“Ano ang Sekreto Mo?”

NAKIBOT si Muriel, nga iloy sang tatlo ka bata, sang ginpamangkot ini sa iya sang tigulang nga lalaki nga indi niya kilala sa isa ka fast-food nga restawran. Masako si Muriel sa pagdala sang iya kabataan sa doktor, kag kulabos na sia sa tion. Maulihi na sila sa pagtambong sa Cristianong miting kon magpauli pa sila agod magkaon. Gani naghapit na lang sila sa malapit nga restawran agod makakaon.

Sang nagahingapos na sila, nagpalapit ang tigulang kay Muriel kag nagsiling: “Ginpanilagan ko kamo halin sang pag-abot ninyo. Tuhay gid ang imo kabataan sa iban nga masami ko makita. Kon nakita mo lang kon paano gamiton sang iban nga mga bata ang mga lamesa kag mga pulungkuan. Ginatungtong nila ang ila mga tiil sa lamesa. Ginapangwahig nila ang mga pulungkuan. Apang kahipos kag kabuot gid sang imo mga bata. Ano ang sekreto mo?”

Nagsabat si Muriel: “Pirme kami sang akon bana nagatuon sing Biblia upod sa amon kabataan, kag ginatinguhaan gid namon nga iaplikar ang amon natun-an. Mga Saksi ni Jehova kami.” Bangod sini, nagsiling ang tigulang: “Judiyo ako kag isa nga nakalampuwas sa Holocaust. Nakita ko nga ginhingabot anay ang mga Saksi ni Jehova sa Alemanya. Bisan sadto, tuhay gid sila. Nagdayaw gid ako sa batasan sang imo mga bata. Dapat ko usisaon sing maayo ang inyo relihion.”

Isa gid ka maayo nga giya sa pagpadaku sa mga bata ang Biblia. Luyag gid sang mga Saksi ni Jehova nga buligan ang iban nga makabenepisyo sa giya sang Kasulatan. Ginaagda namon ikaw nga batunon ang amon ginatanyag.