Ginhanas sa Pagpanaksi sing Maid-id

“Mangin mga saksi ko kamo sa Jerusalem kag sa bug-os nga Judea kag Samaria kag tubtob sa ukbong sang duta.”​—⁠BINUHATAN 1:8.

1, 2. Ano ang ginsugo kay Pedro, kag sin-o ang nagsugo sa iya?

“SI Jesus nga taga-Nasaret . . . [nagsugo sa amon] sa pagbantala sa mga tawo kag sa paghatag sing maid-id nga panaksi nga ini ang Isa nga gintangdo sang Dios nga mangin hukom sang mga buhi kag sang mga patay.” (Binuhatan 10:​38, 42) Sa sining mga pinamulong, ginpaathag ni apostol Pedro kay Cornelio kag sa iya pamilya ang sugo nga iya nabaton agod mangin ebanghelisador.

² San-o ini ginsugo ni Jesus? Mahimo nga ginahunahuna ni Pedro ang ginsiling sang ginbanhaw nga si Jesus antes sia magkayab. Sa sini nga okasyon, ginsilingan ni Jesus ang iya matutom nga mga disipulo: “Mangin mga saksi ko kamo sa Jerusalem kag sa bug-os nga Judea kag Samaria kag tubtob sa ukbong sang duta.” (Binuhatan 1:8) Apang, pila ka tion antes sini, nahibaluan na ni Pedro nga subong disipulo ni Jesus, dapat sia makighambal sa iban tuhoy sa iya pagtuo kay Jesus.

Tatlo ka Tuig nga Paghanas

3. Ano nga milagro ang ginhimo ni Jesus, kag ano ang pangagda niya kanday Pedro kag Andres?

³ Pila ka bulan pagkatapos sang iya bawtismo sang 29 C.⁠E., nagbantala si Jesus kanday Pedro kag sa iya utod nga si Andres nga mga mangingisda sa Dagat sang Galilea. Bilog nga  gab-i nga wala sila sing kuha. Apang, si Jesus nagsiling sa ila: “Magpalawod [kamo] kag iladlad ang inyo mga pukot agod makakuha kamo.” Sang ginhimo nila ang ginsiling ni Jesus, “nakasakop sila sing daku nga luta sang mga isda. Sa katunayan, nagisi ang ila mga pukot.” Pagkakita sini nga milagro, hinadlukan si Pedro, apang ginpakalma sia ni Jesus, nga nagasiling: “Indi ka na mahadlok. Kutob subong magapangisda ka sing mga tawo nga buhi.”​—⁠Lucas 5:4-10.

4. (a) Paano ginhanda ni Jesus ang iya mga disipulo sa pagpanaksi? (b) Paano mapaanggid ang ministeryo ni Jesus sa iya mga disipulo?

⁴ Sa gilayon, sanday Pedro kag Andres​—⁠subong man sanday Santiago kag Juan, nga mga anak ni Zebedeo​—⁠nagbiya sang ila mga baruto kag nagsunod kay Jesus. Sa sulod sang halos tatlo ka tuig, gin-updan nila si Jesus sa iya pagbantala kag ginhanas sila subong mga ebanghelisador. (Mateo 10:⁠7; Marcos 1:​16, 18, 20, 38; Lucas 4:​43; 10:9) Pagkatapos sining paghanas, sang Nisan 14, 33 C.⁠E., si Jesus nagsiling sa ila: “Sia nga nagatuo sa akon, ina man nga isa magahimo sing mga buhat nga ginahimo ko; kag magahimo sia sing mga buhat nga dalagku pa sa sini.” (Juan 14:12) Ang mga disipulo ni Jesus magapanaksi sing maid-id subong sang iya ginhimo apang sa mas daku pa nga kasangkaron. Subong sang ila nahibaluan dayon, sila kag ang tanan nga palaabuton nga mga disipulo magapanaksi sa “tanan nga kapungsuran,” tubtob sa “katapusan sang sistema sang mga butang.”​​—⁠Mateo 28:​19, 20.

