Daw Ano ka Bilidhon ang Imo Kabuhi?

SAMTANG madamo nga kabuhi ang ginsakripisyo sa Europa sadtong Bug-os Kalibutan nga Inaway I, isa man ka makatilingala nga mga panikasog ang ginhimo sa pagsalbar sing kabuhi sa Antarctica. Ang barko nga Endurance nga ginsakyan sang Anglo-Irish nga manuglagulad nga si Ernest Shackleton kag sang iya mga tripulante nakabunggo sa nagatinumpok nga yelo kag nalunod. Natabangan ni Shackleton ang iya mga tripulante padulong sa Elephant Island sa South Atlantic Ocean. Apang delikado gihapon ang ila kahimtangan.

Narealisar ni Shackleton nga makalampuwas lamang sila kon magpadala sia sing pila ka tawo kag magpangayo sing tabang sa estasyon sang mga nagapangdakop sing balyena sa pulo sang South Georgia. Mga 1,100 kilometros ang kalayuon sini, kag isa lamang ka 7 metros nga bote ang nasalbar niya gikan sa Endurance. Daw madulom gihapon ang ila paglaum.

Apang, sang Mayo 10, 1916, pagligad sang 17 ka makakulugmat nga adlaw, si Shackleton kag ang iya lima ka tripulante nakalab-ot sa South Georgia, apang bangod sang dalagku nga mga balod, napilitan sila sa pagdungka sa pihak  nga bahin sang pulo. Kinahanglan sila maglakat sing mga 30 kilometros sa wala dalan kag mayelo nga kabukiran agod makalab-ot sa ila destinasyon. Walay sapayan sang sobra nga katugnaw kag wala sing gamit sa pagtaklad sa bukid, nakalab-ot si Shackleton kag ang iya tripulante sa ila destinasyon kag sang ulihi, nasalbar niya ang iya tanan nga tripulante nga nabilin sa pulo. Ngaa nagpanikasog gid si Shackleton? “Tulumuron gid niya,” sulat sang biograpo nga si Roland Huntford, “nga salbaron ang tanan niya nga mga tripulante.”

“Wala Sing Isa sa Ila nga Nakulang”

Ano ang nakabulig sa mga tripulante ni Shackleton agod indi madulaan sing paglaum samtang ululupod sila nga nagahulat sa isa lamang ka “daw wala kabuhi kag mabudlay kadtuan nga batuhon kag mayelo nga pulo nga 30 kilometros sing kalabaon”? Ang ila kompiansa nga tumanon sang ila lider ang iya saad nga luwason sila.

Ang katawhan karon daw kaangay gid sa sining mga tripulante nga nabilin sa Elephant Island. Madamo ang nagahimakas nga mabuhi sa mabudlay gid nga mga kahimtangan. Apang, makasalig sila sing bug-os nga ‘luwason sang Dios ang mga napiutan’ gikan sa pagpigos kag kapipit-an. (Job 36:15) Makasalig ka nga ginatamod sang Dios ang kabuhi sang tanan nga bilidhon. “Tawga ako sa adlaw sang kasakitan,” siling ni Jehova nga Dios, ang Manunuga, kag “luwason ko ikaw.”​—⁠Salmo 50:15.

Nabudlayan ka bala sa pagpati nga ikaw​​—⁠nga isa lamang ka indibiduwal sa tunga sang binilyon ka tawo sa duta​​—⁠bilidhon sa Manunuga? Kon amo talupangda ang ginsulat ni manalagna Isaias tuhoy sa binilyon ka bituon sa binilyon ka galaksiya sa malapad nga uniberso sa palibot naton. Aton mabasa: “Itangla ang inyo mga mata sa hitaas kag tan-awa. Sin-o ang nagtuga sining mga butang? Amo ang Isa nga nagapagua sang ila kasuldadusan suno sa kadamuon sini, nga sila tanan ginatawag niya sa ngalan. Bangod bugana sa dinamiko nga kusog, mabaskog man sia sa gahom, wala sing isa sa ila nga nakulang.”​—⁠Isaias 40:26.

Nahangpan mo bala ang buot silingon sini? Ang aton Milky Way nga galaksiya​​—⁠diin ang aton sistema solar isa lamang ka bahin​​—⁠may yara mga 100 bilyones ka bituon. Kag daw ano kadamo ang iban pa nga mga galaksiya? Wala sing nakahibalo kon pila gid, apang ginabanabana sang iban nga may yara 125 bilyones. Tuman gid kadamo sang mga bituon! Apang, ang Biblia nagasugid sa aton nga nahibaluan sang Manunuga sang uniberso ang ngalan sang tagsa ka bituon.

