Ang Okasyon nga Dumdumon

ANO nga okasyon ini? Amo ini ang kamatayon sang isa ka tawo nga napatay halos 2,000 ka tuig na ang nagligad. “Ginhatag ko ang akon kalag, agod nga mabaton ko ini liwat,” siling niya. “Wala sing tawo nga nagkuha sini sa akon, kundi ginhatag ko ini sa akon kabubut-on.” (Juan 10:​17, 18) Ini nga tawo amo si Jesucristo.

Ginsugo ni Jesus ang iya mga sumulunod nga saulugon ang Memoryal sang iya mahalaron nga kamatayon. Ang okasyon gintawag man “ang panihapon sang Ginuo.” (1 Corinto 11:20) Ang Memoryal nga ginsugdan ni Jesus agod dumdumon ang iya kamatayon pagasaulugon sang mga Saksi ni Jehova kag sang ila mga abyan sa Huebes, Marso 24, 2005, pagtunod sang adlaw.

Ang isa ka pasad sa Biblia nga pamulongpulong magapaathag sang kahulugan sang tinapay nga wala sing tapay kag sang mapula nga alak nga gamiton sa okasyon. (Mateo 26:26-​28) Ang pamulongpulong magasabat man sa mga pamangkot subong sang: Daw ano kasunson dapat saulugon sang mga Cristiano ini nga okasyon? Sin-o ang dapat nga magapakig-ambit sa mga emblema nga tinapay kag alak? Sin-o ang makabenepisyo tungod sa kamatayon ni Jesus? Ining importante nga pagsaulog magabulig sa tanan nga maapresyar ang katuyuan sang kabuhi kag kamatayon ni Jesus.

Mainit ka nga ginaabiabi sa Memoryal sang kamatayon ni Jesus. Palihug pamangkuta ang mga Saksi ni Jehova sa inyo duog kon san-o kag sa diin ini hiwaton.