Ang Maayo nga Pagginawi ‘Nagapuni sa Panudlo sang Dios’
Ang Maayo nga Pagginawi ‘Nagapuni sa Panudlo sang Dios’
MAAYO gid magkanta ang pamatan-on nga si Maria nga taga-Kransnoyarsk, Rusya, amo nga ginpaentra sia sang iya maestra sa koro sang eskwelahan. Wala madugay pagkatapos sini, ginpalapitan sing matinahuron ni Maria ang isa sang iya mga manunudlo agod ipaathag nga indi niya luyag ambahon ang pila ka ambahanon. Ngaa? Bangod ang pag-amba sa mga ambahanon nga may relihioso nga kahulugan supak sa iya pasad sa Biblia nga mga pagpati. Nakibot sa sini ang maestra, ‘Ano ang malain sa paghimaya sa Dios sa ambahanon?’
Agod ipakita kon ngaa indi niya luyag mag-amba sing ambahanon tuhoy sa Trinidad nga Dios, ginbuksan ni Maria ang iya Biblia kag ginpaathag nga ang Dios kag si Jesucristo indi isa sa pagka-Dios kag ang balaan nga espiritu amo ang aktibo nga puersa sang Dios. (Mateo 26:39; Juan 14:28; Binuhatan 4:31) Panugiron ni Maria: “Wala maapektuhan ang akon kaangtanan sa akon maestra. Sa kabug-usan, maayo gid ang mga manunudlo sa amon eskwelahan. Luyag nila nga mangin bunayag kami.”
Sa bug-os nga tuig sang pag-eskwela, gintahod ang panindugan ni Maria sang iya mga manunudlo kag mga kaklase. Nagsiling si Maria: “Ginbuligan ako sang mga prinsipio sa Biblia. Sang pagsira sang klase, nakabaton ako sing pagpadungog para sa pagkabunayag kag pagkahim-ong, samtang ang akon mga ginikanan nakabaton sing opisyal nga sulat sang pagpasalamat sang eskwelahan bangod sang ila maayo nga pagpadaku sa akon.”
Nabawtismuhan si Maria sang Agosto 18, 2001. Nagsiling sia: “Nalipay ako nga maalagad ko ang dalayawon nga Dios nga si Jehova!” Ginasunod sang pamatan-on nga mga Saksi ni Jehova sa bug-os nga kalibutan ang pinamulong sa Tito 2:10, nga aton mabasa: ‘Punihan ang panudlo sang aton Manluluwas, ang Dios, sa tanan nga butang.’
[Retrato sa pahina 32]
Ang sulat sang pagpasalamat kag sertipiko sang kadungganan
[Retrato sa pahina 32]
Si Maria kag ang iya mga ginikanan sa tapos sia nabawtismuhan