Natuman ang Palanan-awon Tuhoy sa Ginharian sang Dios

“Maayo ang inyo ginahimo sa paghatag sing igtalupangod sa [matagnaon nga pulong] subong sa suga nga nagasiga sa madulom nga duog.”​—⁠2 PEDRO 1:19.

1. Anong magkatuhay nga kahimtangan ang makita naton sa kalibutan karon?

YARA pirme sa krisis ang kalibutan karon. Halin sa mga kagulub-an sang ekolohiya pakadto sa bug-os kalibutan nga terorismo, ang mga problema sang mga tawo daw indi na gid makontrol. Bisan ang mga relihion sa kalibutan indi makabulig. Ang matuod, pirme pa gani ini nagagatong sa pag-ihig-ihig, dumot, kag nasyonalismo nga nagapabahinbahin sa mga tawo. Huo, subong sang gintagna, ang “pitipit nga kadulom” nagtabon sa “pungsudnon nga mga grupo.” (Isaias 60:2) Apang, sa amo man nga tion, minilyon ang may paglaum sa palaabuton. Ngaa? Bangod nagatalupangod sila sa matagnaon nga pulong sang Dios “subong sa suga nga nagasiga sa madulom nga duog.” Ginatugutan nila ang “pulong,” ukon mensahe sang Dios, nga masapwan karon sa Biblia, nga amo ang magtuytoy sang ila mga tikang.​​—⁠2 Pedro 1:⁠19.

2. Suno sa tagna ni Daniel tuhoy sa “tion sang katapusan,” sin-o lamang ang hatagan sing espirituwal nga paghangop?

² Tuhoy sa “tion sang katapusan,” si manalagna Daniel nagsulat: “Madamo ang magadalagan pakadto-pakari, kag ang matuod nga ihibalo magabugana. Madamo ang magapaninlo sang ila kaugalingon kag magapaputi sang ila kaugalingon kag ulayon. Kag ang mga malaut magahimo sing kalautan, kag wala sing malaut nga makahangop; apang ang mga mahinantupon makahangop.” (Daniel 12:​4, 10) Ang espirituwal nga paghantop matigayon lamang sang mga hanuot nga ‘nagadalagan pakadto-pakari,’ ukon makugi nga nagatuon, sa Pulong sang Dios, nagasunod sa iya mga talaksan, kag nagatinguha nga himuon ang iya kabubut-on.​​—⁠Mateo 13:11-​15; 1 Juan 5:⁠20.

3. Sang katuigan 1870, anong importante nga kamatuoran ang nahangpan sang unang mga estudyante sa Biblia?

³ Kutob pa sang katuigan 1870, antes magsugod ang “katapusan nga mga adlaw,” ginpabanaag na ni Jehova nga Dios ang dugang pa nga kapawa sa “sagrado nga mga tinago sang ginharian sang mga langit.” (2 Timoteo 3:​1-5; Mateo 13:11) Nahangpan sadto sang isa ka grupo sang mga estudyante sang Biblia​—⁠nga tuhay sa popular nga opinyon​—⁠nga ang pagbalik ni Cristo indi makita. Pagkatapos mangin hari sa langit, magabalik si Jesus sa kahulugan nga isentro niya ang iya  harianon nga atension sa duta. Ang isa ka makita, kabilugan nga tanda amo ang magapaalisto sa iya mga disipulo nga ang iya di-makita nga presensia nagsugod na.​—⁠Mateo 24:3-14.

Sang Natuman ang Palanan-awon

4. Paano ginpalig-on ni Jehova ang pagtuo sang iya modernong-adlaw nga mga alagad?

⁴ Ang palanan-awon sa pagbaylo-dagway isa ka maathag nga pagtan-aw sing abanse sa himaya ni Cristo sa Ginharian. (Mateo 17:​1-9) Ini nga palanan-awon nagpalig-on sa pagtuo nanday Pedro, Santiago, kag Juan sang madamo na ang nag-untat sa pagsunod kay Jesus bangod wala niya matuman ang ila di-Makasulatanhon nga mga ginpaabot. Sing kaanggid, sa sining tion sang katapusan, ginpalig-on ni Jehova ang pagtuo sang iya modernong-adlaw nga mga alagad paagi sa pagbulig sa ila nga mahangpan sing kapin pa ang katumanan sadtong makahalawhaw nga palanan-awon kag ang madamo nga tagna may kaangtanan sini. Binagbinagon naton karon ang pila sining makapalig-on sing pagtuo nga espirituwal nga mga katunayan.

