon sing mga kalantip sa pagpatindog kag pagmentinar, kag bangod sang Kingdom Hall Fund nabakal ang kinahanglanon nga mga kagamitan kag mga materyales. Ang mga Saksi nga nagagamit na sining bag-o nga mga Kingdom Hall nagapasalamat gid sa gin-amot nga tion kag kuarta sang ila mga masigkatumuluo. Nagaamot man sila kada bulan agod mamentinar ang bag-o nga Kingdom Hall kag maulian ang kagastuhanan sa pagpatindog, sa amo nagabulig sa pagpatindog sing dugang pa nga mga Kingdom Hall.

Ang mga Kingdom Hall ginapatindog nga nagagamit sing lokal nga mga pamaagi kag mga materyales. Bisan pa simple lang ini nga mga tinukod, matahom ini, praktikal, kag komportable. Sang nagsugod ang programa sang pagpatindog sang 1999, mga 40 ka imol nga pungsod ang nalakip sa sini. Sugod sadto, ginpasangkad ang programa sa pagpatindog kag naglakip na sing 116 ka pungsod, nga nagalakip sing kapin sa katunga sang mga kongregasyon sang mga Saksi ni Jehova sa bug-os nga kalibutan. Sang nagligad nga lima ka tuig, kapin sa 9,000 ka Kingdom Hall ang napatindog na sa idalom sining kahimusan, nga may promedyo nga kapin sa 5 ka bag-o nga Kingdom Hall kada adlaw! Apang, sa sining 116 ka pungsod, kinahanglan pa ang 14,500 ka bag-o nga Kingdom Hall. Paagi sa pagpakamaayo ni Jehova kag sa kahanda kag kaalwan sang mga Saksi sa bug-os nga kalibutan, ginalauman nga may bastante nga mga pundo agod mahatag ini nga kinahanglanon.​​—⁠⁠Salmo 127:1.

Ang mga Kingdom Hall Nagabulig sa Pag-uswag

Ano ang epekto sining daku nga mga panikasog sa lokal nga mga Saksi kag sa hilikuton nga pagbantala sing Ginharian? Sa madamo nga duog, may talalupangdon nga pagdamo sang mga nagatambong sa mga miting sang napatindog na ang bag-o nga Kingdom Hall. Makita ang isa ka halimbawa sa report halin sa Burundi: “Sang matapos na ang Kingdom Hall, napuno ini. Halimbawa, ginpatindog ang isa ka Kingdom Hall para sa kongregasyon nga may promedyo nga 100 ka tumalambong sa ila mga miting. Ang ila bag-o nga Kingdom Hall makapapungko sing 150. Sang matapos na ini, 250 ang nagatambong sa mga miting.”

Ngaa may subong sini nga pag-uswag? Ang isa ka rason amo nga ang mga grupo sang mga manugbantala sang Ginharian nga wala sing nagakaigo nga duog-tilipunan kundi nagatipon sa idalom sang kahoy ukon sa latagon ginasuspetsahan kon kaisa. Sa isa ka pungsod, ang kasingki  sa rasa ginaangot sa magamay nga relihioso nga mga grupo, kag ginapatuman sang kasuguan nga ang tanan nga relihioso nga mga pagtinipon dapat hiwaton sa sulod sang isa ka balay sang pagsimba.

Ang pagtigayon sang ila kaugalingon nga duog-tilipunan nagabulig man sa mga Saksi ni Jehova nga ipakita sa komunidad nga indi sila mga disipulo sang pila ka indibiduwal nga pastor. Ang sanga talatapan sang mga Saksi ni Jehova sa Zimbabwe nagsulat: “Sang una, ang mga kauturan sa sini nga duog nagatipon sa pribado nga mga puluy-an, kag ginakilala sang mga pumuluyo sa sini nga duog ang kongregasyon subong sumulunod sang tag-iya sang balay nga ila ginatipunan. Ginapatuhuyan nila ang mga kauturan subong katapo sang simbahan ni G. Kwan. Nagabag-o na ini karon bangod makita na sang mga tawo ang mga karatula nga maathag nga nagapakilala sa tagsa ka tilipunan subong ‘Kingdom Hall of Jehovah’s Witnesses.’”

Malipayon nga mga Nagahatag

“Ang Dios nagahigugma sa malipayon nga nagahatag,” sulat ni apostol Pablo. (2 Corinto 9:7) Siempre, ang dalagku nga mga amot makabulig gid. Apang ang daku nga bahin sang mga pundo  nga ginaamot sa hilikuton sang mga Saksi ni Jehova nagahalin sa mga kahon-alamutan sang Kingdom Hall. Daku man ukon gamay, ang tanan nga amot importante kag wala ginapasapayanan. Dumduma nga nakita ni Jesus ang imol nga balo nga babayi nga nag-amot sang iya duha ka gamay nga sensilyo. Nakita man sia sang mga anghel kag ni Jehova. Wala gani naton mahibaluan ang ngalan sang balo nga babayi, apang ginpat-od ni Jehova nga ang iya di-makagod nga buhat marekord sa Biblia.

Dugang pa sa pagpatindog sa mga Kingdom Hall, ang aton mga amot nagasakdag sang tanan iban pa nga bahin sang hilikuton sang Ginharian. Ang pagbulig sa sini nga paagi nagapahalipay sa aton kag nagahatag sa aton sing rason nga mangin “bugana sa madamo nga pagpahayag sing pagpasalamat sa Dios.” (2 Corinto 9:12) Ang aton Cristianong kauturan sa Benin nagreport: “Kada adlaw madamo nga pangamuyo sang pagpasalamat ang ginapatungod kay Jehova tungod sa pinansial nga bulig nga nabaton gikan sa internasyonal nga paghiliutod.” Sa amo man nga tion, tanan kita nga nagapakigbahin sa pinansial nga pagsakdag sa hilikuton sang Ginharian nagakalipay bangod sang Cristianong paghatag!

