Mga Milagro—Matuod Ukon Indi?

NATALUPANGDAN dayon sang isa ka tawo ang mensahe sa bumper sticker sang isa ka nagalabay nga salakyan, “Nagakatabo ang mga Milagro​​—⁠Pamangkuta Lang ang mga Anghel.” Bisan isa sia ka relihioso nga tawo, nagaduhaduha sia kon ano ang kahulugan sini. Ang mensahe bala nagakahulugan nga nagapati ang drayber sa mga milagro? Ukon isa bala yadto ka makahalam-ot nga pagpahayag sang indi pagpati sa mga milagro kag mga anghel?

Mahimo mangin interesado ka sa ginsiling sang Aleman nga manunulat nga si Manfred Barthel: “Ang milagro isa ka tinaga nga nagapabahinbahin gilayon sa mga bumalasa sa duha ka magkatuhay nga opinyon.” Ang mga nagapati sa mga milagro kumbinsido nga nagakatabo ini kag ayhan masami nga nagakatabo.⁠ * Halimbawa, ginreport sining karon lang nga tinuig sa Gresya nga nangangkon ang mga nagapati nga may milagro kada bulan. Bangod sini ang obispo sang Greek Orthodox Church nagpaandam: “Ginakabig sang mga tumuluo nga daw tawo ang Dios, si Maria, kag ang mga santos. Indi sila dapat magpasobra.”

Sa iban naman nga pungsod, malaka lang ang nagapati sa mga milagro. Suno sa surbe sang Allensbach nga ginbalhag sa Alemanya sang 2002, 71 porsiento sang mga pumuluyo sini ang wala nagapati nga matuod ang mga milagro. Apang, lakip sa kubos sa un-tersia nga nagapati sa milagro, amo ang tatlo ka babayi nga nangangkon nga nakabaton sing mensahe gikan kay Birhen Maria. Pagligad sing pila ka bulan sa tapos nagpakita kuno sa ila si Maria​​—⁠nga ginaupdan sang mga anghel kag sang isa ka salampati​​—⁠nagreport ang pamantalaan sa Alemanya nga Westfalenpost: “Tubtob karon mga 50,000 ka peregrino, nga luyag mag-ayo, lakip ang mga mausisaon, ang interesado gid sa palanan-awon sang mga babayi.” Dugang pa nga 10,000 ang ginalauman nga magadugok sa minuro agod makakita man sing amo nga palanan-awon. Ang kaanggid nga mga pagpakita ni Birhen Maria ginasiling nga natabo sa Lourdes, Pransia, sang 1858, kag sa Fátima, Portugal, sang 1917.

Kamusta ang Di-Cristiano nga mga Relihion?

Ang pagpati sa mga milagro masapwan sa halos tanan nga relihion. Ginapaathag sang The Encyclopedia of Religion nga ang mga tagpasad sang Budhismo, Cristianismo, kag Islam may lainlain nga pagtamod sa mga milagro, apang nagsiling ini: “Ang maragtas sining mga relihion nagapakita gid nga ang mga milagro kag mga rekord sang mga milagro importante nga bahin sang relihioso nga pagpati sang tawo.” Ini nga reperensia nagsiling nga “si Buddha mismo nagahimo kon kaisa sing mga milagro.” Sang ulihi, sang ang “Budhismo ginpasad sa Tsina, ang mga misyonero sini masami nga nagpasundayag sang ila milagruso nga mga gahom.”

Sa tapos patuhuyan ang pila sadtong mga milagro kuno, ini nga ensiklopedia naghinakop: “Mahimo nga indi gilayon magpati ang isa sa  sining tanan nga sugilanon tuhoy sa milagro nga ginsaysay sang relihioso nga mga biograpo, apang pat-od gid nga ginpatuhaw ini sa tuyo nga himayaon si Buddha, nga nakahatag sing milagruso nga gahom sa iya makugi nga mga sumulunod.” Ini man nga reperensia nagsiling tuhoy sa Islam: “Kalabanan sang Islam nga komunidad nagapaabot pirme sing mga milagro. Sa mga tradisyon (hadīths) ginpakilala si Muhammad nga nagahimo sing mga milagro sa publiko sing madamong beses. . . . Bisan patay na sila, ginapatihan nga ang mga santos nagahimo gihapon sing mga milagro sa ila lulubngan para sa mga matutom, kag makugi nga ginapangayo sang mga tawo ang ila bulig.”

Kamusta ang mga Milagro sa Cristianismo?

Madamo sa nagapati sa Cristianismo ang may lainlain nga opinyon. Nagapati ang pila nga matuod ang ginreport sang Biblia nga mga milagro nga ginhimo ni Jesucristo ukon sang mga alagad sang Dios sang wala pa si Cristo. Apang madamo ang nagaugyon sa Protestante nga Repormador nga si Martin Luther. Ang The Encyclopedia of Religion nagsiling tuhoy sa iya: “Sanday Luther kag Calvin lunsay nagsulat nga natapos na ang dag-on sang mga milagro kag indi na ini dapat paabuton.” Ang Katoliko nga Simbahan nagapadayon sa pagpati sa mga milagro apang “wala nagatinguha nga ipaathag kon paano ini nagakatabo,” siling sini nga reperensia. Apang, “ang intelektuwal nga mga Protestante nagpati nga ang Cristianismo halos napatuhoy lamang sa moralidad kag nga ang Dios ukon ang mga espiritu wala nagapakig-angot ukon nagaimpluwensia sa kabuhi sang tawo.”