5. Sin-o ang Kabugwason, kag san-o kag paano sia ‘nagdilag’?

⁵ Nagapatuhoy sa pagbaylo-dagway, si apostol Pedro nagsulat: “Tungod sini may matagnaon kita nga pulong nga ginhimo nga labi pa ka pat-od; kag maayo ang inyo ginahimo sa paghatag sing igtalupangod sa sini subong sa suga nga nagasiga sa madulom nga duog, tubtob sa ang adlaw magapamanagbanag kag ang kabugwason magadilag, sa inyo mga tagipusuon.” (2 Pedro 1:19) Ining malaragwayon nga Kabugwason amo ang ginhimaya nga si Jesucristo. (Bugna 22:16) ‘Nagdilag’ sia sang 1914 sang nabun-ag ang Ginharian sang Dios sa langit, nga nagatanda sang panugod sang isa ka bag-o nga panag-on. (Bugna 11:15) Sa palanan-awon sa pagbaylo-dagway, yara sanday Moises kag Elias sa tupad ni Jesus, nga nagapakighambal sa iya. Sin-o ang ila ginarepresentaran?

6, 7. Sin-o ang ginarepresentaran nanday Moises kag Elias sa pagbaylo-dagway, kag anong importante nga mga detalye ang ginpakita sang Kasulatan tuhoy sa ila?

⁶ Bangod sanday Moises kag Elias nakig-ambit sa himaya ni Cristo, ining duha ka matutom nga saksi dapat magarepresentar sa mga kaupod ni Jesus nga magagahom sa iya Ginharian. Ang paghangop nga may kaupod nga mga manuggahom si Jesus nahisanto sa palanan-awon tuhoy sa ginkoronahan nga Mesias nga nakita ni manalagna Daniel. Nakita ni Daniel ang “kaangay sa anak sang tawo” nga nagabaton sing “dayon nga pagbulut-an” gikan sa “Dumaan sang mga Adlaw,” si Jehova nga Dios. Apang talupangda kon ano pa ang nakit-an ni Daniel pagkatapos sini. Sia nagsulat: “Ang ginharian kag ang pagbulut-an kag ang himaya sang mga ginharian sa idalom sang bug-os nga langit ginhatag sa katawhan nga mga balaan sang Isa nga Supremo.” (Daniel 7:​13, 14, 27) Huo, kapin sa lima ka siglo antes sang pagbaylo-dagway, ginpahayag sang Dios nga may “mga balaan” nga magapakig-ambit sa harianon nga pagkahalangdon ni Cristo.

⁷ Sin-o ang mga balaan sa palanan-awon ni Daniel? Sila ang ginapatuhuyan ni apostol Pablo sang sia nagsiling: “Ang espiritu mismo nagasaksi upod sa aton espiritu nga kita mga anak sang Dios. Nian, kon kita mga anak, kita mga manunubli man: mga manunubli gid sang Dios, apang mga masigkamanunubli ni Cristo, kon nagaantos kita kaupod niya agod nga paghimayaon man kita kaupod niya.” (Roma 8:​16, 17) Ang mga balaan wala sing liwan kundi ang hinaplas sa espiritu nga mga disipulo ni Jesus. Sa Bugna, si Jesus nagsiling: “Ang nagadaug, palingkuron ko sia kaupod nakon sa akon trono, subong nga ako nagdaug man kag naglingkod kaupod sa akon Amay sa iya trono.” Ining ginbanhaw nga ‘mga nagdaug,’ nga nagadamo sing 144,000, magagahom kaupod ni Jesus sa bug-os nga duta.​—⁠Bugna 3:21; 5:​9, 10; 14:​1, 3, 4; 1 Corinto 15:53.

