‘Pagkasapo sa Isa ka Mutya nga may Daku nga Balor’
‘Pagkasapo sa Isa ka Mutya nga may Daku nga Balor’
“Ang ginharian sang mga langit amo ang tulumuron nga ginapanikasugan sang mga tawo, kag ginaagaw ini sang mga nagapanikasog.”—MATEO 11:12.
1, 2. (a) Anong tumalagsahon nga kinaiya ang ginlaragway ni Jesus sa isa niya ka parabola tuhoy sa Ginharian? (b) Ano ang ginsiling ni Jesus sa iya parabola tuhoy sa mutya nga may daku nga balor?
MAY yara bala isa ka butang nga ginapabaloran mo gid amo nga handa ka nga isakripisyo ang tanan mo nga ginapanag-iyahan agod maangkon ini? Bisan pa magsiling ang mga tawo nga determinado sila sa pagpanikasog sa pila ka tulumuron—kuarta, kabantugan, gahom, ukon posisyon—tumalagsahon gid sa isa ka tawo nga makasapo sing isa ka butang nga tuman ka bilidhon amo nga handa niya isakripisyo ang tanan para sa sini. Ginpatuhuyan ni Jesucristo ining tumalagsahon apang dalayawon nga kinaiya sa isa sang iya makapahunahuna nga mga parabola tuhoy sa Ginharian sang Dios.
2 Isa ini ka parabola, ukon ilustrasyon, nga ginsaysay ni Jesus sa iya lamang mga disipulo, tuhoy sa mutya ukon perlas nga may daku nga balor. Amo ini ang ginsiling ni Jesus: “Ang ginharian sang langit kaangay sang isa ka nagalakbay nga manugpatikang nga nagpangita sing maayong mga mutya. Sang masapwan niya ang isa ka mutya nga may daku nga balor, naglakat sia kag ginbaligya gilayon ang tanan niya nga ginapanag-iyahan kag ginbakal ini.” (Mateo 13:36, 45, 46) Ano ang luyag itudlo ni Jesus sa iya mga tagpalamati sa sining ilustrasyon? Kag paano kita makabenepisyo sa mga pinamulong ni Jesus?
Daku nga Balor sang mga Mutya
3. Ngaa malahalon gid ang maayong mga mutya sang dumaan nga tion?
3 Kutob pa sang dumaan nga tion, ang mga mutya ginapabaloran na subong dekorasyon. Ang isa ka reperensia nagsiling nga suno sa isa ka Romano nga iskolar nga si Pliny the Elder, ang mga mutya amo anay ang “nagapangibabaw sa malahalon nga mga butang.” Indi kaangay sang bulawan, pilak, ukon iban pa nga mga hiyas, ang mutya ginapatubas sang buhi nga mga tinuga. Madamo sing nakahibalo nga may pila ka sahi sang talaba nga kon masudlan gani sing isa ka butang, halimbawa sing balas, nagaresulta ini sa mutya paagi sa amat-amat nga pagputos sini sang nacre sa balas. Sang dumaan nga tion, ang pinakamaayo nga mga perlas masami ginakuha sa Dagat nga Mapula, sa Persian Gulf, kag sa Indian Ocean—malayo sa pungsod sang Israel. Amo ini ang rason kon ngaa si Jesus nagpamulong tuhoy sa “isa ka nagalakbay nga manugpatikang nga nagpangita sing maayong mga mutya.” Agod makakita sing malahalon gid nga mga mutya, daku gid nga panikasog ang nadalahig.
4. Ano ang pinakaimportante nga leksion sa parabola ni Jesus tuhoy sa nagalakbay nga manugpatikang?
4 Bisan pa mahal gid ang bili sang maayong mga mutya halin pa sang una, maathag nga indi ang presyo sini ang pinakaimportante nga leksion sa parabola ni Jesus. Sa sining parabola, wala lamang ginpaanggid ni Jesus ang Ginharian sang Dios sa isa ka mutya nga may daku nga balor; gintalupangod man niya ang “isa ka nagalakbay nga manugpatikang nga nagpangita sing maayong mga mutya” kag sa iya ginhimo sang nakasapo sia sing isa sini. Indi kaangay sang isa ka ordinaryo nga negosyante, ang isa ka nagalakbay nga manugpatikang sang mutya matawag sadto anay nga eksperto, isa nga mausisaon ukon mauti sa paghibalo kon ano ang pinasahi nga perlas. Makilala niya ang tunay nga mutya kag indi sia malimbungan sang ginatanyag nga mapigaw nga klase ukon peke nga perlas.
