Nagapamunga Bala ang Kamatuoran sa Imo mga Ginatudluan?

ANG nagsiling ang pamatan-on nga si Eric nga indi na niya luyag mangin Saksi ni Jehova, ginsubuan gid ang iya mga ginikanan. Wala gid nila mamutikan ang mga pagbag-o sa iya. Sang bata pa si Eric, nagpakigbahin sia sa pangpamilya nga pagtuon sa Biblia, nagtambong sa Cristianong mga miting, kag nagbantala upod sa kongregasyon. Daw yara man sa iya ang kamatuoran. Apang karon nga naghalin na sia sa ila puluy-an, narealisar sang iya mga ginikanan nga ang kamatuoran sang Biblia wala gali magtudok sa iya. Nakibot gid sila sa sini kag nagbatyag sila sing kapaslawan.

Amo man sini nga kasakit ang nabatyagan sang iban sang hinali lang nga nag-untat sa pagtuon ang ila ginatudluan sa Biblia. Sa amo nga mga tion, masami nila ginapamangkot ang ila kaugalingon, ‘Ngaa wala ko ini matalupangdan?’ Bueno, antes matabo ang espirituwal nga kalamidad, posible bala matalupangdan kon nagapamunga ang kamatuoran sa mga ginatudluan naton? Gani, paano naton mapat-od nga nagapanghikot ang kamatuoran sa aton kag sa mga ginatudluan naton? Ginbuligan kita ni Jesus nga masabat ini nga mga pamangkot paagi sa iya pamilyar nga parabola tuhoy sa manugsab-ug.

Ang Kamatuoran Dapat Makalab-ot sa Tagipusuon

“Ang binhi amo ang pulong sang Dios,” siling ni Jesus. “Tuhoy sa mga [ginsab-ug] sa maayong duta, ini amo sila nga, sa tapos makabati sang pulong nga may maminatud-on kag maayo nga tagipusuon, nagahupot sini kag nagapamunga nga may pagbatas.” (Lucas 8:​11, 15) Gani, ang kamatuoran sang Ginharian dapat anay manggamot sa malaragwayon nga tagipusuon sang aton mga ginatudluan antes ini magapamunga. Si Jesus nagpasalig sa aton nga kaangay sang maayong binhi sa maayong duta, kon ang kamatuoran sang Dios makalab-ot sa maayong tagipusuon, gilayon ini nga magalambo kag magapamunga. Ano ang dapat naton paabuton?

Dapat naton talupangdon ang mga kinaiya sang tagipusuon, indi ang nagua nga panagway lamang. Ang pagsunodsunod lamang sa rutina sang pagsimba wala pirme nagapakita kon ano gid ang yara sa tagipusuon sang isa. (Jeremias 17:​9, 10; Mateo 15:​7-9) Kinahanglan tan-awon naton ang nasulod nga pagkatawo. Dapat nga may maathag nga pagbag-o sa mga handum, motibo, kag mga prioridad sang tawo. Dapat nga ginapalambo sang indibiduwal ang bag-o nga personalidad nga nahisuno sa kabubut-on sang Dios. (Efeso 4:​20-​24) Sa pag-ilustrar: Nagsiling si Pablo nga sang nabatian sang mga taga-Tesalonica ang maayong balita, ginbaton dayon nila ini subong pulong sang Dios. Apang ang pagbatas, katutom, kag gugma nga ginpakita nila sang ulihi nagpamatuod nga ang kamatuoran “nagapanghikot man sa [ila].”​—⁠1 Tesalonica 2:​13, 14; 3:6.

Siempre, madayag gid man sa ulihi kon ano ang yara sa tagipusuon sang estudyante paagi sa iya paggawi, kaangay sang ginhimo ni Eric. (Marcos 7:​21, 22; Santiago 1:​14, 15) Sing makapasubo, sa tion nga madayag ang malain nga mga kinaiya sa mga paggawi sang isa ka tawo, ayhan indi na sia mabuligan. Gani, ang hangkat amo ang pagtinguha nga hibaluon ang espesipiko nga mga kaluyahon antes ini mangin kasandaran sa espirituwal. Kinahanglan mabasa naton ang malaragwayon nga tagipusuon. Paano?