8. Paano nanghikot ang hinaplas nga mga disipulo ni Jesus kaangay nanday Moises kag Elias, kag ano ang mga resulta?

⁸ Apang, ngaa ang hinaplas nga mga Cristiano ang ginarepresentaran nanday Moises kag Elias?  Ang rason amo nga ining mga Cristiano, samtang yari pa sa duta, naghimo sing isa ka hilikuton nga kaanggid sa ginhimo nanday Moises kag Elias. Halimbawa, nag-alagad sila subong mga saksi ni Jehova, bisan pa ginahingabot. (Isaias 43:10; Binuhatan 8:​1-8; Bugna 11:​2-​12) Kaangay nanday Moises kag Elias, ginabuyagyag nila sing maisugon ang butig nga mga relihion samtang ginapalig-on ang sinsero nga mga tawo nga maghatag sing eksklusibo nga debosyon sa Dios. (Exodo 32:​19, 20; Deuteronomio 4:​22-​24; 1 Hari 18:18-​40) Nagbunga bala ang ila hilikuton? Huo! Magluwas nga nakabulig sa pagtipon sa nabilin nga mga hinaplas, nagbulig sila sa minilyon ka “iban nga mga karnero” nga magpasakop sing kinabubut-on kay Jesucristo.​—⁠Juan 10:16; Bugna 7:4.

Natapos ni Cristo ang Iya Pagpangdaug

9. Paano ginlaragway sang Bugna 6:2 ang kahimtangan ni Jesus karon?

⁹ Sa baylo nga ahaw lamang nga tawo nga nagasakay sa polyino, si Jesus isa na karon ka gamhanan nga Hari. Ginlaragway sia subong nagasakay sa isa ka kabayo​—⁠nga gingamit sa Biblia subong simbulo sa inaway. (Hulubaton 21:31) “Yari karon! ang kabayo nga maputi,” siling sang Bugna 6:​2, “kag ang isa nga nagasakay sa sini may pana; kag ginhatagan sia sing korona, kag naglakat sia nga nagapangdaug kag sa pagtapos sang iya pagpangdaug.” Dugang pa, tuhoy kay Jesus, si salmista David nagsulat: “Ang sungkod sang imo kusog ipadala ni Jehova gikan sa Sion, nga nagasiling: ‘Magpanglutos ka sa tunga sang imo mga kaaway.’”​—⁠Salmo 110:2.

10. (a) Paano nangin mahimayaon ang panugod sang pagpangdaug ni Cristo? (b) Ano ang epekto sa kalibutan sang una nga kadalag-an ni Cristo?

¹⁰ Ang una nga kadalag-an ni Jesus amo ang sa iya labing gamhanan nga mga kaaway​—⁠si Satanas kag ang mga demonyo. Gintagbong niya sila sa duta. Bangod nakahibalo nga malip-ot na lang ang ila tion, ining malaut nga mga espiritu nagpaupok sang ila daku nga kaakig sa katawhan, nga nagtuga sing daku nga kailo. Sa Bugna, ginasimbuluhan ini nga kailo sa pagsakay sang tatlo pa ka manugkabayo. (Bugna 6:​3-8; 12:​7-​12) Subong sang gintagna ni Jesus tuhoy sa ‘tanda sang iya presensia kag sang katapusan sang sistema sang mga butang,’ ang ila pagsakay nagresulta sa inaway, gutom, kag makamamatay nga salot. (Mateo 24:​3, 7; Lucas 21:​7-​11) Kaangay sang literal nga kasakit sa pagpanganak, ining “mga hapdi sang kasakit” wala sing duhaduha nga magapadayon sa pagbaskog tubtob ‘matapos ni Cristo ang iya pagpangdaug’ paagi sa paglaglag sing bug-os sa makita nga organisasyon ni Satanas.⁠ *​​—⁠Mateo 24:8.

11. Paano nagapamatuod ang maragtas sang Cristianong kongregasyon sa harianon nga awtoridad ni Cristo?

 ¹¹ Maathag man ang harianon nga awtoridad ni Jesus bangod iya gin-amligan ang Cristianong kongregasyon agod matuman ang hilikuton sini nga ibantala ang mensahe sang Ginharian sa bug-os nga kalibutan. Walay sapayan sang mapintas nga pagpamatok sang Babilonia nga Daku​—⁠ang bug-os kalibutan nga emperyo sang butig nga relihion​—⁠kag sang mapintas nga mga gobierno, ang pagbantala nga hilikuton wala lamang magpadayon kundi nakalab-ot na sa kasangkaron nga indi matupungan sa maragtas sang kalibutan. (Bugna 17:​5, 6) Daw ano ka mabakod nga pamatuod sang pagkahari ni Cristo!​—⁠Salmo 110:3.