[Kahon/Retrato sa pahina 22, 23]

Mga Paagi sang Iban sa Paghatag

MGA KONTRIBUSYON PARA SA BUG-OS KALIBUTAN NGA HILIKUTON

Madamo ang nagapain, ukon nagatigana sing kantidad nga gin3yahulog nila sa mga kahon-alamutan nga may ngalan “Contributions for the Worldwide Work​​—⁠⁠Matthew 24:14.”

Kada bulan, ginapadala sang mga kongregasyon ini nga kantidad sa opisina sang mga Saksi ni Jehova sa ila mga pungsod. Ang boluntaryo nga donasyon nga kuarta mahimo man ipadala direkta sa Watch Tower Bible and Tract Society of the Philippines, Inc., P.O. Box 2044, 1060 Manila, ukon sa sanga talatapan nga nagapangalagad sa inyo pungsod. Ang mga tseke dapat ipangalan sa “Watch Tower.” Mahimo man idonar ang mga alahas ukon iban pa malahalon nga mga pagkabutang. Dapat ilakip sa sini nga mga donasyon ang isa ka malip-ot nga sulat nga nagasiling nga ini isa ka direkta nga regalo.

KAHIMUSAN SANG MAY KONDISYON NGA DONASYON

Mahimo man itugyan ang kuarta sa Watch Tower. Apang, kon pangabayon ini sang nagdonar, mahimo ibalik ang kuarta sa iya. Sa dugang nga impormasyon, makig-angot palihug sa direksion nga ginsambit kaina.

CHARITABLE PLANNING

Dugang pa sa direkta nga mga regalo nga kuarta, may iban pa nga paagi sang paghatag nga makabulig sa bug-os kalibutan nga pag-alagad sa Ginharian. Nagalakip ini sa:

Paseguro: Mahimo hingadlan ang Watch Tower nga benepisyaryo sang isa ka kontrata sang paseguro sa kabuhi ukon isa ka plano sa pagretiro/pension.

Mga Deposito sa Bangko: Ang mga deposito sa bangko, sertipiko sang deposito, ukon deposito sang indibiduwal para sa iya pagretiro mahimo itugyan ukon ibayad sa tion sang kamatayon sa Watch Tower, suno sa mga reglamento sang lokal nga bangko.

Stocks kag Bonds: Mahimo idonar sa Watch Tower ang stocks kag bonds subong direkta nga regalo.

Propiedad: Mahimo idonar ang sarang mabaligya nga propiedad paagi sa direkta nga pagregalo sini ukon, sa kaso sang balay kag lote, paagi sa pagreserba sang pagpanag-iya sa nagdonar tubtob buhi sia, nga mahimo sia makapadayon sa pag-istar diri sa iya bug-os nga kabuhi. Makig-angot sa sanga talatapan sang inyo pungsod antes legal nga sayluhon ang titulo sang ano man nga propiedad.

Gift Annuity: Ang gift annuity isa ka kasugtanan diin ang isa nagdonar sang kuarta ukon securities sa isa ka korporasyon sang Watch Tower. Bilang kabaylo, ang nagdonar, ukon ang isa nga gintangduan sang nagdonar, regular nga makabaton sing ginpat-od nga kantidad nga kabayaran kada tuig tubtob buhi sia. Ang nagdonar makabaton sang income-tax deduction sa tuig nga nagsugod ang gift annuity.

Mga Testamento kag mga Trust Agreement: Mahimo ipapanubli sa Watch Tower ang pagkabutang ukon kuarta paagi sa isa ka legal nga testamento, ukon mahimo hingadlan ang Watch Tower subong benepisyaryo sang isa ka trust agreement. Ang paghingalan sa isa ka relihioso nga organisasyon subong benepisyaryo sang isa ka trust agreement makahatag sing pila ka bentaha sa pagbayad sang buhis.

Subong ginapahangop sang termino nga “charitable planning,” ining sahi sang mga donasyon nagakinahanglan sang pagplano sa bahin sang nagdonar. Agod buligan ang mga indibiduwal nga luyag maghatag sing pinansial nga bulig para sa bug-os kalibutan nga hilikuton sang mga Saksi ni Jehova paagi sa pila ka porma sang ginplano nga pagdonar, ginhanda ang isa ka brosyur sa Ingles kag Espanyol nga ginatig-uluhan Charitable Planning to Benefit Kingdom Service Worldwide. Ginsulat ang brosyur agod maghatag sing impormasyon tuhoy sa nanuhaytuhay nga paagi sang pagdonar karon ukon sa tion sang kamatayon. Pagkatapos mabasa ang brosyur kag makonsulta ang ila mga abogado ukon manugkwenta sang buhis, nakabulig ang madamo sa pagsuportar sa hilikuton sang mga Saksi ni Jehova sa bug-os nga kalibutan kag napadaku nila ang ila mga benepisyo sa buhis bangod sang paghimo sini. Ini nga brosyur matigayon paagi sa pagpangabay sing kopya direkta sa Charitable Planning Office.

Para sa dugang nga impormasyon, mahimo kamo magpakig-angot sa Charitable Planning Office, paagi sa sulat ukon sa telepono, sa direksion nga nalista sa ubos ukon sa opisina sang mga Saksi ni Jehova sa inyo pungsod.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue

San Francisco Del Monte

1105 Quezon City

Telepono: (02) 411-6090

[Mga retrato sa pahina 20, 21]

Daan kag bag-o nga mga duog-tilipunan sang mga Saksi ni Jehova

Zambia

Central African Republic