Ipabugal Ninyo nga mga Cristiano Kamo!

“Sia nga nagapabugal, ipabugal niya si Jehova.”​—⁠1 CORINTO 1:31.

1. Ano ang maathag nga panimuot sang mga tawo tuhoy sa relihion?

ANG isa ka komentarista sa mga hublag sang relihion sining karon lang nagkomento tuhoy sa pagtamod sang mga tawo sa ila pagtuluuhan. Nagpaathag sia: “Ang pinakadaku nga pagbag-o sa relihion sa karon indi ang relihion mismo kundi ang pagtamod sang mga miembro sini.” Ginapaathag niya nga ang mga tawo “indi luyag magsakdag sa mga hublag sang ila relihion.” Nagsiling sia nga madamo nga tawo, “ang nagatuo sa Dios . . . ; wala lang sila nagasapak sa iya.”

2. (a) Ngaa indi katingalahan nga may di-pagsapak sa espirituwal? (b) Ano nga katalagman ang ginatuga sang di-pagsapak sa matuod nga mga Cristiano?

² Wala matingala ang mga estudyante sang Biblia sa sining di-pagsapak. (Lucas 18:8) Kag tuhoy sa mga relihion sa kabug-usan, inang di-pagsapak ginapaabot na nga daan. Madugay na nga ginapatalang kag ginapalugaw-an sang butig nga relihion ang katawhan. (Bugna 17:​15, 16) Apang, para sa matuod nga mga Cristiano makatalagam gid ang lapnag nga pagkasalimpapaw kag ang kakulang sing kakugi. Malain gid ang aton madangatan kon patumbayaan naton ang aton pagtuo kag dulaon ang aton kasidla sa pag-alagad sa Dios kag sa kamatuoran sa Biblia. Si Jesus nagpaandam tuhoy sa pagkaalabaab sang ginpaandaman niya ang unang siglo nga mga Cristiano sa Laodicea: “Indi ka mabugnaw ukon mainit. Luyag ko kuntani nga mabugnaw ka ukon mainit. . . . Maalabaab ka.”​—⁠Bugna 3:15-18.

Paghantop Kon Sin-o Kita

3. Ano ang dapat ipabugal sang mga Cristiano?

³ Agod mapakigbatuan ang di-pagsapak sa espirituwal, dapat mahangpan gid sang mga Cristiano kon sin-o sila, kag dapat malipay sila bangod Cristiano sila. Subong mga alagad ni Jehova kag mga disipulo ni Cristo, nahibaluan naton kon sin-o kita paagi sa Biblia. Samtang aktibo kita nga nagapakigbahin sa pagbantala sang “maayong balita” sa iban, mga “saksi” kita ni Jehova, “mga masigkamanugpangabudlay sang Dios.” (Isaias 43:10; 1 Corinto 3:⁠9; Mateo 24:14) Mga katawhan kita nga ‘nagahigugmaanay.’ (Juan 13:34) Ang matuod nga mga Cristiano mga indibiduwal nga “paagi sa paggamit nahanas ang ila mga ikasarang sa paghantop nga makilala ang husto kag sayop.” (Hebreo 5:14) “Mga sulo [kita] sa kalibutan.” (Filipos 2:15) Ginatinguhaan naton nga ‘mahuptan ang aton maayo nga paggawi sa tunga sang mga pungsod.’​​—⁠1 Pedro 2:​12; 2 Pedro 3:​11, 14.

4. Paano mahibaluan sang isa ka sumilimba ni Jehova kon sa ano indi sila bahin?

⁴ Nahibaluan man sang matuod nga mga sumilimba ni Jehova kon sa ano indi sila bahin. “Indi sila bahin sang kalibutan,” subong nga ang ila Lider, si Jesucristo, indi bahin sang kalibutan. (Juan 17:16) Padayon sila nga napain gikan sa “mga pungsod,” nga ‘ginadulman sa ila painuino, kag nahamulag sa kabuhi nga iya sang Dios.’ (Efeso 4:​17, 18) Bilang resulta, ang mga sumulunod ni Jesus ‘nagasikway sang pagkadidiosnon kag kalibutanon nga mga handum kag nagakabuhi nga may kaligdong sa hunahuna kag  pagkamatarong kag diosnon nga debosyon sa tunga sining karon nga sistema sang mga butang.’​—⁠Tito 2:12.