Magtuon kay Jesus

Siempre, mabasa sing sibu ni Jesus ang mga tagipusuon. (Mateo 12:25) Indi naton mahimo ina.  Apang, ginpakita niya nga sarang man naton mahantop ang mga handum, motibo, kag mga prioridad sang isa ka tawo. Subong nga ang isa ka doktor nagagamit sing nanuhaytuhay nga pamaagi sa pagsayasat kon bala may balatian sa tagipusuon ang isa ka pasyente, gingamit man ni Jesus ang Pulong sang Dios agod ‘sag-ubon’ kag ipadayag ang natago nga “mga hunahuna kag mga tinutuyo sang tagipusuon.”​​—⁠Hulubaton 20:⁠5; Hebreo 4:⁠12.

Halimbawa, isa ka bes ginbuligan ni Jesus si Pedro nga talupangdon ang isa ka kaluyahon nga nangin kasandaran sang ulihi. Nahibaluan ni Jesus nga ginahigugma sia ni Pedro. Ang matuod, bag-o lang gintulin ni Jesus kay Pedro ang “mga yabi sang ginharian.” (Mateo 16:13-​19) Apang, nahibaluan man ni Jesus nga ginapuntariya ni Satanas ang mga apostoles. Sa ulihi, ipiton gid sila agod magkompromiso. Nahantop ni Jesus nga maluya ang pagtuo sang iban nga mga disipulo. Gani wala sia magpangalag-ag sa pagpatalupangod sa ila kon ano ang dapat nila pauswagon. Binagbinaga kon paano niya ini ginpakighambal sa ila.

Ang Mateo 16:21 nagasiling: “Gikan sadtong tion ginsugdan ni Jesucristo nga ipakita sa iya mga disipulo nga kinahanglan sia . . . mag-antos . . . kag mapatay.” Talupangda nga wala lamang ginhambal kundi ginpakita man sa ila ni Jesus kon ano gid ang matabo sa iya. Mahimo gid nga gingamit niya ang mga teksto sa Biblia, kaangay sa Salmo 22:14-​18 ukon Isaias 53:10-​12, nga nagapakita nga ang Mesias kinahanglan mag-antos kag mapatay. Kon ano man, paagi sa pagbasa ukon pagkutlo sing direkta gikan sa Kasulatan, ginhatagan ni Jesus si Pedro kag ang iban pa sing kahigayunan nga magsabat sing tinagipusuon. Paano nila tamdon ang paghingabot sa palaabuton?

Sing makapakibot, bisan pa nakilala si Pedro nga maisog kag makugi, ang iya padasudaso nga sabat sa sining higayon nagpadayag sing isa ka serioso nga sayop sa iya pagtamod. “Mangin mainayuhon sa imo kaugalingon, Ginuo,” siling niya, “indi gid ini matabo sa imo.” Maathag nga sayop ang panghunahuna ni Pedro, kay subong sang ginsiling ni Jesus, naghunahuna si Pedro, ‘indi sang mga hunahuna nga iya sang Dios, kundi iya sang mga tawo’​​—⁠isa ka serioso nga sayop nga mahimo magdul-ong sa makahalalit nga mga resulta. Nian, ano ang ginhimo ni Jesus? Sa tapos masabdong si Pedro, si Jesus nagsiling sa iya kag sa iban pa nga disipulo: “Kon ang bisan sin-o luyag magsunod sa akon, isikway niya ang iya kaugalingon kag pas-anon ang iya usok sang pag-antos kag padayon nga magsunod sa akon.” Ginapatuhuyan ang Salmo 49:8 kag 62:​12, mainayuhon nga ginpahanumdom niya sila nga ang ila walay katapusan nga paglaum nasandig sa Dios kag indi sa tawo nga indi makaluwas.​​—⁠Mateo 16:22-​28.

Bisan pa nga sang ulihi si Pedro umalagi nga nagpadaug sa kahadlok kag ginpanghiwala si Jesus sing makatlo, pat-od nga ini kag ang iban pa nga paghambalanay naghanda sa iya nga makapasag-uli gilayon sa espirituwal. (Juan 21:15-​19) Mga 50 ka adlaw lamang sang ulihi, masidla nga ginpamatud-an ni Pedro ang pagkabanhaw ni Jesus sa atubang sang kadam-an. Sa masunod nga mga semana, bulan, kag mga tuig, maisog nga gin-atubang niya ang sulitsulit nga pagdakop, pagbunal, kag pagkabilanggo, nga nagapakita sing talalupangdon nga halimbawa sang walay kahadlok nga integridad.​​—⁠Binuhatan 2:​14-​36; 4:​18-​21; 5:​29-​32, 40-​42; 12:​3-5.