5. Sa anong mga paagi makabenepisyo kita sa paghanas ni Jesus sa iya mga sumulunod?

⁵ Nagakabuhi kita sa “katapusan sang sistema sang mga butang.” (Mateo 24:3) Indi kaangay sadtong una nga mga disipulo, indi na naton maupdan si Jesus kag mapanilagan ang iya pagbantala sa mga tawo. Apang, makabenepisyo gihapon kita sa iya pagpanghanas paagi sa pagbasa sa Biblia kon paano sia nagbantala kag kon ano ang iya mga instruksion sa iya mga sumulunod. (Lucas 10:​1-​11) Apang, ini nga artikulo magahinun-anon sang isa pa ka importante nga butang nga ginpasundayag ni Jesus sa iya mga disipulo​—⁠ang husto nga panimuot sa pagbantala nga hilikuton.

Kabalaka sa mga Tawo

6, 7. Ano nga kinaiya ang nagpaposible kay Jesus nga mangin epektibo sa ministeryo, kag paano naton sia mailog sa sini?

⁶ Ngaa epektibo gid si Jesus sa pagpanaksi? Ang isa ka rason amo ang iya tudok nga interes kag kabalaka sa mga tawo. Ang salmista nagtagna nga si Jesus ‘magakaawa sa kubos kag imol.’ (Salmo 72:13) Natuman gid niya ini nga tagna. Ang Biblia nagasiling tuhoy sa isa ka okasyon: “Sang nakita niya ang kadam-an naluoy sia sa ila, kay ginpanitan sila kag nag-alaplaag kaangay sang mga karnero nga wala sing manugbantay.” (Mateo 9:36) Bisan ang mga makasasala gid nakabatyag sang iya kabalaka kag nabuyok sa iya.​—⁠Mateo 9:​9-​13; Lucas 7:​36-​38; 19:​1-​10.

⁷ Mangin epektibo man kita karon kon magpakita kita sing kaangay nga kabalaka sa mga tawo. Antes makigbahin sa ministeryo, ngaa indi mamalandong sing makadali kon daw ano ka importante sa mga tawo ang mensahe nga imo ipaambit sa ila? Hunahunaa ang ila mga problema nga ang Ginharian lamang ang makalubad. Mangin positibo sa tanan, bangod wala mo mahibaluan kon sin-o ang magabaton sang mensahe. Basi ang masunod nga tawo nga imo masugilanon nagapangamuyo nga may isa nga magduaw para magbulig sa iya!

Ginpahulag sang Gugma

8. Bilang pag-ilog kay Jesus, ano ang nagapahulag sa iya mga sumulunod nga ibantala ang maayong balita?

⁸ Ang maayong balita nga ginbantala ni Jesus amo ang tuhoy sa pagtuman sang kabubut-on ni Jehova, sa pagpakabalaan sang Iya ngalan, kag sa pagbindikar sang Iya pagkasoberano​—⁠amo ang labing importante nga mga hulusayon nga ginaatubang sang katawhan. (Mateo 6:​9, 10) Bangod ginahigugma niya ang iya Amay, nahuptan ni Jesus ang iya integridad tubtob sa katapusan kag nakapanaksi sia sing maid-id tuhoy sa Ginharian, nga amo ang magalubad sadto nga mga hulusayon. (Juan 14:31) Bangod ang mga sumulunod ni Jesus karon may amo man nga motibo, mapisan sila sa pagpakigbahin sa ministeryo. Si apostol Juan nagsiling: “Amo ini ang kahulugan sang gugma sa Dios, nga sundon naton ang iya mga sugo,” nga nagalakip sa sugo nga magbantala sang maayong balita kag maghimo sing mga disipulo.​—⁠1 Juan 5:⁠3; Mateo 28:​19, 20.

9, 10. Magluwas sa gugma sa Dios, ang gugma para kay sin-o ang nagapahulag sa aton nga manaksi sing maid-id?

