“Matutom sa Idalom sang mga Pagtilaw”

SANG temprano sang Abril 1951, hinali nga ginsalakay sang gamhanan nga gobierno sang Sobyet ang isa ka inosente nga grupo sang mga Cristiano sa nakatundan nga Unyon Sobyet​​—⁠ang mga Saksi ni Jehova. Linibo ka pamilya​​—⁠lakip ang magamay nga kabataan, mga nagabusong, kag mga tigulang​​—⁠ang ginpasakay sa mga bagon para sa 20 ka adlaw nga makakalapoy nga biyahe sang tren pa Siberia. Gintapok sila sing permanente sa mabudlay kag dinumaan nga mga kahimtangan.

Sang Abril 2001, gintalupangod sa Moscow ang ika-50 nga anibersaryo sining maragtason nga hitabo paagi sa pagpagua sa isa ka video nga nagasaysay sang dinekada nga pagpigos sa mga Saksi ni Jehova sa anay Unyon Sobyet. Sa dokumentaryo, ginsaysay sang mga istoryador kag mga nakasaksi kon paano nakalampuwas kag nagdamo pa gani ang mga Saksi walay sapayan sang tuman nga pag-ipit.

Ining dokumentaryo, nga Faithful Under Trials​​—⁠Jehovah’s Witnesses in the Soviet Union, natan-aw na sang minilyon sa Rusya kag sa iban pa nga lugar kag gindayaw gid sang publiko sa kabilugan kag sang mga istoryador. Ang masunod amo ang duha ka komento sang Ruso nga mga iskolar nga nagapuyo sa duog nga ang kalabanan nga pamilya nga Saksi gintapok:

“Nalipay gid ako sa sining video. Nanamian ako pirme sa mga kaupod ninyo sa relihion, apang sang natan-aw ko ini, nagdugang pa gid ang akon pagdayaw sa inyo. Propesyonal gid ang video! Naluyagan ko ilabi na ang inyo paagi sa pagpakilala sa tagsa ka tawo subong indibiduwal. Bisan pa Ortodokso ako kag wala sing tuyo nga magbaylo sing relihion, nahamuot ako sa mga Saksi. Luyag ko nga may kopya ang amon talapuanan sining video. Nagdesisyon kami sang akon mga kaupod nga ipatan-aw ini sa amon mga estudyante kag ilakip ini sa kurikulum.”​​—⁠Propesor Sergei Nikolayevich Rubtsov, dekano sang mga manunudlo sang maragtas sa State Pedagogical University, Irkutsk, Russia.

“Ginakalipay ko ang paggua sining video. Kon nagahimo ka sing video tuhoy sa pagpamigos, mabudlay gid ini pirme isaysay sa lohiko nga paagi. Apang nahimo ninyo ini. Palihug dal-i pa ninyo ako sang inyo mga video.”​​—⁠Propesor Sergei Ilyich Kuznetsov, dekano sang mga manunudlo sang maragtas sa Irkutsk State University, Russia.

Ginaapresyar man sing tudok sang mga Saksi ni Jehova sa Siberia ang dokumentaryo. Ang masunod amo ang mga halimbawa sang ila mga reaksion:

“Sang nagakatabo ang mga hitabo nga ginpakita sa video, sayop nga impormasyon ang nabaton sang kadam-an sa Rusya tuhoy sa hilikuton sang mga Saksi ni Jehova. Apang sang natan-aw nila ang video, nahangpan nila nga ang aton organisasyon indi lamang isa ka sekta, subong sang ginhunahuna nila anay. Ang iban nga bag-o lang nangin Saksi nagsiling: ‘Daw indi namon mapatihan  nga nagasinalayo kag nagaobra kami kaupod sang Cristianong mga kauturan nga nagbatas sing tuman!’ Ang isa ka Saksi nagpabutyag sang iya handum nga mangin bug-os tion nga payunir nga ministro sang natan-aw niya ang video.”​​—⁠Anna Vovchuk, nga gintapok sa Siberia.