Ano ang matun-an naton sa sini? Natalupangdan mo bala kon paano ginhantop kag ginbuyagyag ni Jesus kon ano ang yara sa tagipusuon ni Pedro? Una, nagpili sia sing nagakaigo nga  mga kasulatan agod ipatalupangod kay Pedro ang iya espesipiko nga kaluyahon. Dayon, ginhatagan niya sing kahigayunan si Pedro nga magsabat sing tinagipusuon. Sa katapusan, naglaygay pa gid sia gikan sa Kasulatan agod buligan si Pedro nga tadlungon ang iya panghunahuna kag mga balatyagon. Mahimo magahunahuna ka nga indi mo masarangan ini nga paagi sang pagtudlo, apang binagbinagon naton ang duha ka eksperiensia nga nagailustrar kon paano ang paghanda kag pagsalig kay Jehova makabulig sa kay bisan sin-o sa aton nga sundon ang halimbawa ni Jesus.

Pagpadayag Kon Ano ang Yara sa Tagipusuon

Sang nahibal-an sang isa ka Cristianong amay nga ang iya duha ka anak nga lalaki nga yara sa una kag ikaduha nga grado nagkuha sing dulse sa lamesa sang manunudlo, ginsugilanon niya sila kag nangatarungan upod sa ila. Sa baylo nga pasapayanan lamang ini subong inosente kag binatabata nga pagkasutil, ang amay nagsiling, “Gintinguhaan ko nga hantupon sa ila tagipusuon kon ano ang nagbuyok sa ila sa paghimo sining malain nga butang.”

Ginhambalan sang amay ang mga bata nga dumdumon kon ano ang natabo kay Acan, nga gin-asoy sa Josue kapitulo 7. Nahangpan gilayon sang mga bata ang punto kag gin-ako ang ila sala. Ginatublag na sila sang ila konsiensia. Gani ginpabasa sang amay sa ila ang Efeso 4:​28 nga nagasiling: “Ang kawatan dili na magpangawat, kundi sa baylo magpangabudlay sia sing lakas . . . agod nga may mahatag sia sa bisan sin-o nga nagakinahanglan.” Ginpatudok pa gid sang amay ang Makasulatanhon nga laygay paagi sa pagsugo sa kabataan nga baklan sing dulse ang manunudlo.

“Kon may mahantop kami nga malain nga mga motibo, ginatinguhaan namon nga dulaon ini,” siling sang amay, “kag buslan sing maayo kag putli nga mga motibo paagi sa pagpangatarungan sa kabataan.” Bangod ginailog sining mga ginikanan si Jesus kon nagatudlo sa ila kabataan, nangin maayo gid ang mga resulta sa pagligad sang tion. Sang ulihi, ang duha nila ka anak gin-agda nga mangin katapo sang talapuanan sang ulong-talatapan sa Brooklyn Bethel, sa diin ang isa nagaalagad gihapon pagligad sang 25 ka tuig.

Talupangda kon paano ginbuligan sang isa pa ka Cristiano ang iya ginatudluan sa Biblia. Ang iya ginatudluan nagatambong na sa mga miting kag nagapakigbahin sa ministeryo kag luyag na magpabawtismo. Apang, daw mas nagasalig gid sia sa iya kaugalingon sangsa kay Jehova. “Subong dalaga, wala niya marealisar nga nangin tuman sia ka independiente,” hinumdom sang Saksi. “Nabalaka ako nga basi magluya sia sa pisikal ukon sa espirituwal.”

Gani nagpangatarungan ang Saksi upod sa estudyante pasad sa Mateo 6:​33, nga nagapalig-on sa iya nga tadlungon ang iya mga prioridad, unahon ang Ginharian, kag magsalig nga himuon ni Jehova ang pinakamaayo. Ginprangka niya sia: “Nabudlayan ka bala kon kaisa magsalig sa iban, lakip kay Jehova, bangod naanad ka nga magkinaugalingon?” Gin-ako sang estudyante nga halos wala na sia nagapangamuyo. Nian, ginpalig-on sia sang manugbantala nga sundon ang laygay sa Salmo 55:22 nga ihaboy ang iya lulan kay Jehova, kay ginapasalig kita sang 1 Pedro 5:7 nga ‘nagaulikid sia sa imo.’ Natandog sini ang iya tagipusuon. Ang Saksi nagsiling, “Isa yadto sang pila lang ka beses nga nakita ko sia nga naghibi.”