5, 6. (a) Ano ang talalupangdon gid sa manugpatikang sa parabola ni Jesus? (b) Ano ang ginapakita sang parabola sang natago nga bahandi tuhoy sa nagalakbay nga manugpatikang?
5 May isa pa ka butang nga talalupangdon sa sini nga manugpatikang. Ang isa ka kinaandan nga manugpatikang mahimo magbulubanta anay sang balor sang mutya kon ibaligya agod mahibaluan niya kon pila ang iya ibayad sa sini agod makaganansia. Mahimo man niya binagbinagon anay kon bala may mabakal sa sini nga sahi sang mutya agod mabaligya niya ini gilayon. Kon sa aton pa, mas interesado sia nga makaganansia gilayon, indi sa pagpanag-iya sang mutya. Apang ang manugpatikang sa parabola ni Jesus indi amo sini. Indi sia interesado sa ganansia. Sa katunayan, handa niya isakripisyo “ang tanan niya nga ginapanag-iyahan”—mahimo ang tanan niya nga pagkabutang—agod maangkon ang madugay na niya nga ginapangita.
6 Sa pagtamod sang madamo nga manugpatikang, indi maalamon ang ginhimo sining tawo sa parabola ni Jesus. Indi magrisgo sing subong sini ang isa ka tuso nga negosyante. Apang ang manugpatikang sa parabola ni Jesus may tuhay nga mga prinsipio. Ang iya natigayon, indi pinansial nga bentaha, kundi ang kalipay kag kaayawan sa pagpanag-iya sing isa ka butang nga tuman gid ka bilidhon. Ining punto nangin maathag sa kaanggid nga ilustrasyon nga ginhatag ni Jesus. Nagsiling sia: “Ang ginharian sang langit kaangay sang isa ka bahandi nga natago sa uma, nga nakita sang isa ka tawo kag gintago; kag bangod sa kalipay naglakat sia kag ginbaligya ang mga butang nga ginapanag-iyahan niya kag ginbakal yadto nga uma.” (Mateo 13:44) Huo, ang kalipay bangod sa pagkatukib kag pagpanag-iya sang bahandi nagpahulag gid sa tawo nga ibaylo ang tanan niya nga ginapanag-iyahan. May mga tawo bala nga kaangay sini karon? May yara bala bahandi nga takus sa sini nga sakripisyo?
Ang mga Nag-apresyar sa Daku nga Balor
7. Paano ginpakita ni Jesus nga gin-apresyar gid niya ang daku nga balor sang Ginharian?
7 Sang ginasugid ni Jesus ang iya parabola, nagapamulong sia tuhoy sa “ginharian sang langit.” Gin-apresyar gid niya mismo ang daku nga balor sang Ginharian. Ginapamatud-an gid ini sang mga kasaysayan sa Ebanghelyo. Pagkatapos sang iya bawtismo sang 29 C.E., “ginsugdan ni Jesus ang pagbantala kag pagsiling: ‘Maghinulsol kamo, kay ang ginharian sang mga langit malapit na.’” Sa sulod sang tatlo ka tuig kag tunga, gintudluan niya ang kadam-an tuhoy sa Ginharian. Ginlatas niya ang bug-os nga pungsod, “naglibot sia sa mga siudad kag mga minuro, nga nagabantala kag nagawali sing maayong balita sang ginharian sang Dios.”—Mateo 4:17; Lucas 8:1.