 ⁹ Si Jesus nagsiling sa iya mga sumulunod: “Kon ginahigugma ninyo ako, tumanon ninyo ang akon mga sugo. Sia nga nagahupot sang akon mga sugo kag nagatuman sini, sia amo ang nagahigugma sa akon.” (Juan 14:​15, 21) Sa amo, ang gugma kay Jesus dapat magapahulag sa aton nga manaksi tuhoy sa kamatuoran kag tumanon ang iban pa nga mga butang nga iya ginsugo. Sang isa ka okasyon nga nagpakita si Jesus pagkatapos sia mabanhaw, ginpalig-on ni Jesus si Pedro: “Pakan-a ang akon mga kordero. . . . Tatapa ang akon gamay nga mga karnero. . . . Pakan-a ang akon gamay nga mga karnero.” Ano ang dapat magpahulag kay Pedro sa paghimo sini? Ginpakita ni Jesus ang sabat sang sia sulitsulit nga namangkot kay Pedro: “Ginahigugma mo bala ako? . . . Ginahigugma mo bala ako? . . . Ginahigugma mo bala ako?” Huo, ang gugma ni Pedro kay Jesus amo ang magapahulag sa iya nga manaksi sing maid-id, pangitaon ang “gamay nga mga karnero” ni Jesus, kag sa ulihi mangin isa ka espirituwal nga manugbantay nila.​—⁠Juan 21:15-17.

¹⁰ Sa karon, wala naton makilala sing personal si Jesus subong ni Pedro. Apang, nahangpan gid naton ang importansia sang ginhimo ni Jesus para sa aton. Napahulag ang aton tagipusuon bangod sang iya daku nga gugma nga bangod sini ‘natilawan niya ang kamatayon para sa tagsa ka tawo.’ (Hebreo 2:⁠9; Juan 15:13) Kaanggid ang aton ginabatyag kay Pablo sang sia nagsulat: “Ang gugma ni Cristo nagatiklod sa aton . . . Napatay sia para sa tanan agod nga ang mga nagakabuhi indi na magkabuhi para sa ila kaugalingon, kundi para sa iya.” (2 Corinto 5:​14, 15) Ginapakita naton nga ginapakahamili naton ang gugma ni Jesus para sa aton kag nga ginahigugma man naton sia paagi sa pagsunod sa sugo nga manaksi sing maid-id. (1 Juan 2:​3-5) Indi gid naton luyag nga magpabuyanbuyan sa pagbantala, nga daw sa wala lang sa aton ang halad ni Jesus.​​—⁠Hebreo 10:29.

Paghupot sing Husto nga Pagtamod

11, 12. Ano ang tuyo ni Jesus sa pagkari sa kalibutan, kag sa ano nasentro ang iya igtalupangod?

¹¹ Sang si Jesus yara sa atubangan ni Poncio Pilato, sia nagsiling: “Tungod sini natawo ako, kag tungod sini nagkari ako sa kalibutan, agod magpanaksi ako sa kamatuoran.” (Juan 18:37) Wala sing nakaupang kay Jesus sa pagpanaksi sa kamatuoran. Amo ini ang kabubut-on sang Dios sa iya.

¹² Gintilawan gid ni Satanas si Jesus tuhoy sa sini. Wala madugay pagkatapos sang bawtismo ni Jesus, nagtanyag si Satanas nga himuon sia nga bantog sa kalibutan, nga ihatag sa iya ang “tanan nga ginharian sang kalibutan kag ang ila himaya.” (Mateo 4:​8, 9) Sang ulihi, luyag sang mga Judiyo nga himuon sia nga hari. (Juan 6:15) Ang iban mahimo maghunahuna sang mga benepisyo kon batunon ni Jesus ini nga tanyag, ayhan nagapangatarungan nga subong isa ka tawhanon nga hari, mas madamo nga kaayuhan ang mahimo ni Jesus para sa katawhan. Apang, ginsikway ni Jesus ini nga pangatarungan. Ang iya igtalupangod nasentro sa pagpanaksi sa kamatuoran.

13, 14. (a) Ano ang wala ginhimud-usan ni Jesus? (b) Bisan imol si Jesus, ano ang iya nahimo?