12. Ngaa ang kalabanan nga tawo wala makahantop sang di-makita nga presensia ni Cristo?

¹² Apang, makapasubo nga ang kalabanan nga tawo, lakip ang minilyon nga nagapangangkon nga mga Cristiano, wala makahantop sang di-makita nga mga katunayan sa likod sang tumalagsahon nga mga nagakatabo sa duta. Ginayaoyao pa gani nila ang mga nagapanaksi tuhoy sa Ginharian sang Dios. (2 Pedro 3:​3, 4) Ngaa? Bangod ginbulag ni Satanas ang ila mga hunahuna. (2 Corinto 4:​3, 4) Ang matuod, nagsugod sia sa pagbutang sing tabon sang espirituwal nga kadulom sa nagapangangkon nga mga Cristiano madamo na nga siglo ang nagligad, nga nagresulta pa gani sa pagbiya nila sa hamili nga paglaum sang Ginharian.

Ginbiyaan ang Paglaum nga Ginharian

13. Sa diin nagdul-ong ang tabon sang espirituwal nga kadulom?

¹³ Si Jesus nagtagna nga ang mga apostata, kaangay sang mga gamhon nga ginsab-ug sa tunga sang mga trigo, magasulod sa Cristianong kongregasyon kag magapatalang sa madamo. (Mateo 13:24-​30, 36-​43; Binuhatan 20:29-​31; Judas 4) Sang ulihi, ining nagapangangkon nga mga Cristiano nagsunod sa pagano nga mga kapiestahan, mga buhat, kag mga panudlo, kag gintawag pa gani nila ini nga “Cristiano.” Halimbawa, ang Krismas naghalin sa mga ritwal sa pagsimba sa pagano nga mga diosdios nga sanday Mitra kag Saturno. Apang ano ang nag-impluwensia sa nagapangangkon nga mga Cristiano nga batunon ining di-Cristiano nga mga selebrasyon? Ang The New Encyclopædia Britannica (1974) nagasiling: “Ginsugdan nga saulugon ang Krismas, nga amo ang kapiestahan sang pagkabun-ag ni Jesucristo, bangod sang nagaamat-amat tahaw nga pagpaabot sa nagahilapit nga pagbalik ni Cristo.”

14. Paano ang mga panudlo nanday Origen kag Augustine nagpatiko sang kamatuoran tuhoy sa Ginharian?

 ¹⁴ Binagbinaga man ang pagpatiko sa kahulugan sang tinaga nga “ginharian.” Ang libro nga The Kingdom of God in 20th-Century Interpretation nagasiling: “Gin-islan ni Origen [teologo sang ikatlo nga siglo] ang Cristianong paggamit sa tinaga nga ‘ginharian’ nga nagkahulugan na sing paggahom sang Dios sa tagipusuon.” Diin ginbase ni Origen ang iya panudlo? Indi sa Kasulatan, kundi sa “pilosopiya kag opinyon sang kalibutan nga tuhay gid sa panghunahuna ni Jesus kag sang una nga simbahan.” Sa iya libro nga De Civitate Dei (Ang Siudad Sang Dios), si Augustine sang Hippo (354-​430 C.⁠E.) nagsiling nga ang simbahan mismo amo ang Ginharian sang Dios. Ining di-Makasulatanhon nga panghunahuna amo ang ginbasihan sang mga relihion sang Cristiandad agod maggahom sa politika. Kag naggahom sila sa sulod sang madamong siglo, nga sa masami upod ang kapintas.​—⁠Bugna 17:​5, 18.

15. Paano natuman ang Galacia 6:7 kon tuhoy sa madamo nga relihion sang Cristiandad?

¹⁵ Apang sa karon, ginaani sang mga relihion ang ila ginsab-ug. (Galacia 6:7) Madamo ang daw nadulaan na sing gahom kag subong man sang ila mga sumilimba. Ini nga kahimtangan talalupangdon gid sa Europa. Suno sa dyurnal nga Christianity Today, “ang daku nga mga katedral sa Europa karon indi na mga balay sang pagsimba kundi mga museo na, diin mga turista na lamang ang nagakadto.” Amo man sini ang naobserbahan sa iban nga bahin sang kalibutan. Ano ang ginapatimaan sini tuhoy sa butig nga relihion? Madula na bala ini bangod sa kakulang sing suporta? Kag paano maapektuhan ang matuod nga pagsimba?

