Tigkalaon—Indi Lamang Tion sa Pagkaon!

LUYAG sang tanan ang manamit nga pagkaon. Kag kon kaupod mo nga nagakaon ang imo mga hinigugma kag nagaistoryahanay kamo, mangin makalilipay ini nga tion nga nagapaumpaw indi lamang sang aton kagutom. Batasan sang madamo nga pamilya ang magkaon sing dungan bisan kis-a lang sa isa ka adlaw. Mahimo hambalan sang pamilya ang mga hitabo ukon mga plano sa bug-os nga adlaw samtang nagakaon. Mahantop sang mga ginikanan nga nagapamati sa mga ginasiling sang ila kabataan ang ila panghunahuna kag balatyagon. Samtang nagaligad ang tion, bangod sang malipayon kag relaks nga pag-updanay sa pagkaon, mabatyagan sang pamilya ang seguridad, pagsalig, kag gugma nga nagapabakod sa pamilya.

Sa karon, bangod madamo nga miembro sang pamilya ang masako, daw indi na sila makadungan sa pagkaon. Indi kinabatasan sa iban nga mga lugar nga magdungan sa pagkaon ang pamilya ukon mag-istoryahanay samtang nagakaon. Batasan sang iban nga mga pamilya ang pagbukas sang telebisyon samtang nagakaon amo nga indi na sila makasugilanon sing maayo.

Apang, pirme alisto ang Cristianong mga ginikanan sa pagpalig-on sa ila panimalay. (Hulubaton 24:27) Madugay na nga ginsiling sa mga ginikanan nga isa sa maayo nga mga kahigayunan sa pagtudlo sang pulong sang Dios sa ila kabataan amo nga ‘kon nagapungko sila sa ila balay.’ (Deuteronomio 6:7) Ang pirme nga pagdungan sa pagkaon nagahatag sa mga ginikanan sing pinasahi nga kahigayunan agod ipatudok sa ila kabataan ang daku nga gugma kay Jehova kag sa iya matarong nga mga prinsipio. Kon himuon ninyo nga masadya kag relaks ang kahimtangan, mangin makalilipay kag makapalig-on man ang tion sang inyo pamilya sa pagkaon. Huo, himua ang tigkalaon nga indi lamang mangin tion sa pagkaon!