¹³ Dugang pa, wala matublag si Jesus sa paghimud-os sa manggad. Subong resulta, indi sia manggaranon. Wala gani sia sing kaugalingon nga balay. Kis-a, sia nagsiling: “Ang mga sora may mga lungib kag ang mga pispis sa langit may mga hapunan, apang ang Anak sang tawo wala gid sing ulunlan sang iya ulo.” (Mateo 8:20) Sang napatay si Jesus, ang iya malahalon lamang nga pagkabutang amo ang panapton nga ginpapalaran sang Romanong mga soldado. (Juan 19:​23, 24) Apang, wala bala sing pulos ang kabuhi ni Jesus? May pulos gid ini!

¹⁴ Mas daku ang nahimo ni Jesus sangsa labing manggaranon nga pilantropo. Si Pablo nagsiling: “Nahibaluan ninyo ang di-bagay nga kaluoy ni Ginuong Jesucristo, nga bisan manggaranon sia nangin imol sia tungod sa inyo, agod nga paagi sa iya kaimulon mangin manggaranon kamo.”  (2 Corinto 8:⁠9; Filipos 2:​5-8) Bisan imol, ginpaposible ni Jesus nga matigayon sang mga mapainubuson ang dayon kag himpit nga kabuhi. Nagapasalamat gid kita sa iya! Kag nalipay gid kita sa padya nga nabaton niya bangod gin-una niya ang paghimo sang kabubut-on sang Dios!​​—⁠Salmo 40:⁠8; Binuhatan 2:​32, 33, 36.

15. Ano ang mas malahalon pa sa manggad?

¹⁵ Ang mga Cristiano nga nagatinguha karon nga ilugon si Jesus wala man nagahimud-os sang manggad. (1 Timoteo 6:​9, 10) Nagapati sila nga komportable ang kabuhi kon may manggad, apang nahibaluan nila nga wala sing labot ang manggad sa ila dayon nga palaabuton. Kon mapatay ang isa ka Cristiano, indi na niya mapuslan ang iya manggad subong nga wala man sing pulos para kay Jesus ang iya malahalon nga panapton sang mapatay sia. (Manugwali 2:​10, 11, 17-​19; 7:12) Kon mapatay ang isa ka Cristiano, ang malahalon lamang nga iya ginapanag-iyahan amo ang iya kaangtanan kay Jehova kag kay Jesucristo.​—⁠Mateo 6:​19-​21; Lucas 16:9.

Wala Malingkang sang Pagpamatok

16. Paano gin-atubang ni Jesus ang pagpamatok?

¹⁶ Wala maapektuhan sang pagpamatok si Jesus sa iya pagpanaksi sa kamatuoran. Wala sia maluyahan sing buot bisan pa nahibaluan niya nga matapos ang iya ministeryo paagi sa mahalaron nga kamatayon. Tuhoy kay Jesus, si Pablo nagsiling: “Tungod sa kalipay nga ginbutang sa iya atubang nagbatas sia sing usok sang pag-antos, nga nagatamay sang kahuluy-an, kag naglingkod sa tuo nga kamot sang trono sang Dios.” (Hebreo 12:2) Talupangda nga ‘gintamay ni Jesus ang kahuluy-an.’ Wala sia nabalaka kon ano ang hunahunaon sang iya mga kasumpong tuhoy sa iya. Nasentro ang iya igtalupangod sa paghimo sang kabubut-on sang Dios.

17. Ano ang matun-an naton sa pagbatas ni Jesus?

¹⁷ Nagaaplikar sang leksion sang pagbatas ni Jesus, si Pablo nagpalig-on sa mga Cristiano: “Binagbinaga ninyo sing maayo ang isa nga nagbatas sang amo nga nagasupak nga hambal sang mga makasasala batok sa ila mismo mga kaayuhan, agod indi kamo paglapyuon kag mangampo ang inyo kalag.” (Hebreo 12:3) Matuod, makapaluya nga atubangon kada adlaw ang pagpamatok ukon pagyaoyao. Mahimo nga makakalapoy nga batuan pirme ang mga pagganyat sang kalibutan, kag ayhan ginamulay kita sang mga paryente nga luyag mangin “madinalag-on” kita. Apang, kaangay ni Jesus nagapangayo kita sing bulig kay Jehova samtang determinado nga ginauna naton ang Ginharian.​​—⁠Mateo 6:​33; Roma 15:13; 1 Corinto 2:4.