Ang iban nga nagapangangkon nga Cristiano, lakip ang pila ka mga klero, nagaduhaduha kon matuod ang mga milagro sa Biblia. Isa ka halimbawa amo ang rekord tuhoy sa nagadabdab nga sapinit nga ginrekord sa Biblia sa Exodo 3:​1-5. Ang libro nga What the Bible Really Says nagapaathag  nga madamo nga Aleman nga teologo ang wala nagapati nga ini literal nga hitabo sang isa ka milagro. Sa baylo, ginpatpat nila ini subong “isa ka simbulo sang nasulod nga pagpakig-away ni Moises sa daw tunukon kag nagadabdab nga pagpaantos sang konsiensia.” Ang libro nagsiling pa: “Ang kalayo mahimo man hangpon nga mga bulak nga hinali nga namukadkad sa kapawa sang presensia sang Dios.”

Mahimo nga indi ka makontento sini nga paathag. Gani, ano ang patihan mo? Realistiko bala patihan nga natabo gid ang mga milagro? Kamusta naman ang modernong adlaw nga mga milagro? Bangod indi man naton mapamangkot ang mga anghel, sin-o ang pamangkuton naton?

Ang Pagtamod Sang Biblia

Wala sing makapanghiwala nga nagreport ang Biblia nga sang una kon kaisa nagapasilabot ang Dios kag nagahimo sing mga buhat nga imposible sa tawo. Tuhoy sa iya, mabasa naton: “Ginpagua mo ang imo katawhan nga Israel gikan sa duta sang Egipto, paagi sa mga tanda kag mga milagro kag sa makusog nga kamot kag sa nauntay nga butkon kag sa daku nga kahaladlukan.” (Jeremias 32:⁠21) Handurawa ini, ang labing gamhanan nga pungsod sang adlaw ni Moises ginpaubos paagi sa napulo ka kalalat-an gikan sa Dios, lakip ang kamatayon sang iya panganay. Mga milagro gid yadto!​​—⁠Exodo, kapitulo 7 tubtob 14.

Mga siglo sang ulihi, ang apat ka manunulat sang Ebanghelyo naglaragway sang mga 35 ka milagro nga ginhimo ni Jesus. Sa pagkamatuod, mahantop mo sa ila mga pulong nga naghimo sia sing kapin nga milagro sangsa ila ginreport. Ini nga mga report matuod bala ukon indi?⁠ *​​—⁠Mateo 9:​35; Lucas 9:⁠11.

Kon matuod ang ginapangangkon sang Biblia nga amo ini ang matuod nga Pulong sang Dios​​—⁠nian may maathag ka nga rason nga magpati sa mga milagro nga ginasugid sini. Ginareport sing maathag sang Biblia nga natabo ang mga milagro sang una​​—⁠milagruso nga pagpang-ayo, pagbanhaw, kag iban pa​​—⁠apang prangka man nga ginapaathag sini nga yadtong mga milagro wala na nagakatabo. (Tan-awa ang kahon nga “Kon Ngaa ang mga Milagro Kaangay Sang Una Wala Na Nagakatabo,” sa pahina 4.) Gani nagakahulugan bala ini nga bisan ang mga nagapati nga matuod ang Biblia wala nagapati sa modernong adlaw nga mga milagro? Tuguti sa pagsabat ang masunod nga artikulo.

[Mga nota]

[Kahon sa pahina 4]

KON NGAA ANG MGA MILAGRO KAANGAY SANG UNA WALA NA NAGAKATABO

Nanuhaytuhay nga mga milagro ang ginhinambitan sa Biblia. (Exodo 7:​19-​21; 1 Hari 17:​1-7; 18:22-​38; 2 Hari 5:​1-​14; Mateo 8:​24-​27; Lucas 17:11-​19; Juan 2:​1-​11; 9:​1-7) Madamo sining mga milagro ang nagpakilala kay Jesus subong ang Mesias, kag nagpamatuod nga ginasakdag sia sang Dios. Ginpasundayag sang una nga mga sumulunod ni Jesus ang milagruso nga mga dulot, kaangay sa paghambal sing sarisari nga hambal kag paghantop sing inspirado nga mga pinamulong. (Binuhatan 2:​5-​12; 1 Corinto 12:28-​31) Ining milagruso nga mga dulot mapuslanon sa Cristianong kongregasyon sang nagasugod pa lang ini. Ngaa?

Kay man, diutay pa lang ang kopya sang Kasulatan. Sa masami, ang mga manggaranon lamang ang may mga linukot ukon mga libro. Sa pagano nga kadutaan, wala sing ihibalo tuhoy sa Biblia ukon sa Awtor sini nga si Jehova. Ang Cristianong panudlo ipaalinton lamang paagi sa hambal. Ang milagruso nga mga dulot mapuslanon sa pagpakita nga ginagamit sang Dios ang Cristianong kongregasyon.

Apang ginpaathag ni Pablo nga ini nga mga dulot magauntat kon indi na ini kinahanglanon. “Apang bisan pa may mga dulot nga pagpanagna, pagadulaon ini; bisan pa may mga hambal, magauntat ini; bisan pa may ihibalo, pagadulaon ini. Kay may diutay kita nga ihibalo kag nagapanagna kita sing diutay; apang kon ang kabug-usan mag-abot, ang diutay pagadulaon na.”​—⁠1 Corinto 13:8-10.

Karon, ang mga tawo may mga Biblia na, subong man mga konkordansia kag mga ensiklopedia. Kapin sa anom ka milyon ka hanas nga mga Cristiano ang nagabulig sa iban nga makatigayon sing ihibalo tuhoy sa Dios pasad sa Biblia. Busa, indi na kinahanglan ang mga milagro agod pamatud-an nga si Jesucristo amo ang gintangdo sang Dios nga Manluluwas ukon pamatud-an nga ginasakdag ni Jehova ang iya mga alagad.