5. Ano ang ginapahangop sang laygay nga ‘ipabugal si Jehova’?

⁵ Ang aton maathag nga pagtamod sa aton identidad kag sa aton kaangtanan sa Soberano nga Manuggahom sang uniberso nagapahulag sa aton nga ‘ipabugal si Jehova.’ (1 Corinto 1:31) Ano nga sahi ini sang pagpabugal? Subong matuod nga mga Cristiano, nalipay kita nga ang aton Dios amo si Jehova. Ginasunod naton ang laygay nga: “Ang isa nga nagapabugal sang iya kaugalingon magpabugal sang iya kaugalingon bangod sini gid nga butang, nga may paghantop sia kag may ihibalo tuhoy sa akon, nga ako si Jehova, ang Isa nga nagapakita sing mahigugmaon nga kaayo, katarungan kag pagkamatarong sa duta.” (Jeremias 9:24) “Nagapabugal” kita sa pribilehiyo nga nakilala naton ang Dios kag sa paggamit niya sa aton nga buligan ang iban.

Ang Hangkat

6. Ngaa ang pila nagabatyag nga makahalangkat ang paghupot sang isa ka maathag nga panan-aw sa ila identidad subong mga Cristiano?

⁶ Matuod, indi pirme mahapos nga huptan sing maathag ang aton panan-aw sa aton pinasahi nga identidad subong mga Cristiano. Nadumduman sang isa ka lamharon nga lalaki nga ginpadaku subong Cristiano nga nagluya sia sing makadali sa espirituwal: “Kon kaisa, indi ko na mahibaluan kon ngaa nangin Saksi ni Jehova ako. Halin pa sa pagkalapsag nga gintudluan ako sang kamatuoran. Sa pamatyag ko daw isa lamang ini sang dalagku kag ginabaton nga mga relihion.” Gintugutan sang iban nga maimpluwensiahan ang ila identidad sang kalingawan sa kalibutan, mass media, kag sang di-diosnon nga pagtamod sang kalibutan karon. (Efeso 2:​2, 3) Ang pila ka Cristiano nagapangduhaduha kon kaisa kag nagausisa liwat sang ila mga pagtamod kag mga tulumuron.

7. (a) Ano nga sahi sang pag-usisa sa kaugalingon ang nagakaigo sa mga alagad sang Dios? (b) Ano ang posible nga katalagman sa sini?

⁷ Sayop bala nga usisaon naton sing maayo ang aton kaugalingon? Indi. Mahimo madumduman mo nga ginpalig-on ni apostol Pablo ang mga Cristiano nga usisaon pirme ang ila kaugalingon: “Padayon ninyo nga tilawan kon yara kamo sa pagtuo, padayon ninyo nga pamatud-an kon ano gid kamo.” (2 Corinto 13:5) Ginapalig-on diri sang apostol ang mga Cristiano nga manikasog nga hibaluon sing maayo kag sing balanse ang bisan ano nga mga kaluyahon sa espirituwal nga mahimo magluntad, upod ang tulumuron nga tadlungon ini. Dapat pat-uron sang isa ka Cristiano, sa pagtilaw kon bala yara sia sa pagtuo, nga ang iya mga pinamulong kag mga buhat nahisanto sa iya ginatuuhan. Apang, kon magsayop sa paghimo sini, mangin walay pulos kag malaglagon pa gani sa espirituwal ang pag-usisa naton sang aton kaugalingon agod hibaluon ang aton “identidad” ukon pangitaon ang mga sabat nga wala sing labot kay Jehova ukon sa Cristianong kongregasyon.⁠ * Indi gid naton luyag nga ‘malunod ang aton pagtuo’!​​—⁠1 Timoteo 1:⁠19.

Indi Naton Malikawan ang mga Hangkat

8, 9. (a) Paano ginpabutyag ni Moises ang iya pagpangduhaduha? (b) Ano ang sabat ni Jehova sa pagpangalag-ag ni Moises? (c) Ano ang epekto sa imo sang mga pasalig ni Jehova?

