Kon Ano ang Basahon​—Ang Maalamon nga Laygay ni Solomon

“ANG paghimo sing madamo nga libro wala sing katapusan, kag ang tama nga paghugod sa sini makapalapyo sa unod.” (Manugwali 12:12) Wala ginapalas-ay sang maalam nga si Hari Solomon sang Israel ang pagbasa sang ginsulat niya ining mga pinamulong mga 3,000 ka tuig na ang nagligad. Sa baylo, ginakomentuhan niya ang kinahanglanon nga mangin mapilion. Sibu gid sa tion ining pahanumdom karon, kay binilyon ka pahina sang mga balasahon ang ginaimprinta kada tuig!

Maathag nga ang “madamo nga libro” nga ginapatuhuyan ni Solomon indi makapalig-on ukon makapabakod. Busa, nangatarungan sia nga ang paghugod sa sini, sa baylo nga makahatag sing positibo kag mapinadayunon nga mga padya, “makapalapyo sa unod.”

Apang, buot bala silingon ni Solomon nga wala na sing mga libro nga makahatag sing maayo kag masaligan nga panuytoy nga makabenepisyo ang bumalasa? Indi, kay sia man nagsulat: “Ang mga pulong sang maalam subong sang mga pangtuslok sa baka, kag subong sang mga lansang nga ginpadulot sang mga nagatipon sang mga dinalan; ginhatag ini gikan sa isa ka manugbantay.” (Manugwali 12:11) Sa pagkamatuod, may mga sinulatan nga “subong sang mga pangtuslok,” makaaman sing positibo nga motibasyon. Mapahulag sini ang isa sa husto nga paagi. Dugang pa, “subong sang mga lansang nga ginpadulot,” makabulig ini sa pagpalig-on sang pamat-od sang isa kag may makapabakod nga epekto.

Diin naton masapwan ining maalamon nga mga pinamulong? Ang nagapanguna sa sini, suno kay Solomon, amo ang naghalin sa isa ka Manugbantay, si Jehova. (Salmo 23:1) Busa, ang pinakamaayo nga libro nga pilion sang isa amo ang gin-inspirar sang Dios​​—⁠⁠ang Biblia. Ang regular nga pagbasa sining inspirado nga mga pinamulong makabulig sa isa nga mangin “nasangkapan sing bug-os para sa tagsa ka maayong buhat.”​​—⁠⁠2 Timoteo 3:​16, 17.