Maghanda sa Dakung Adlaw Sang Dios

16. Ngaa talalupangdon ang nagadugang nga kaakig sa Babilonia nga Daku?

¹⁶ Subong nga ang aso kag abo nga nagagua sa nagakatulog anay nga bulkan mahimo magpatimaan sang nagahilapit nga paglupok sini, ang pagdugang sang kaakig sa relihion sa madamo nga bahin sang kalibutan isa ka patimaan nga ilisipon na lang ang inadlaw sang butig nga relihion. Sa dili madugay, pahulagon na ni Jehova ang politikal nga mga elemento sang kalibutan nga maghiusa sa ila panikasog nga ipadayag kag laglagon ang espirituwal nga makihilawason nga amo ang Babilonia nga Daku. (Bugna 17:15-​17; 18:21) Dapat bala magkahadlok ang matuod nga mga Cristiano sa sini nga hitabo kag sa magasunod nga iban pa nga mga bahin sang “dakung kapipit-an”? (Mateo 24:21) Indi gid! May rason gid sila sa pagkasadya kon manghikot ang Dios batok sa mga malauton. (Bugna 18:20; 19:​1, 2) Binagbinaga ang natabo sa Jerusalem sang unang siglo kag ang mga Cristiano nga nagapuyo didto.

17. Ngaa maatubang nga may pagsalig sang matutom nga mga alagad ni Jehova ang katapusan sining sistema?

¹⁷ Sang ginsalakay sang mga soldado sang Roma ang Jerusalem sang 66 C.⁠E., wala nakibot ukon nahadlok ang alisto sa espirituwal nga mga Cristiano. Bangod mapisan sila nga mga estudyante sang Pulong sang Dios, nahibaluan nila nga ‘malapit na ang paghapay sa iya.’ (Lucas 21:20) Nahibaluan man nila nga hatagan sila sang Dios sing kahigayunan nga makapalagyo. Sang natabo ini, nalagyo ang mga Cristiano. (Daniel 9:​26; Mateo 24:15-​19; Lucas 21:21) Sa karon man, maatubang nga may pagsalig sang mga nakakilala sa Dios kag nagatuman sa iya Anak ang katapusan sining sistema. (2 Tesalonica 1:​6-9) Ang matuod, kon magsugod na ang dakung kapipit-an, malipayon sila nga ‘magatindog sing tadlong kag magahangad sang ila mga ulo, bangod nahibaluan nila nga malapit na ang pagtubos sa ila.’​—⁠Lucas 21:28.

18. Ano ang mangin resulta sang katapusan nga pagsalakay ni Gog sa mga alagad ni Jehova?

¹⁸ Pagkatapos malaglag ang Babilonia nga Daku, salakayon ni Satanas, sa iya papel subong si Gog sang Magog, ang mahidaiton nga mga Saksi ni Jehova. Nagakari “subong sang gal-um nga magatabon sa duta,” ang mga sakop ni Gog magapaabot sang mahulas nga kadalag-an. Makibot gid sila! (Ezequiel 38:14-​16, 18-​23) Si apostol Juan nagsulat: “Nakita ko nga nabuksan ang langit, kag, yari karon! ang kabayo nga maputi. Kag ang nagasakay sa iya gintawag nga Matutom kag Matuod . . . Gikan sa iya baba nagagua ang isa ka malaba nga espada nga matalom, agod sakiton niya ang mga pungsod.” Ining indi madaug nga “Hari sang mga hari” magaluwas sa mainunungon nga mga sumilimba ni Jehova  kag magalaglag sa tanan nila nga kaaway. (Bugna 19:11-21) Isa gid ini ka talipuspusan sang katumanan sang palanan-awon sa pagbaylo-dagway!

19. Paano ang bug-os nga kadalag-an ni Cristo makaapektar sa iya mainunungon nga mga disipulo, kag ano ang ginatinguhaan nila nga himuon karon?