⁸ Dapat bala magbatyag ang mga Cristiano nga napaslawan bangod nagapangduhaduha sila sa ila kaugalingon kon kaisa? Indi gid! Sa pagkamatuod, sarang sila mapalugpayan kon mahibaluan nila nga ining mga balatyagon indi bag-o. Naeksperiensiahan man ini sang matutom nga mga saksi sang Dios sadto. Halimbawa, binagbinaga si Moises, nga nagpakita sing tumalagsahon nga pagtuo, pagkamainunungon, kag debosyon. Sang ginhatagan sia sing daw indi niya masarangan nga hilikuton, si Moises nagapangduhaduha nga namangkot: “Sin-o ako?” (Exodo 3:11) Maathag nga ang iya ginahunahuna amo nga, ‘Ordinaryo lang ako!’ ukon ‘Indi ako makasarang!’ Ang ginhalinan ni Moises mahimo nga nagpabatyag sa iya nga indi sangkol: Halin sia sa pungsod sang mga ulipon. Ginsikway sia sang mga Israelinhon. Indi sia maayo  nga humalambal. (Exodo 1:​13, 14; 2:​11-​14; 4:10) Manugbantay sia sang karnero, isa ka palamugnan nga ginakangil-aran sang mga Egiptohanon. (Genesis 46:34) Indi katingalahan nga nagbatyag sia nga indi sangkol agod mangin manughilway sang gin-ulipon nga katawhan sang Dios!

⁹ Ginpasalig ni Jehova si Moises paagi sa paghatag sing duha ka dalagku nga saad: “Ako mangin kaupod mo, kag ini amo ang tanda para sa imo nga ako ang nagpadala sa imo: Pagkatapos nga mapagua mo ang katawhan gikan sa Israel, alagaron ninyo ang matuod nga Dios sa sini nga bukid.” (Exodo 3:12) Ginsilingan sang Dios ang iya nagapangalag-ag nga alagad nga pirme Sia magaupod sa iya. Dugang pa, ginapakita ni Jehova nga luwason gid niya ang iya katawhan. Sa sulod sang mga siniglo, amo man sini nga pagsakdag ang ginsaad sang Dios. Halimbawa, paagi kay Moises, nagsiling sia sa pungsod sang Israel samtang manugsulod sila sa Ginsaad nga Duta: “Magpakaisog kamo kag magpakabakod. . . . Si Jehova nga inyo Dios amo ang nagaupod sa inyo. Indi gid niya kamo pagbayaan ukon pagpatumbayaan.” (Deuteronomio 31:6) Si Jehova nagpasalig man kay Josue: “Wala sing bisan sin-o nga makatindog sing malig-on sa atubangan mo sa bug-os mo nga kabuhi. . . . Magaupod ako sa imo. Indi ko ikaw pagpabay-an ni biyaan ka sing bug-os.” (Josue 1:5) Kag nagsaad sia sa mga Cristiano: “Indi ko gid kamo pagbiyaan ukon pagpatumbayaan.” (Hebreo 13:5) Dapat ipabugal gid naton nga kita mga Cristiano bangod sini nga pagsakdag!

10, 11. Paano nahuptan sang Levinhon nga si Asaf ang husto nga pagtamod sa importansia sang iya pag-alagad kay Jehova?

¹⁰ Mga lima ka siglo pagkatapos ni Moises, ang isa ka matutom nga Levinhon nga si Asaf nagsulat sing prangka sang iya mga pagpangduhaduha tuhoy sa balor sang pagpabilin sa matarong nga dalanon. Samtang ginapanikasugan niya nga alagaron ang Dios walay sapayan sang mga pagtilaw kag mga pagsulay, nakita ni Asaf nga nagagamhanan kag nagauswag pa gid ang mga nagatamay sa Dios. Paano naapektuhan si Asaf? “Apang ako, ang akon mga tiil diutayan lang makadanlog,” baton niya. “Ang akon mga tikang diutayan lang makadalin-as. Kay nangin mahisaon ako sa mga matinaastaason, sang nakita ko ang kalinong sang mga malauton.” Ginduhaduhaan niya ang importansia sang mangin sumilimba ni Jehova. “Sa pagkamatuod walay pulos nga gintinluan ko ang akon tagipusuon kag ginhinawan ang akon mga kamot sa pagkawalay sala,” hunahuna ni Asaf. “Kag ginsit-an ako sa bug-os nga adlaw.”​—⁠Salmo 73:​2, 3, 13, 14.