Tuguti nga Magpanghikot sing Dalayon ang Kamatuoran sa Imo

Makalilipay gid makita nga nagauswag sa kamatuoran sang Biblia ang mga ginatudluan naton. Apang, agod magmadinalag-on kita sa pagbulig sa iban, dapat mangin maayo man kita nga  halimbawa. (Judas 22, 23) Kinahanglan naton tanan ‘panikasugan ang aton kaugalingon nga kaluwasan nga may kahadlok kag pagkurog.’ (Filipos 2:12) Nagalakip ini sing tayuyon nga pag-usisa sa aton tagipusuon sa kapawa sang Kasulatan, nga ginapangita ang mga panimuot, handum, kag balatyagon nga kinahanglan tadlungon.​​—⁠2 Pedro 1:⁠19.

Halimbawa, nagtahaw bala ang imo kakugi sa Cristianong mga hilikuton sining karon lang? Kon amo, ngaa? Mahimo nga ang isa ka kabangdanan amo nga nagasalig ka sing tuman sa imo kaugalingon. Paano mo mahibaluan kon amo sini? Basaha ang Hageo 1:​2-​11, kag binagbinaga sing tampad ang pagpangatarungan ni Jehova sa ginpapauli nga mga Judiyo. Nian pamangkuta ang imo kaugalingon: ‘Nabalaka gid bala ako sing tuman sa pinansial nga kasiguruhan kag materyal nga kasulhayan? Nagasalig gid bala ako nga tatapon ni Jehova ang akon pamilya kon unahon ko ang espirituwal nga mga butang? Ukon nagabatyag bala ako nga dapat ko unahon ang akon kaayuhan?’ Kon kinahanglan tadlungon ang imo pagtamod ukon balatyagon, indi magduhaduha sa paghimo sini. Ang Makasulatanhon nga laygay subong sang makita sa Mateo 6:​25-​33, Lucas 12:13-​21, kag 1 Timoteo 6:​6-​12, nagaaman sing sadsaran para sa timbang nga pagtamod sa materyal nga mga kinahanglanon kag mga pagkabutang, pagtamod nga nagapasalig sing padayon nga pagpakamaayo ni Jehova.​—⁠Malaquias 3:⁠10.

Serioso nga butang ining bunayag nga pag-usisa sa kaugalingon. Mahimo mabudlay batunon ang espesipiko nga mga kaluyahon nga ginapatalupangod sa aton. Apang, kon mahigugmaon nga buligan mo ang imo bata, ang imo ginatudluan sa Biblia, ukon bisan ang imo kaugalingon​—⁠bisan pa daw personal ini ukon sensitibo nga butang⁠—⁠ayhan ginahimo mo ang una nga tikang sa pagluwas sa iya ukon sa imo kabuhi.​​—⁠Galacia 6:1.

Apang, ano kon daw wala sing maayo nga mga resulta ang imo mga panikasog? Indi dayon mag-untat. Ang pagtadlong sa di-himpit nga tagipusuon mahimo nga isa ka sensitibo, nagakinahanglan sing madamo nga tion, kag kon kaisa makapalaslaw nga panikasog. Apang makapaladya man ini.

Si Eric, nga ginsambit kaina, nakamarasmas gid man sang ulihi kag liwat nga “naglakat sa kamatuoran.” (2 Juan 4) “Nagbalik ako kay Jehova sang marealisar ko ang akon nawasi,” siling niya. Sa bulig sang iya mga ginikanan, si Eric matutom na karon nga nagaalagad sa Dios. Bisan pa naugot sia anay sa sulitsulit nga pagpanikasog sang iya mga ginikanan agod nga usisaon niya ang iya tagipusuon, ginaapresyar gid niya karon ang ila ginhimo. “Dalayawon gid ang akon mga ginikanan,” siling niya. “Wala gid mag-ugdaw ang ila gugma sa akon.”

Ang pagpasilak sing kapawa sang Pulong sang Dios sa tagipusuon sang mga ginatudluan naton isa ka pagpakita sing mahigugmaon nga kaayo. (Salmo 141:5) Padayon nga usisaa ang tagipusuon sang imo kabataan kag sang imo mga ginatudluan sa Biblia agod mapamatud-an mo kon bala ginakabuhi gid nila ang bag-o nga Cristianong personalidad. Tuguti nga magpanghikot sing dalayon ang kamatuoran sa iban kag sa imo paagi sa ‘paggamit sing matadlong sang pulong sang kamatuoran.’​​—⁠2 Timoteo 2:⁠15.

[Retrato sa pahina 29]

Ang mga pulong ni Jesus nagpadayag sing kaluyahon ni Pedro

[Retrato sa pahina 31]

Gamita ang Biblia sa pagpadayag kon ano ang yara sa tagipusuon