8. Ano ang ginhimo ni Jesus agod ipasundayag kon ano ang pagahimuon sang Ginharian?
8 Paagi sa paghimo sing madamo nga milagro sa bug-os nga pungsod—lakip na ang pagbulong sa mga may balatian, pagpakaon sa mga ginagutom, pagpatinong sa bagyo, bisan gani sa pagbanhaw sa mga patay—ginpasundayag man ni Jesus kon ano ang pagahimuon sang Ginharian sang Dios. (Mateo 14:14-21; Marcos 4:37-39; Lucas 7:11-17) Sang ulihi, ginpamatud-an niya ang iya pagkamainunungon sa Dios kag sa Ginharian paagi sa paghatag sang iya kabuhi, pagkapatay subong isa ka martir sa usok sang pag-antos. Subong nga kinabubut-on nga ginhatag sang nagalakbay nga manugpatikang ang tanan niya nga ginapanag-iyahan para sa “mutya nga may daku nga balor,” si Jesus nagkabuhi kag napatay para sa Ginharian.—Juan 18:37.
9. Anong tumalagsahon nga kinaiya ang nakita sa una nga mga disipulo ni Jesus?
9 Wala lamang ginsentro ni Jesus ang iya kabuhi sa Ginharian kundi gintipon man niya ang magamay nga grupo sang mga sumulunod. Mga indibiduwal sila nga nag-apresyar man sa daku nga balor sang Ginharian. Lakip sa ila amo si Andres, nga isa anay ka disipulo ni Juan Bautista. Sang mabatian ang testimonya ni Juan nga si Jesus amo “ang Kordero sang Dios,” si Andres kag ang isa pa ka disipulo ni Juan, mahimo nga isa sa mga anak ni Zebedeo nga Juan man ang ngalan, naganyat gilayon sa pagsunod kay Jesus kag nangin mga tumuluo. Apang kapin pa ang iya ginhimo. Nagkadto gilayon si Andres sa iya utod nga si Simon kag ginsugiran sia: “Nakita namon ang Mesias.” Wala magdugay pagkatapos sini, si Simon (nga nakilal-an sang ulihi nga Cefas, ukon Pedro) subong man si Felipe kag ang iya abyan nga si Natanael nagkilala man kay Jesus subong Mesias. Sa katunayan, si Natanael nakasiling tuhoy kay Jesus: “Ikaw ang Anak sang Dios, ikaw ang Hari sang Israel.”—Juan 1:35-49.
Napahulag sa Pagpanghikot
10. Ano ang reaksion sang mga disipulo sang nag-abot si Jesus kag gintawag sila pagligad sang pila ka tion pagkatapos sang una nila nga pagkitaay?
10 Ang kakunyag nga nabatyagan nanday Andres, Pedro, Juan, kag sang iban pa sang nakilal-an nila ang Mesias mahimo mapaanggid sa nabatyagan sang nagalakbay nga manugpatikang sang nasapwan niya ang mutya nga may daku nga balor. Ano ang himuon nila karon? Wala sing madamo nga ginasugid ang mga Ebanghelyo tuhoy sa masunod nga ginhimo nila pagkatapos sang una nila nga pagkitaay ni Jesus. Mahimo nga ang kalabanan sa ila nagbalik sa naandan nila nga pangabuhi. Apang, pagligad sang mga anom ka bulan tubtob mga isa ka tuig, nakigkita liwat si Jesus kanday Andres, Pedro, Juan, kag sa utod ni Juan nga si Santiago sa ila negosyo nga pagpangisda sa Dagat sang Galilea. * Pagkakita sa ila, si Jesus nagsiling: “Magsunod kamo sa akon, kag himuon ko kamo nga mga mangingisda sang mga tawo.” Ano ang ila reaksion? Ang rekord ni Mateo nagasiling tuhoy kanday Pedro kag Andres: “Ginbayaan nila sa gilayon ang mga pukot, kag nagsunod sa iya.” Tuhoy naman kanday Santiago kag Juan, aton mabasa: “Ginbayaan nila sa gilayon ang sakayan kag ang ila amay, kag nagsunod sa iya.” Ang rekord ni Lucas nagsiling pa nga ila “ginbayaan ang tanan nga butang kag nagsunod sa iya.”—Mateo 4:18-22; Lucas 5:1-11.