“Ang mga Buhok sa Inyo Ulo Naisip Na Tanan”

‘Apang,’ ang isa mahimo mamatok, ‘indi buot silingon nga kon nahibaluan mo ang ngalan sang binilyon ka bituon​​—⁠ukon binilyon ka tawo⁠—nagaulikid ka na sa kada isa sa ila.’ Mahimo marekord sang isa ka kompyuter nga may supisyente nga memorya ang ngalan sang binilyon ka tawo. Apang, wala sing magahunahuna nga ang kompyuter nagaulikid sa bisan sin-o sa ila. Apang, ginapakita sang Biblia nga indi lamang nga nahibaluan ni Jehova nga Dios ang ngalan sang binilyon ka tawo, kundi nagaulikid man sia sa ila subong mga indibiduwal. ‘Itugyan ninyo ang tanan ninyo nga kabalaka sa iya,’ sulat ni apostol Pedro, ‘kay nagaulikid sia sa inyo.’​—⁠1 Pedro 5:7.

Si Jesucristo nagsiling: “Wala bala ginabaligya ang duha ka maya sa isa ka sensilyo nga diutay sing balor? Apang wala sing isa sa ila nga mahulog sa duta nga indi mahibaluan sang inyo Amay. Apang bisan ang mga buhok sa inyo ulo naisip na tanan. Busa dili kamo mahadlok: mahal pa kamo sa madamo nga maya.” (Mateo 10:29-31) Talupangda nga si Jesus wala magsiling nga nahibaluan lamang sang Dios ang nagakatabo sa mga maya kag sa mga tawo. Sia nagsiling: “Mahal pa kamo sa madamo nga maya.” Ngaa mahal pa ikaw? Bangod ginhimo ka sa “dagway sang Dios”​​ —⁠nga may ikasarang sa pagpalambo kag sa pagpakita sing moral, intelektuwal, kag espirituwal nga mga kinaiya nga nagapabanaag sang mataas nga mga kinaiya sang Dios.​​—⁠Genesis 1:​26, 27.

“Produkto sang Intelihente nga Hinimuan”

Indi kamo magpadaya sa ginasiling sang mga tawo nga wala nagapati nga may Manunuga. Suno sa ila, nagluntad ka bangod sang di-kontrolado nga mga puwersa sang kinaugali. Nagasiling sila nga wala ka ginhimo sa “dagway sang Dios,” kag pareho ka lang sa tanan nga iban pa nga sapat sa sining planeta​​—⁠lakip na ang maya.

Importante gid bala sa imo kon nagluntad ang kabuhi paagi sa di-makontrol nga puwersa? Suno sa molecular biologist nga si Michael J. Behe, ang “tuman kasibod nga biokemiko nga mga proseso” nga nagakontrol sang kabuhi nagahimo sa sini nga ideya nga indi gid makatarunganon. Ang ebidensia sang biochemistry, siling niya, nagadul-ong sa di-mapanghiwala nga konklusion nga “ang kabuhi sa duta sa pinakasadsaran gid sini . . . produkto sang intelihente nga hinimuan.”​​—⁠Darwin’s Black Box​​—⁠The Biochemical Challenge to Evolution.

Ang Biblia nagasugid sa aton nga ang tanan nga kabuhi sa duta produkto sang intelihente nga hinimuan. Kag nagasugid ini sa aton nga ang Ginhalinan sining tanan nga intelihente nga hinimuan amo si Jehova nga Dios, ang Manunuga sang uniberso.​​—⁠Salmo 36:⁠9; Bugna 4:⁠11.

Indi pagtuguti nga bangod dapat naton batason ang kalibutan nga puno sing kasakit kag pag-antos, indi ka na magpati nga ang duta kag ang tanan nga kabuhi sa sini may Manunuga kag Desinyador. Dumduma ang duha ka sadsaran nga kamatuoran. Ang isa amo nga wala gindesinyo sang Dios ang pagkadihimpit nga nagaluntad sa palibot naton. Ang isa pa amo nga may rason gid ang aton Manunuga kon ngaa ginatugutan niya ini sing umalagi. Subong sang masami nga ginapaathag sini nga magasin, gintugutan ni Jehova nga Dios nga magluntad ang kalautan sa limitado lamang nga tion agod lubaron sing permanente ang moral nga mga hulusayon nga ginpautwas sang una nga ginsikway sang mga tawo ang iya pagkasoberano.⁠ *​​—⁠Genesis 3:​1-7; Deuteronomio 32:​4, 5; Manugwali 7:​29; 2 Pedro 3:​8, 9.