18. Anong maayo nga leksion ang matun-an naton sa ginsiling ni Jesus kay Pedro?

¹⁸ Ang pagtinguha ni Jesus nga indi matublag nadayag sang ginsugiran niya ang iya mga disipulo sang iya nagahilapit nga kamatayon. Ginpalig-on ni Pedro si Jesus nga “magmalulo” sa iya kaugalingon kag ginpasalig sia nga “indi gid ini matabo” sa iya. Wala mamati si Jesus sa bisan ano nga butang nga sarang magpaluya sang  iya determinasyon nga himuon ang kabubut-on ni Jehova. Ginbalikid niya si Pedro kag nagsiling: “Palayo ka sa akon, Satanas! Kasandaran ka sa akon, bangod nagahunahuna ka, indi sang mga panghunahuna sang Dios, kundi sang mga tawo.” (Mateo 16:21-​23) Kabay nga amo man kita sini ka determinado sa pagsikway sa mga panghunahuna sang mga tawo. Sa baylo, dapat kita magpatuytoy pirme sa mga panghunahuna sang Dios.

Magadala Sing Matuod nga mga Benepisyo

19. Bisan pa nga naghimo si Jesus sing mga milagro, ano ang labing importante nga bahin sang iya ministeryo?

¹⁹ Naghimo si Jesus sing madamo nga milagro agod ipakita nga sia ang Mesias. Ginbanhaw pa gani niya ang patay. Naganyat ang kadam-an sa sadtong mga milagro, apang wala magkari si Jesus sa duta agod lamang maghimo sini. Nagkari sia agod magpanaksi sa kamatuoran. Nahibaluan niya nga temporaryo lamang ang materyal nga mga benepisyo nga mahatag niya sadto. Bisan ang iya mga ginbanhaw napatay liwat. Paagi lamang sa pagpanaksi sa kamatuoran nga mabuligan niya ang pila nga makatigayon sang kabuhi nga wala sing katapusan.​—⁠Lucas 18:28-​30.

20, 21. Paano mangin balanse ang matuod nga mga Cristiano tuhoy sa maayong mga buhat?

²⁰ Sa karon, ginatinguhaan sang pila ka indibiduwal nga ilugon ang maayo nga mga binuhatan ni Jesus paagi sa pagtukod sing mga ospital ukon paghatag sang iban pa nga mga bulig para sa mga imol. Sa pila ka kaso, ginahimo nila ini walay sapayan sang daku gid nga pagsakripisyo, kag dalayawon ang ila pagkasinsero; apang temporaryo lamang ang ila mahatag nga bulig. Ang Ginharian lamang ang makahatag sing permanente nga solusyon. Busa, ang mga Saksi ni Jehova nagakonsentrar, kaangay ni Jesus, sa pagpanaksi sang kamatuoran tuhoy sa sini nga Ginharian.

²¹ Sa pagkamatuod, nagahimo man sing maayo nga mga buhat ang matuod nga mga Cristiano. Si Pablo nagsulat: “Samtang may kahigayunan kita sa sini, magbuhat kita sing maayo sa tanan, apang labi na gid sa mga may labot sa aton sa pagtuo.” (Galacia 6:10) Kon may krisis ukon kon may nagakinahanglan, wala kita nagapangalag-ag sa ‘pagbuhat sing maayo’ sa aton mga isigkatawo ukon sa aton Cristianong mga kauturan. Apang, ginauna gihapon naton ang pagpanaksi sa kamatuoran.

