Sin-o ang Magapakaon sa Kalibutan?

SUNO sa mga pagbanabana sang World Food Programme, isa ka ahensia sang Nasyones Unidas nga nagapangabudlay sa pagtapna sa gutom, 800 milyones ka tawo​​—⁠madamo sa ila mga bata​​—⁠ang malapit na mag-antos sing sobra nga gutom. Sining karon lang, ini nga ahensia nagsiling nga ang suporta kag igtalupangod sang madamong mauswagon nga mga pungsod nga mahimo kuntani ihinguyang sa paglubad sa sini nga problema gingamit sa iban nga mga problema, subong sang terorismo. Labi pa nga naglala ang problema bangod sang paglapnag sang makalalaton nga mga balatian. Ang Global School Feeding Report sang ahensia nagsiling tuhoy sa mga pungsod sa Aprika diin lapnag ang AIDS: “Ang bug-os nga kaliwatan sang mga ginikanan nagakalamatay. Masami nga kinahanglan buhion sang nailo nga mga kabataan ang ila kaugalingon, ang kalabanan sa ila wala sing ihibalo sa pagpanguma kag sa adlaw-adlaw nga pagkabuhi nga kinaandan na nga ginaliton sa masunod nga kaliwatan.”

Ginapangunahan sang World Food Programme ang programa sa pag-aman sing di-magkubos isa ka kalan-an kada adlaw sa mga eskwelahan. Ang katuyuan sini nga programa indi lamang agod tapnaon ang gutom kundi agod sugdan paagi sa regular nga edukasyon ang iban pa nga mga programa nga gindesinyo sa pagtapna sang HIV/AIDS sa mga pamatan-on.

Sa mga lugar diin ginsugdan na ini nga programa, ang mga kabataan nakabaton sing pagkaon, paghanas sa personal nga katinlo, kag iban pa nga bulig. Napanilagan man nga kon bag-uhon sang mga tawo ang ila paggawi, ang paglaton sang HIV/AIDS mabuhinan.

Makapasubo nga sa masami, wala malubad sing bug-os sang mga panikasog sang tawo ang problema. Apang ang Biblia makalulugpay nga nagasaad nahanungod sa isa ka permanente nga solusyon sa problema sa gutom. “May bugana nga uyas sa duta,” siling sang Salmo 72:16. Sa idalom sang Ginharian sang Dios, ang mga tawo makasiling tuhoy kay Jehova nga Dios: “Ginliso mo ang imo igtalupangod sa duta, agod hatagan mo ini sing kabuganaan . . . Ginhanda mo ang ila uyas, kay amo sini ang paghanda mo sa duta.”​​—⁠Salmo 65:9.

[Credit Line sang retrato sa pahina 32]

WFP/Y. Yuge