“Nagkurog ako sang nakita ko sa video ang sekreta nga nagapanuktok sa puertahan sang balay sang isa ka Saksi. Daw kaangay yadto sang pagpanuktok sa amon puertahan, kag nadumduman ko nga nagsiling si Nanay: ‘Basi may sunog.’ Apang ang video nagapahanumdom man sa akon nga madamo nga Saksi ang nag-antos sing kapin pa sangsa akon. Ining tanan nga impormasyon nagapabaskog kag nagapapagsik pa gid sa amon nga alagaron sing dalayon si Jehova.”​​—⁠Stepan Vovchuk, nga gintapok sa Siberia.

“Anak ako sang gintapok nga mga Saksi. Gani, abi ko madamo na ako sing nahibaluan tuhoy sadtong tion. Apang sang natan-aw ko ining video, narealisar ko nga halos wala ako sing nahibaluan. Nagahibi ako samtang nagapamati sa mga interbyu. Karon ang mga eksperiensia indi lamang mga sugilanon kundi matuod gid para sa akon. Ginpabaskog sang video ang akon kaangtanan sa Dios kag ginhanda ako sa pagbatas sa tanan nga kabudlayan sa palaabuton.”​​—⁠Vladimir Kovash, Irkutsk.

“Para sa akon, mas may puersa ang video sangsa naimprinta nga rekord. Sang nakita kag nabatian ko ang mga interbyu sa mga kauturan, pamatyag ko daw naagihan ko man ang ila inagihan. Ang halimbawa sang utod nga nagdibuho sang mga postcard para sa iya lamharon nga mga anak nga babayi samtang priso sia nagpahulag sa akon nga tinguhaan nga lab-uton ang tagipusuon sang akon kabataan sing mga kamatuoran sang Biblia. Salamat gid! Ining video nagpabatyag pa gid sa mga Saksi ni Jehova sa Rusya nga bahin sila sang bug-os kalibutan nga katawhan ni Jehova.”​​—⁠Tatyana Kalina, Irkutsk.

“Ang hurubaton nga, ‘Ang pagtan-aw sing makaisa mas maayo sangsa pagpamati sing isa ka gatos ka beses’ maaplikar gid sa sining video. Tuman gid ini kaathag, matuod, kag may kaangtanan gid sa amon! Kinahanglan mamensar ako sing madugay sa tapos ko matan-aw ini. Bangod sa video nabatyagan ko ang kabuhi sang gintapok nga mga Saksi. Kon ipaanggid ko karon ang akon mga kahimtangan sa ila, nabuligan ako nga tamdon sing tuhay ang amon mga problema.”​​—⁠Lidia Beda, Irkutsk.

Ang Faithful Under Trials ginpagua na sa 25 ka lenguahe kag ginabaton sing maayo sa bug-os nga kalibutan. * Ang bug-os nga dokumentaryo ginpasalida sang mga estasyunan sang telebisyon sa St. Petersburg, Omsk, kag sa iban pa nga mga siudad sa Russia, subong man sa mga siudad sang Ukraine nga Vynnytsya, Kerch, Melitopol kag sa rehiyon sang Lʹviv. Nakabaton man ini sing mga pagpadungog gikan sa mga nagausisa sang pelikula halin sa nanuhaytuhay nga pungsod.

Ang puersa sang mensahe sining dokumentaryo masapwan sa halimbawa sang linibo ka ordinaryo nga tawo nga nagpakita sing di-kinaandan nga kaisog kag espirituwal nga kusog bisan sa tinuig nga paghingabot. Ginpamatud-an gid sang mga Saksi ni Jehova sa Unyon Sobyet nga matutom sila bisan ginatilawan. Kon luyag mo matan-aw ining dokumentaryo, malipay ang mga Saksi ni Jehova sa pag-aman sini sa imo. Palihug kontaka ang isa sa ila sa inyo lugar.

[Nota]

[Credit Line sang retrato sa pahina 8]

Stalin: U.⁠S. Army photo

[Credit Line sang retrato sa pahina 9]

Stalin: U.⁠S. Army photo