¹¹ Ano ang ginhimo ni Asaf sa sining makatulublag nga mga emosyon? Ginpanghiwala bala niya ini? Wala. Ginpangamuyo niya ini sa Dios, subong sang aton makita sa ika-73 nga Salmo. Ang nagpabag-o kay Asaf amo ang iya pagduaw sa templo. Samtang didto, narealisar niya nga ang debosyon sa Dios amo gihapon ang labing maayo nga dalanon. Bangod nagbaskog liwat ang iya apresasyon sa espirituwal, nahangpan niya nga ginadumtan ni Jehova ang kalautan kag sa nagakaigo nga tion silutan niya ang mga malauton. (Salmo 73:17-​19) Sang ulihi, ginpabakod ni Asaf ang iya apresasyon sa iya identidad subong alagad ni Jehova. Sia nagsiling sa Dios: “Kaupod mo ako pirme; ginakaptan  mo ang akon tuo nga kamot. Paagi sa imo laygay tuytuyan mo ako, kag pagkatapos dalhon mo ako sa himaya.” (Salmo 73:​23, 24) Nalipay kag nangin kontento liwat si Asaf sa iya Dios.​—⁠Salmo 34:2.

Nahibaluan Gid Nila Kon Sin-o Sila

12, 13. Maghatag sing mga halimbawa sang mga karakter sa Biblia nga nagpabugal sang ila kaangtanan sa Dios.

¹² Ang isa ka paagi agod mapabakod ang aton apresasyon subong Cristiano amo ang pag-usisa kag pag-ilog sa pagtuo sang mainunungon nga mga sumilimba, nga walay sapayan sang kabudlayan, nagpabugal sang ila kaangtanan sa Dios. Binagbinaga si Jose, ang anak ni Jacob. Sa lamharon nga pangidaron, malimbungon sia nga ginbaligya subong ulipon kag gindala sa Egipto, ginatos ka kilometro palayo sa iya mahinadlukon sa Dios nga amay kag isa ka palibot nga tuhay gid sa iya puluy-an. Samtang yara sa Egipto, wala sia sing mapangayuan sang diosnon nga laygay, kag dapat niya atubangon ang makasululay nga mga kahimtangan nga magatilaw sang iya mga prinsipio kag pagsalig sa Dios. Apang, nagpanikasog gid sia nga mahuptan ang iya identidad subong alagad sang Dios, kag nagpabilin sia nga matutom sa nahibaluan niya nga matarong. Ginpabugal niya nga sumilimba sia ni Jehova bisan sa mabudlay nga palibot, kag wala sia magpangalag-ag sa pagpabutyag sang iya ginabatyag.​—⁠Genesis 39:7-10.

¹³ Walo ka siglo sang ulihi, ang isa ka ginbihag nga Israelinhon nga bata nga babayi nga nangin ulipon ni Heneral Naaman sang Siria wala man malipat nga sumilimba sia ni Jehova. Sang may kahigayunan, masidla sia nga nanaksi para kay Jehova sang ginpakilala niya si Eliseo subong manalagna sang matuod nga Dios. (2 Hari 5:​1-⁠19) Mga tinuig pagkatapos sini, bisan sa malaut nga palibot, ginpatuman ni Hari Josias ang mga pagbag-o sa relihion, ginpakay-o ang  templo sang Dios, kag ginpasag-uli ang pungsod sa pagsimba kay Jehova. Ginpabugal niya ang iya pagtuluuhan kag pagsimba. (2 Cronica, kapitulo 34, 35) Si Daniel kag ang iya tatlo ka Hebreo nga kaupod sa Babilonia wala malipat nga mga alagad sila ni Jehova, kag bisan sa idalom sang mga pag-ipit kag pagsulay, ginhuptan nila ang ila integridad. Maathag nga ginapabugal nila nga mga alagad sila ni Jehova.​—⁠Daniel 1:8-20.

Ipabugal nga Cristiano Ikaw

14, 15. Ano ang nadalahig sa pagpabugal naton nga kita Cristiano?

¹⁴ Ining mga alagad sang Dios madinalag-on bangod ginpalambo nila ang isa ka mapuslanon nga sahi sang bugal sa ila tindog sa Dios. Kamusta kita karon? Ano ang nadalahig sa pagpabugal nga kita Cristiano?

¹⁵ Una, nagalakip ini sa isa ka madalom nga apresasyon nga mangin isa sa katawhan nga may ngalan ni Jehova, nga iya ginapakamaayo kag ginkahamut-an. Kilala gid sang Dios kon sin-o ang para iya. Si apostol Pablo, nga nagkabuhi sa isa ka dag-on nga may kagubot sa relihion, nagsulat: “Kilala ni Jehova kon sin-o ang para sa iya.” (2 Timoteo 2:​19; Numeros 16:5) Ginapabugal ni Jehova yadtong “para sa iya.” Sia nagsiling: “Sia nga nagatandog sa inyo nagatandog sang tawotawo sang akon mata.” (Zacarias 2:8) Maathag nga ginahigugma kita ni Jehova. Busa ang aton kaangtanan sa iya dapat napasad sa aton madalom nga gugma sa iya. Si Pablo nagsiling: “Kon ginahigugma sang bisan sin-o ang Dios, ginakilala niya ining isa.”​—⁠1 Corinto 8:3.