Magtuon Gikan sa Halimbawa ni Jesus

22. Ngaa nagabantala ang mga Cristiano sa ila mga isigkatawo?

²² Si Pablo nagsulat: “Kailo ako kon indi ko pag-iwali ang maayong balita!” (1 Corinto 9:16) Wala niya ginpatumbayaan ang maayong balita bangod ang pagbantala sini nagkahulugan sing kabuhi para sa iya kag sa mga nagpamati sa iya. (1 Timoteo 4:16) Amo man sini ang pagtamod naton sa aton ministeryo. Luyag naton buligan ang aton mga isigkatawo. Luyag naton ipakita ang aton  gugma kay Jehova. Luyag naton pamatud-an ang aton gugma kay Jesus kag ang aton apresasyon sa iya daku nga gugma sa aton. Busa, ibantala naton ang maayong balita kag sa amo magkabuhi “indi sa kailigbon sang mga tawo, kundi sa kabubut-on sang Dios.”​​—⁠1 Pedro 4:​1, 2.

23, 24. (a) Ano nga leksion ang aton natun-an tuhoy sa milagro sa isda? (b) Sin-o karon ang nagapanaksi sing maid-id?

²³ Kaangay ni Jesus, wala kita nagakatublag gikan sa aton panguna nga hilikuton kon ang iban magyaguta ukon maakigon nga magsikway sang aton mensahe. May leksion kita nga natun-an gikan sa ginhimo ni Jesus nga milagro sang gin-agda niya si Pedro kag si Andres nga magsunod sa iya. Nahangpan naton nga kon magtuman kita kay Jesus kag, sa malaragwayon nga paghambal, ginaladlad naton ang aton mga pukot bisan sa daw wala sing isda nga dagat, mahimo nga may makuha kita. Madamong Cristiano nga mga mangingisda ang nakatigayon sing madamo nga kuha pagligad sang pila ka tuig nga pagpangabudlay sa daw indi mapatubason nga teritoryo. Ang iban nagsaylo sa duog diin mapatubason ang pagpangisda kag may madamo nga nakuha. Ano man ang aton ginahimo, indi kita mag-untat sa pagladlad sang aton mga pukot. Nahibaluan naton nga wala pa magsiling si Jesus nga natapos na ang pagbantala sa bisan diin nga bahin sang duta.​​—⁠Mateo 24:14.

²⁴ Kapin sa anom ka milyon ka Saksi ni Jehova ang masako karon sa kapin sa 230 ka kadutaan. Ang Pebrero 1, 2005, nga gua sang Ang Lalantawan may tuigan nga report sang bug-os kalibutan nila nga hilikuton sang 2004 nga tuig sang pag-alagad. Ginapakita sang report ang bugana nga pagpakamaayo ni Jehova sa pagbantala nga hilikuton. Sa nabilin pa nga tion sining sistema sang mga butang, kabay nga magpadayon kita sa pagpamati sa makapahulag nga pinamulong ni Pablo: “Ibantala ang pulong, magmadagmit sa sini.” (2 Timoteo 4:2) Kabay nga magpadayon kita sa pagpanaksi sing maid-id tubtob magsiling si Jehova nga natapos na ang hilikuton.

Sugod sini nga tuig, ang Report sa Tuig Sang Pag-alagad Sang mga Saksi ni Jehova sa Bug-os Kalibutan indi na makita sa Enero 1 nga gua sang Ang Lalantawan. Sa baylo, makita na ini sa Pebrero 1 nga gua.

Masabat Mo Bala?

• Paano kita makabenepisyo gikan sa paghanas ni Jesus sa iya mga disipulo?

• Ano ang panimuot ni Jesus sa mga tawo nga iya ginbantalaan?

• Ano ang nagapahulag sa aton nga manaksi sing maid-id?

• Sa anong mga paagi nga mauna naton ang paghimo sang kabubut-on sang Dios, subong sang ginhimo ni Jesus?

[Mga Pamangkot sa Pagtinuon]

[Retrato sa pahina 15]

Mangin epektibo kita sa aton ministeryo kon nagakabalaka man kita sa mga tawo kaangay ni Jesus

[Retrato sa pahina 16]

Nagkari si Jesus sa duta ilabi na agod magpanaksi sa kamatuoran

[Mga retrato sa pahina 17]

Ang mga Saksi ni Jehova nagakonsentrar sa pagpanaksi sing maid-id