“Luwason Niya ang Imol nga Nagapangayo sing Bulig”

Sa pagkamatuod, walay sapayan sang makaluluoy nga kahimtangan nga dapat batason sang madamo nga tawo sa karon, ang kabuhi isa gihapon ka dalayawon nga regalo. Kag ginahimo naton ang aton tanan nga masarangan agod amligan ini. Ang palaabuton nga kabuhi nga ginasaad sang Dios indi lamang paghimakas agod mabuhi sa mabudlay kag mapait nga mga kahimtangan​​—⁠kaangay sang mga tripulante ni Shackleton sa Elephant Island. Katuyuan sang Dios nga salbaron kita sa aton karon kabuhi nga may kasakit kag pagkawalay pulos agod “makapanguyapot [kita] sing hugot sa matuod nga kabuhi” nga gintuyo sang Dios sa ginsuguran para sa iya tawhanon nga mga tinuga.​​—⁠1 Timoteo 6:⁠19.

Himuon ini tanan sang Dios bangod ang kada isa sa aton bilidhon sa iya panulok. Naghimo sia sing kahimusan agod ang iya Anak, nga si Jesucristo, magaaman sing halad gawad nga kinahanglanon agod mahilway kita sa sala, pagkadihimpit, kag kamatayon nga napanubli naton sa aton una nga mga ginikanan nga sanday Adan kag Eva. (Mateo 20:28) “Ginhigugma gid sang  Dios ang kalibutan,” siling ni Jesucristo, “amo nga ginhatag niya ang iya bugtong nga Anak, agod nga ang bisan sin-o nga magtuo sa iya . . . may kabuhi nga walay katapusan.”​—⁠Juan 3:16.

Ano ang himuon sang Dios sa mga tawo nga ang ila kabuhi nasit-an karon sang kasakit kag pagpigos? Tuhoy sa iya Anak, ang inspirado nga Pulong sang Dios nagasiling sa aton: “Luwason niya ang imol nga nagapangayo sing bulig, subong man ang nasit-an kag ang bisan sin-o nga wala sing manugtabang. Magakaawa sia sa kubos kag imol, kag luwason niya ang mga kalag sang mga imol. Tubson niya ang ila kalag gikan sa pagpigos kag kasingki.” Ngaa himuon niya ini? Bangod “ang ila dugo [ukon, ang ila kabuhi] mangin bilidhon sa iya itululok.”​—⁠Salmo 72:12-14.

Mga siniglo na nga ang katawhan nagaantos bangod sang sala kag pagkadihimpit, daw subong nga “nagaugayong” sa daku nga kasakit kag pag-antos. Gintugutan lamang ini sang Dios bangod nahibaluan niya nga sarang niya madula ang bisan ano nga halit sini. (Roma 8:18-22) Sa dili madugay ‘ipasag-uli niya ang tanan nga butang’ paagi sa iya Ginharian nga panguluhan sa kamot sang iya Anak, nga si Jesucristo.—Binuhatan 3:​21; Mateo 6:​9, 10.

Nagalakip ini sang pagbanhaw sa mga tawo nga nag-antos kag napatay sang nagligad. Madumduman sila sang Dios. (Juan 5:​28, 29; Binuhatan 24:15) Sa dili madugay batunon nila ang kabuhi “sing bugana”​​—⁠ang himpit nga kabuhi nga walay katapusan sa paraiso nga duta nga hilway sa kasakit kag pag-antos. (Juan 10:10; Bugna 21:3-5) Ang tanan nga nagakabuhi magakalipay sing bug-os kag magapalambo sang dalayawon nga mga kinaiya kag mga ikasarang nga amo ang nagapakilala sa mga tawo nga ginhimo sa “dagway sang Dios.”

Matigayon mo ayhan ang kabuhi nga ginsaad ni Jehova? Nagadepende ini sa imo. Ginapalig-on ka namon nga himuslan ang mga kahimusan nga ginhimo sang Dios nga magahatag sini nga mga pagpakamaayo. Ang mga manugbalhag sini nga magasin malipay sa pagbulig sa imo.

[Nota]

[Retrato sa pahina 4, 5]

Ang nabilin nga mga tripulante nagsalig nga tumanon ni Shackleton ang iya saad nga salbaron sila

[Credit Line]

© CORBIS

[Retrato sa pahina 6]

“Mahal pa kamo sa madamo nga maya”