Madumduman Mo Bala?

Nalipay ka bala sa pagbasa sa ulihi nga mga gua sang Ang Lalantawan? Bueno, tilawi kon masabat mo ang masunod nga mga pamangkot:

• Ano ang himuon sang isa ka Cristiano kon makabatyag sia sing kalapyo sa emosyon kag sa espirituwal?

Dapat naton mahibaluan ang kabangdanan sang aton kalapyo. Mahimo makabulig kon ilista naton ang aton mga batasan kag mga pagkabutang, kag isikway ang di-kinahanglanon nga kabug-atan. Makapahamtang kita sing realistiko nga mga tulumuron suno sa aton kahimtangan. Dapat naton atipanon ang aton espirituwal nga kapagros kag pirme mangamuyo kag magpamalandong.​​—⁠8/15, pahina 23-6.

• Ngaa nagasiling ang mga Saksi ni Jehova nga literal nga numero ang 144,000?

Sa tapos masugiran si apostol Juan tuhoy sa 144,000, nakita niya “ang isa ka dakung kadam-an, nga wala sing tawo nga makaisip.” (Bugna 7:​4, 9) Kon simbuliko ang numero nga 144,000, indi maathag ang kinatuhayan. Ginsiling ni Jesus nga ang mangin kaupod niya sa paggahom isa ka “diutay nga panong.” (Lucas 12:32)​​—⁠9/1, pahina 30.

• Ngaa mahimo ibaligya sang isa ka Israelinhon ang wala mapadugo nga patay nga sapat sa isa ka dumuluong?

Ang isa ka dumuluong ukon dumuluong nga pumuluyo nga indi nangin proselita wala sa idalom sang Kasuguan. Gani gintugutan ang isa ka Israelinhon sa paghatag ukon sa pagbaligya sining mga sapat sa iya. (Deuteronomio 14:21) Apang ang proselita napaidalom sa Kasuguan kag indi dapat magkaon sing karne sang wala mapadugo nga sapat. (Levitico 17:10)​—⁠9/15, pahina 26.

• Paano gin-ilog sang mga tawo ang mga desinyo nga masapwan sa kinaugali, kag ngaa interesado sa sini ang mga Cristiano?

Halimbawa, ang mag-utod nga Wright nagdesinyo sing isa ka eroplano sa tapos nila matun-an ang dalagku nga mga pispis nga nagalupad. Ini nga impormasyon makapahulag sa isa ka Cristiano nga himayaon ang Manunuga.​—⁠10/1, pahina 9.

• Sin-o ang ginsambit sa 2 Corinto 12:2-4 nga ginsabnit pakadto sa paraiso?

Ini nga mga dinalan nagasunod sa mga bersikulo nga nagasugid sang pagdepensa ni Pablo sa iya pagkaapostol. Bangod ang Biblia wala nagsambit sang iban nga tawo nga nakaeksperiensia sini kag si Pablo lamang ang nagsugid sini sa aton, mahimo gid nga si Pablo ang nakabaton sining palanan-awon.​—⁠10/15, pahina 8.

• Ano ang pila ka kinaiya ni Jesus amo nga kalipikado sia nga mangin Lider nga pinili sang Dios?

Nahuptan ni Jesus ang himpit nga integridad, bunayag sia kag matarong sa iya paggawi. Bug-os sia nga dedikado sa Dios. Nabalaka gid si Jesus sa katawhan kag handa sia mangabudlay.​—⁠11/1, pahina 6-7.

• Sa diin ang mga demonyo sa tion sang Milenyo?

Makahinakop kita sing makatarunganon nga sa tion sang Isa ka Libo ka Tuig nga Paghari ni Cristo, itagbong sila kaupod ni Satanas sa kadadalman. (Bugna 20:1-3) Gintagna sang Genesis 3:15 ang pagdugmok sa ulo sang man-ug, nga nagalakip sa pagtagbong sa iya sa kadadalman sa tion sang Milenyo. Lakip sa iya binhi ang malauton nga mga anghel, ukon mga demonyo. Ang daku nga kahadlok sang malauton nga mga espiritu sa kadadalman nagapahangop nga nahibaluan nila ini nga paglimite sa ulihi. (Lucas 8:31)​—⁠11/15, pahina 30-1.

• Ngaa dapat maghalong ang isa sa pag-inom sang makahulubog nga ilimnon, bisan pa ginalikawan niya nga mahubog?

Ang pila ka tawo daw indi bal-anon nga hubog bisan pa madamo na sing nainom. Apang sing amat-amat, ang isa mahimo magiyan sa alkohol kag mangin ‘ulipon sa madamo nga alak.’ (Tito 2:3) Nagpaandam si Jesus nga indi kita dapat ‘mabug-atan sang sobra nga pagkaon kag lakas nga pag-inom.’ (Lucas 21:​34, 35) Ang pag-inom indi na kinahanglan nga maglab-ot pa sa pagpahubog antes sini patuyuhon kag paluyahon ang tawo​—⁠sa pisikal subong man sa espirituwal.​—⁠12/1, pahina 19-​21.