“Ang Bulig sa Akon Nagagikan kay Jehova”

Kon San-o Mangin “Purongpurong sang Katahom” ang Katigulangon

“ANG labing maayo nga pagkabuhi nga matigayon,” siling sang 101-anyos nga si Muriel. “Isa gid matuod ka pribilehiyo!” ang siling sang 70-anyos nga si Theodoros. “Wala ko gid ginahinulsulan ang paggamit ko sang akon kabuhi,” siling ni Maria sa edad nga 73. Sila tanan naghinguyang sang ila bug-os nga kabuhi sa pag-alagad kay Jehova nga Dios.

Madamo sing aktibo nga mga tigulang na nga mga sumilimba si Jehova nga kaangay sa ila sa bug-os nga kalibutan. Walay sapayan sang katigulangon, panglawason, kag iban pa mabudlay nga mga kahimtangan, ginaalagad nila gihapon ang Dios sing bug-os kalag. Ining matutom nga mga tigulang ginatahod sa Cristianong kongregasyon subong mga halimbawa sang diosnon nga debosyon. Ginapabaloran gid ni Jehova ang pag-alagad sang mga tigulang, bisan pa nalimitehan sila sang ila mga kahimtangan.⁠ *​​—⁠2 Corinto 8:⁠12.

Ang tulun-an nga Salmo may sibu nga paglaragway tuhoy sa kalidad sang kabuhi nga matigayon sang matutom nga mga tigulang. Halimbawa, mahimo sila mangin kaangay sang isa ka gulang kag daku nga kahoy nga mabungahon gihapon. Ang salmista nag-amba tuhoy sa mga tigulang: “Magapabilin sila nga nagauswag sa tion sang ila pagkaubanon, magapabilin sila nga matambok kag lab-as.”​​—⁠Salmo 92:14.

Ang iban mahimo mahangawa nga basi isikway sila kag indi pagsapakon kon magluya na sila bangod sang ila katigulangon. Si David nakitluoy sa Dios: “Dili ako pagsikwaya sa tion sang katigulangon; dili ako pagbayai kon magluya na ang akon kusog.” (Salmo 71:9) Ano ang makabulig sa isa nga mag-uswag sa tion sang katigulangon sa baylo nga magluya? Ang diosnon nga kinaiya sang pagkamatarong. “Ang matarong magapamukadkad kaangay sang puno sang palma,” amba sang salmista.​—⁠Salmo 92:12.

Ang mga nag-alagad sa Dios sa bug-os nila nga pagkabuhi masami nga nagapamunga pa gihapon sa tion sang ila katigulangon. Daw subong bala nga nagresulta sa maayo ang madamo nga butang nga ila ginhimo sa ila kabuhi agod buligan ang ila kaugalingon ukon ang iban, nga daw kaangay sang mga binhi nga nagtubo kag naghamtong nga nagresulta sa bugana nga ani. (Galacia 6:​7-​10; Colosas 1:10) Sa pagkamatuod, ang mga tawo nga nag-uyang sang ila kabuhi sa maiyaiyahon nga mga dalanon nga supak sa mga dalanon sang Dios masami nga wala nagapakita sing daku nga balor kon magtigulang na sila.

Ang katigulangon nga ginpatahom sang pagkamatarong ginpadaku man sa tulun-an sang Biblia nga Hulubaton. Mabasa naton: “Ang ubanon nga ulo amo ang purongpurong sang katahom kon makita ini sa dalanon sang pagkamatarong.” (Hulubaton 16:31) Huo, ang pagkamatarong isa ka pagpasundayag sang nasulod nga katahom. Ang pagbuhat sang pagkamatarong sa sulod sang malawig nga pagkabuhi nagaresulta sa pagtahod sang iban. (Levitico 19:32) Ang uban kon ginaupdan sing kaalam kag prinsipio nagaresulta sa kadungganan.​​—⁠Job 12:12.