11. Ano mahimo ang rason sang paghulag gilayon sang mga disipulo sang gintawag sila ni Jesus?
11 Padasudaso lang bala ang desisyon sang mga disipulo? Indi gid! Bisan pa nagbalik sila sa negosyo nga pagpangisda sang ila pamilya pagkatapos sang una nila nga pagkitaay ni Jesus, wala sing duhaduha nga nagtudok gid sa ila tagipusuon kag hunahuna ang ila nakita kag nabatian sa sina nga pagkitaay. Ang pagligad sang halos isa ka tuig mahimo naghatag sa ila sing madamo nga tion sa pagpamalandong tuhoy sini. Karon nag-abot na ang tion sa pagdesisyon. Mangin kaangay bala sila sang nagalakbay nga manugpatikang nga napahulag gid ang tagipusuon sang matukiban niya ang bilidhon katama nga mutya, amo nga, subong sa ginsiling ni Jesus, ‘naglakat sia kag gilayon’ nga ginhimo ang dapat niya himuon agod mabakal ini nga mutya? Huo. Napahulag gid ang ila tagipusuon sa ila nakita kag nabatian. Nakita nila nga tion na agod maghulag. Busa, suno sa ginasiling sang kasaysayan, wala sila nagpangalag-ag sa pagbiya sang tanan nila nga pagkabutang kag nangin mga sumulunod ni Jesus.
12, 13. (a) Paano naghulag ang pila nga nakabati kay Jesus? (b) Ano ang ginsiling ni Jesus tuhoy sa iya matutom nga mga disipulo, kag ano ang ginapahangop sang iya mga pulong?
12 Daku gid ang kinatuhayan sining mga matutom sa iban nga ginsambit sang ulihi sa mga kasaysayan sa Ebanghelyo! Madamo sa mga gin-ayo ukon ginpakaon ni Jesus ang basta na lamang naglakat kag nagpadayon sa ila kaugalingon nga pangabuhi. (Lucas 17:17, 18; Juan 6:26) Ang iban nagpamalibad pa gani sang gin-agda sila ni Jesus nga mangin iya sumulunod. (Lucas 9:59-62) Sa kabaliskaran, si Jesus nagsiling sang ulihi tuhoy sa mga matutom: “Kutob sang mga adlaw ni Juan Bautista tubtob karon ang ginharian sang mga langit amo ang tulumuron nga ginapanikasugan sang mga tawo, kag ginaagaw ini sang mga nagapanikasog.”—Mateo 11:12.
13 “Ginapanikasugan” kag “nagapanikasog”—ano ang ginapahangop sining mga termino? Tuhoy sa Griegong berbo nga ginhalinan sining mga ekspresyon, ang Vine’s Expository Dictionary of Old and New Testament Words nagasiling: “Ang berbo nagapahangop sing masupog nga pagpaninguha.” Kag tuhoy sa sining bersikulo, ang iskolar sa Biblia nga si Heinrich Meyer nagsiling: “Ginalaragway sini ang maukod, di-mapunggan nga paghimud-os kag paghimulat sa manug-abot nga Mesianikong ginharian . . . Tuman kaukod kag kapagsik (indi na kampante kag mahulaton) ang interes sa ginharian.” Kaangay sang isa ka nagalakbay nga manugpatikang, nakilala gilayon sang pila ka indibiduwal kon ano ang tunay nga bilidhon, kag handa sila sa pagsakripisyo sang tanan nila nga ginapanag-iyahan tungod sa Ginharian.—Mateo 19:27, 28; Filipos 3:8.
