Mga Pamangkot Gikan sa mga Bumalasa

Ang pagkaon bala ni David kag sang iya mga tinawo sang mga tinapay sang presentasyon nagapakita nga sarang malapas ang kasuguan sang Dios sa idalom sang mabudlay nga mga kahimtangan nga indi masilutan?​​—⁠1 Samuel 21:​1-6.

Suno sa Levitico 24:​5-9, ang mga tinapay sang presentasyon nga ginaislan kada Inugpahuway ginatigana para kaunon sang mga saserdote. Ang prinsipio kon ngaa nagakaigo para sa mga saserdote nga kaunon ang mga tinapay amo nga balaan ini kag nangin pagkaon para sa mga nagahimo sing pag-alagad sa Dios​​—⁠ang mga saserdote. Ang paghatag sini sa ordinaryo nga manugpangabudlay ukon ang pagkaon sini para malingaw lamang sayop gid. Apang, ang saserdote nga si Ahimelec wala makasala sang ginpakaon niya ang tinapay sang presentasyon kay David kag sa iya mga tinawo.

Mahimo nga may pinasahi nga asaynment si David gikan kay Hari Saul. Gutom sia kag ang iya mga tinawo. Ginpat-od ni Ahimelec nga matinlo sila suno sa seremonya. Bisan pa sa estrikto nga paagi supak sa kasuguan ang pagkaon nila sang mga tinapay sang presentasyon, nahisanto naman ini sa panguna nga katuyuan sa paggamit sang tinapay sang presentasyon. Amo ini ang rason kon ngaa naghimo sing eksepsion si Ahimelec. Si Jesucristo mismo naggamit sining hitabo agod iilustrar ang pagkasayop sang estrikto gid nga pag-aplikar sa kasuguan sa Inugpahuway nga ginpatuman sang mga Fariseo suno sa ila interpretasyon sa sini.​​—⁠Mateo 12:​1-8.

Apang, ang nasambit na, wala nagakahulugan nga ang kasuguan sang Dios sarang malapas kon mangin mabudlay ang mga kahimtangan. Halimbawa, nag-utwas ang daw sa serioso nga kahimtangan sang ang mga hangaway sang mga Israelinhon nagpakig-away sa mga Filistinhon. Si Hari Saul nagsiling: “Pinakamalaut ang tawo nga nagakaon sing bisan ano nga kalan-on tubtob sa kahapunon kag tubtob makatimalos ako sa akon mga kaaway!” Ang Biblia nagasiling: “Ginlaglag nila sadto nga adlaw ang mga Filistinhon.” Kapoy gid kag gutom kaayo ang mga soldado bangod sa inaway, ‘kag ang katawhan nagpatay sang mga kasapatan sa duta kag nagkaon pati sang dugo.’ (1 Samuel 14:​24, 31-33) Nakasala sila batok kay Jehova paagi sa paglapas sa iya kasuguan sa dugo. Wala nahisanto ang ila ginbuhat sa lamang espesipiko nga paagi nga luyag sang Dios gamiton ang dugo, nga amo “sa paghimo sing katumbasan” para sa mga sala. (Levitico 17:10-​12; Genesis 9:​3, 4) Sing maluluy-on, ginbaton ni Jehova ang pinasahi nga mga halad para sa mga nakasala.​​—⁠1 Samuel 14:​34, 35.

Huo, ginapaabot ni Jehova nga tumanon naton ang iya mga kasuguan sa tanan nga kahimtangan. “Amo ini ang kahulugan sang gugma sa Dios,” siling ni apostol Juan, “nga sundon naton ang iya mga sugo.”​​—⁠1 Juan 5:3.

[Retrato sa pahina 30]

Ang bag-o nga mga tinapay sang presentasyon ginabutang sa sulod sang tabernakulo kada Inugpahuway