16, 17. Ngaa nga ang mga Cristiano, lamharon kag tigulang, nagapabugal sang ila espirituwal nga palanublion?

¹⁶ Ang mga lamharon nga ginpadaku subong mga Saksi ni Jehova dapat mag-usisa man kon bala ang ila Cristianong identidad nangin mabakod bangod sang ila suod nga kaangtanan sa Dios. Indi sila makasandig sa pagtuo lamang sang ila mga ginikanan. Tuhoy sa tagsa ka alagad sang Dios, si Pablo nagsulat: “Sa iya kaugalingon nga agalon nagatindog ukon nagakapukan sia.” Sa amo, si Pablo nagpadayon: “Ang tagsatagsa sa aton magahatag sing husay para sa iya kaugalingon sa Dios.” (Roma 14:​4, 12) Maathag, ang pakulahaw nga pagbaton sang pagsimba sang imo mga ginikanan kay Jehova indi makasakdag sang isa ka suod, madugay nga kaangtanan kay Jehova.

¹⁷ Sa bug-os nga maragtas, nagbulosbulos ang madamo nga mga saksi ni Jehova. Nagsugod ini gikan sa matutom nga si Abel​—⁠mga 6,000 ka tuig sang una​—⁠pakadto sa “dakung kadam-an” sang moderno nga mga Saksi kag padayon sa kadam-an sang mga sumilimba ni Jehova nga makatigayon sing walay katapusan nga palaabuton. (Bugna 7:⁠9; Hebreo 11:4) Lakip kita sa bag-o nga grupo sining malawig nga linya sang matutom nga mga sumilimba. May tumalagsahon gid kita nga espirituwal nga palanublion!

18. Paano ang aton mga prinsipio kag mga talaksan nagapatuhay sa aton sa kalibutan?

¹⁸ Ang aton Cristianong identidad nagalakip man sang mga prinsipio, kinaiya, talaksan, kag mga batasan nga nagapakilala sa aton subong mga Cristiano. Ini amo ang “Dalan,” ang lamang madinalag-on nga dalanon sang pagkabuhi kag pagpahamuot sa Dios. (Binuhatan 9:⁠2; Efeso 4:​22-​24) Mga Cristiano, “pat-ura ninyo ang tanan nga butang” kag “hupti sing malig-on ang maayo”! (1 Tesalonica 5:21) Nahangpan gid naton ang daku nga kinatuhayan sang Cristianismo kag sang kalibutan nga napahilayo sa Dios. Maathag nga ginapatuhay ni Jehova ang matuod nga pagsimba sa butig. Paagi sa iya manalagna nga si Malaquias, sia nagsiling: “Makita ninyo ang kinatuhayan sa ulot sang isa nga matarong  kag sang isa nga malauton, sa ulot sang isa nga nagaalagad sa Dios kag sang isa nga wala nagaalagad sa iya.”​—⁠Malaquias 3:18.

19. Ano ang indi gid matabo sa matuod nga mga Cristiano?

¹⁹ Bangod ang pagpabugal kay Jehova tuman gid ka importante sa sining magamo nga kalibutan, ano ang makabulig sa aton nga mahuptan ang mapuslanon nga pagpabugal sa aton Dios kag sa aton Cristianong identidad? Ang mabuligon nga mga panugda masapwan sa masunod nga artikulo. Samtang ginabinagbinag ini, isa ka butang ang imo mapat-od: Ang matuod nga mga Cristiano indi gid apektado sang di-pagsapak sa Dios.

[Nota]

Madumduman Mo Bala?

• Paano ang mga Cristiano ‘makapabugal kay Jehova’?

• Ano ang matun-an mo gikan sa mga halimbawa nanday Moises kag Asaf?

• Sanday sin-o nga mga karakter sa Biblia ang nagpabugal sang ila pag-alagad sa Dios?

• Ano ang nadalahig sa pagpabugal sang aton Cristianong identidad?

[Mga Pamangkot sa Pagtinuon]

[Retrato sa pahina 14]

May tion nga nagpangduhaduha man si Moises

[Mga retrato sa pahina 15]

Madamo nga mga alagad ni Jehova sang una ang nagapabugal gid sang ila identidad