Ang Iban Nag-upod sa Pagpangita
14. Paano ginhanda ni Jesus ang mga apostoles sa pagbantala sing Ginharian, kag ano ang nangin resulta?
14 Samtang nagapadayon si Jesus sa iya pagministeryo, ginhanas kag ginbuligan niya ang iban nga pangitaon ang Ginharian. Una nagpili sia sing 12 sa iya mga disipulo kag gintangdo sila subong mga apostoles, ukon iya mga pinadala. Ginhatagan sila ni Jesus sing detalyado nga mga instruksion kon paano himuon ang ila ministeryo subong man sing mga paandam tuhoy sa mga hangkat kag mga kabudlayan nga ila atubangon. (Mateo 10:1-42; Lucas 6:12-16) Sa nagsunod nga mga duha ka tuig, gin-updan nila si Jesus sa iya pagbantala sa bug-os nga pungsod, kag sa amo nangin suod sila sa iya. Nabatian nila ang iya mga pulong, nasaksihan ang iya gamhanan nga mga buhat, kag nakita ang iya personal nga halimbawa. (Mateo 13:16, 17) Walay duhaduha nga ini tanan nagtandog gid sing tudok sa ila, tubtob sa punto nga kaangay sang nagalakbay nga manugpatikang, makugihon kag bug-os tagipusuon nila nga ginpangita ang Ginharian.
15. Ano ang ginsiling ni Jesus nga dapat mangin matuod nga rason sang pagkalipay sang iya mga sumulunod?
15 Dugang pa sa 12 ka apostoles, si Jesus “nagtangdo sing kapituan pa kag ginpadala sila sing tagduhaduha sa una niya sa tagsa ka siudad kag duog nga iya kadtuan.” Ginsugiran man niya sila tuhoy sa mga pagtilaw kag mga kabudlayan nga ila atubangon sa ulihi kag ginsugo sila nga sugiran ang mga tawo: “Ang ginharian sang Dios malapit na sa inyo.” (Lucas 10:1-12) Sang nagbalik ang 70, nalipay gid sila kag nagreport kay Jesus: “Ginuo, bisan pa ang mga demonyo nagpasakop sa amon paagi sa paggamit sang imo ngalan.” Apang mahimo nakibot gid sila sang ginsiling ni Jesus nga daku pa nga kalipay ang nagahulat sa ila bangod sang ila kakugi para sa Ginharian. Ginsugiran niya sila: “Indi kamo magkalipay sa sini, nga napasakop sa inyo ang mga espiritu, apang magkalipay bangod ang inyo mga ngalan nasulat na sa mga langit.”—Lucas 10:17, 20.
16, 17. (a) Ano ang ginsugid ni Jesus sa iya matutom nga mga apostoles sa ulihi nga gab-i nga magkaupod sila? (b) Ano nga kalipay kag pasalig ang nabatyagan sang mga apostoles bangod sang mga pulong ni Jesus?
16 Sa katapusan, sa ulihi nga gab-i nga nakaupod ni Jesus ang mga apostoles, sang Nisan 14, 33 C.E., ginsugdan niya ang gintawag sang ulihi nga Panihapon sang Ginuo kag ginsugo sila nga saulugon ini nga okasyon. Sadto nga gab-i, ginsugiran ni Jesus ang 11 nga nabilin: “Gin-unungan ninyo ako sa akon mga pagtilaw; kag nagapakigkatipan ako sa inyo, subong nga ang akon Amay nagpakigkatipan sa akon, para sa isa ka ginharian, agod magkaon kag mag-inom kamo sa akon latok sa akon ginharian, kag maglingkod sa mga trono sa paghukom sa napulog-duha ka tribo sang Israel.”—Lucas 22:19, 20, 28-30.
17 Daw ano gid nga kalipay ang mahimo nabatyagan sang mga apostoles sang nabatian nila ining mga pulong ni Jesus! Ginhatagan sila sing labing mataas nga kadungganan kag pribilehiyo nga matigayon sang isa ka tawo. (Mateo 7:13, 14; 1 Pedro 2:9) Kaangay sang nagalakbay nga manugpatikang, daku ang ginbiyaan nila agod sundon si Jesus sa pagpangita sa Ginharian. Karon ginpasalig sila nga ang ila mga pagsakripisyo indi walay pulos.
