‘Nalipay Kay Ginhanas Ako’

NAKIBOT ang pamatan-on nga si Kazuna sang ginsilingan sia sang iya maestro nga mag-entra sa isa ka paindis-indis nga magapamulongpulong sia sa Ingles. Para ini nga paindis-indis sa tanan nga hayskul sa Hokkaido, ang naaminhan kag daku nga isla sang Japan, apang wala pa gid sing estudyante sa ila eskwelahan nga nakaentra sa sini. Sa adlaw sang paindis-indis, kinulbaan si Kazuna kay kaatubang niya ang mga 50 ka estudyante. Labi sia nga kinulbaan sang natalupangdan niya nga Ingles ang tumandok nga lenguahe sang duha ka miembro sang hurado.

Ginlawag ang mga nagdaug sugod sa pinakaulihi nga premyo. Nakibot si Kazuna sang sia ang ulihi nga ginlawag. Indi makapati nga nagtulukay sila sang iya maestro nga tupad niya. Daw indi gihapon makapati, nagsaka sa entablado si Kazuna kag ginbaton ang iya tropeo​—⁠para sa una nga premyo!

“Natabo lamang ini bangod sang paghanas sa akon sang organisasyon ni Jehova paagi sa Teokratikong Eskwelahan Para sa Ministeryo,” malipayon nga paathag ni Kazuna. “Nalipay gid ako bangod nabaton ko ini nga paghanas.” Ini nga eskwelahan, nga ginapakigbahinan ni Kazuna halin sang bata pa sia, isa sa mga miting sa kongregasyon sang mga Saksi ni Jehova. Sang nagahanda si Kazuna sa paindis-indis, nagkonsentrar sia sa paggamit sa mikropono, paghambal nga may kainit kag kapagsik, pagkumpas, pagtulok sa tagpalamati, kag sa iban pa nga mga topiko nga ginatudlo sa Teokratikong Eskwelahan Para sa Ministeryo.

Ginaagda namon ikaw nga mag-obserbar sa sini nga eskwelahan, nga ginahiwat kada semana sa Kingdom Hall sang mga Saksi ni Jehova sa inyo lugar. Tan-awa kon paano nagabenepisyo ang mga pamatan-on kag mga tigulang. Ginaagda ang tanan sa sini nga miting. Para sa dugang nga impormasyon tuhoy sini nga eskwelahan nga malapit sa inyo puluy-an, palihug kontaka ang mga Saksi ni Jehova sa inyo lugar.