Ang Pagbantala ni Saulo Nagresulta sa Pagpamatok

INDI ini mahangpan sang mga Judiyo sa Damasco. Paano nangin apostata ang isa ka makugi nga manugpangapin sang tradisyon? Kilala si Saulo nga naghingabot sa mga nagapanawag sa ngalan ni Jesus sa Jerusalem. Nagkadto sia sa Damasco agod hingabuton ang mga disipulo didto. Apang karon ginabantala na niya nga ang gintamay nga kriminal nga ginlansang bangod sang pagpasipala amo ang Mesias! Nagbuang bala si Saulo?​—⁠Binuhatan 9:​1, 2, 20-22.

Mahimo nga may kabangdanan ini. Mahimo gid nga ginsugid sang iban pa nga kaupod ni Saulo sa paglakbay halin sa Jerusalem kon ano ang natabo sa dalanon. Sang nagahinampot sila sa Damasco, hinali lang nga nagsilak sa palibot nila ang masilaw nga kapawa, kag natumba sila tanan sa duta. May nabatian man sila nga tingog. Si Saulo lamang ang nahalitan. Nagahigda sia sa dalan. Sang nagtindog sia, gintuytuyan sia sang iya mga kaupod nga naglakbay pa Damasco, kay indi na sia makakita.​—⁠Binuhatan 9:3-8; 26:​13, 14.

Ang Manugpamatok Nangin Manugsakdag

Ano ang natabo kay Saulo sang nagapakadto sia sa Damasco? Nahalitan ayhan sia sang malawig nga paglakbay ukon sang init sang adlaw sa kaudtuhon? Ang mga maduhaduhaon sa karon nagtinguha sa pagpaathag sini paagi sa pagpanugda nga mahimo nakaeksperiensia si Saulo sing pagdeliryo, halusinasyon, malala nga balatian sa hunahuna bangod sang iya natublag nga konsiensia, nervous breakdown, ukon kuyap.

Ang matuod nga natabo amo nga nagpakita si Jesucristo kay Saulo sa makabululag nga kapawa, nga nagkumbinsi sa iya nga Sia amo ang Mesias. Ginapakita sang pila ka dibuho sa sini nga hitabo nga nahulog si Saulo sa kabayo. Bisan pa posible ini matabo, ginsiling lamang sang Biblia nga ‘natumba sia sa duta.’ (Binuhatan 22:6-11) Ang pagkatumba ni Saulo indi salapakon kon ipaanggid sa iya makahuluya nga pagkapukan gikan sa iya posisyon anay. Dapat niya karon batunon nga matuod ang ginabantala sang mga sumulunod ni Jesus. Ang mahimo lamang ni Saulo amo ang magbuylog sa ila. Isa anay ka mapintas nga manugpamatok sang mensahe ni Jesus, si Saulo karon nangin isa na ka matutom nga manugsakdag sini. Sang nanumbalik ang iya panan-aw kag nabawtismuhan, “si Saulo labi nga nakatigayon sing gahom kag ginpalibog niya ang mga Judiyo nga nagapuyo sa Damasco sang ginpamatud-an niya sing makatarunganon nga amo ini ang Cristo.”​—⁠Binuhatan 9:22.

Napaslawan ang Buko sa Pagpatay

Diin nagkadto si Saulo, nga gintawag sang ulihi nga Pablo, matapos sia makumbertir? Sang nagsulat sia sa mga taga-Galacia, nagsiling sia: “Nagkadto ako sa Arabia, kag nagbalik ako liwat sa Damasco.” (Galacia 1:17) Ang pagsambit sa “Arabia” mahimo magpahangop sing paglakbay sa bisan diin nga bahin sang Arabian Peninsula. Nagsiling ang iban nga mga iskolar nga mahimo nagkadto si Pablo sa Desyerto sang Siria ukon sa isa ka duog sa Nabataea nga ginagamhan ni Aretas IV. Mahimo gid nga nagkadto  si Saulo sa isa ka malinong nga duog agod magpamalandong sa tapos sang iya bawtismo, kaangay man ni Jesus nga nagkadto sa kamingawan sa tapos sang iya bawtismo.​—⁠Lucas 4:1.

Sang nagbalik si Saulo sa Damasco, “nagsinapol ang mga Judiyo sa pagpatay sa iya.” (Binuhatan 9:23) Ang gobernador nga tiglawas ni Hari Aretas sa Damasco nagbantay sa siudad agod dakpon si Saulo. (2 Corinto 11:32) Apang samtang nagabuko ang mga kaaway sa pagpatay kay Saulo, ginplano sang mga disipulo ni Jesus ang iya pagpalagyo.

Lakip sa mga nagbulig kay Saulo nga makapalagyo amo si Ananias kag ang mga disipulo nga nakig-upod gilayon sa apostol sa tapos sia makumbertir.⁠ * (Binuhatan 9:17-19) Mahimo nga nagbulig man ang iban nga nangin mga tumuluo bangod sang pagbantala ni Saulo sa Damasco, kay ang Binuhatan 9:25 nagsiling: “Ginkuha sia sang iya mga disipulo sa kagab-ihon kag ginpaagi sia sa isa ka bintana sa pader, nga ginatunton sa alat.” Ang ekspresyon nga “iya mga disipulo” mahimo nagapatuhoy sa mga gintudluan ni Saulo. Ano man ang kahimtangan, ang kadalag-an sang iya ministeryo mahimo gid nga nagpabaskog sang kaakig sa iya.

Matun-an nga Leksion

Kon binagbinagon naton ang mga hitabo sang nakumbertir kag nabawtismuhan si Saulo, mahangpan gid naton nga wala sia nabalaka sing sobra sa pagtamod sang iban sa iya; kag wala man sia nag-untat bangod sang daku nga pagpamatok. Ang pinakaimportante kay Saulo amo ang sugo sa iya nga magbantala.​—⁠Binuhatan 22:​14, 15.

Nakumbinsi ka bala sining karon lang nga importante gid ang pagbantala sang maayong balita? Kon amo, nahibaluan mo nga ang tanan nga matuod nga mga Cristiano dapat magbantala sang Ginharian. Indi ka dapat matingala kon pamatukan kon kaisa ang imo ministeryo. (Mateo 24:⁠9; Lucas 21:12; 1 Pedro 2:20) Maayo gid nga huwaran ang reaksion ni Saulo sa pagpamatok. Kahamut-an sang Dios ang mga Cristiano nga padayon nga nagabatas sang mga pagtilaw. Ginsilingan ni Jesus ang iya mga disipulo: “Dumtan kamo sang tanan nga tawo bangod sa akon ngalan.” Apang, ginpasalig niya sila: “Paagi sa inyo pagbatas matigayon ninyo ang inyo mga kalag.”​—⁠Lucas 21:17-19.

[Nota]

[Retrato sa pahina 28]

‘Natumba sa duta’ si Saulo sang nagpakita sa iya si Jesus

[Retrato sa pahina 29]

Nakapalagyo si Saulo sa isa ka buko nga pagpatay sa iya sa Damasco