18. Sin-o pa luwas sa 11 ka apostoles ang magabenepisyo sa ulihi sa Ginharian?
18 Indi lamang ang mga apostoles nga kaupod ni Jesus sadto nga gab-i ang makabenepisyo sa Ginharian. Kabubut-on ni Jehova nga ang kabug-usan nga 144,000 mangin bahin sang katipan sang Ginharian subong mga masigkamanuggahom ni Jesucristo sa mahimayaon nga langitnon nga Ginharian. Dugang pa, nakita ni apostol Juan sa palanan-awon ang “isa ka dakung kadam-an, nga wala sing tawo nga makaisip, . . . nga nagatindog sa atubangan sang trono kag sang Kordero, . . . nga nagasiling: ‘Ang kaluwasan utang namon sa amon Dios, nga nagalingkod sa trono, kag sa Kordero.’” Sila amo ang dutan-on nga mga sakop sang Ginharian. *—Bugna 7:9, 10; 14:1, 4.
19, 20. (a) Anong kahigayunan ang bukas sa mga tawo sang tanan nga kapungsuran? (b) Anong pamangkot ang binagbinagon sa masunod nga artikulo?
19 Wala madugay antes magkayab si Jesus sa langit, ginsugo niya ang iya matutom nga mga sumulunod: “Busa lakat kamo kag maghimo sing mga disipulo sa mga tawo sang tanan nga kapungsuran, nga nagabawtismo sa ila sa ngalan sang Amay kag sang Anak kag sang balaan nga espiritu, nagatudlo sa ila nga tumanon ang tanan nga butang nga ginsugo ko sa inyo. Kag, yari karon! ako kaupod ninyo sa tanan nga adlaw tubtob sa katapusan sang sistema sang mga butang.” (Mateo 28:19, 20) Busa, mangin mga disipulo ni Jesucristo ang mga tawo gikan sa tanan nga kapungsuran. Panikasugan man nila ang Ginharian—langitnon man ukon dutan-on ang ila padya—subong sang ginhimo sang nagalakbay nga manugpatikang sa maayong mutya.
20 Ginpakita sang mga pulong ni Jesus nga ang buluhaton nga paghimo sing mga disipulo magapadayon tubtob sa “katapusan sang sistema sang mga butang.” Ti sa aton panahon, may yara bala gihapon mga indibiduwal kaangay sang nagalakbay nga manugpatikang, nga handa sa pagsakripisyo sang tanan nila nga ginapanag-iyahan sa pagpangita sa Ginharian sang Dios? Binagbinagon ini nga pamangkot sa masunod nga artikulo.
[Mga nota]
^ par. 10 Mahimo nga nagsunod si Juan nga anak ni Zebedeo kay Jesus kag nakasaksi sa pila ka butang nga iya ginhimo pagkatapos sang ila una nga pagkitaay, amo nga maathag katama ang rekord ni Juan sa sini sa iya Ebanghelyo. (Juan, kapitulo 2-5) Walay sapayan, nagbalik sia sa negosyo nga pagpangisda sang iya pamilya sa sulod sang pila ka tion antes sia gin-agda ni Jesus.
^ par. 18 Para sa dugang pa nga detalye, tan-awa ang kapitulo 10 sang libro nga Ang Ihibalo nga Nagadul-ong sa Kabuhi nga Walay Katapusan, nga ginbalhag sang mga Saksi ni Jehova.
Mapaathag Mo Bala?
• Ano ang importante nga leksion sa parabola tuhoy sa nagalakbay nga manugpatikang?
• Paano ginpakita ni Jesus ang iya apresasyon sa daku nga balor sang Ginharian?
• Ano ang rason ngaa naghulag gilayon sanday Andres, Pedro, Juan kag ang iban pa sang gintawag sila ni Jesus?
• Anong dalayawon nga kahigayunan ang bukas sa mga tawo sang tanan nga kapungsuran?
[Mga Pamangkot sa Pagtinuon]
[Retrato sa pahina 10]
‘Ginbayaan nila ang tanan nila nga pagkabutang kag nagsunod kay Jesus’
[Retrato sa pahina 12]
Antes magkayab sa langit, ginsugo ni Jesus ang iya mga sumulunod nga maghimo sing mga disipulo