Nahamuot gid si Jehova sa matadlong nga pagkabuhi nga ginhinguyang sa pag-alagad sa iya. Ang Kasulatan nagasiling: “Bisan tubtob sa katigulangon sang isa, ako [si Jehova] amo gihapon inang Isa; kag tubtob sa pagkaubanon sang isa padayon ako nga magapas-an. Magapanghikot gid ako, agod ako makadala kag agod ako makapas-an kag makahatag sang pagpalagyo.” (Isaias 46:4) Daw ano ka makapalugpay  mahibaluan nga nagasaad ang aton mahigugmaon langitnon nga Amay nga sakdagon kag suportahan niya ang iya mga matutom nga alagad sa ila katigulangon!​—⁠Salmo 48:14.

Bangod ang kabuhi nga ginhinguyang sa pag-alagad kay Jehova matahom sa iya pagtamod, indi bala dapat man ini tahuron sang iban? Bilang pagpabanaag sa pagtamod sang Dios, ginapakabahandi naton ang aton tigulang nga mga masigkatumuluo. (1 Timoteo 5:​1, 2) Busa mangita kita sing praktikal nga mga paagi nga ipakita ang Cristianong gugma sa pag-atipan sang ila mga kinahanglanon.

Paglakat sa Dalanon sang Pagkamatarong sa Tion sang Katigulangon

“Sa banas sang pagkamatarong may kabuhi,” pasalig sa aton ni Solomon. (Hulubaton 12:28) Ang katigulangon wala nagapugong sa isa sa paglakat sa sini nga banas sa ulihi nga bahin sang kabuhi. Halimbawa, sa Moldova, isa ka 99-anyos nga lalaki ang naghinguyang sang iya pagkapamatan-on sa pagsakdag sa mga ideolohiya sang Komunista. Ginpabugal niya nga nasugilanon niya mismo ang bantog nga mga lider sang Komunismo, kaangay ni V. I. Lenin. Apang, sang naghuyang kag napukan ang Komunismo, nadulaan sing katuyuan kag direksion ang kabuhi sining tigulang nga lalaki. Apang sang ginpakita sang mga Saksi ni Jehova sa iya nga ang Ginharian sang Dios amo lamang ang matuod nga solusyon sa mga problema sang katawhan, ginbaton niya ang kamatuoran sa Biblia kag nangin maukod nga estudyante sang Kasulatan. Sing masubo, napatay sia antes mangin isa ka bawtismado nga alagad ni Jehova.

Sang matun-an ang mga ginapatuman sang Dios sa moral, narealisar sang isa ka 81-anyos nga babayi sa Hungary nga kinahanglan sila magpakasal sang ginapuyopuyo niya sa sulod sang madamo nga tinuig. Nagpakaisog sia kag ginpaathag sa iya ginapuyopuyo ang iya pasad sa Biblia nga pagtamod. Nakibot gid sia kag nalipay sang nagpasugot ang lalaki nga pakaslan sia. Sang makasal na sila, madasig sia nga nag-uswag sa espirituwal. Sa sulod lamang sang walo ka bulan nga pagtuon sa Biblia, nangin isa sia ka di-bawtismado nga manugbantala, kag wala madugay nabawtismuhan sia. Matuod gid nga ang pagkamatarong nagapatahom sa mga tigulang!

Huo, makasalig gid ang matutom nga tigulang nga mga Cristiano nga ang Dios interesado gid sa ila. Wala ginapabay-an ni Jehova ang mga nagapabilin nga mainunungon sa iya. Sa baylo, nangako sia nga tuytuyan, buligan, kag alay-ayon sila bisan sa ila katigulangon. Kag mapamatud-an nila ang mga pinamulong sang salmista: “Ang bulig sa akon nagagikan kay Jehova.”​—⁠Salmo 121:2.

[Nota]

[Blurb sa pahina 9]

“Ang ubanon nga ulo amo ang purongpurong sang katahom kon makita ini sa dalanon sang pagkamatarong.”​—⁠HULUBATON 16:31

[Kahon sa pahina 8]

SI JEHOVA NAGAULIKID SA IYA TIGULANG NGA MGA ALAGAD

“Magtindog ka sa atubangan sang ulo nga ubanon, kag magpakita ka sing patugsiling sa pagkatawo sang tigulang nga tawo.”​—⁠Levitico 19:32.

“Bisan tubtob sa katigulangon sang isa ako amo gihapon inang Isa; kag tubtob sa pagkaubanon sang isa padayon ako nga magapas-an.”​—⁠Isaias 46:4.