“Padayon Kamo nga Magbantay”

SANG dumaan nga tion, may mga manugbantay sang ganhaan sa mga gawang sang siudad kag templo kag kon kaisa, sa mga puertahan sang pribado nga mga puluy-an. Wala labot nga ginapat-od nila nga sirado ang mga gawang kon gab-i, nagaguardia man sila. Isa ini ka mabug-at nga salabton kay ang kaluwasan sang siudad nagadepende sa ila maabtik nga pagpaandam sa mga tawo tuhoy sa nagahilapit nga katalagman.

Pamilyar si Jesucristo sa katungdanan sang mga manugbantay sang gawang ukon ganhaan. Isa ka bes, ginpaanggid niya ang iya mga disipulo sa mga manugbantay sang ganhaan kag ginpalig-on sila nga padayon nga bantayan ang katapusan sang Judiyong sistema sang mga butang. Sia nagsiling: “Magpabilin kamo nga nagabantay, magpabilin kamo nga nagamata, kay wala kamo makahibalo kon san-o ang gintalana nga tion. Kaangay ini sa isa ka tawo nga naglakbay sa malayo nga nagbiya sang iya balay kag . . . nagsugo sa manugbantay sang ganhaan nga magpadayon sa pagbantay. Busa padayon kamo nga magbantay, kay wala kamo makahibalo kon san-o maabot ang agalon sang balay.”​​—⁠Marcos 13:33-​35.

Sing kaanggid, sa kapin sa 125 ka tuig na karon, ginpaalinton sining magasin nga Ang Lalantawan, ang pagpalig-on ni Jesus nga “padayon kamo nga magbantay.” Paano? Subong sang nasulat sa pahina 2 sining magasin, “Ginabantayan sini ang mga hitabo sa kalibutan samtang ginatuman sini ang tagna sa Biblia. Ginapaumpawan sini ang tanan nga katawhan sing maayong balita nga sa dili madugay laglagon sang Ginharian sang Dios ang mga nagapigos sa ila mga isigkatawo kag himuon sini ang duta nga isa ka paraiso.” Ang Lalantawan amo ang ginapanagtag sing pinakalapnag nga relihioso nga magasin sa bug-os nga kalibutan nga may sirkulasyon nga kapin sa 26,000,000 ka kopya sa 150 ka lenguahe. Paagi sini, ang mga Saksi ni Jehova, kaangay sang mga manugbantay sang ganhaan sang una, nagapalig-on sa mga tawo bisan diin nga ‘magpabilin nga nagamata’ sa espirituwal bangod ang Agalon, si Jesucristo, magabalik na kag magahukom sa sining sistema sang mga butang.​​—⁠Marcos 13:​26, 37.