¹⁹ Si Jesus mangin ‘katingalahan sa amo nga adlaw may kaangtanan sa tanan nga nagtuo.’ (2 Tesalonica 1:10) Luyag mo bala malakip sa mga magadayaw sa madinalag-on nga Anak sang Dios? Kon amo, padayon nga palig-una ang imo pagtuo kag ‘pamatud-i ang imo kaugalingon nga handa, bangod sa oras nga wala mo ginahunahunaa, magaabot ang Anak sang tawo.’​​—⁠Mateo 24:​43, 44.

Hupti ang Imo Kaligdong

20. (a) Paano naton mapakita ang apresasyon sa pag-aman sang Dios sang “matutom kag mainandamon nga ulipon”? (b) Ano ang dapat naton ipamangkot sa aton kaugalingon?

²⁰ “Ang matutom kag mainandamon nga ulipon” regular nga nagapalig-on sa katawhan sang Dios nga magpabilin nga nagapulaw sa espirituwal kag huptan ang ila kaligdong. (Mateo 24:​45, 46; 1 Tesalonica 5:6) Ginaapresyar mo bala ining suno sa tion nga mga pahanumdom? Ginagamit mo bala ini sa pagpahamtang sang imo mga prioridad sa kabuhi? Ngaa indi pagpamangkuton ang imo kaugalingon: ‘Maathag bala ang akon espirituwal nga panan-aw amo nga mahantop ko nga nagagahom na sa langit ang Anak sang Dios? Mahantop ko bala nga handa na sia nga ipatuman ang paghukom sang Dios batok sa Babilonia nga Daku kag sa iban pa nga bahin sang sistema ni Satanas?’

21. Ngaa gintugutan sang pila nga magburon ang ila panan-aw sa espirituwal, kag ano ang dapat nila himuon sa gilayon?

²¹ Gintugutan sang iban nga nagapakig-upod karon sa katawhan ni Jehova nga magburon ang ila panan-aw sa espirituwal. Mahimo ayhan nga kulang sila sing pasensia ukon pagbatas, subong sang pila ka disipulo ni Jesus sang una? Naapektuhan bala sila sang mga kabalaka sa kabuhi, materyalismo, ukon sang paghingabot? (Mateo 13:​3-8, 18-​23; Lucas 21:34-​36) Mahimo nga ang pila nabudlayan sa paghangop sang pila ka impormasyon nga ginbalhag sang “matutom kag mainandamon nga ulipon.” Kon natabo ini sa imo, ginapalig-on namon ikaw nga tun-an ang Pulong sang Dios upod ang bag-o nga kakugi kag magpakitluoy kay Jehova agod nga matigayon mo liwat ang isa ka mabakod, suod nga kaangtanan sa iya.​​—⁠2 Pedro 3:​11-​15.

22. Ano ang epekto sa imo sang pagbinagbinag sang palanan-awon sa pagbaylo-dagway kag sang mga tagna may kaangtanan sa sini?

²² Ang palanan-awon sa pagbaylo-dagway ginpakita sa mga disipulo ni Jesus sang nagakinahanglan sila sing pagpalig-on. Sa karon, may mas makapalig-on pa para sa aton​—⁠ang katumanan sining tumalagsahon nga palanan-awon kag sang mga tagna may kaangtanan sa sini. Samtang ginahunahuna naton ining mahimayaon nga mga katunayan kag ang kahulugan sini sa palaabuton, kabay nga mapabutyag man naton sing bug-os tagipusuon ang panimuot ni apostol Juan sang sia nagsiling: “Kabay pa! Kari ka, Ginuong Jesus.”​—⁠Bugna 22:20.

[Nota]

Madumduman Mo Bala?

• Sang katuigan 1870, ano ang nahangpan sang diutay nga grupo sang mga estudyante sang Biblia tuhoy sa pagbalik ni Cristo?

• Paano natuman ang palanan-awon sa pagbaylo-dagway?

• Ano ang epekto sang pagpangdaug ni Jesus sa kalibutan kag sa Cristianong kongregasyon?

• Ano ang dapat naton himuon agod malakip sa makalampuwas kon matapos na ni Jesus ang iya pagpangdaug?

[Mga Pamangkot sa Pagtinuon]

[Mga retrato sa pahina 17]

Natuman ang palanan-awon

[Mga retrato sa pahina 18]

Nahibaluan mo bala kon ano ang natabo sang ginsugdan ni Cristo ang pagpangdaug?