Mga Pamangkot Gikan sa mga Bumalasa

Paano nangin posible nga Nazareo gihapon si Samson bisan pa natandog niya ang mga bangkay sang iya mga ginpamatay?

Sang una sa Israel, mahimo magpanumpa ang isa ka indibiduwal nga mangin isa ka Nazareo sa isa ka hut-ong sang tion.⁠ * Amo ini ang isa sa mga ginapatuman sa isa nga nagpanumpa: “Sa tanan nga adlaw nga nagapain sia para kay Jehova indi sia magpalapit sa patay nga kalag. Indi niya pagdagtaan ang iya kaugalingon bisan tungod sa iya amay ukon iya iloy ukon iya utod nga lalaki ukon iya utod nga babayi kon mapatay sila.” Paano kon may isa nga “mapatay sing hinali sa luyo niya”? Ining di-hungod nga pagtandog sa bangkay nagadagta sa iya pagka-Nazareo. Sa amo, ginsiling ini: “Ang nahauna nga mga adlaw indi pag-isipon.” Dapat niya sundon ang seremonya sa pagputli kag sugdan liwat ang tion sang pagka-Nazareo.​—⁠Numeros 6:6-12.

Apang, tuhay ang pagka-Nazareo ni Samson. Antes mabun-ag si Samson, ginsilingan sang anghel ni Jehova ang iya iloy: “Yari karon! magabusong ka, kag magaanak sing lalaki, kag wala sing labaha nga magaagi sa iya ulo, kay ang bata mangin Nazareo sang Dios sa iya pagkabun-ag; kag sia ang magapanguna sa pagluwas sa Israel gikan sa mga Filistinhon.” (Hukom 13:5) Wala nagpanumpa si Samson subong isa ka Nazareo. Gintangdo sia sang Dios subong Nazareo, kag bug-os kabuhi sia nga Nazareo. Indi maaplikar sa iya ang pagdumili sa pagtandog sa bangkay. Kon naaplikar ini sa iya kag di-hungod niya nga matandog ang isa ka bangkay, paano niya masugdan liwat ang bug-os kabuhi nga pagka-Nazareo nga nagsugod sa iya pagkabun-ag? Kon amo, maathag nga ang mga ginapatuman sa bug-os kabuhi nga mga Nazareo tuhay sa pila ka paagi sa mga ginapatuman sa nagpanumpa nga mga Nazareo.

Binagbinaga ang mga sugo ni Jehova sa tatlo ka bug-os kabuhi nga mga Nazareo​—⁠sanday Samson, Samuel, kag Juan Bautista​—⁠nga ginsambit sa Biblia. Subong sang ginsambit kaina, indi dapat pag-utdan ni Samson ang iya buhok. Tuhoy sa ipanamkon pa nga anak ni Ana nga si Samuel, nagpanumpa si Ana: “Ihatag ko sia kay Jehova sa tanan nga adlaw sang iya kabuhi, kag wala sing labaha nga magaagi sa iya ulo.” (1 Samuel 1:11) Tuhoy naman kay Juan Bautista, nagsiling ang anghel ni Jehova: “Indi gid sia mag-inom sing alak kag maisog nga ilimnon.” (Lucas 1:15) Isa pa, “si Juan nagpanapot sing balahibo  sang kamelyo kag nagpangwagkus sing panit sa iya balikawang; ang iya man kalan-on mga apan kag dugos nga talunon.” (Mateo 3:4) Wala sa ila nga tatlo ang ginsugo nga indi magpalapit sa patay nga kalag.

Bisan pa isa ka Nazareo, lakip si Samson sa mga hukom nga gingamit ni Jehova agod luwason ang mga Israelinhon gikan sa mga nagapang-ati sa ila. (Hukom 2:16) Kag sa paghimo sini, natandog niya ang mga bangkay. Isa ka bes, ginpatay ni Samson ang 30 ka Filistinhon kag ginkuha ang ila mga bayo. Sang ulihi, ginpamatay niya ang mga kaaway, “gintangkas ang mga batiis kag mga paa sa madamo nga pagpamatay.” Nagkuha man sia sing bag-o nga sulang sang asno kag ginpatay ang isa ka libo ka tawo paagi sa sini. (Hukom 14:19; 15:​8, 15) Ginhimo ini tanan ni Samson nga may kahamuot kag pagsakdag ni Jehova. Gintawag sia sang Kasulatan subong tawo nga may huwaran nga pagtuo.​—⁠Hebreo 11:32; 12:1.

Ang pagsiling bala nga ginpihak ni Samson ang leon “subong sang pagpihak sa isa ka lalaki nga tinday nga kanding” nagapahangop nga kinabatasan sadto ang pagpihak sa tinday nga mga kanding?

Wala sing ebidensia nga sang tion sang mga Hukom sa Israel kinaandan na nga pihakon sang mga tawo ang tinday nga mga kanding. Ang Hukom 14:6 nagsiling: “Nagpanghikot [kay Samson] ang espiritu ni Jehova, amo nga ginpihak niya ini [ang bataon nga leon], subong sang pagpihak sa isa ka lalaki nga tinday nga kanding, kag wala sing bisan ano sa iya kamot.” Mahimo nga isa ini ka ilustrasyon.

Mahimo nga duha ang kahulugan sang ekspresyon nga “ginpihak niya ini.” Mahimo nga ginkusnit ni Samson ang mga apipingig sang leon ukon ginpihak niya ang leon paagi sa mga tiil sini. Kon ang una nga kahulugan ang ginapatuhuyan, ang paghimo sini sa tinday nga kanding masarangan sang isa ka tawo. Ginapakita sini nga para kay Samson ang pagpatay sa leon sa iya lamang mga kamot pareho lang kahapos sa pagpatay sa lalaki nga tinday nga kanding. Apang, paano kon ginpatay ni Samson ang leon paagi sa pagpihakpihak sini? Nian isa ini ka pagpaanggid. Ang punto sang pagpaanggid amo nga bangod sang espiritu ni Jehova, nahimo ni Samson ang isa ka butang nga nagakinahanglan sing di-kinaandan nga kusog. Sa duha ka kahulugan, ginapakita sang pagpaanggid sa Hukom 14:6 nga paagi sa bulig ni Jehova, ang makusog nga leon nangin indi mabangis para kay Samson kaangay sang lalaki nga tinday nga kanding para sa isa ka kinaandan nga tawo.

[Nota]